« 9–15 nō Setepa. 2 Korinetia 1–7 : ‘E fa’afaite ’outou i te Atua’ », Mai, pe’e mai—nō te ta’ata hō’ē ’e te ’utuāfare : Faufa’a ’Āpī 2019 (2019)
« 9–15 nō Setepa. 2 Korinetia 1–7 », Mai, pe’e mai—nō te ta’ata hō’ē ’e te ’utuāfare : 2019
9-15 nō Setepa
2 Korinetia 1–7
« E fa’afaite ’outou i te Atua »
’A tuatāpapa ai ’outou i te mau rata a Paulo i tō Korinetia, e pāpa’i i te tahi o te mau parau tumu o te ’evanelia tā ’outou e ’ite mai ’e e feruri i te rāve’a nō ’outou nō te fa’a’ohipa i te reira i roto i tō ’outou orara’a.
Pāpa’i i tō ’oe mau mana’o
I te tahi taime, te ti’ara’a fa’atere o te ’Ēkālesia, ’o te paraura’a ïa i te tahi mau parau fifi. Mai te reira i te tau o Paulo, mai te reira i teienei. E au ē, e rata tā Paulo i hāpono a’ena i te feiā mo’a nō Korinetia tei a’o ’eta’eta ri’i ia rātou ’e ’ua fa’atupu te reira i te ’ino’ino. I roto i te rata tei riro mai i te 2 Korinetia, ’ua tāmata ’oia i te fa’ata’a i te tumu nō te mau parau ’eta’eta i ni’a ia rātou : « I pāpa’i ho’i au i te parau ia ’outou ma te pohe rahi ’e te māuiui rahi ’ā’au, ’e ma te roimata rahi ho’i ; e ’ere ra ē ’ei fa’a’otora’a atu ia ’outou, ’ia ’ite rā ’outou i te rahi o tō’u nei aroha ia ’outou na » (2 Korinetia 2:4). I te taime ’a fāri’i ai ’outou i te tahi fa’atītī’aifarora’a mai roto mai i te hō’ē ti’a fa’atere, pāpū roa e mea tauturu ’ia ’ite ē, nō roto mai te reira i te here HuruMesia. ’E noa atu ē ’aita, mai te peu ’ua ineine tātou ’ia hi’o ia vetahi ’ē i te here tā Paulo i fa’a’ite atu, e mea ’ōhie a’e ’ia fa’aruru tano i te mau ’ohipa māinaina ato’a. Mai tā Elder Jeffrey R. Holland i parau : « Nō reira ’a fa’a’oroma’i i te mau hape a te ta’ata nei—tō ’outou iho ’e tō vetahi e tāvini ra i roto i teie ’Ēkālesia, arata’ihia e te mau tāne ’e te mau vahine tāhuti e hōro’a i tō rātou taime. Ta’a ’ē noa atu tāna Tamaiti fānau tahi maita’i roa a’e, e mau ta’ata hapehape ana’e tā te Atua e ’ohipa nei mai te ’ōmuara’a mai ā o te tau » (« E te Fatu, ’ua fa’aro’o vau », Ensign ’aore rā Liahona, Mē 2013, 94)
Mau mana’o nō tā ’oe iho tuatāpapara’a pāpa’ira’a mo’a
2 Korinetia 1:3–7 ; 4:6–10, 17–18 ; 7:4–7
E ti’a i tō’u mau fifi i te ha’amaita’i iā’u.
’Ia hi’ohia te mau fifi tā Paulo i fa’aruru i roto i tāna tāvinira’a, e’ita iho ā ïa tātou e māere ē, ’ua pāpa’i rahi ’oia nō ni’a i te fā ’e te ha’amaita’ira’a o te mau ’ati. E feruri i te huru tā ’oe mau tāmatara’a e nehenehe e riro ’ei ha’amaita’ira’a ’ia tai’o ’oe i te 2 Korinetia 1:3–7 ; 4:6–10, 17–18 ; ’e 7:4–7. ’Ei hi’ora’a, e nehenehe e feruri i te huru te Atua i « ha’amāhanahana mai ia [’oe] i tō [’oe] mau pohe ato’a nei » ’e te huru ïa ’oe e nehenehe e « ha’amāhanahana i te feiā i ro’ohia i te pohe ra » (2 Korinetia 1:4). ’Aore rā e nehenehe tā ’oe e rōtahi i ni’a i te māramarama o Iesu Mesia tei « ’ana’ana mai ïa i roto i tō tātou ’ā’au », noa atu ā tō ’oe mana’o « ’ati » ’e te « pe’ape’a » (2 Korinetia 4:6–10).
Hi’o ato’a Mosia 24:13–17.
’Ua fāri’i au i te mau ha’amaita’ira’a ma tē ha’amaita’i ia vetahi ’ē i te taime e fa’a’ore atu vau i te hapa.
’Aita e parau rahi nō ni’a i te ta’ata tā Paulo i fa’ahiti i roto i te 2 Korinetia 2:5–11—tei ’ite-noa-hia, ’oia ho’i, ’ua ’ōfati ture ’oia (hi’o ’īrava 5–6) ’e ’ua hina’aro Paulo ’ia fa’a’ore te feiā mo’a i tāna mau hapa (hi’o ’īrava 7–8). Nō te aha, i te tahi taime, tē manuia ’ore nei tātou i te « fa’a’ite pāpū i i tō [tātou] aroha » i te ta’ata i fa’a’ino ia tātou ? (’īrava 8). Nāhea te ’orera’a e hōro’a i te fa’a’orera’a hapa e ha’amāuiui ai i te ta’ata ’e ia tātou ato’a nei ? (hi’o i te mau ’īrava 7, 10–11). E aha te aura’a nō ’oe te parau ē, e « noa’a mai… tā Sātane vāhi ia tātou » i tō tātou ’orera’a e hōro’a i te fa’a’orera’a hapa ? (’īrava 11).
Hi’o atoa Te Parau Ha’api’ira’a e te Mau Parau Fafau 64:9–11.
Nā roto i te tāra’ehara a Iesu Mesia, e nehenehe tā’u e fa’afaite i te Atua.
Mai te tahi atu mau ta’ata, ’ua ’ite Paulo e aha te huru te rirora’a ’ei « ta’ata ’āpī ». Mai te ta’ata hāmani ’ino i te keresetiano ’oia i te rirora’a mai ’ei tino pāruru mata’u ’ore nō te Mesia. ’Ua ’ite iho ’oia nāhea Iesu, tei « ’ore i ’ite i te hara ra », i te rave-’ē-ra’a i tā tātou hara ma te hōro’a ia tātou i tōna « parau ti’a », i te fa’aho’ira’a ia tātou i te hō’ēra’a ’e te Atua. ’Ia tai’o ’oe i teie mau ’irava, e feruri e aha te aura’a e fa’afaite ’e te tahi atu ta’ata. Nāhea te reira e tauturu ai ia ’oe ’ia māramarama e aha te aura’a te fa’afaitera’a i te Atua ? E feruri i te mau mea e nehenehe e fa’ata’a ’ē ia ’oe i te Atua. E aha te tītauhia ’ia rave ’oe nō te fa’afaite hope roa iāna ?
Hi’o ato’a 2 Nephi 10:23–25.
E arata’i te ’oto e au i te Atua ra i te tātarahapa.
’Aita tātou i mātau ’ia feruri i te ’oto ’ei mea maita’i, tē parau nei rā Paulo i « te ’oto e au i te Atua ra » ’ei tuha’a tumu nō te tātarahapara’a. E aha tā ’oe e ha’api’i mai nō ni’a i te ’oto e au i te Atua ra i roto i te mau mea i muri nei ? 2 Korinetia 7:8–11 ; Alama 36:16–21 ; Moromona 2:11–15. I te hea taime ’oe i te ’itera’a i te ’oto e au i te Atua, ’e e aha tā te reira i fa’atupu i roto i tō ’oe orara’a ?
Mau mana’o nō tā te ’utuāfare tuatāpapara’a pāpa’ira’a mo’a ’e nō te pō ’utuāfare
’Ia tai’o ’outou i te mau pāpa’ira’a mo’a ’e te ’utuāfare, e nehenehe te Vārua e tauturu mai ’ia ’ite e aha te mau parau tumu e ha’afaufa’a ’e e ’āparau nō te pāhono i te mau hina’aro o te ’utuāfare. Teie te tahi mau mana’o :
’Ua ani a’enei te mau melo o tō ’outou ’utuāfare i te hō’ē ta’ata ’ia pāpa’i i te hō’ē rata parau pa’epa’e ia rātou, nō te hō’ē ānei ’ohipa ’aore rā te tahi fare ha’api’ira’a ? E ani ia rātou ’ia fa’ati’a mai i te ’ohipa i tupu nō rātou ’e e aha te mau parau i pāpa’ihia nō ni’a ia rātou. ’Ua ha’api’i Paulo ē, ’ua riro te orara’a o te feiā mo’a mai te rata parau pa’epa’e nō te ’evanelia, nō ’ō mai i te Mesia iho, e rata « ’aita i pāpa’ihia i te inita, nā te Vārua rā o te Atua ora ra ». ’Ia tai’o ’āmui ’outou i te 2 Korinetia 3:1–3, e ’āparau nāhea tō tātou hi’ora’a e riro nei mai te rata parau pa’epa’e i te ’evanelia o te nehenehe e « ’itea ’e ’ua tai’ohia e te ta’ata ato’a ». Penei a’e e nehenehe te melo tāta’itahi o te ’utuāfare e pāpa’i i te hō’ē rata ’aore rā te hō’ē « ’episetole » e tātara nei nāhea te tahi atu melo o te ’utuāfare i riro ’ei hi’ora’a maita’i nō te ti’ara’a pipi nō Iesu Mesia. E nehenehe tā rātou e tai’o i tā rātou mau rata i te ’utuāfare ’e e hōro’a atu i te melo iho o te ’utuāfare nō ni’a iāna tā rātou i pāpa’i. Nō te aha e mea faufa’a ’ia māramarama ē, e mau « ’episetole a te Mesia » tō tātou nei orara’a ?
E aha te aura’a o te parau « e haere’a fa’aro’o… e ’ere i te haere’a ’ite mata » ? E aha tā tātou e rave ra nō te fa’a’ite ē, tē ti’aturi nei tātou i te mau mea e’ita e nehenehe e hi’o ?
E ti’a ānei i tō ’outou ’utuāfare e feruri—’aore rā e ’ite mai—i te tahi hi’ora’a o te hō’ē mea i roto i te nātura e haere nei nā roto i te mau tauira’a fa’ahiahia nō te riro mai ’ei ’ohipa ’āpī ? (e hi’o i te mau hōho’a e ’āpe’e nei i teie arata’i ha’api’ira’a). E aha tā teie mau hi’ora’a e ha’api’i nei ia tātou nō ni’a i te huru te ’evanelia a Iesu Mesia e nehenehe e taui ia tātou ?
’Ia au i teie mau ’īrava, e aha te aura’a te rirora’a « e rave ’ohipa nā te Atua » ?
Nāhea tā tātou e nehenehe e pe’e i te parau a’o a Paulo e « haere… i rāpae au mai roto mai [i te feiā parau ti’a ’ore] ra, ’ia ta’a ’ē ’outou », ’e ’ia riro ato’a ho’i ’ei mau hi’ora’a maita’i nō rātou ’ati a’e ia tātou ?
Nō te mau mana’o hau atu nō te ha’api’ira’a i te mau tamari’i, hi’o te arata’i ha’api’ira’a o teie hepetoma i roto Mai, pe’e mai—nō te Paraimere.
Ha’amaita’i i tā tātou ha’api’ira’a
Fa’a’ohipa i te mau ha’api’ira’a tao’a Tē vai nei te tahi mau mea o te ’evanelia, mai te Tāra’ehara, e mea fifi ’ia māramarama. E ’ōpua e fa’a’ohipa i te tahi hōho’a ’aore rā te tahi tao’a e tauturu i tō ’outou ’utuāfare ’ia māramarama i te mau parau tumu tā ’outou e ’ite mai i roto i te mau pāpa’ira’a mo’a.
’Ia fa’afāriuhia tātou i te ’evanelia a te Mesia, ’ua rahi roa tō tātou tauira’a ’o tā Paulo i parau e riro mai tātou ’ei « ta’ata ’āpī » (2 Korinetia 5:17).