« 23–29 nō Setepa. Galatia : ‘E pe’e tātou i tā te Vārua ra’ », Mai, pe’e mai—nō te ta’ata hō’ē ’e te ’utuāfare : Faufa’a ’Āpī 2019 (2019)
« 23–29 nō Setepa. Galatia », Mai, pe’e mai—nō te ta’ata hō’ē ’e te ’utuāfare : 2019
23–29 nō Setepa.
Galatia
« E ha’apa’o i tā te Vārua ra »
’Ia tai’o ’outou i te Galatia, e pāpa’i i te mau mana’o e tae mai. Nā te reira e tauturu ia ’outou ’ia ha’amana’o ’e ’ia feruri i te reira ananahi.
Pāpa’i i tō ’oe mau mana’o
Tē pūpū mai nei te ’evanelia a Iesu Mesia i te ti’amāra’a i te tītīra’a pae vārua. I te tahi rā taime, te ta’ata i ’ite i te ti’amāra’a o te ’evanelia, e fāriu ’ē atu rātou i te reira ma te « hina’aro na ē ’ia tāvini fa’ahou ā ’outou i reira » (Galatia 4:9). ’O te mea ïa tā te tahi mau ta’ata Galatia e rave ra—tē fāriu ’ē ra rātou i te ti’amāra’a tā te Mesia i pūpū ia rātou (hi’o Galatia 1:6). Nō reira, ’ua riro te ’episetole a Paulo i tō Galatia ’ei pi’ira’a rū ’ia ho’i mai i te « ti’amā tā te Mesia i fa’ati’amā mai ia tātou nei » (Galatia 5:1). E pi’ira’a teie tei tītauhia ia tātou ’ia fa’aro’o ’e ’ia ha’apa’o i te mea ē, noa atu ā e tau ’ē teie, tē tāmau noa nei te ’arora’a i roto i te ti’amāra’a ’e te tītīra’a. Mai tā Paulo i ha’api’i, ’aita i nava’i ’ia « parauhia atu… ’ia noa’a te ti’amā » (Galatia 5:13) ; e mea ti’a ato’a rā ia tātou ’ia « tāpe’a tāmau māite » i te reira (Galatia 5:1) nā roto i te tūru’ira’a i ni’a i te Mesia.
Mau mana’o nō tā ’oe iho tuatāpapara’a pāpa’ira’a mo’a
E fa’ati’amā te ture a te Mesia iā’u.
’Ua pāpa’i Paulo i te feiā mo’a nō Galatia i tōna fa’aro’ora’a ē, tē arata’i-’ē-hia ra rātou e te mau ha’api’ira’a hape. Hō’ē o teie mau ha’api’ira’a hape, ’oia ho’i, nō te noa’a te ora e ti’a i te mau ’Ētene i fāri’i i te ’evanelia ’ia peritomehia ’e ’ia ha’apa’o ato’a rātou i te mau peu o te ture a Mose. ’Ua pi’i paulo i te reira mau peu « i te zugo [fa’atītī] ra » (Galatia 5:1) nō te mea tē ārai nei te reira i te feiā mo’a ’ia ora hope roa i te ture a te Mesia, ’o tē hōro’a mau nei te reira i te feiā mo’a ’ia ora hope roa i te ture o te ti’amāra’a. E aha tā ’oe e ’ite ra i roto i te parau a’o a Paulo i tō Galatia ’o te tauturu nei ia ’oe ’ia māramarama e aha te ti’amāra’a mau ? E nehenehe ato’a tā ’oe e feruri e aha te mau zugo fa’atītī e vai ra i roto i tō ’oe orara’a. Tē vai ra ānei te hō’ē mea e tāpe’a ra ia ’oe ’ia ’ite i te ti’amāra’a tā te ’evanelia e pūpū nei ? Nāhea te Mesia ’e tāna ’evanelia « i fa’ati’amā mai ai ia [’oe] » ? (Galatia 5:1).
Hi’o ato’a 2 Nephi 2:27 ; 9:10–12.
E ta’ata ’āi’a vau nō te mau ha’amaita’ira’a i parauhia ia Aberahama ra.
Tē vai ra te tahi feiā mo’a nō Galatia tei ha’ape’ape’a ē, nō te mea e ’ere rātou i te hua’ai mau nō Aberahama, e’ita ïa rātou e fāri’i i te mau ha’amaita’ira’a i parauhia ia Aberahama, mai te fa’ateiteira’a. ’Ia au i tei pāpa’ihia i roto i te Galatia 3:7–9, 13–14, 27–29, e aha te mau tītaura’a nō te riro ’ei « hua’ai nō Aberahama » ?
Tē vai ra ānei tā Aberahama te ’evanelia a Iesu Mesia ?
’Ua fa’ata’a mai te peropheta Iosepha Semita ē : « E’ita e ti’a ia tātou ’ia ti’aturi ē, ’ua ma’ua tō tahito ra i terā tau ’e terā tau nō ni’a i te fa’anahora’a o te ra’i mai tā te ta’ata e rave rahi e parau nei, inaha ho’i te mea ato’a i fa’aorahia, ’ua fa’aorahia ïa nā roto i te mana o teie fa’anahora’a fa’aorara’a rahi, i nā mua a’e i te taera’a o te Mesia ’e mai reira atu ē i teienei… ’Ua pūpū Aberahama i te tusia, noa atu rā, ’ua ha’api’ihia ’oia te ’evanelia » (« The Elders of the Church in Kirtland to Their Brethren Abroad », The Evening and the Morning Star, Māti 1834, 143, josephsmithpapers.org). Tē fa’a’ite ato’a nei te mau ’īrava i muri nei ē, ’ua porohia te ’evanelia a Iesu Mesia nā mua a’e tōna tau tāvinira’a i te tāhuti nei : Helamana 8:13–20 ; Mose 6:50–66.
Mai te mea e « ha’apa’o [vau] i tā te Vārua ra », e fāri’i au i « tā te Vārua e fa’atupu ra ».
Nā roto i te tuatāpapara’a i teie mau ’īrava ’oe e ’ite ai e aha te fāito ’oe e ha’apa’o ra i tā te Vārua ra. Tē ’ite ra ānei ’oe i te mau hotu o te Vārua e fa’ahitihia nei i roto i te mau ’īrava 22–23? E aha te tahi atu ā mau hotu, ’aore rā mau maita’i, nō te orara’a pae vārua ? E feruri i tei tītauhia ia ’oe ’ia rave nō te fa’atupu hope roa atu i te reira hotu. E aha tā te fa’atupura’a i teie hotu e ha’amaita’i i roto i te mau aura’a faufa’a rahi o tō ’oe orara’a ?
E ti’a iā’u ’ia ’imi i te « hotu o te Vārua » i roto i tō’u orara’a.
Tē tāmata ra paha ’oe i te ha’apa’o i tā te Vārua, e au ra ē, ’aitā tā ’oe mau tauto’ora’a e hōro’a nei i te hotu i parauhia. E tai’o i te Galatia 6:7–10 (tei parau-pinepine-hia ’ei ture nō te ’ō’otira’a). ’Ia mana’o ’oe, e aha te poro’i a te Fatu nō ’oe i roto i teie mau ’īrava ? Nāhea ’oe i te fa’a’ohipa i teie mau ’īrava nō te fa’aitoito i te tahi ta’ata e tāfifi ra i te ora i te ’evanelia ?
Hi’o ato’a Alama 32:28, 41–43 ; Te Parau Ha’api’ira’a ’e te mau Parau Fafau 64:32–34.
Mau mana’o nō tā te ’utuāfare tuatāpapara’a pāpa’ira’a mo’a ’e nō te pō ’utuāfare
’Ia tai’o ’outou i te mau pāpa’ira’a mo’a ’e te ’utuāfare, e nehenehe te Vārua e tauturu mai ’ia ’ite e aha te mau parau tumu e ha’afaufa’a ’e e ’āparau nō te pāhono i te mau hina’aro o te ’utuāfare. Teie te tahi mau mana’o :
E aha te aura’a nō te ora « i te fa’aro’o ra » ? E aha tā tō ’outou ’utuāfare e rave nei nō te fa’a’ite ē, tē ora ra ’outou i te fa’aro’o ra ?
E nehenehe e ’ōmua i te Galatia 4 nā roto i te paraparaura’a i te ta’a-’ē-ra’a e vai ra i roto i te mau tāvini o te ari’i ’e tāna iho mau tamari’i. E aha tā te tamari’i o te ari’i e fāna’o nei ’aita tā te tāvini ? E feruri i te reira ’a tai’o ai ’outou i te mau ’īrava 1–7. E aha tā teie mau ’īrava e ha’api’i nei nō ni’a i tō tātou aura’a ’e te Metua i te Ao ra ?
’Ei fa’a’ana’anataera’a i tā ’outou ’āparaura’a i te Galatia 5:22–23, e nehenehe tā tō ’outou ’utuāfare e tu’u i te i’oa tā Paulo i fa’a’ite nō te mau mea « tā te Vārua e fa’atupu ra » i ni’a i te tahi mā’a hotu mau. ’Ei reira e mā’iti te melo tāta’itahi o te ’utuāfare hō’ē, e parau e aha te reira ’e e paraparau nō te hō’ē ta’ata e fa’ahi’o nei i te reira hotu a te Vārua. E nehenehe te reira e arata’i i te hō’ē ’āparaura’a nō ni’a i te mau rāve’a e ti’a ai i te ’utuāfare ’ia tītau i te Vārua i roto i te fare nō te fa’atupu i te reira hotu. I muri iho i te ’āparaura’a, e nehenehe e tāpūpū i te reira mau mā’a hotu, e ’āno’i pauroa ’e e ’amu atu ai.
Tē vai ra paha te taime e « ro’ohia te hō’ē [melo o te ’utuāfare] i te hapa ». E aha te parau tauturu tā ’outou e ’ite ra i roto i te Galatia 6:1 nō ni’a i te ’ohipa e rave i terā taime ?
Mai te peu ’ua tanu ’āmui a’enei te ’utuāfare i te hō’ē tumu rā’au, e nehenehe e fa’a’ohipa i te reira ’ei fa’ahōho’ara’a i te parau tumu ē : « ’O tā te ta’ata e ueue ra, ’o tāna ā ïa e ’ō’oti mai » (’īrava 7). ’Aita ana’e, e nehenehe e ui i te mau melo o te ’utuāfare i te mā’a hotu ’aore rā te mā’a tupu au roa a’e nā rātou, ’e ’ia paraparau nō ni’a i te mau mea e tītauhia nō te fa’atupu i te reira. (E nehenehe e fa’a’ohipa i te hōho’a i tu’uhia i roto i teie arata’i ha’api’ira’a ’ei mātēria tauturu) I muri iho e nehenehe tā ’outou e paraparau nō ni’a i te mau ha’amaita’ira’a tā te ’utuāfare e tīa’i ra ’ia fāri’i ’e te rāve’a nō te « noa’a » te reira.
Nō te mau mana’o hau atu nō te ha’api’ira’a i te mau tamari’i, hi’o te arata’i ha’api’ira’a o teie hepetoma i roto Mai, pe’e mai—nō te Paraimere.
Haʼamaitaʼiraʼa i tā tātou haʼapiʼiraʼa
E tauturu i tō ’outou ’utuāfare ’ia fa’aau i te mau pāpa’ira’a mo’a ia rātou iho. ’Ua parau Nephi ē « ’Ua fa’aau ho’i au i te mau parau pāpa’i mo’a ato’a ia mātou, ’ia riro te reira ’ei maita’i ’e ’ei ha’api’ira’a ho’i nō mātou » (1 Nephi 19:23 ’Ei tauturura’a i tō ’outou ’utuāfare ’ia rave i te reira, e nehenehe tā ’outou e ani ia rātou ’ia feruri i te tahi taime ’ua ’ite rātou i te hotu tā te Vārua i fa’atupu, mai tei fa’a’itehia i roto i te Galatia 5:22–23. (’A hi’o Ha’api’ira’a mai tā te Fa’aora, 21
’Ua ha’api’i Paulo ē, ’ia pe’e [tātou] i tā te Vārua ra, e fāri’i tātou i « tā te Vārua e fa’atupu ra i roto i tō tātou orara’a.