21–27 nō ’Ātopa.

1 ’e 2 Tesalonia

« ’Ia ’ore tō ’outou ’ā’au ’ia ’āueue vave, ’ia ’ore ’ia hitima’ue »

Mai te peu e’ita tātou e pāpa’i i te mau mana’o e tae mai nō ’ō mai i te Vārua, e mo’e tātou. E aha tā te Vārua e muhumuhu nei ia ’outou ’ia pāpa’i ’a tai’o noa ai ’outou i te 1 ’e 2 Tesalonia ?

Pāpa’i i tō ’oe mau mana’o

I Tesalonia, ’ua fa’ahapahia Paulo ’e Sila nō te « [’orure-hau-ra’a]… i te mau fenua ato’a nei » (Te mau ’Ohipa 17:6). ’Ua riri te tahi feiā fa’atere ’āti Iuda i tā rāua porora’a, ’e ’ua ’ume rātou i te ta’ata ē ’ua tupu te ti’arepu (hi’o Te mau ’Ohipa 17:1–10). ’Ei fa’ahope’ara’a, ’ua parauhia Paulo rāua o Sila ’ia fa’aru’e ia Tesalonia. ’Ua pe’ape’a Paulo nō te mau ta’ata Tesalonia i fa’afāriu-’āpī-hia ’e nō ni’a i te hāmani-’ino-ra’a tā rātou e fa’aruru ra, ’aita ’oia e nehenehe e ho’i nō te fārerei ia rātou. ’Ua pāpa’i ’oia : « ’Ore a’era e ti’a iā’u ’ia ha’amahu noa atu ā, i tono atu ai… ’ia ’ite i tō ’outou fa’aro’o. » ’Ei pāhonora’a, ’ua tāvini te tauturu o Paulo ’o Timoteo i Tesalonia, ’e « ’ua hōpoi mai i te parau maita’i ra o tō ’outou fa’aro’o, ’e te aroha » (1 Tesalonia 3:5–6). Inaha, ’ua mātauhia te feiā mo’a nō Tesalonia ’ei mau hi’ora’a nō « te feiā ato’a i fa’aro’o » (1 Tesalonia 1:7), ’e ’ua pārare te parau nō tō rātou fa’aro’o nā te mau ’oire fātata. E feruri na i te ’oa’oa o Paulo ’e tōna mana’o hau i te fa’aro’ora’a ē, ’aita tāna ’ohipa i rotopū ia rātou « i te mea faufa’a ’ore » (1 Tesalonia 2:1). ’Ua ’ite rā Paulo ē, ’aita te ha’apa’o maita’i i tahito ra e nava’i nō te oraora i te pae vārua ’āraua’e, ’e tē pe’ape’a ra ’oia i te mana o te mau ’orometua ha’avare i rotopū i te feiā mo’a (hi’o 2 Tesalonia 2:2–3). Tāna poro’i ia rātou ’e ’ia tātou nei, ’o te tāmaura’a ïa i te « fa’ati’a ho’i i tei toe i tō [tātou] fa’aro’o » ’e i te « [fa’arahi] atu ā » tō tātou aroha (hi’o 1 Tesalonia 3:10 ; 4:10).

Mau mana’o nō tā ’oe iho tuatāpapara’a pāpa’ira’a mo’a

1 Tesalonia 1–2

E poro te mau ti’a o te ’evanelia ma te ateate ’e te here.

I roto i te 1 Tesalonia, tē fa’a’ite nei te mau parau a Paulo i te māna’ona’ora’a ’e te ’oa’oa o te hō’ē ta’ata tei hōro’a tā’āto’a iāna i te tāvinira’a i te mau tamari’i a te Atua. I roto ihoa rā i nā pene mātāmua e piti o te 1 Tesalonia, e ’ite ’oe i te mau ta’o ’e te mau parau e fa’a’ite ra nāhea te hō’ē ti’a mau e ha’api’i i te ’evanelia. E aha te fa’aurura’a tei tae mai ia ’oe nō te rave nō te ha’amaita’i i tā ’oe ha’api’ira’a i te ta’ata i te ’evanelia ?

1 Tesalonia 3:9–4:12

’Ia pe’e au ia Iesu Mesia, e ti’a iā’u ’ia riro ’ei mea mo’a.

Tātou pā’āto’a e tīa’i nei ē, « ’ia fā mai tō tātou Fatu ra » e ti’a ia tātou ’ia ti’a i mua iāna ma te « ’ā’au… i te maita’i ma te hapa ’ore i mua i te aro o te Atua » (1 Tesalonia 3:13). E aha tā Paulo e ha’api’i ra nō ni’a i te rirora’a ’ei mea mo’a a’e i roto i te 1 Tesalonia 3:9–13 ; 4:1–12?

Hi’o ato’a Moroni 10:32–33 ; Carol F. McConkie, « Te nehenehe o te huru mo’a », Ensign ’aore rā Liahona, Mē 2017, 9–12.

1 Tesalonia 4:16–18 ; 5:1–10 ; 2 Tesalonia 1:4–10

Mai te mea e vai ha’apa’o maita’i au ’e ’ia vai ara ho’i, e fa’aineine ïa vau nō te tae-piti-ra’a mai o te Fa’aora.

I roto i te 1 Tesalonia 5:1–10, ’ua fa’a’ohipa Paulo e rave rahi fa’ahōho’ara’a nō te ha’api’i i te mau parau mau faufa’a rahi nō ni’a i te tau e ho’i fa’ahou mai ai Iesu i te fenua nei. ’Ia tuatāpapa ’oe i teie mau fa’ahōho’ara’a, ’a feruri i te pāpa’i i te mau mana’o e tae mai nō ni’a i te tae-piti-ra’a mai o Iesu Mesia :

« Te ’eiā i te pō ra » :

« Te vahine hapū ’ia ro’ohia i te māuiui ra » :

Te tahi atu mau fa’ahōho’ara’a tā ’oe i ’ite mai :

E aha te tahi fa’ahou parau mau tā ’oe i ha’api’i mai nō ni’a i te tae-piti-ra’a mai o Iesu Mesia i roto i te 1 Tesalonia 4:16–18 ; 5:1–10 ; 2 Tesalonia 1:4–10 ? E aha te mea e muhumuhuhia ra ia ’oe e rave nō tē vai ara ’e nō te fa’aineine nō tōna ho’ira’a mai ?

Hi’o ato’a Dallin H. Oaks, « Fa’aineinera’a nō te tae-piti-ra’a mai », Ensign ’aore rā Liahona, Mē 2004, 7–10.

2 Tesalonia 2

’Ua tohuhia te hō’ē tāivara’a, ’aore rā te tāivara’a i te parau mau, nā mua atu i te tae-piti-ra’a mai.

I roto i te mau hāmani-’ino-ra’a rahi, e rave rahi feiā mo’a nō Tesalonia tei ti’aturi ē, e mea fātata te tae-piti-ra’a mai o te Fa’aora. ’Ua ’ite rā Paulo ē, hou Iesu e ho’i mai ai i te fenua nei, e tupu te hō’ē tāivara’a—hō’ē ’orurehaura’a ’aore rā e « tāivara’a » i te parau mau (hi’o 2 Tesalonia 2:1–4). E nehehene tā ’oe e ha’amāramarama hōhonu atu ā nō ni’a i te tāivara’a rahi—’e e māuruuru ato’a nō te fa’aho’i-fa’ahou-ra’a mai—nā roto i te hi’ora’a i te tahi o te mau mea i muri nei :

• Mau ’īrava e tohu ātea nei i te tāivara’a : Isaia 24:5 ; Amosa 8:11–12 ; Mataio 24:4–14 ; 2 Timoteo 4:3–4

• Mau ’īrava e fa’a’ite ra ’ua ha’amata a’ena te tāivara’a i te tau o Paulo : Te mau ’Ohipa 20:28–30 ; Galatia 1:6–7 ; 1 Timoteo 1:5–7

• Mau parau nō ni’a i te tāivara’a rahi a te tahi reforomatio keresetiano :

  Martin Luther : « ’Aita atu ā tītaura’a nā’u maori rā te fa’atanora’a i te ’Ēkālesia mai te au i te mau pāpa’ira’a mo’a… Tā’u noa e parau nei, ’oia ho’i, ’ua ’ore te ha’apa’ora’a keresetiano i rotopū i te ta’ata nā rātou te tītaura’a e fa’aherehere i te reira » (i roto E. G. Schweibert, Luther and His Times: The Reformation from a New Perspective [1950], 590).

  Roger Williams: « ’Ua… ha’avi’ivi’i pauroa ho’i te tāivara’a ’e e’ita te reira e nehenehe e matara ē tae roa atu e tono mai te Mesia i te tahi mau ’āpōsetolo ’āpī nō te patu ’āpī i te mau ’ēkālesia » (i roto Philip Schaff, The Creeds of Christendom [1877], 851).

  Erasmus: « ’Ua tāfifi roa ho’i te mau mea i te mau parau nō te [ha’api’ira’a tumu] ’e te mau ture ’aita ato’a atura tō tātou ti’aturi i te pi’ira’a i te ao nei ’ia ho’i mai i te ha’apa’ora’a keresetiano mau » (The Praise of Folly, trans. Clarence H. Miller, 2nd ed. [2003], 155–56).

Hi’o ato’a 2 Nephi 28.

Mau mana’o nō tā te ’utuāfare tuatāpapara’a pāpa’ira’a mo’a ’e nō te pō ’utuāfare

’Ia tai’o ’outou i te mau pāpa’ira’a mo’a ’e te ’utuāfare, e nehenehe te Vārua e tauturu mai ’ia ’ite e aha te mau parau tumu e ’āparau atu mai te au i te mau hina’aro o tō ’outou ’utuāfare. Teie te tahi mau mana’o :

1 Tesalonia 3:9–13

E aha tā ’outou e fa’ahiahia nei i roto i tō Paulo mau mana’o nō ni’a i tōna mau hoa ? Nāhea tātou i te fa’aitoito i te reira huru mana’o nō tō tātou ’utuāfare, tō tātou mau hoa ’e te feiā mo’a ?

1 Tesalonia 4:13–18

Nāhea e ti’a ia tātou ’ia fa’a’ohipa i teie mau ’īrava nō te tāmāhanahana ia tātou iho ’aore rā te tahi atu ta’ata i te taime e fa’aru’e mai ai te tahi ta’ata herehia ?

1 Tesalonia 5:14–25

E hi’o i te parau a’o a Paulo i roto i te 1 Tesalonia 5:14–25, ’e e ’imi i te hō’ē parau ’ua hina’aro tō ’outou ’utuāfare e rōtahi atu i ni’a iho. E ’ōpua e pāpa’i i te reira i ni’a i te hō’ē parau pia nō te tu’u atu i roto i te fare. E nehenehe te mau melo o te ’utuāfare e tu’u atu i te tahi mau pāpa’ipa’ira’a i ni’a iho i te reira ’ia ’ite rātou ē tē orahia ra te parau a’o i ni’a i te parau pia.

2 Tesalonia 3:13

Tē « tō’aru’aru [nei ānei tātou] i te ravera’a i te parau maita’i »—nō te teimaha paha o te mau tītaura’a ti’ara’a pipi ? E aha te tauturu ia tātou ’ia tae mai terā mana’o ? (Hi’o Galatia 6:9 ; PH&PF 64:33.) Nāhea tātou i te tauturu te tahi ’e te tahi ’ia tupu te reira ?

Nō te mau mana’o hau atu nō te ha’api’ira’a i te mau tamari’i, hi’o te arata’i ha’api’ira’a o teie hepetoma i roto Mai, pe’e mai—nō te Paraimere.

Ha’amaita’i i tā tātou tuatāpapara’a pāpa’ira’a mo’a

’Imi i te heheura’a i te mau mahana ato’a. « Pinepine te heheura’a i te tae mai ‘te a’o ’e ’ua nā ni’a iho i te a’o’ (2 Nephi 28:30 e ’ere te tā’āto’ara’a i te hō’ē ā taime… ’Eiaha e feruri i te [tuatāpapara’a ’evanelia] mai te tahi mea e fa’ata’a ’outou i te hō’ē taime mai te tahi rā mea tā ’outou e rave noa » (Ha’api’ira’a mai tā te Fa’aora, 12).

Resurrected Christ, nā Robert T. Barrett