« 26 nō ’Ātete–1 nō Tetepa. 1 Korinetia 8–13: ‘ ʼO te tino ’outou nō te Mesia’ » Mai, pe’e mai—nō te Paraimere : Faufa’a ’Āpī 2019 (2019)
« 26 nō ’Ātete–1 nō Tetepa. 1 Korinetia 8–13 », Mai, pe’e mai—nō te Paraimere : 2019
« 26 nō ’Ātete–1 nō Tetepa
1 Korinetia 8–13
« ’O te tino ’outou nō te Mesia »
’A taiʼo ai ʼoutou i te 1 Korinetia 8–13, e faʼaroʼo i te mau muhumuhuraʼa a te Vārua e nāhea i te haʼapiʼi i te mau tumu parau i roto i teie mau pene. E haʼamanaʼo ē e nehenehe te mau manaʼo nō te ʼohiparaʼa e faʼatanohia nō te mau tamariʼi paʼari aʼe ʼe te mau tamariʼi ʼāpī aʼe.
E pāpa’i i tō ʼoutou mau mana’o
E ani ’ia fa’a’ite mai i te mana’o
E ani i te mau tamariʼi ’ia faʼaʼite mai i te tahi mea tā rātou i rave i roto i te pureraʼa ʼōroʼa i teie mahana nō te manaʼo ia Iesu.
Ha’api’i i te ha’api’ira’a tumu
Te mau tamari’i ’āpī a’e
E tauturu te Metua i te Ao ra iāʼu ’ia rave i te mau māʼitiraʼa parau-tiʼa.
E ʼere i te mea ʼōhie i te mau taime atoʼa ’ia māʼiti i te mea tiʼa, e tauturu mai rā te Metua i te Ao ra ia tātou ’ia rave i te mau māʼitiraʼa parau-tiʼa.
Mau ’ohipara’a e nehenehe e rave
-
E taiʼo i te 1 Korinetia 10:13 i te mau tamariʼi, ma te ani atu ia rātou ’ia fāriu ʼē atu ’ia faʼaroʼo anaʼe rātou i te mau tāʼo « faʼahemahia » ʼaore rā « faʼahemaraʼa ».
-
E hāmani i te tahi mau tāpaʼo faʼaea nā te mau tamariʼi. E faʼatiʼa i te mau ʼāʼamu poto nō te mau taʼata ’o te fātata i te rave i te mau māʼitiraʼa hape. ’A faʼaroʼo ai te mau tamariʼi, e ani ia rātou ’ia ’āfaʼi i tā rātou mau tāpaʼo i niʼa ’ia rave anaʼe te taʼata i roto i te ʼāʼamu i te hōʼē māʼitiraʼa hape. E aha te māʼitiraʼa tiʼa ? E faʼaʼite pāpū atu ē e tauturu te Metua i te Ao ra ia rātou ʼia māʼiti i te mea tiʼa.
-
E faʼaʼite i te hōʼē hōhoʼa nō Iesu, ʼe e hīmene ʼe te mau tamariʼi i te hōʼē hīmene nō niʼa ia Iesu Mesia, mai « Jésus-Christ est mon modèle » (Chants pour les enfants, 40–41). Nāhea te haʼamanaʼoraʼa ia Iesu e tauturu ai ia tātou ’ia rave i te mau mā‘itira’a maitaʼi ? E faʼaʼite mai i te mau hōhoʼa nō te tahi atu mau mea ’o te tauturu ia tātou ’ia rave i te mau māʼitiraʼa maitaʼi, mai te mau metua ʼaore rā te mau pāpaʼiraʼa moʼa. E ani i te mau tamariʼi e aha tei tauturu ia rātou ’ia rave i te mau māʼitiraʼa maitaʼi.
ʼUa haʼamaitaʼi mai te Metua i te Ao ra iāʼu ʼe te mau hōroʼaraʼa pae vārua.
ʼUa hōroʼa te Metua i te Ao ra i tāna mau tamariʼi atoʼa i te mau hōroʼaraʼa pae vārua. E aha te mau hōroʼaraʼa pae vārua tā ʼoutou i ʼite i roto i te mau tamariʼi tā ʼoutou e haʼapiʼi nei ?
Mau ’ohipara’a e nehenehe e rave
-
E taiʼo ʼāmui i te 1 Korinetia 12:7–11, ʼe e ʼimi i te mau hōroʼaraʼa pae vārua tā Paulo i piʼi. E tauturu i te mau tamariʼi ’ia feruri i te mau ʼohipa e nehenehe e tūʼati atu i teie mau hōroʼaraʼa a te Vārua, ʼe ʼia faʼaʼohipa i te mau ʼohiparaʼa nō te tauturu i te mau tamariʼi ʼia haʼamanaʼo i te mau hōroʼaraʼa.
-
E ani i te mau tamariʼi ’ia pāpaʼi i te hōʼē hōhoʼa nō te hōʼē taoʼa aroha au-roa-hia e rātou tā rātou hoʼi i fāriʼi. E tātara atu ē e hōroʼa mai te Metua i te Ao ra ia tātou te mau hōroʼaraʼa pae vārua nō te haʼapūai i tō tātou faʼaroʼo ʼe nō te tauturu ia tātou ʼia haʼamaitaʼi ’ia vetahi ʼē.
-
E pāpaʼi i te hōʼē rata iti nā te tamariʼi tātaʼitahi, ma te faʼaʼite i te hōʼē hōroʼaraʼa vārua tā ʼoutou i ʼite i roto iāna (ʼaore rā e nehenehe tā ʼoutou e ani i te mau metua ʼia pāpaʼi i teie mau nota). E pūʼohu i te mau rata iti mai te mau taoʼa aroha. E faʼatiʼa i te mau tamariʼi ’ia ʼiriti i tā rātou mau taoʼa aroha, ʼe ’a tauturu ia rātou ’ia taiʼo i tā rātou mau hōroʼaraʼa pae vārua.
ʼUa hōroʼa te Metua i te Ao ra i tāna mau tamariʼi atoʼa i te mau hōroʼaraʼa pae vārua.
E nehenehe au e aroha ia vetahi ʼē.
Tē haʼapiʼi mai nei te mau pāpaʼiraʼa moʼa ē te aroha ’o te « hinaʼaro mau ïa i te Mesia » (Moroni 7:47). Nāhea e nehenehe ai ia ʼoutou ʼia tauturu i te mau tamariʼi ’ia faʼatupu ʼe ’ia faʼaʼite i te aroha mai tō te Mesia ?
Mau ’ohipara’a e nehenehe e rave
-
E taiʼo i te 1 Korinetia 13:8 ʼe te Moroni 7:47, ʼe e tauturu i te mau tamariʼi ’ia tāpiti i te parau i te pereota « te aroha o te hinaʼaro mau ïa i te Mesia » E faʼaʼite i te mau hōhoʼa nō Iesu Mesia e aroha ra ʼe e hāmani maitaʼi ra, ʼe e ani i te mau tamariʼi e nāhea ʼoia i faʼaʼite i te aroha ia vetahi ʼē (hiʼo Buka Hōhoʼa nō te ʼEvanelia nō te mau manaʼo).
-
E ani i te hōʼē tamariʼi ʼia tiʼa mai i mua i te mau tamariʼi. E ani i te tamariʼi e nāhea ʼoia e tāvini ai i te tahi atu taʼata i roto i te piha haʼapiʼiraʼa. E tātara atu ē teie ïa te hōʼē rāveʼa e nehenehe ai ia tātou ʼia faʼaʼite i te aroha ia vetahi ʼē. E ani i te tahi atu mau tamariʼi ’ia rave i tō rātou taime nō te faʼaʼite i te aroha.
-
E hīmene i te hōʼē hīmene nō niʼa i te aroharaʼa ia vetahi ʼē, mai « ʼAimez chacun » ʼaore « Aimez vos frères » (Chants pour les enfants, 39, 74), ʼe te mau tamariʼi. E faʼaʼite i te mau hōhoʼa nō te mau taʼata huru rau (mai te hōʼē metua, ʼorometua haʼapiʼi, ʼaore rā hoa), ʼe e ani i te mau tamariʼi ʼia faʼaʼite mai e nāhea e nehenehe ai ia rātou ʼia tāvini i taua taʼata ra. E ani i te mau tamariʼi ʼia feruri i te tahi taʼata e nehenehe tā rātou e tāvini atu ʼe ʼia pāpaʼi i te hōʼē rata iti ʼaore rā ʼia pāpaʼi i te hōʼē hōhoʼa nō te hōroʼa atu i taua taʼata ra. Mai te mea e hinaʼaro rātou i te tahi atu mau manaʼo, e faʼaʼite i te video « E faʼaʼite atu i te reira » (LDS.org).
Ha’api’i i te ha’api’ira’a tumu
Te mau tamari’i pa’ari a’e
E tauturu te Metua i te Ao ra iāʼu ʼia pātoʼi atu i te faʼahemaraʼa.
E nehenehe te mau fafauraʼa i roto i teie ʼīrava e hōroʼa i te mau tamariʼi i te tiʼaturiraʼa ē e tauturu te Metua i te Ao ra ia rātou ʼia faʼahema-anaʼe-hia rātou.
Mau ’ohipara’a e nehenehe e rave
-
E ani i te mau tamariʼi ’ia taiʼo pea i te 1 Korinetia 10:13 ʼe ʼia haʼapoto mai i te ʼīrava nā roto i tā rātou iho mau parau. E ani i te mau tamariʼi ’ia faʼaʼite mai i te hōʼē taime i tauturu mai ai te Metua i te Ao ra ia rātou ’ia ʼape ʼaore rā ʼia pātoi i te faʼahemaraʼa. Nāhea e nehenehe ai ia tātou ’ia tiʼaturi i te Metua i te Ao ra ʼia faʼahema-anaʼe-hia tātou ?
-
E pāpaʼi i niʼa i te mau ʼapi parau te mau faʼahemaraʼa tā te mau tamariʼi e nehenehe e faʼaruru atu i teie mahana. E ani i te mau tamariʼi ʼia māʼiti tātaʼitahi rātou i te hōʼē parau ʼe ʼia faʼaʼite mai e aha tā te Metua i te Ao ra i hōroʼa nō te tauturu ia tātou ’ia ʼape ʼaore rā ʼia pātoʼi atu i teie mau faʼahemaraʼa. Nō te tahi mau manaʼo, e taiʼo ia Alama 13:28–29.
I roto i te taime nō te ʼōroʼa, e nehenehe ai e feruri e nāhea vau i te peʼe atu i te Faʼaora.
E auraʼa taʼa ʼē faʼahou tō te ʼōroʼa nō te mau tamariʼi tei bāpetizohia. E tauturu ia rātou ’ia ʼite i teie ʼōroʼa moʼa ʼei rāveʼa nō te « hiʼopoʼa » ia tātou iho ʼe ʼia faʼaʼāpī i tā rātou mau fafauraʼa i te Faʼaora (1 Korinetia 11:28).
Mau ’ohipara’a e nehenehe e rave
-
E ani i te hō’ē tamari’i ’ia tai’o i te 1 Korinetia 11:28. E aha te auraʼa ʼia « hiʼopoʼa » ia tātou hou e ʼāmu ai i te ʼōroʼa ? E ani i te mau tamariʼi ’ia feruri i te tahi atu mau taʼata o te hiʼopoʼa i te mau mea, mai te mau taote, te mau mutoʼi, ʼaore rā mau ʼaivanaʼa (ʼei hiʼoraʼa, ʼe hiʼopoʼa te mau taote i tō tātou tino nō te mau pēpē ʼaore rā mau maʼi e tiʼa ’ia faʼaorahia). E aha tā rātou ʼohipa e haʼapiʼi nei ia tātou e nāhea e tiʼa ai ia tātou ʼia hiʼopoʼa ia tātou iho ʼia ʼāmu anaʼe tātou i te ʼōroʼa ?
-
E ani i te mau tamariʼi ’ia hāmani i te hōʼē tāpura nō te mau mea e nehenehe ia rātou ʼia feruri ’ia ʼāmu anaʼe rātou i te ʼōroʼa. E ani ia rātou ’ia faʼaʼohipa i tā rātou mau tāpura ʼei faʼahaʼamanaʼoraʼa ’ia hiʼopoʼa ia rātou iho i roto i te ʼōroʼa.
1 Korinetia 12:4, 7–12, 31 ; 13:1–8
E mau hōro’ara’a pae vārua tāʼu.
ʼUa haʼapiʼi Paulo ē ʼua « hōroʼahia i te taʼata atoʼa » te mau hōroʼaraʼa pae vārua (1 Korinetia 12:7). E nehenehe teie tumu parau e tauturu i te mau tamariʼi ʼia haʼamau i tō rātou manaʼo faufaʼa, i te taime ihoa ra e faʼaʼohipa ai rātou i tō rātou mau hōroʼaraʼa nō te haʼamaitaʼi ia vetahi ʼē.
Mau ’ohipara’a e nehenehe e rave
-
E ani i te mau tamariʼi ’ia pāpaʼi i niʼa i te ʼiri pāpaʼiraʼa te mau hōroʼaraʼa pae vārua tā rātou i ʼite i roto i te 1 Korinetia 12:7–11 ; 13:2. E ani ia rātou ’ia ʼimi i te tahi atu ā mau hōroʼaraʼa tei faʼahitihia i roto i te Moroni 10:8–18 ʼe Te Parau Haʼapiʼiraʼa ʼe te mau Parau Fafau 46:13–26. E faʼaʼite ia rātou i te tahi atu ā mau hōroʼaraʼa pae vārua tei faʼahitihia e Elder Marvin J. Ashton: « Te hōroʼaraʼa nō te ani ; te hōroʼaraʼa nō te faʼaroʼo ;… te hōroʼaraʼa nō te ʼaperaʼa i te marōraʼa ; … te hōroʼaraʼa nō te ʼimi i te mea parau-tiʼa ; te hōroʼaraʼa ʼia ʼore e faʼahapa ; te hōroʼaraʼa ’ia ʼimi i te Atua nō te arataʼiraʼa ; … te hōroʼaraʼa nō te utuuturaʼa ia vetahi ʼē ; … te hōroʼaraʼa nō te pūpūraʼa i te pure ; te hōroʼaraʼa nō te faʼaʼite i te hōʼē ʼiteraʼa pāpū pūai » (« E rave rahi mau hōroʼaraʼa », Ensign, Novema 1987, 20). E ani i te mau tamariʼi ’ia parau mai nō niʼa i te mau hōroʼaraʼa pae vārua tā rātou i ʼite i roto i te tahi ʼe te tahi.
-
Hou te haʼapiʼiraʼa, e ani i te mau metua nō niʼa i te mau hōroʼaraʼa tā rātou i ʼite i roto i tā rātou mau tamariʼi, ʼaore rā ’ia feruri ʼoutou iho i tō rātou mau hōroʼaraʼa. E parau atu i te mau tamariʼi nō niʼa i teie mau hōroʼaraʼa, ’e e ani ia rātou ’ia ʼimi ’o vai te tamariʼi tei mau i taua hōroʼaraʼa ra. E ani i te mau tamariʼi ’ia pāpaʼi i te hōʼē rāveʼa e faʼaʼohipa ai rātou i tō rātou hōroʼaraʼa nō te haʼamaitaʼi i te tahi taʼata i teie hepetoma.
-
E faʼaʼite i te mau huru orara’a e nehenehe ai i te taʼata ʼia faʼaʼohipa i te hōʼē hōroʼaraʼa pae vārua nō roto mai i te 1 Korinetia 12:7–10. E ani i te mau tamariʼi ʼia ʼite i te mau hōroʼaraʼa pae vārua e nehenehe e faʼaʼohipahia i roto i te hiʼoraʼa tātaʼitahi.
E faʼaitoito i te haʼapiʼiraʼa mai i te fare.
E ani i te mau tamariʼi ʼia faʼaʼite i tō rātou mau hōroʼaraʼa pae vārua i tō rātou ʼutuāfare ʼe e ani i te mau melo nō tō rātou ʼutuāfare e aha tō rātou mau hōroʼaraʼa.
Haʼamaitaʼiraʼa i tā tātou haʼapiʼiraʼa
Fa’atae i te mau anira’a ’o te fa’atura i te ti’amāra’a ’A ani ai ʼoutou i te mau tamariʼi ’ia rave i te mea tā rātou i haʼapiʼi mai ’a feruri i te mau rāveʼa ʼia faʼatura i tō rātou tiʼamāraʼa. ’Eiaha e fa’atae tāmau noa i te anira’a ’ia rave i te tahi mea ta’a ’ē, ’a ’ōpua rā i te ani i te mau pīahi ’ia feruri i tā rātou iho mau rāve’a nō te fa’a’ohipa i te mea tā rātou i ha’api’i mai.