’Ua ha’amaita’i Melehizedeka ia Aberama, nā Walter Rane.

11–17 nō Novema.

Hebera 7-13

«’Ei tahu’a rahi nō te mau mea maitata’i a muri nei »

E taiʼo faʼahou ai ʼe e feruri ai ʼoutou i teie faʼanahoraʼa, e haʼapaʼo maitaʼi i te mau muhumuhuraʼa tā ʼoutou e fāriʼi nō niʼa i te mau tamariʼi tā ʼoutou e haʼapiʼi nei. E tauturu mai te Vārua ia ʼoutou ʼia ʼimi i te mau parau poroʼi nō rātou i roto i te Hebera 7–13.

E pāpa’i i tō ʼoutou mau mana’o

E ani ’ia fa’a’ite mai i te mana’o

E ani i te mau tamariʼi ’ia faʼaʼite mai i te mau mea tā rātou ʼe tō rātou mau ʼutuāfare i rave nō te haʼapiʼi i te ʼevanelia i roto i te ʼutuāfare. E ani ia rātou ʼia faʼaʼite mai i te tahi o tō rātou mau ’itera’a au-roa-hia nō niʼa i te haʼapiʼiraʼa mai i te ʼevanelia ʼe tō rātou ʼutuāfare.

Ha’api’i i te ha’api’ira’a tumu

Te mau tamari’i ’āpī a’e

Hebera 7:1-6

E nehenehe te autahuʼaraʼa e tauturu ia tātou nā roto i te mau rāveʼa huru rau.

E nehenehe te Hebera 7:1–6 e hōroʼa mai ia tātou te hōʼē rāveʼa nō te faʼaʼite atu i te mau tamariʼi te mau haʼamaitaʼiraʼa nō te autahuʼaraʼa.

Mau ’ohipara’a e nehenehe e rave

• E tātara haʼapoto noa ē o vai Aberahama, ʼe e faʼaʼohipa i muri iho i te Hebera 7:1–6 ʼe Te ʼĪritiraʼa a Iosepha Semita, Genese 14:36–40 (i roto i te Hiu o te Bibilia) nō te haʼapiʼi atu ʼe ʼua aufau Aberahama i te tuhaʼa ʼahuru ia Melehizedeka ra. E tātara atu ē ʼua mau Melehizedeka i te autahuʼaraʼa teitei aʼe, ʼoia hoʼi te mana o te Atua tei hōroʼahia i te taʼata nei i niʼa i te fenua, ʼe ʼua faʼaʼohipa ʼoia i te reira nō te haʼamaitaʼi ia Aberahama. E ʼoaʼoa paha te mau tamariʼi i te haʼuti i te ʼāʼamu nā roto i te mau tauihaʼa ʼōhie, mai te hōʼē kōrona ʼe te hōʼē vehi rata nō te tuhaʼa ʼahuru.

• E ani i te hōʼē taeaʼe tei mau i te autahuʼaraʼa a Aarona ʼe Melehizedeka e haere mai i roto i te pīha haʼapīʼiraʼa ʼe ’ia faʼaʼite i te mau tamariʼi nāhea tō rātou faʼaʼohiparaʼa i te autahuʼaraʼa nō te haʼamaitaʼi ia vetahi ʼē. E faʼaʼite i muri iho i te mau tamariʼi te mau hōhoʼa nō te mau ʼōroʼa ta’a ’ē nō te autahuʼaraʼa (nō te mau hiʼoraʼa, e hiʼo i te mau hōhoʼa 103–8 i roto i te Buka hōhoʼa nō te ʼEvanelia). E tauturu i te mau tamariʼi ʼia faʼataʼa mai e aha te autahuʼaraʼa tei tītauhia nō te ʼōroʼa tātaʼitahi ʼe e hōroʼa i taua hōhoʼa i te taʼata tei mau i te autahuʼaraʼa tano nō te tāpeʼa.

Hebera 11: 1-32

Te faʼaroʼo o te ti’aturira’a ïa i te mau mea ’aore e ʼite-mata-hia e tātou.

Noa atu ē eʼita e nehenehe ia rātou ʼia ʼite i te Metua i te Ao ra ʼe ’ia Iesu Mesia ʼaore rā ’ia ʼite i te tāʼātoʼaraʼa o te mau haʼamaitaʼiraʼa o te ʼevanelia, e nehenehe tā te mau tamariʼi tā ʼoutou e haʼapiʼi nei ’ia faʼatupu i te faʼaroʼo nā roto i te haʼapiʼiraʼa mai i te mau hiʼoraʼa i roto i te Hebera 11.

Te mau ’ohipara’a e nehenehe e rave

• E faʼaʼiteʼite i te hōʼē hōhoʼa nō Iesu. E tuʼu haere i roto i te piha e rave rahi mau taoʼa nō te faʼahōhoʼa i te mau tāpaʼo faʼaʼite ē e mea mau ʼoia noa atu eʼita e nehenehe ia tātou ʼia ʼite mata atu iāna (mai te mau pāpaʼiraʼa moʼa, te hōʼē hōhoʼa nō te ʼOrama Mātāmua, ʼe te hōʼē hōhoʼa nō te fenua nei). E ani i te mau tamariʼi ’ia ʼimi i te mau taoʼa,ʼe ’ia faʼaʼite mai e nāhea te taoʼa tātaʼitahi e tauturu ai ia tātou ’ia roa’a te faʼaroʼo ē tē ora nei Iesu.

• E ’āfaʼi mai i te hōʼē haʼapūvaʼivaʼi, ʼe e vaiiho i te mau tamariʼi ’ia ʼite e aha ra te huru ʼia pūpuhi anaʼe te haʼapūvaʼivaʼi i te mataʼi nā niʼa atu i tō rātou mau hōhoʼa mata. E parau atu ’ia rātou ē eʼita e nehenehe ia rātou ʼia ʼite mata atu i te mataʼi, e nehenehe rā tā tātou e ʼite i te reira. ʼOia atoʼa, eʼita e nehenehe ia tātou ’ia ʼite mata atu i te Metua i te Ao ra ʼe ia Iesu Mesia, e nehenehe rā tā tātou e ʼite i tō rāua here ʼe ʼia tiʼaturi e tē ora mau nei rāua.

• E faʼaʼite atu i te mau ʼāʼamu o te mau taʼata tei faʼahitihia i roto i te Hebera 11:4–32. E feruri i te faʼaʼohipa i te Mau ʼāʼamu o te Faufaʼa Tahito (hiʼo i te mau pene 4–6, 8–10, 15–17, 23, e 28). E aha tā teie mau taʼata i rave nō te faʼaʼite e faʼaroʼo tō rātou i te tahi mea tei ʼore i nehenehe ia rātou ʼia ʼite mata atu ? E faʼaʼite i te tahi mau haʼamaitaʼiraʼa tā ʼoutou i fāriʼi nō tō ʼoutou faʼaroʼo.

Hebera 13: 5-6

E tauturu te Metua i te ao ra ʼe Iesu Mesia ia tātou ʼe e ʼore roa rāua e faʼaruʼe ia tātou.

E aha te mau tāmataraʼa e nehenehe i te mau tamariʼi e faʼaruru atu ? Nāhea te poroʼi o te Hebera13:5–6 e nehenehe ai e tauturu ia rātou ?

Mau ’ohipara’a e nehenehe e rave

• E taiʼo faʼahou i te tahi mau ʼāʼamu o te Faufaʼa ʼĀpī tā te mau tamariʼi i haʼapiʼi mai i teie matahiti i roto i te reira te Faʼaora te tauturura’a ia vetahi ʼē, mai te taime ’a faʼaora ai ʼoia i te taʼata hāpepa (hiʼo ’ia Luka 5:18–26) ʼaore rā faʼaʼāmuraʼa e 5 000 taʼata (hiʼo ’ia Mataio 14:15–21). E tauturu i te mau tamariʼi ’ia haʼapiʼi mai i te pereota « ’o te Fatu tōʼu tauturu » (Hebera 13:6).

• E ani i te mau tamariʼi ’ia nīnoʼa i te hōʼē hōhoʼa nō te hōʼē taime i riʼariʼa ai rātou. E taiʼo atu i te Hebera13:5–6 ia rātou, ʼe e faʼaʼite pāpū atu ē e tauturu mai te Metua i te Ao ra ia tātou ʼe e ʼore roa ʼoia e faʼaruʼe ia tātou. E tauturu i te mau tamariʼi ʼia tāpupu i te mau māfatu parau nō te tāpoʼi i te mau hōhoʼa. E aha te tahi mau mea o te tauturu ia tātou ’ia piri atu ā i te Metua i te Ao ra ? E pāpaʼi i te tahi o teie mau mea i niʼa i te mau māfatu.

• E haʼapiʼi atu i te mau tamariʼi i te piti o te ʼīrava o te hīmene « Dis moi, Seigneur » (Chants pour les enfants, 75). ’Ia au i te hīmene, e aha ïa te huru tauturu tā tātou e nehenehe e fāriʼi ’ia vai piri atu anaʼe tātou i te Metua i te Ao ra ʼe ia Iesu Mesia ? E parau atu i te hōʼē taime i piri atu ai te Metua i te Ao ra ia ʼoutou ʼe ʼua tauturu atu ia ʼoutou.

Ha’api’i i te ha’api’ira’a tumu

Te mau tamari’i pa’ari a’e

Hebera 7: 1-4

E peʼe te mau taeaʼe parau-tiʼa tei mau i te autahuʼaraʼa i te Faʼaora.

Nāhea e nehenehe ai ia ʼoutou ʼia faʼaʼohipa i teie mau ʼīrava nō te tauturu i te mau tamariʼi ʼia taʼa ē e tiʼa i te feiā tei mau i te autahuʼaraʼa ʼia haʼapaʼo ʼe ʼia tāvini ia vetahi ʼē mai tā te Faʼaoʼa i rave ?

Mau ’ohipara’a e nehenehe e rave

• E tauturu i te mau tamariʼi ’ia tāpura i te mau mea tā rātou i ʼite nō niʼa ia Aberahama ʼe ia Melehizedeka, nā taʼata faʼahiahia e piti tei mau i te autahuʼaraʼa. E nehenehe tā rātou e ʼite i te tauturu i roto i te Hebera 7:1–4 ; Aberahama 1:1–2 ; ʼe Te ʼĪritiraʼa a Iosepha Semita, Genese14:25–40 (i roto i te hiu o te Bibilia). E aha te mau tāpaʼo mai tō te Mesia i mauhia e teie nā taʼata tei tauturu ia rāua ’ia faʼatura i te autahuʼaraʼa ?

• E ani i te mau tamariʼi ’ia taiʼo i te Hebera 7:1–2 ʼe e hiʼo i te mau tiʼaraʼa tei faʼaʼohipahia nō te faʼaʼite ē o vai Melehizedeka. E mea nāhea teie mau tiʼaraʼa e faʼahaʼamanaʼo ai ia tātou i ia Iesu Mesia ? E tauturu ia rātou ʼia feruri i te rāveʼa i riro ai Iesu ʼei « ariʼi nō te hau ». ʼUa ʼite ānei ra rātou ē tē vai nei te tahi atu mau taʼata tei mau i te autahuʼaraʼa tei riro atoʼa ’ei hiʼoraʼa nō te peʼeraʼa atu i te Faʼaora ?

• E faʼaʼite i te hōʼē ʼohipa tei tupu ’a tauturu ai te hōʼē taʼata parau-tiʼa tei mau i te autahuʼaraʼa ’ia piri atu i te Faʼaora. E tauturu i te mau tamariʼi ʼia feruri i te mau rāveʼa i haʼamaitaʼi ai te tāviniraʼa a te autahuʼaraʼa ia rātou.

Hebera 11

E faʼaʼutuʼa te Metua i te Ao ra i te feiā e faʼaroʼo tō rātou.

Tē vai nei e rave rahi mau hiʼoraʼa i roto i te Hebera 11 nō te mau taʼata tei haʼamaitaʼihia ’a ’ohipa ai rātou ma te faʼaroʼo Tei hea te ʼāʼamu tei riro ʼei faʼaururaʼa rahi ʼaore rā tei tauturu rahi i te mau tamariʼi tā ʼoutou e haʼapiʼi nei ?

Mau ’ohipara’a e nehenehe e rave

• E ani i te mau tamariʼi ’ia hāmani i te hōʼē tāpura i niʼa i te ʼiri pāpaʼiraʼa nō te mau mea tā rātou i haʼapiʼi mai nō niʼa i te faʼaroʼo i roto i te Hebera 11:1–3, 6. E hōroʼa i te tamariʼi tātaʼitahi te iʼoa o te tahi taʼata tei faʼahitihia i roto i te Hebera 11, ʼe e ani atu ia rātou ’ia taiʼo mai i te mau ʼīrava i tūʼatihia atu i taua taʼata ra. E ani ia rātou ’ia faʼaʼite mai i te mau tāpaʼo nō niʼa i te taʼata ʼia nehenehe i te tahi atu mau tamariʼi ’ia ʼite ʼo vai ra. Nāhea teie mau taʼata i te faʼaʼiteraʼa i te faʼaroʼo, e nāhea te Metua i te Ao ra i te haʼamaitaʼira’a ia rātou ? (Nō te mau hōhoʼa o teie mau taʼata, e hiʼo i te tufaʼa o te Faufaʼa Tahito nō te Buka Hōhoʼa nō te ʼEvanelia).

• I muri aʼe i te taiʼoraʼa i te tahi o te mau hiʼoraʼa nō te haʼapaʼo i roto i te Hebera 11, e ani i te mau tamariʼi ʼia pāpaʼi atu nō niʼa i te hōʼē taʼata tā rātou i ʼite tei faʼaʼite i te faʼaroʼo. E ani e rave rahi mau tamariʼi ʼia faʼaʼite mai i tā rātou hiʼoraʼa i te mau pīahi.

Hebera 12:5–11

E aʼo te Fatu i te feiā tāna e here nei.

E nehenehe teie mau ʼīrava e tauturu i te mau tamariʼi ’ia ʼite ē e aʼo te Metua i te Ao ra, tō rātou mau metua, ʼe te tahi atu mau taʼata ia rātou nō tō rātou here ia rātou ʼe tō rātou hinaʼaro ʼia haʼapiʼi mai rātou nā roto mai i tā rātou mau hape.

Mau ’ohipara’a e nehenehe e rave

• E taiʼo ʼāmui i te Hebera 12:5–11, ʼe e ani i te mau tamariʼi ʼia ʼimi i te mau tumu nō te aha te Metua i te Ao ra e aʼo ai ia tātou (faʼa’āfaro ʼaore rā haʼavī ia tātou). E aha tā teie e haʼapiʼi mai nei ia tātou nō te tumu e aʼo atoʼa nei te mau metua i te fenua nei i tā rātou mau tamariʼi ? Nāhea tātou ʼia pāhono atu i te aʼo nā roto i te here ?

• E faʼaʼite i te mau hiʼoraʼa o te mau taʼata i roto i te mau pāpaʼiraʼa moʼa tei aʼohia e te Fatu ʼe tei tātarahapa (ʼei hiʼoraʼa, e hiʼo i te 1 Nephi 16:25–27 ; Etera 2:13–15). Nāhea tō rātou riroraʼa ʼei mau hiʼoraʼa maitaʼi nō te mau parau tumu i roto i te Hebera 12:5–11 ?

• I muri aʼe i te taiʼoraʼa i te Hebera 12:5–11, e ani i te mau tamariʼi ʼia pāpaʼi i te tahi mau mea tā rātou e tāmata ’ia haʼamanaʼo ’ia aʼo-anaʼe-hia rātou nō tā rātou mau hape.

E faʼaitoito i te haʼapiʼiraʼa mai i te fare

E ani i te mau tamariʼi ’ia pāpāʼi ʼaore rā ʼia nīnoʼa i te hōʼē hōhoʼa nō te mea tā rātou i manaʼo e mea hau roa atu i te faufaʼa tā rātou i haʼapiʼi mai i roto i te piha. E faʼaitoito ia rātou ʼia faʼaʼite atu e aha tā rātou i haʼapiʼi mai ʼe tō rātou ʼutuāfare.

Ha’amaita’iraʼa i tā tātou ha’api’ira’a

E fa’a’ohipa i te mau ’api ’ohipara’a. E fa’a’ī ai te mau tamari’i i te ’api ’ohipara’a i roto i te taime haʼapiʼiraʼa, ’a fa’a’ohipa i te reira taime nō te hi’o fa’ahou i te mau parau tumu o te ha’api’ira’a.