« 19–25 nō ’Ātete. 1 Korinetia 1–7 : ‘’Ia ’ati māite rā ’outou’ », Mai, pe’e mai—nō te ta’ata hō’ē ’e te ’utuāfare : Faufa’a ’Āpī 2019 (2019)
« 19–25 nō ’Ātete. 1 Korinetia 1–7 », Mai, pe’e mai—nō te ta’ata hō’ē ’e te ’utuāfare : 2019
Corinth, Southern Greece, the Forum and Civic Center, hōho’a pēni nā Balage Balogh
19–25 nō ’Ātete
1 Korinetia 1–7
« ’Ia ’ati māite rā ’outou »
Pāpa’i i te mau mana’o e tae mai ’a tai’o ai ’outou i te 1 Korinetia 1–7. I roto i te mau mana’o e tae mai, tē vai nei te mau fa’aurura’a e tuatāpapa rahi atu ā i te hō’ē mana’o, tē vai nei te fa’a’itera’a i te tahi ta’ata i te mea tā ’outou i ’apo mai ’aore rā tē vai nei te ravera’a i te tahi mau tauira’a i roto i tō ’outou orara’a.
Pāpa’i i tō ’oe mau mana’o
I te mau ’āva’e ’a fa’aea ai Paulo i Korinetia, « e rave rahi… tō Korinetia i ’ite ’e ’ua fa’aro’o, ’e bāpetizohia ihora » (Te mau ’Ohipa 18:8). Nō reira, ’ua riro paha e ’oto rahi i te ’ā’au nō Paulo ’ia fa’aro’o ē, ma’a matahiti noa i muri iho, e « ’āmahamaha » ’e e « mārōra’a » i roto i te feiā mo’a nō Korinetia ’e i te revara’a ’oia, ’ua ha’amata rātou i te pe’e i te « pa’ari o teie nei ao » (1 Korinetia 1:10–11, 20). ’Ei pāhonora’a, ’ua pāpa’i Paulo i te hō’ē rata tā tātou e parau nei, te 1 Korinetia. E ha’api’ira’a tumu hōhonu mau te reira, ’āre’a rā, ’ua ta’a ’ore ato’a Paulo i te ’orera’a te feiā mo’a i ineine nō te fāri’i i te ha’api’ira’a tumu ato’a tāna e hina’aro e hōro’a ia rātou. « ’Aita a’era i ti’a iā’u, e au mau taea’e, ’ia parau atu ia ’outou mai te feiā e ha’apa’o i tā te Vārua ra », tāna ho’i i ’oto, « tei tā te tino ā ho’i ’outou i teienei » (1 Korinetia 3:1–3). ’Ia fa’aineine tātou i te tai’o i te mau parau a Paulo, e riro ē, e tauturu mau ’ia hi’opo’a tātou i tō tātou iho vai-ineine-ra’a nō te fāri’i i te parau mau—mai tō tātou ineine ’ia pe’e i te Vārua ’e ’ia tūtava nō te tāhō’ēra’a i roto i tō tātou mau ’utuāfare, i roto i te feiā mo’a ’e i roto ia tātou ’e te Atua.
Mau mana’o nō tā ’oe iho tuatāpapara’a pāpa’ira’a mo’a
E mea tāhō’ē te mau melo o te ’Ēkālesia a te Mesia.
’Aita tātou i ’ite pauroa nō ni’a i te huru ’erera’a te feiā mo’a nō Korinetia i te hō’ēra’a, ’ua ’ite rā tātou i tō tātou iho ’erera’a i te hō’ēra’a. E feruri i te hō’ē aura’a ’e te hō’ē ta’ata e nehenehe e ’āpī rahi atu ā i te hō’ēra’a ; ’ei reira e hi’o ai i tā Paulo i ha’api’i i roto i te 1 Korinetia 1:10–17 ; 3:1–11 nō ni’a i te ’erera’a i te hō’ēra’a i roto i te feiā mo’a i Korinetia. E aha te tahi mau mea tā ’oe i ’apo mai nō ni’a i te fa’atupu-rahi-atu-ā-ra’a i te hō’ēra’a ’e te ta’ata ?
Hi’o ato’a Mosia 18:21 ; 4 Nephi 1:15–17 ; Te Parau Ha’api’ira’a ’e te mau Parau Fafau 38:23–27 ; 105:1–5.
Nō te fa’atupu i te ’ohipa a te Atua, tītauhia te pa’ari o te Atua.
Noa atu ā e ’ohipa maita’i—tei fa’aitoito-ato’a-hia—te ’imira’a i te pa’ari i te vāhi ato’a e ’ite mai tātou i te reira (hi’o 2 Nephi 9:29 ; PH&PF 88:118), ’ua tu’u mai Paulo i te tahi mau parau fa’aara ’eta’eta nō ni’a i te pa’ari hapehape o te ta’ata nei, ’o tāna ïa i parau te « pa’ari o teie nei ao ». ’Ia tai’o ’oe i te 1 Korinetia 1:17–25, e feruri e aha te aura’a o terā parau. E aha tā Paulo e parau ra te « pa’ari o te Atua » ? Nō te aha tītauhia te pa’ari o te Atua nō te fa’atupu i te ’ohipa a te Atua ?
I roto i tā ’oe mau tauto’ora’a e fa’atupu i tā ’oe mau hōpoi’a fa’atupura’a i te ’ohipa a te Atua, ’ua ’ite a’enei ’oe i te « mata’u, ’e te rūrūta’ina » mai tā Paulo i ’ite i te ha’api’ira’a i te feiā mo’a nō Korinetia ? (1 Korinetia 2:3). E aha tā ’oe e ’ite ra i roto i te mau ’īrava 1–5 ’o tē fa’aitoito nei ia ’oe ? E feruri i te rāve’a nō ’oe e nehenehe e fa’a’ite i tō ’oe ti’aturi i te « mana o te Atua », hau atu i te « pa’ari ta’ata nei ».
Hi’o ato’a Te Parau Ha’api’ira’a ’e te mau Parau Fafau 1:17–28.
Tītauhia te Vārua Maita’i nō te māramarama i te mau mea a te Atua.
Mai te peu e hina’aro ’oe e ha’api’i nō ni’a i te mātini ’aore rā te patura’a fare i te tau tahito ra, nāhea ’oe ? ’Ia au i tei pāpa’ihia i roto i te 1 Korinetia 2:9–16, e aha te ta’a-’ē-ra’a i roto i te ha’api’ira’a i « te mau mea a te Atua » ’e « te mau mea a te ta’ata nei » ? Nō te aha e mea tītauhia te Vārua Maita’i nō te māramarama i te mau mea a te Atua ? I muri mai i tō ’oe tai’ora’a i teie mau ’īrava, e aha tō ’oe mana’o nō te mau mea e rave nō te māramarama hope atu ā i te mau mea pae vārua ? Nāhea te mau parau a Paulo e nehenehe ai e tauturu i te hō’ē ta’ata e tāfifi ra i tōna ’itera’a pāpū ?
E mea mo’a tō’u tino.
’Ua mana’o te rahira’a ta’ata i Korinetia ē, e ’ere te vi’ivi’i pae mōrare i te hō’ē fifi ’e ’ua hāmani-nā-mua-roa-hia tō rātou tino nō te ha’amāha i te reira. E nehenehe e parau ē, ’aita Korinetia i ta’a ’ē roa i tō tātou nei ao. E aha tā Paulo i ha’api’i i roto i te 1 Korinetia 6:13–20 e nehenehe e tauturu ia ’oe ’ia fa’a’ite i te ta’ata nō te aha ’oe e hina’aro ai e ora i te orara’a vi’ivi’i ’ore ?
E mea au ato’a ’ia hi’o i te parau fa’aitoito a te tuahine Wendy W. Nelson, tei fa’aitoito, mai ia Paulo te huru, i te feiā mo’a ’ia vai vi’ivi’i ’ore i roto i tā rātou mau ’āparaura’a « Te here ’e te fa’aipoipora’a » (Purera’a ’ati ti’a i te ao nei nā te feiā ’āpī pa’ari, 8 nō Tēnuare 2017, broadcasts.lds.org). E aha te ta’a-’ē-ra’a i roto i te parau mau a te tuahine Nelson nō ni’a i te here ’e te hereherera’a, ’e te poro’i a tō te ao ?
Hi’o ato’a Roma 1:24–27.
’Ua ha’api’i ānei Paulo ē, e mea maita’i a’e te fa’aipoipo-’ore-ra’a i te fa’aipoipora’a ?
E rave rahi ’īrava i roto i te 1 Korinetia 7 e huru parau ra ē, e mea au te fa’aipoipora’a, terā rā e mea au a’e te vai-’ōtahi-ra’a ’e te ha’apae-hope-ra’a i te hereherera’a. Terā rā, tē tauturu nei te ’Īritira’a a Iosepha Semita, te 1 Korinetia 7:29–33 ’ia māramarama ē, tē parau ra Paulo nō rātou i pi’ihia ’ei misiōnare rave tāmau ’a nā ’ō ai ē, e mea ’ōhie a’e ’ia tāvini i te Atua i roto i tā rātou misiōni mai te peu e vai ’ōtahi rātou. ’Ua ha’api’i te Fatu nā roto i tāna mau tāvini mai ia Paulo ē, e tuha’a te fa’aipoipora’a nō tāna fa’anahora’a mure ’ore ’e e mea tītauhia nō te fa’ateiteira’a (hi’o 1 Korinetia 11:11 ; PH&PF 131:1–4).
Mau mana’o nō tā te ’utuāfare tuatāpapara’a pāpa’ira’a mo’a ’e nō te pō ’utuāfare
’Ia tai’o ’outou i te mau pāpa’ira’a mo’a ’e te ’utuāfare, e nehenehe te Vārua e tauturu mai ’ia ’ite e aha te mau parau tumu e ha’afaufa’a ’e e ’āparau nō te pāhono i te mau hina’aro o te ’utuāfare. Teie te tahi mau mana’o :
’Ia tai’o te mau melo o te ’utuāfare i teie mau ’īrava, e ani ia rātou ’ia hi’o mai i te hō’ē mea e nehenehe e tauturu ia rātou ’ia fa’arahi atu ā te hō’ēra’a.
Penei a’e e nehenehe e tai’o i te reira mau ’īrava ma te fa’aineine i te tahi ’amu’amura’a, te tahi ’ū ’e te tahi ’īna’i, e nehenehe ïa e fa’aau i te pa’arira’a te ’aiū ’ei ta’ata pa’ari i te huru tātou e pa’ari nei i te pae vārua.
’Ua fa’aau Paulo i tāna tauto’ora’a misiōnare ’ei tanura’a huero. E aha tā tāna fa’aaura’a e parau nei nō ni’a i te huru e ti’a ia tātou e hi’o i te fa’a’itera’a ’evanelia i te ta’ata ?
E nehenehe te fa’aaura’a i tō tātou nei tino i te hō’ē hiero, mai tā Paulo i rave, e riro ’ei rāve’a manuia roa nō te ha’api’i nō ni’a i te mo’ara’a o tō tātou nei tino. Penei a’e e nehenehe tā ’outou e fa’a’ite i te mau hōho’a hiero, mai te mau hōho’a i roto i teie arata’i ha’api’ira’a. Nō te aha e mea mo’a te mau hiero ? Mea nāhea tō tātou nei tino e riro ai mai te hiero ? E aha tā tātou e nehenehe e rave nō te rave au i tō tātou nei tino mai te hiero ? (Hi’o ato’a « Te vi’ivi’i ’ore i te pae nō te ’āpeni », Nō te pūai o te feiā ’āpī, 35–37.) Mai te peu e nehenehe, e haere ’āmui i te hiero ’aore rā e haere nā rāpae i te hiero ; e nehenehe te reira e ha’amaita’i i te ’āparaura’a nō ni’a i te mo’ara’a o te hiero ’e o tō tātou nei tino.
Nō te mau mana’o hau atu nō te ha’api’ira’a i te mau tamari’i, hi’o te arata’i ha’api’ira’a o teie hepetoma i roto Mai, pe’e mai—nō te Paraimere.
Ha’amaita’i i tā ’oe iho tuatāpapara’a pāpa’ira’a mo’a
E fa’a’oroma’i ia ’oe iho. ’Ua ha’api’i Paulo ē, ’ia ha’api’i tātou i te ’evanelia, e ū nā mua, e ’īna’i i muri iho (hi’o 1 Korinetia 3:1–2). Mai te peu ē, e mea fifi te tahi mau ha’api’ira’a tumu ’ia māramarama i teienei, e fa’a’oroma’i. E ti’aturi ē, e tae mai te mau pāhonora’a, ’ia vai noa rā te fa’aro’o ’e ’ia fa’aitoito noa te tuatāpapara’a.
’Ua fa’aau Paulo i tō tātou nei tino i te mo’ara’a o te hiero. Fa’a’ohu mai te nira uāti, ha’amata i ni’a i te pae ’aui : Hiero nō Tijuana (Mehiko), hiero nō Taipei (Taiwan), hiero nō Tegucigalpa (Honduras), hiero nō Houston (Texas).