« 16–22 nō Setepa. 2 Korinetia 8–13 : ‘’O te ta’ata hōro’a noa tā te Atua e hina’aro’ », Mai, pe’e mai—nō te ta’ata hō’ē ’e te ’utuāfare : Faufa’a ’Āpī 2019 (2019)
« 16–22 nō Setepa. 2 Korinetia 8–13 », Mai, pe’e mai—nō te ta’ata hō’ē ’e te ’utuāfare : 2019
16–22 nō Setepa
2 Korinetia 8–13
« ’O te ta’ata hōro’a noa tā te Atua e hina’aro »
E riro te pāpa’ira’a i te mau mana’o pae vārua e tae mai ’ei tauturura’a nō te ha’amana’o i tā ’outou e ha’api’i mai i roto i te tuatāpapara’a pāpa’ira’a mo’a. E nehenehe e hāmani i te hō’ē buka tuatāpapara’a, e tāpa’o i te tahi mau parau i te hiti ’api o te mau pāpa’ira’a mo’a, e tu’u i te tahi parau i roto i tā ’outou fa’anahora’a vaira’a buka ’evanelia ’aore rā e haruharu roa i tō ’outou mau mana’o.
Pāpa’i i tō ’oe mau mana’o
E aha tā ’outou e rave ’āhani tē fa’aro’o ra ’outou ē, te fifi ra te tahi ’āmuira’a feiā mo’a nō te hō’ē vāhi i te veve ? ’O te ’ohipa ïa tā Paulo i fa’ata’a mai i te feiā mo’a nō Korinetia i roto i te 2 Korinetia 8–9. ’Ua vai tōna tīa’ira’a ē, e haere iāna e ani i te feiā mo’a nō Korinetia ’ia hōro’a i te tahi pae o tā rātou ’auhune i te feiā mo’a i roto i te ’ati. Ta’a ’ē noa atu te tītaura’a ’ia hōro’a, tē vai nei i roto i te mau parau a Paulo i te parau mau rahi nō ni’a i te ’ohipa hōro’a : « E hōro’a te ta’ata ato’a i tāna i ’ōpua i roto i tōna ’ā’au, ’eiaha ma te nounou, ’e mai te mea ē nō te tītau : ’o te ta’ata hōro’a [noa] ho’i tā te Atua i hina’aro » (2 Korinetia 9:7). I tō tātou nei ’anotau, tē vai noa nei ā te feiā mo’a nā te ao nei i hina’aro i te tauturu. I te tahi taime, te mea rahi roa a’e tā tātou e nehenehe e rave nō rātou, ’o te ha’apaera’a ïa i te mā’a ’e te hōro’ara’a i te ō ha’apaera’a mā’a. I te tahi taime, e nehenehe tā tātou e hōro’a roa atu i roto i te rima. Ta’a ’ē noa atu tā tātou huru fa’atusiara’a, e mea maita’i ’ia hi’opo’a tātou i te mau mana’o e tūra’i nei ia tātou ’ia hōro’a. E fa’a’itera’a ānei tā tātou mau fa’atusiara’a nō tō tātou here ? Inaha ho’i, nā te here e fa’ariro nei i te hō’ē ta’ata hōro’a ’ei ta’ata ’oa’oa.
Mau mana’o nō tā ’oe iho tuatāpapara’a pāpa’ira’a mo’a
E nehenehe tā’u e ’ōpere i tā’u ma te ’oa’oa nō te ha’amaita’i i te feiā veve ’e te nava’i ’ore.
E rave rahi roa ho’i ta’ata nava’i ’ore nā te ao nei. Nāhea tā tātou e nehenehe ai e rave i te hō’ē mea ta’a ’ē mau ? ’Ua hōro’a Elder Jeffrey R. Holland i teie parau a’o : « E ta’ata moni tātou ’e ’aore rā e ta’ata veve, e ti’a ia tātou ’ia ‘rave i te vāhi e ti’a ia tātou » ’ia nava’i ’ore ana’e te tahi ta’ata [hi’o Mareko 14:6, 8]… E tauturu mai [te Atua] ’e e arata’i mai ’oia ia ’outou i roto i te mau ’ohipa aroha o te ti’ara’a pipi, mai te mea ē, e hina’aro mau ’outou, e pure ’e e ’imi ho’i ’outou i te mau rāve’a nō te ha’apa’o i te hō’ē fa’auera’a tāna i hōro’a mai ia tātou fa’ahou ’e fa’ahou ā » (« E ’ere ānei tātou pā’āto’a e mau ta’ata tao’a ’ore ra ? » Ensign ’aore rā Liahona, Novema 2014, 41).
E tai’o i te 2 Korinetia 8:1–15 ; 9:6–15, ma te tāpa’o i te mau parau tumu tā Paulo i ha’api’i nō ni’a i te aupurura’a i te feiā veve ’e te nava’i ’ore. E aha te mana’o e tae mai ia ’outou nō ni’a i te parau a Paulo ? E nehenehe tā ’oe e pure nō te arata’ira’a nō ni’a i te mea tā ’oe e nehenehe e rave nō te ha’amaita’i i te tahi ta’ata nava’i ’ore. E hi’o maita’i ē, e pāpa’i ’oe i te mau mana’o ato’a e tae mai ’e ’ia ’ohipa ’oe mai te au i te reira.
Hi’o ato’a Mosia 4:16–27 ; Alama 34:27–29 ; Henry B. Eyring, « E ’ere ānei teie i te ha’apaera’a mā’a hina’aro nā’u ra ? » Ensign ’aore rā Liahona, Mē 2015, 22–25 ; Linda K. Burton, « E ta’ata ’ē au », Ensign ’aore rā Liahona, Mē 2016, 13–15.
E ’imi te mau peropheta ha’avare ’ia ha’avare.
Nō te māramarama i teie pene e tauturu paha ’ia ’ite ē, ’ua ti’a atu te tahi mau « ’āpōsetolo ha’avare » i rotopū i te feiā mo’a nō Korinetia (2 Korinetia 11:13). E aha tā ’oe e ha’api’i ra i roto i te mau ’īrava 13–15 nō ni’a i te ta’ata e ha’api’i i te mau ha’api’ira’a tumu hape ? E aha tā ’oe e ha’api’i nei nō ni’a i te mau peropheta mau ’ia tai’o ’oe i te mau ’ohipa i tupu nō Paulo ’ei tāvini nā te Mesia ? (hi’o ’īrava 23–33).
E ti’a iā’u ’ia « ’imi māite » i tō’u ha’apa’o maita’i i te ’evanelia a Iesu Mesia.
Nō te mea e rave rahi i teie mahana e ’imi nei i te fa’ahahi ’ē ia tātou i te ’ōhie « e au i te Mesia nei » (2 Korinetia 11:3), e mea au ’ia fāri’i i te anira’a a Paulo e « ’imi māite ia [’oe iho] i tō [’oe] fa’aro’o » (2 Korinetia 13:5). ’Ei hi’ora’a, e nehenehe tā ’oe e feruri e aha te fa’a’ore i roto i tō ’oe orara’a ’o tē tauturu ia ’oe ’ia rōtahi i ni’a i te Mesia, ’aore rā e nehenehe tā ’oe e rave i te « ’Ohipara’a nō te taipe » i roto i te ’Ia Poro Haere i Ta’u Nei ’Evanelia, ’api 144.
E aha te « ra’i tua toru ra » ’e ’o vai terā ta’ata i hōpoi-roa-hia ?
I roto i teie mau ’īrava, tē paraparau ra Paulo nō ni’a iāna, ma te fa’a’ite ’ore i te reira—penei a’e nō te ’orera’a e fa’atietie iāna i teie ’ōrama fa’ahiahia. Te parau nō te « ra’i tua toru », ’o te bāsileia tiretiera ïa (hi’o PH&PF 76:96–98).
’Ua nava’i te maita’i o te Fa’aora nō te tauturu iā’u ’ia ’ite mai i te pūai i roto i tō’u paruparu.
’Aita tātou i ’ite e aha te « tara i roto i [tō Paulo] tino », e mea ’ōhie rā ’ia ’ite i tōna hina’aro ’ia tātara i te reira. E mau tāmatara’a ’e e mau fifi tō tātou pā’āto’a i roto i te orara’a, tā te Fatu e hi’o nei, ’aita i te mea tītau ’ia tātara. E feruri i tā ’oe iho mau tāmatara’a ’ia tai’o ’oe i te 2 Korinetia 12:5–10. E aha tā Paulo e ha’api’i ra nō ni’a i te paruparu ? E aha te aura’a nō ’oe te parau ē, ’ua nava’i te maita’i o te Atua nō ’oe ? E mea nāhea tō ’oe ’itera’a i te mana ha’apūai a te Atua ?
Hi’o ato’a Mosia 23:21–24 ; 24:10–15 ; Etera 12:27 ; Moroni 10:32–33.
E aha te aura’a o te parau a Paulo i te fa’ahitira’a ’oia nō « nā ’ite to’opiti ’e to’otoru » ?
I te tau o te Faufa’a Tahito, e mea tītauhia e piti ’aore rā e toru ’ite nō te tu’u i te hō’ē fa’ahapara’a i ni’a i te hō’ē ta’ata (hi’o Deuteronomi 19:15). Tē fa’ahiti ra Paulo i teie peu i tōna paraura’a nō te toru o tōna tere i Korinetia. Te mau hi’ora’a nō teie parau tumu i tō tātou nei ’anotau, o te nā ’ite to’otoru ïa o te Buka a Moromona, te mau ’itera’a pāpū nō Iesu Mesia tei hōro’ahia mai e to’opiti, te Bibilia ’e te Buka a Moromona, nā reira ato’a te ’ohipa misiōnare, te hāhaerera’a ’utuāfare a te mau taea’e ’e te mau tuahine, ’o te haere ’āpipiti nei.
Mau mana’o nō tā te ’utuāfare tuatāpapara’a pāpa’ira’a mo’a ’e nō te pō ’utuāfare
’Ia tai’o ’outou i te mau pāpa’ira’a mo’a ’e te ’utuāfare, e nehenehe te Vārua e tauturu mai ’ia ’ite e aha te mau parau tumu e ha’afaufa’a ’e e ’āparau nō te pāhono i te mau hina’aro o te ’utuāfare. Teie te tahi mau mana’o :
E aha tā ’outou e ’ite ra i roto i teie mau pene e fa’auru nei i tō ’outou ’utuāfare ’ia toro i te rima i te feiā veve ’e te nava’i ’ore ? E taime tano paha nō te fa’aineine i te ’utuāfare nō te hō’ē ’ohipa haere tauturu i te tahi ta’ata nava’i ’ore.
’Ua mātau ānei tō ’outou ’utuāfare i te hō’ē ta’ata e nehenehe e parau ē, e « ta’ata hōro’a [noa] » ’oia ? Nāhea tā tātou e nehenehe e fa’ariro i tā tātou tāvinira’a i te ta’ata ’ei ’ohipa ’oa’oa atu ā ?
Nāhea ’outou i te ha’api’i i tō ’outou ’utuāfare nō ni’a i tā tātou « tama’i » i te ’ino ? E au ānei tō ’outou ’utuāfare e patu i te hō’ē papa’i ’aore rā hō’ē pare ma te tahi pārahira’a ’e te tahi ’ahu ta’oto ? E nehenehe te reira e arata’i i te hō’ē ’āparaura’a nō ni’a i te rāve’a e vaiiho i te mau mea e arata’i ’ē nei ia tātou i te Atua ’e e « fa’atītī atu i te mau mana’o ato’a i te fa’aro’o i te Mesia ra ». E aha te mau « mauiha’a tama’i » pae vārua tā tātou e fa’a’ohipa nei nō te ha’avī i tō tātou nei mau mana’o ? (hi’o Ephesia 6:11–18).
E aha tā tō ’outou ’utuāfare e nehenehe e rave nō te rōtahi rahi atu i ni’a i te ’ōhie « e au i te Mesia nei » ?
Nō te mau mana’o hau atu nō te ha’api’ira’a i te mau tamari’i, hi’o te arata’i ha’api’ira’a o teie hepetoma i roto Mai, pe’e mai—nō te Paraimere.
Ha’amaita’i i tā ’oe iho tuatāpapara’a pāpa’ira’a mo’a
Tāpa’o i te mau mana’o e tae mai ’Ua nā ’ō Elder Richard G. Scott : « Te ’ite i tāpa’o-maita’i-hia e ’ite ïa e vai noa mai i te taime e hina’arohia… [Nā te tāpa’ora’a i te mau arata’ira’a pae vārua] e fa’ati’a ia ’oe ’ia fāri’i i te tahi atu ā māramarama » (« Acquiring Spiritual Knowledge », Ensign, Novema 1993, 88 ; hi’o ato’a Ha’api’ira’a mai tā te Fa’aora, 12, 30).
« E hōro’a te ta’ata ato’a i tāna i ’ōpua i roto i tōna ’ā’au, ’eiaha ma te nounou, ’e mai te mea ē nō te tītau : ’o te ta’ata hōro’a noa ho’i tā te Atua i hina’aro » (2 Korinetia 9:7).