9–15 nō Setepa

2 Korinetia 1–7

« E fa’afa’ite ’outou i te Atua »

E haʼamata i tā ʼoutou faʼaineineraʼa nā roto i te taiʼoraʼa i te 2 Korinetia 1–7. E nehenehe teMai, pe’e mai—nō te ta’ata hō’ē ’e te ’utuāfare e tauturu ia ’outou ’ia hāro’aro’a i teie mau pene, ’e e nehenehe teie fa’anahora’a e hōro’a mai ia ’outou i te mau mana’o nō te ha’api’ira’a.

E pāpa’i i tō ʼoutou mau mana’o

E ani ’ia fa’a’ite mai i te mana’o

ʼUa pāpaʼi paha te tahi mau tamariʼi i roto i tā ʼoutou piha haʼapiʼiraʼa i te mau rata i teie hepetoma e nāhea te hōʼē melo o te ʼutuāfare e riro ai ʼei hōʼē hiʼoraʼa maitaʼi nō te hōʼē pipi a Iesu Mesia. Mai te mea ʼua nā reira rātou, e ani ia rātou nā mua roa ʼia faʼaʼite mai i te hōʼē rata i mua i te mau pīahi. ʼAore rā, e ani ia rātou ’ia faʼaʼite mai i te tahi mea tā rātou i ʼapo mai.

Ha’api’i i te ha’api’ira’a tumu

Te mau tamari’i ’āpī a’e

2 Korinetia 1:3–4

E tāmāhanahana mai te Metua i te Ao ra iāʼu, ʼe e nehenehe tāʼu e tāmāhanahana ia vetahi ʼē.

Nāhea e nehenehe ai ia ʼoutou ʼia hōroʼa i te mau tamariʼi i te tiʼaturiraʼa ē e tāmāhanahana mai te Metua i te Ao ra ia rātou ? Nāfea e nehenehe ai ia ’outou ’ia fa’aitoito ia rātou ’ia tāmāhanahana ia vetahi ’ē ?

Mau ’ohipara’a e nehenehe e rave

• E ’āfaʼi mai i te mau taoʼa i roto i te piha haʼapiʼiraʼa ’o te hōroʼa mai i te tāmāhanahanaraʼa mai te hōʼē ʼahu taʼoto ʼaore rā te hōʼē plasta. E ani i te mau tamariʼi e aha te tāmāhanahana ia rātou ʼia ʼoto ʼaore rā ʼia riʼariʼa anaʼe rātou ʼaore rā e fifi tō rātou. E taʼio i te 2 Korinetia 1:3–4 ʼe te mau tamariʼi, ʼe e tātara atu ē te « pohe » o te tahi atu ïa parau nō te mau fifi rahi. E faʼaʼite atu i te tahi mau rāveʼa i tāmāhanahana ai te Metua i te Ao ra ia ʼoutou, ʼe e faʼaʼite pāpū atu ē e tāmāhanahana atoʼa ʼoia i te mau tamariʼi.

• E faʼaʼite i te mau hōhoʼa nō te mau taʼata e bāpetizohia ra (hiʼo te Buka hōhoʼa nō te ʼEvanelia, nūmera 103 ʼe 104) ’a taiʼo ai ʼoutou i te 2 Korinetia 1:4 ʼe Mosia 18:8–9 i te mau tamariʼi. E tātara atu ē i te bāpetizoraʼa ’ua fafau tātou e tāmāhanahana ia vetahi ’ē. Nāhea e nehenehe ai ia tātou ’ia peʼe i te aʼo a Paulo e « haʼamāhanahana i te feiā i roʼohia i te pohe ra » ?

• E ani i te mau tamariʼi ’ia nīnoʼa i te hōʼē hōhoʼa nō rātou iho e tauturu ra i te tahi taʼata i roto i te ʼati. E vaiiho ia rātou ’ia faʼaʼite mai e nāhea te raveraʼa i teie mau mea e nehenehe ai e haʼamāhanahana ia vetahi ʼē.

2 Korinetia 2:7–8, 10

E nehenehe tāʼu e faʼaʼore i te hapa a vetahi ʼē.

E māʼiti i roto i teie mau ʼohiparaʼa—ʼaore rā e ’āfaʼi mai i tā ʼoutou iho—nō te tauturu i te haʼapūai i te hinaʼaro o te mau tamariʼi ’ia faʼaʼore i te hapa a vetahi ʼē.

Mau ’ohipara’a e nehenehe e rave

• E haʼamāramarama atu i te mau tamariʼi ē ʼua hinaʼaro Paulo ʼia faʼaʼore te feiʼa moʼa nō Korinetia i te hara a te hōʼē taʼata tei hara. E taiʼo i te 2 Korinetia 2:7–8, 10, ʼe a ani i te mau tamariʼi ’ia tuʼu i tō rātou mau rima i niʼa i tō rātou māfatu i te mau taime atoʼa e faʼaroʼo rātou i te mau tāʼo e faʼaʼore ʼe ʼua faʼaʼore.

• E ani i te mau tamariʼi ’ia haʼuti mai e nāhea e nehenehe ai ia rātou ʼia pāhono atu i roto i te mau taime ʼua rave te tahi taʼata i te tahi mea ʼino i niʼa ia rātou. E vaiiho ia rātou ’ia parau ’ia tae i tō rātou taime « te tātarahapa nei au » ʼe « te faʼaʼore nei au i tā ʼoe hapa ». Nāhea tātou e tauturu ai i te mau taʼata ʼia ʼite ē tē faʼaʼore nei tātou i tā rātou mau hapa ? » E tātara atu ē te hōʼē rāveʼa ’o te « faʼaʼite-pāpu-ra’a atu ïa i tō ʼoutou aroha », ʼaore rā te faʼaʼiteraʼa i tō ʼoutou aroha nō rātou (2 Korinetia 2:8).

2 Korinetia 4:1–2

Tē ti’aturi nei au ’ia ora ma te parau-ti’a.

ʼUa haʼapiʼi Paulo ē eʼita te mau tāvini a te Mesia e haʼavare ia vetahi ʼē—ʼua « faʼaru’e rātou i te peu riʼi moʼe nō te haʼavare ». E feruri i te mau rāveʼa e nehenehe ai ia ʼoutou ʼia haʼapūai i te hinaʼaro o te mau tamariʼi ’ia vai parau-tiʼa noa i roto i te mau mea atoʼa.

Mau ’ohipara’a e nehenehe e rave

• E tauturu i te mau tamariʼi ʼia tāmau ʼāʼau i te parau « tē tiʼaturi nei mātou e mea tiʼa ’ia ora ma te parau-tiʼa » (Te mau Hiroʼa Faʼaroʼo 1:13). E pāpaʼi i teie parau i niʼa i te mau tāhere rima ʼāpi parau e nehenehe i te mau tamariʼi ’ia faʼaʼunaʼuna ʼe ʼia ʼōʼomo i te fare. E tātara atu ē te auraʼa nō te ora ma te parau-tiʼa ’o te parauraʼa ïa i te parau mau.

• E ani i te mau tamariʼi ʼia ʼāfaʼi i tō rātou rima i niʼa ’ia parau anaʼe ʼoutou i te tahi mea e parau mau ʼe ʼia tuʼu i raro ʼia parau anaʼe ʼoutou i te tahi mea ʼe ʼere i te parau mau. E parau i te mau faʼahitiraʼa parau ʼōhie ʼe te faufaʼa mai te « e sābati teie mahana » ʼaore rā « e toru tōʼu ihu ». E tāpiti i teie ʼohiparaʼa maʼa taime, ma te vaiiho i te mau tamariʼi ʼia rave i tō rātou taime nō te fa’ahiti i te mau parau mau ʼe te mau parau haʼavare. Nō te aha e mea maitaʼi ’ia riro ’ei ta’ata parau-tiʼa ?

Ha’api’i i te ha’api’ira’a tumu

Te mau tamari’i pa’ari a’e

2 Korinetia 1:3-4

E tāmāhanahana mai te Metua i te Ao ra iāʼu, ʼe e nehenehe tāʼu e tāmāhanahana ’ia vetahi ʼē.

E nehenehe te haʼamanaʼoraʼa e nāhea tō te Atua tāmāhanahanaraʼa ia rātou e faʼauru i te mau tamariʼi ’ia hōroʼa i te tāmāhanahanaraʼa ia vetahi ʼē.

Mau ’ohipara’a e nehenehe e rave

• ’A taiʼo ai ʼoutou i te 2 Korinetia 1:3–4, e ani i te mau tamariʼi ʼia faʼaroʼo nō te hōʼē pāhonoraʼa i te uiraʼa « e aha tā te Atua e rave nō tātou ? » E tauturu i te mau tamariʼi ’ia tāpura i te mau rāveʼa ’a tāmāhanahana ai te Atua ia tātou. E ani i te mau tamariʼi ’ia faʼaʼite mai i te mau taime ʼoto ʼaore rā ’a peʼapeʼa ai rātou ʼaore rā ’a mātaʼu ai rātou e ʼua tāmāhanahana mai te Atua ia rātou.

• E ani i te mau tamariʼi ʼia faʼaʼite mai i te mau rāveʼa e nehenehe ai ia tātou ʼia tāmāhanahana ia vetahi ʼē. E hōroʼa atu i te taime ia rātou ’ia feruri i te tahi taʼata tā rātou i mātau ’o tē hinaʼaro nei i te tāmāhanahanaraʼa ʼe e faʼanaho i te hōʼē ʼōpuaraʼa nō te haere atu e fārerei i taua taʼata ra.

2 Korinetia 2:5–11

E nehenehe tāʼu e faʼaʼore i te hapa a vetahi ʼē.

E nehenehe te faʼaʼoreraʼa i te hapa a vetahi ʼē e riro i te mea paʼari ’ia hāmani ʼino anaʼe rātou ia tātou. E ʼite rā te mau tamariʼi tā ʼoutou e haʼapiʼi nei i te aroha, te hau ʼe te ʼoaʼoa ʼia haʼapiʼi anaʼe rātou i te faʼaʼore i te hapa.

Mau ’ohipara’a e nehenehe e rave

• E parau atu i te mau tamariʼi ē ʼua hara te tahi taʼata i Korinetia ʼe ʼua « faʼatupu i te ʼoto » i roto i te feiā moʼa (hiʼo i te 2 Korinetia 2:5). E ani i te mau tamariʼi ’ia māʼimi i te 2 Korinetia 2:7–8 nō te ʼimi e aha tā Paulo i hinaʼaro i te feiā moʼa ʼia rave.

• E faʼaʼite atu i te hōʼē taime a faʼaʼore ai ʼoutou i te hapa a te tahi taʼata—ʼaore rā ʼua faʼaʼore mai te tahi taʼata i tā ʼoutou ra hapa—ʼe tō ʼoutou huru i muri iho.

2 Korinetia 5:6–7

E « haereʼa faʼaroʼo, e ʼere i te haereʼa ʼite mata tōʼu ».

E feruri e nāhea e nehenehe ai ia ʼoutou ’ia faʼaitoito i te mau tamariʼi ʼia haʼapaʼo i te mau faʼaueraʼa a te Atua noa atu ’aita rātou e ʼite i te reira ihoa taime i te mau haʼamaitaʼiraʼa tā rātou e hinaʼaro ra.

Mau ’ohipara’a e nehenehe e rave

• E taiʼo i te 2 Korinetia 5:6–7 ʼe Alama 32:21 ʼe te mau tamariʼi, ʼe e ani ia rātou ʼia ʼimi i te mau tāʼo ʼe te mau pereota ’o te tauturu i te faʼataʼara’a mai i te auraʼa o te faʼaroʼo. E ani ia rātou ʼia pāpaʼi i tā rātou iho mau tātararaʼa, ʼia parau mai i te reira, ʼe ʼia tuʼu atu i te reira i niʼa i te ʼiri pāpaʼiraʼa.

• E tāpiri i te mata o te hōʼē o te mau tamariʼi, ʼe e ani i te tahi atu mau tamariʼi ʼia hōroʼa i te arataʼiraʼa nō te tauturu iāna ’ia rave faʼaoti i te tahi ʼohipa mai te hāmaniraʼa i te hōʼē patu ʼe te mau ʼōfaʼi, te tuʼu ʼāmuiraʼa i te hōʼē haʼuti, ʼaore rā te haereraʼa nā roto i te piha. Nāhea teie ’ohipara’a e tauturu ai ia tātou ’ia hāro’aro’a ē, e aha te aura’a ʼia « haereʼa faʼaroʼo » i te Atua ra ?

• E faʼaʼite i te video « Te faʼaroʼo mā ʼe te ʼōhie » (LDS.org), ʼe e ani i te mau tamariʼi e nāhea te tamāhine ʼāpī haereraʼa ma te faʼaroʼo. E faʼaʼite atu i te hōʼē taime i tiʼa ai ia ʼoutou ’ia vai te faʼaroʼo i te Atua. E ani i te mau tamari’i ’ia fa’a’ite mai i te hō’ē ’itera’a tō rātou nō ni’a i te haereraʼa ma te faʼaroʼo.

2 Korinetia 7:8–11

Nā te ʼoto e au i te Atua e arata’i ti’a atu iāʼu i te tātarahapa.

E haʼamā ʼaore rā ʼe taiā ihoa te mau tamariʼi ’ia ʼite-anaʼe-hia rātou i te raveraʼa i te tahi mea hape. E tauturu ia rātou ’ia faʼataʼa ʼē i teie mau manaʼo i te ʼoto e au i te Atua, o te arataʼi tiʼa atu i te tātarahaparaʼa mau.

Mau ’ohipara’a e nehenehe e rave

• E haʼamāramarama ē i roto i te 2 Korinetia 7:8–11, ʼua faʼahiti Paulo i te hōʼē rata tāna i pāpaʼi aʼena i te feiā moʼa, ma te faʼaara taiā ʼore ia rātou nō niʼa i tā rātou mau hara. E taiʼo ʼāmui i teie mau ʼīrava. Nō te aha Paulo i ʼoaoʼa ai nō te ʼoto o te feiā moʼa ? E faʼaʼite atu ē ʼua piʼihia teie huru ʼoto te ʼoto e au i te Atua.

• E ani i te mau tamariʼi ’ia tāpiri i tō rātou mata ʼe ʼia feruri i te hōʼē taime ʼua rave rātou i te tahi ʼohipa hape ʼe ʼua ʼoto rātou nō te reira. E ani ia rātou ’ia ui ia rātou iho, « nō te aha vau i ʼoto ai ? » E pāpaʼi i niʼa i te ʼiri pāpaʼiraʼa te tahi mau tumu i ʼoto ai te mau taʼata i muri aʼe i te raveraʼa i te tahi mea hape, mai te « ʼua riʼariʼa vau e faʼaʼutuʼahia vau » ʼaore rā « ʼua haʼamā vau nō te manaʼo o te taʼata nōʼu » ʼaore ra « ʼua ʼite au ʼe ʼaita te Metua i te Ao ra i māuruuru iāʼu ». E aha te mau pāhonoraʼa i niʼa i te tāpura e au i te « ʼoto e au i te Atua » ? Nō te aha te ʼoto e au i te Atua ʼei mea maitaʼi aʼe i te tahi atu mau huru ʼoto e nehenehe tā tātou e ʼite i muri aʼe i te raveraʼa i te tahi mea hape ?

E faʼaitoito i te haʼapiʼiraʼa mai i te fare

E parau atu i te mau tamariʼi e nehenehe tā rātou e faʼaʼite atu i te hōʼē o te mau ʼohiparaʼa i roto i te haʼapiʼiraʼa nō teie mahana i tō rātou ʼutuafare i te fare, penei aʼe i roto i te hōʼē pureraʼa pō ʼutuāfare.

Haʼamaitaʼiraʼa i tā tātou haʼapiʼiraʼa

Pia i te hō’ē pāpa’ira’a mo’a. E mā’iti i te hō’ē pāpa’ira’a mo’a faufa’a rahi nō ’outou ’e e pia i te reira i te vāhi e ’ite pinepine te mau pīahi. E ani i te tahi atu mau pīahi e fa’a’ohu nō te mā’itira’a i te hō’ē pāpa’ira’a moa nō te pia.