« 26 nō ’Atete–1 Nō Setepa. 1 Korinetia 8–13 : ‘E tino ’outou nō te Mesia’ », Mai, pe’e mai—nō te ta’ata hō’ē ’e te ’utuāfare : Faufa’a ’Āpī 2019 (2019)
« 26 nō ’Atete–1 nō Setepa. 1 Korinetia 8–13 », Mai, pe’e mai—nō te ta’ata hō’ē ’e te ’utuāfare : 2019
« 26 nō ’Atete–1 nō Setepa
1 Korinetia 8–13.
« E tino ’outou nō te Mesia »
’Ia tai’o ’outou ma te pure i te 1 Korinetia 8–13, e paraparau te Vārua Maita’i ia ’outou ma te rāve’a au (hi’o 1 Ari’i 19:11–12). E riro te pāpa’ira’a i teie mau mana’o e tae mai ’ei tauturura’a nō te ha’amana’o i te mana’o i te ’ā’au ’e te mana’o i te ferurira’a i roto i tā ’outou tuatāpapara’a.
Pāpa’i i tō ’oe mau mana’o
I te tau o Paulo, e ’oire tapiho’ora’a rahi ’e te moni rahi ’o Korinetia, ’e te feiā e noho i reira, mea nā te mau fenua ato’a ïa o te hau emepera Roma. Nō te mau peu rau ’e te mau ha’apa’ora’a fa’aro’o rau i reira, ’ua fifi te mau melo o te ’Ēkālesia i Korinetia i te tāpe’ara’a i te hō’ēra’a, nō reira ’ua ’imi Paulo i te tauturu ia rātou ’ia ’ite mai i te hō’ēra’a i roto i tō rātou ti’aturira’a i te Mesia. ’Ua hau atu teie hō’ēra’a i te vai-hau-noa-ra’a te tahi i te tahi ; ’aita ’o Paulo e ani noa ra ia rātou ’ia fa’a’oroma’i i te ta’a-’ē-ra’a o te tahi ’e te tahi. ’Aita, tē ha’api’i nei rā ’oia ē, i te taime e tomo ’outou i roto i te ’Ēkālesia a Iesu Mesia, ’ua « bāpetizohia ho’i [’outou]… i roto i te tino hō’ē ra » ’e ’ua hina’arohia te melo tāta’itahi (1 Korinetia 12:13). Te mo’era’a te hō’ē melo, mai te mo’era’a ïa te hō’ē melo tino, ’ua paruparu fa’ahou atu ïa te tino. ’Ia māuiui te hō’ē melo, e māuiui ato’a ïa tātou pā’āto’a e ti’a ai ’e e rave tātou i tā tātou tuha’a nō te tāmarū i te reira. I roto i teie huru hō’ēra’a, e fā’ihia te ta’a-’ē-ra’a, e poihere-ato’a-hia rā te reira, nō te mea ’aita teie mau melo tārēni rau ’e te ’āravihi rau, ’ua tā’ōti’ahia ïa tō tātou nei tino. Nō reira, e vai noa ānei te mana’o ē, ’ua riro te ’Ēkālesia mai tō ’outou iho fare, ’aore rā, tē uiui ra te mana’o ē, terā mau ānei te vāhi nō ’outou, teie te poro’i a Paulo ia ’outou, e ’ere te hō’ēra’a i te hōho’a hō’ē noa. E hina’aro ’outou i tō ’outou hoa feiā mo’a, ’e e hina’aro tō ’outou hoa feiā mo’a ia ’outou.
Mau mana’o nō tā ’oe iho tuatāpapara’a pāpa’ira’a mo’a
E hōro’a te Atua i te hō’ē rāve’a nō te horo ’ē i te fa’ahemara’a.
’Aita te mau ’ohipa pae vārua, temeio noa atu ā te reira, e ha’apae nō tātou te mau fa’ahemara’a « mai tā te ta’ata nei ā » (1 Korinetia 10:13). ’O te hō’ē paha tumu Paulo i pāpa’i ai nō ni’a i te huru te ’āti ’Īserā’ela i tāfifi ai i te fa’ahemara’a i te tau o Mose, noa atu ā te mau temeio rārahi tā rātou i ’ite mata roa (hi’o Exodo 13:21 ; 14:13–31). ’Ia tai’o ’oe i te 1 Korinetia 10:1–13, e aha te mau fa’aarara’a i tupu nō te mau ’āti ’Īserā’ela e tano nō ’oe ? E aha te horo-’ē-ra’a i te fa’ahemara’a tā te Metua i te Ao ra i fa’afāna’o ia ’oe ? (hi’o ato’a Alama 13:27–30 ; 3 Nephi 18:18–19).
1 Korinetia 10:16–17 ; 11:16–30
Tē fa’atāhō’ē nei te ’ōro’a ia tātou ’ei feiā ’āpe’e i te Mesia.
Noa atu ā tei roto i te ’ōro’a mo’a te tītaura’a nō te ta’ata hō’ē ’ia fafau iāna iho i te Fatu ra, e ’ohipa ato’a rā e rave ’āmui tātou—fātata pauroa te taime e rave ’āmui tātou i te ’ōro’a, tātou te tino feiā mo’a. E tai’o i tā Paulo i ha’api’i nō ni’a i te ’ōro’a ’e e feruri nāhea teie ’ōro’a mo’a e nehenehe ai e tauturu i te « rave rahi » ’ia riro ’ei « hō’ē » i roto i te Mesia (1 Korinetia 10:17). Nāhea i te noa’a mai te pūai i roto i te ravera’a i te ’ōro’a ’e te tahi atu mau ta’ata fa’aro’o ? E aha tā te reira e fa’atupu nei i roto i tā ’oe fa’aineinera’a nō te ’ōro’a ’e te tūtavara’a ’ia ha’apa’o i tā ’oe mau fafaura’a nō te bāpetizora’a ?
Nō te aha Paulo i pāpa’i ai nō ni’a i te tāpo’i upo’o ’e te hōho’a rouru ?
’Ua fa’ahiti Paulo i te mau peu nō ni’a i te ’ahu ’e te fa’anehenehera’a iāna nō te ha’api’i nō ni’a i te mau aura’a i roto i te tāne, te vahine ’e te Fatu. ’Aita tātou e pe’e ra i te reira mau peu i teie mahana, e nehenehe rā tā tātou e ’apo i te tahi ha’api’ira’a i roto i te fa’a’itera’a a Paulo i roto i te 1 Korinetia 11:11, ’oia ho’i, i tītauhia te tāne ’e te vahine i roto i te fa’anahora’a a te Fatu, nō te fa’aipoipora’a ’e nō te ’Ēkālesia, to’opiti. Mai tā Elder David A. Bednar ho’i i ha’api’i : « ’Ua fa’ata’ahia te tāne ’e te vahine ’ia ha’api’i, ’ia fa’aitoito, ’ia ha’amaita’i ’e ’ia fa’ananea te tahi i te tahi » ’a haere noa ai rāua i mua i te fa’ateiteira’a (« Tē ti’aturi nei mātou ē, e mea ti’a i te ta’ata ’ia ora ma te vi’ivi’i ’ore », Ensign ’aore rā Liahona, Mē, 2013, 42 ; hi’o ato’a Mareko 10:6–9).
’Ua hōro’ahia te mau hōro’a pae vārua ’ei maita’i nō te tā’āto’ara’a o te mau tamari’i a te Metua i te Ao ra.
’Aita te tāpura nō te mau hōro’a pae vārua i roto i te 1 Korinetia 12–13 i hope roa. E vāhi maita’i rā nō te ha’amata nō te hi’o ’e nō te feruri i te mau hōro’a pae vārua tā te Metua i te Ao ra i hōro’a ia ’oe. E nehenehe tā ’oe e tu’u i roto i teie tāpura tā Paulo te mau hōro’a tā ’oe i ’ite i roto i te ta’ata, i roto ia ’oe ’e i roto i te ta’ata o te mau pāpa’ira’a mo’a. Mai te mea e ha’amaita’ira’a patereareha tō ’oe, tē vai ato’a ra te tahi o tā ’oe mau hōro’a pae vārua i fa’ahitihia. Nāhea teie mau hōro’a pae vārua e tauturu ai ia tātou ’ia patu i te bāsileia o te Atua ? E feruri i te mau mea tā ’oe e rave ra nō te ’imi i « te mau [hōro’a] rahi ra » (1 Korinetia 12:31).
Hi’o ato’a Moroni 10:8–21, 30 ; Te Parau Ha’api’ira’a ’e te mau Parau Fafau 46:8–26 ; Hīro’a fa’aro’o 1:7.
Mau mana’o nō tā te ’utuāfare tuatāpapara’a pāpa’ira’a mo’a ’e nō te pō ’utuāfare
’Ia tai’o ’outou i te mau pāpa’ira’a mo’a ’e te ’utuāfare, ’a ’imi i te fa’aurura’a nō te pāhono i te mau hina’aro o te ’utuāfare. E nehenehe te mau mea i muri nei e tauturu atu :
Inaha ho’i ’ua fa’ahōho’a ’o Paulo i te orara’a ’evanelia mai te hō’ē horora’a, e nehenehe ’outou te ’utuāfare e fa’atupu i te hō’ē horora’a ’ei fa’ahōho’ara’a i teie ha’api’ira’a. E hōro’a i te hō’ē korōna i te ta’ata ato’a e tāpae i te hope’a, ’ei reira e paraparau ai i te huru te mau ta’ata ato’a e fa’aitoito roa i te ’āpe’era’a ia Iesu Mesia i roto i teie orara’a e noa’a mai te rē « tāhuti ’ore » (1 Korinetia 9:25 ; hi’o ato’a 2 Timoteo 4:7–8). E aha te mau mea tā te hō’ē ’aito e rave nō te fa’aineine nō te horora’a ? I teienei, e aha tā tātou e nehenehe e rave nō te fa’aineine nō te ho’i atu i te Metua i te Ao ra ?
’Ua fa’aau Paulo i te orara’a ’evanelia i te hō’ē horora’a ?
E ’ōpua e hōro’a i te ta’ata tāta’itahi i te hō’ē pāpie ma te i’oa o te tahi atu melo o te ’utuāfare pāpa’ihia i ni’a roa. E ani i te ta’ata tāta’itahi ’ia pāpa’i i te mau hōro’ara’a pae vārua o terā ta’ata. E nehenehe i muri iho e fa’a’ohu i te mau pāpie ’ia pāpa’i pauroa te ta’ata i te mau hōro’a a terā ta’ata.
Nō te aha e mea tītauhia te Vārua Maita’i ’ia noa’a te hō’ē ’itera’a pāpū nō Iesu Mesia ? E aha tā tātou e nehenehe e rave nō te tītau i te Vārua Maita’i nō te ha’apūai i tō tātou ’itera’a pāpū nōna ?
E nehenehe te fa’aaura’a a Paulo nō te tino e riro ’ei hō’ē rāve’a nō te ’āparau nō ni’a i te hō’ēra’a ’o tē ha’amana’o-maoro-hia . ’Ei hi’ora’a, e nehenehe te mau melo o te ’utuāfare e tāmata i te pāpa’i i te hōho’a nō te hō’ē tino e mata noa ’aore rā e tari’a noa (hi’o i te ’īrava 17). E aha tā teie mau ’īrava e parau nei nō ni’a i te huru e ti’a ia tātou ’ia rave i te tahi ’e te tahi i roto i te ’utuāfare ?
E nehenehe te tātara’a a Paulo i te aroha mau ’ia riro ’ei tumu parau fa’auru nō tō ’outou ’utuāfare. E nehenehe e fa’ata’a nō te melo tāta’itahi o te ’utuāfare ’ia tuatāpapa i te hō’ē parau i roto i te ’īrava 4–8 ’e ’ia ha’api’i rātou i te toe’a o te ’utuāfare e aha tō te reira aura’a ma te fa’a’ohipa i te mau tātarara’a parau, te tahi mau hi’ora’a ’e te mau ’ohipa i tupu nō rātou iho. E mea nāhea te Fa’aora i te riro ’ei hi’ora’a nō teie mau maita’i ? E nehenehe ato’a tā ’outou e hāmani i te tahi mau ’api pia nō te parau tāta’itahi ’a pia haere ai i te reira i roto i te fare. E feruri i te hōho’a au nō te reira !
Nō te mau mana’o hau atu nō te ha’api’ira’a i te mau tamari’i, hi’o te arata’i ha’api’ira’a o teie hepetoma i roto Mai, pe’e mai—nō te Paraimere.
Haʼamaitaʼiraʼa i tā tātou haʼapiʼiraʼa
Pia i te hō’ē ’īrava. E pia i te hō’ē ’īrava faufa’a rahi nō ’outou i te hō’ē vāhi ’ia ’ite pinepine te mau melo o te ’utuāfare. E ani i te tahi atu mau melo o te ’utuāfare e fa’a’ohu nō te mā’itira’a i te ’īrava e pia.
« Te pāne tā tātou e ’ōfene nei, e ’ere ānei i te ’āmuira’a i te tino o te Mesia ra ? Nō te mea hō’ē ā pāne, tātou ato’a e rave rahi nei hō’ē ā ïa tino » (1 Korinetia 10:16–17).