« 2–8 nō Setepa. 1 Korinetia 14–16 : ‘E ’ere ho’i te Atua i te tumu nō te ’āno’i noa, nō te hau rā’ », Mai, pe’e mai—nō te ta’ata hō’ē ’e te ’utuāfare : Faufa’a ’Āpī 2019 (2019)
« 2–8 nō Setepa. 1 Korinetia 14–16 », Mai, pe’e mai—nō te ta’ata hō’ē ’e te ’utuāfare : 2019
2–8 nō Setepa
1 Korinetia 14–16
« E ’ere ho’i te Atua i te tumu nō te ’āno’i noa, nō te hau rā »
Pāpa’i i te mau mana’o e tae mai ’a tai’o ai ’outou i te 1 Korinetia 14–16. E pure nō ni’a i te mea tā te Vārua i ha’api’i ia ’outou ma te ui i te Metua i te Ao ra ē, tē vai ra ānei te tahi atu mea tāna e hina’aro ia ’outou ’ia ha’api’i mai.
Pāpa’i i tō ’oe mau mana’o
Nō te mea ho’i e mea huru ’āpī te ’Ēkālesia ’e tō te reira mau ha’api’ira’a tumu i Korinetia, ’ua māramarama ïa tātou ē, ’ua fa’aruru ato’a te feiā mo’a nō Korinetia i te ta’a ’ore. Nō ha’api’i noa nei Paulo ia rātou i te parau mau niu o te ’evanelia : « I pohe te Mesia i tā tātou nei hara… ’e i tanuhia ho’i ’oia, e ti’afa’ahou mai ra i te ru’i toru » (1 Korinetia 15:3–4). ’Āre’a rā ’oi’oi roa te tahi mau melo i te ha’amata i te ha’api’i atu ē, « ’aore e ti’a-fa’ahou-ra’a tō tei pohe » (1 Korinetia 15:12). ’Ua tāparu hua atu Paulo ia rātou ’ia « tāpe’a māite ā » i te mau parau mau tei ha’api’ihia ia rātou (1 Korinetia 15:2). ’Ia fa’aruru tātou i te titotitora’a mana’o nō ni’a i te mau parau mau o te ’evanelia, e mea maita’i ’ia ha’amana’o tātou ē : « E ’ere ho’i te Atua i te tumu nō te ’āno’i noa, nō te hau rā » (1 Korinetia 14:33). Nā te fa’aro’ora’a i te mau tāvini tā te Fatu i fa’ata’a ’e te tāpe’a-noa-ra’a i te mau parau mau ’ōhie tā rātou e ha’api’i tāmau nei e tauturu ia tātou ’ia ’ite i te hau ’e ’ia « mau pāpū i te fa’aro’o » (1 Korinetia 16:13).
Mau mana’o nō tā ’oe iho tuatāpapara’a pāpa’ira’a mo’a
E nehenehe tā’u ’ia ’imi i te hōro’a nō te tohura’a.
’Ua uiui a’enei tō ’oe mana’o ē e aha te hōro’a nō te tohura’a ? E ’aravihi ānei nō te tohu i te ananahi ? E ti’a ānei i te mau ta’ata ato’a ’ia fāri’i i te reira hōro’a ? ’Aore rā nā te mau peropheta noa ?
’O te peresideni o te ’Ēkālesia noa te ta’ata e nehenehe e tohu ’e e fāri’i i te heheura’a nō te ’Ēkālesia tā’āto’a ; terā rā tē fa’ata’a nei te Arata’i nō te pāpa’ira’a mo’a ē, te parau tohu ’o « te mau parau ïa ’e te mau pāpa’ira’a tei fa’auruhia e te Atua, ’o tā te hō’ē ta’ata e fāri’i nā roto i te heheura’a a te Vārua Maita’i… ’Ia tohu te hō’ē ta’ata, tē parau ra ’oia ’e tē pāpa’i ra ’oia i te mea ’ua hina’aro te Atua ’ia ’ite ’oia, nō tōna iho maita’i ’e nō te maita’i o vetahi ’ē » (Arata’i nō te mau Pāpa’ira’a mo’a, « Parau tohu », scriptures.lds.org ; hi’o ato’a PH&PF 100:5–8). Tē fa’ata’a ato’a nei te Apokalupo 19:10 i te vārua o te tohu ’ei « [fa’a’itera’a] i te parau o Iesu ra ».
E aha te mea tā ’oe e ha’api’i ra nō ni’a i teie hōro’a pae vārua i roto i te 1 Korinetia 14:3, 31, 39–40 ? E aha te aura’a o te parau a Paulo i tōna anira’a i tō Korinetia « ’ia rahi tō [rātou] hina’aro i te [parau tohu] » ? (1 Korinetia 14:39). Nāhea ’outou i te pe’e i teie anira’a ?
Hi’o ato’a Nūmera 11:24–29 ; Iakoba 4:6–7 ; Alama 17:3 ; Te Parau Ha’api’ira’a ’e te mau Parau Fafau 11:23–28.
Nō te aha Paulo i parau ai e mea ti’a i te mau vahine ’ia māmū noa i te purera’a ?
E mea huru ta’a ’ore te mau ha’api’ira’a a Paulo i roto i te 1 Korinetia 14:34–35, inaha i te ha’amatara’a o taua ’episetole ra, ’ua pāpa’i ’oia ē, ’ua pure ’e ’ua parau tohu te mau vahine (hi’o 1 Korinetia 11:5). Tē taui nei te ’Īritira’a a Iosepha Semita i te ta’o parau i roto i nā ’īrava 34 ’e 35 ’ei fa’atere. I te reira ha’amāramaramara’a, e au ē te parau ra Paulo nō te mau vahine e tāmata ra i te haru i te mana fa’aterera’a i roto i te mau purera’a a te ’Ēkālesia. (Hi’o ato’a 1 Timoteo 2:11–12.)
’Ua noa’a ia Iesu Mesia te rē i ni’a i te pohe.
E tumu faufa’a roa te ti’a-fa’ahou-ra’a o Iesu Mesia i roto i te ao keresetiano, e parau te tahi ē, ’āhani ’aita te reira ’aita e ao keresetiano—mai te au i te parau a Paulo : « E ha’avare mau tā mātou e a’o nei, ’e e ha’avare ato’a tō ’outou fa’aro’o » (1 Korinetia 15:14). Noa atu rā te reira, e mau feiā mo’a nō Korinetia e ha’api’i ra ē, « ’aore e ti’a-fa’ahou-ra’a tō tei pohe » (1 Korinetia 15:12). ’Ia tai’o ’oe i te pāhonora’a a Paulo i roto i te 1 Korinetia 15, e rave i te tahi taime nō te feruri e aha te ta’a-’ē-ra’a i roto i tō ’oe orara’a ’āhani ’aita ’oe i ti’aturi i te ti’a-fa’ahou-ra’a ? Nāhea te reira i te ha’amaita’ira’a ia ’oe ? E aha te mau ha’amaita’ira’a e tae mai ia ’oe maoti te ti’a-fa’ahou-ra’a o Iesu Mesia ? (hi’o 2 Nephi 9:6–19 ; Alama 40:19–23 ; Te Parau Ha’api’ira’a ’e te mau Parau Fafau 93:33–34). E aha te aura’a o te parau « ’aita ho’i te Mesia i fa’ati’ahia ra, e mea faufa’a ’ore tō ’outou fa’aro’o » ? (’īrava 17).
E mea ta’a ’ē te tino ti’afa’ahou i te tino tāhuti.
’Ua uiui a’enei tō ’oe mana’o ē e aha te huru te tino ti’afa’ahou ? Mai tei pāpa’ihia i roto i te 1 Korinetia 15:35, ’ua uiui vetahi nō Korinetia nō ni’a i te reira. E tai’o i te pāhonora’a a Paulo i roto i te mau ’īrava 36–54, ’e e pāpa’i i te mau ta’o ’e te mau parau e fa’ata’a nei i te ta’a-’ē-ra’a i roto i te tino tāhuti ’e te tino ti’afa’ahou. ’Ei hi’ora’a, tē ha’api’i ra te mau ’īrava 40–42 ē, e ’ana’ana te mau tino ti’a fa’ahou i te hanahana e tano i tōna fāito, mai te mahana, te ’āva’e ’e te mau fēti’a e ta’a ’ē nei te ’ana’ana (hi’o ato’a ’Īritira’a a Iosepha Semita, 1 Korinetia 15:40 ; PH&PF 76:50–112).
Hi’o ato’a Alama 11:43–45 ; Luka 24:39.
« E ’ana’ana ’ē tō te mahana » (1 Korinetia 15:41).
Mau mana’o nō tā te ’utuāfare tuatāpapara’a pāpa’ira’a mo’a ’e nō te pō ’utuāfare
’Ia tai’o ’outou i te mau pāpa’ira’a mo’a ’e te ’utuāfare, e nehenehe te Vārua e tauturu mai ’ia ’ite e aha te mau parau tumu e ha’afaufa’a ’e e ’āparau nō te pāhono i te mau hina’aro o te ’utuāfare. Teie te tahi mau mana’o :
Tē ha’api’i nei tātou i roto i te ’īrava 29 ē, ’ua rave te feiā mo’a i tahito ra te mau bāpetizora’a nō te feiā pohe, mai tā tātou e rave nei i roto i te ’Ēkālesia. E aha tō tātou huru te ’utuāfare i te fa’aineinera’a i te i’oa o tō tātou mau tupuna nō te mau ’ōro’a i te hiero ?
E aha te mau tao’a ’aore rā te mau hōho’a e nehenehe e fa’a’ite atu nō te tauturu i tō ’outou ’utuāfare ’ia māramarama i te tahi mau parau a Paulo nō te fa’ata’a i te ta’a-’ē-ra’a i roto i te tino tāhuti ’e te tino ti’afa’ahou ? ’Ei hi’ora’a, nō te fa’ata’a i te ta’a-’ē-ra’a i roto i te tāhuti ’e te tāhuti ’ore (hi’o i te mau ’īrava 52–54) e nehenehe tā ’outou e fa’a’ite i te mētara tei tūtae-’āuri-hia ’e te tahi mētara ’aita i tūtae-’āuri-hia. ’Aore rā e nehenehe e hi’o i te hō’ē mea paruparu i pīha’i iho i te hō’ē mea pūai (hi’o i te ’īrava 43).
E mea au te ’āparaura’a nō ni’a i teie mau ’īrava mai te peu ’ua mātau te ’utuāfare i te hō’ē ta’ata tei fa’aru’e mai. E nehenehe te mau melo o te ’utuāfare e hōro’a i tō rātou ’itera’a pāpū nō te huru Iesu Mesia e rave ’ē atu i « tō te pohe nei tara » (’īrava 56). E nehenehe te a’ora’a a Elder Paul V. Johnson, « ’E e ’ore roa te pohe » (Ensign ’aore rā Liahona, Mē 2016, 121–23) e fa’ananea i tā ’outou paraparaura’a.
’Ei tauturura’a i tō ’outou ’utuāfare e fa’aau ia rātou i teie ’īrava, e nehenehe tā ’outou e pāpa’i i te hō’ē menemene i raro i te repo ’e e parau i te hō’ē melo o te ’utuāfare ’ia « ti’a pāpū » i roto ’a tāpōhia ai tōna mata, ’e e tāmata te tahi mau pu’era’a e fa’ahaere iāna i rāpae i te menemene. E aha te ta’a-’ē-ra’a e ’itehia mai te peu ’aita te ta’ata i roto i te menemene e tāpōhia te mata ’e e nehenehe tāna e « hi’o » ? E aha tā tātou e nehenehe e rave nō te « ti’a pa’ari » i roto i tō tātou orara’a i te taime e fa’ahemahia ai tātou ’ia rave i te mau mā’itira’a hape ?
Nō te mau mana’o hau atu nō te ha’api’ira’a i te mau tamari’i, hi’o te arata’i ha’api’ira’a o teie hepetoma i roto Mai, pe’e mai—nō te Paraimere.
Ha’amaita’i i tā ’oe iho tuatāpapara’a pāpa’ira’a mo’a
’Imi i te mau hōho’a. I roto i te mau pāpa’ira’a mo’a e ’ite mai tātou i te mau hōho’a e fa’a’ite mai nāhea te Fatu i te rave i tāna ’ohipa. E aha te mau hōho’a ’ohipa e ’itehia i roto i te 1 Korinetia 14 e tauturu nei ia tātou ’ia māramarama i te huru e ha’api’i ’e e ha’apāutuutu i te tahi ’e te tahi ? Hi’o ato’a PH&PF 50:13–23.
Woman, Why Weepest Thou? nā Simon Dewey