2–8 ni Tiseba. 1–3 Joni; Juta: ‘Ni sa Loloma na Kalou’” Lako Mai, Mo Muri Au—Me Baleti Ira na Tamata Yadua kei na Matavuvale: Veiyalayalati Vou 2019 (2019)

“2–8 ni Tiseba. 1–3 Joni; Juta,” Lako Mai, Mo Muri Au—Me Baleti Ira na Tamata Yadua kei na Matavuvale: 2019

iVakatakilakila

E matadredredre tiko o Jisu Karisito ni dabe tiko kei na dua na gone e matadredredre tale tiko ga

Loloma Uasivi, maivei Del Parson

2–8 ni Tiseba

1–3 Joni; Juta

“Ni sa Loloma na Kalou”

Ni o wilika na nodra ivola o Joni kei Juta, vasaqara na veivakauqeti me baleta na ivakarau vakacava e rawa ni o vakaraitaka kina na loloma ni Kalou. Vola na veivakila oqo, mo vakayacori ira.

Vola na Veika o Vakauqeti Kina

Ena gauna erau vola kina o Joni kei Juta na nodrau ivola, na Vukitani ka tukuni tiko ni na yaco esa yaco tiko, nai vatuka ni veivakacacani kaukauwa kei na ivakavuvuli lasu. Eso na qasenivuli vakailasu era vakataroga kevaka e a yaco dina mai o Jisu Karisito ni a “liatamata mai” (raica, me ivakaraitaki, 1 Joni 4:1–3; 2 Joni 1:7). E tekivuna na iApositolo o Joni na imatai ni nona ivola ena nona vakadinadinataka na iVakabula: “Oqo na ivakadinadina sa soli mai na ivakatekivu, o koya keitou a rogoca, o koya keitou raica ena matai keitou, o koya keitou a vakaraica sara, ia ka tara na ligai keitou, ena vuku ni Vosa ni Bula” (Ai Vakadewa i Josefa Simici, 1 Joni 1:1 [ena 1 Joni 1:1, ivakamacala e ra a]). Ia, nai tukutuku kaukauwa duadua ni nona ivola o Joni sai koya na loloma: na loloma ni Kalou vei keda kei na loloma e dodonu me tiko vei keda me baleti Koya kei ira na Luvena taucoko. Ena veika kece oqo, esa vakila saraga na Nona loloma na iVakabula (raica na Joni 13:23; 20:2), e vinakata o koya me ra vakila na Yalosavasava na loloma vata oya ena gauna ni dredre kei na veisaqasaqa, baleta ni sa “Sega ni tu vata na rere kei na loloma; ia sa biuta tani na rere na loloma levu sara” (1 Joni 4:18).

iVakatakilakila

ivakatakilakila ni vuli yadua

Vakasama eso ni Vuli iVolanikalou Yadua

1 Joni

Ni sa rarama na Kalou, ni sa loloma na Kalou.

Kevaka mo a digia e dua se rua na vosa me vakamacalataka na Kalou, na cava beka na vosa oqori? Ena nona ivola e vakayagataka o Joni na vosa na “rarama” kei na “loloma” (1 Joni 1:5; 4:8, 16). Ni o wilika na 1 Joni, vakasamataka vakatitobu na veika e sotava o koya me vaka e volai ena Kosipeli i Joni, ka qai vakasamataka e vakavulici Joni vakacava na veika e sotavi oqo me baleta na rarama kei na loloma ni Kalou. Na cava so o sa sotava ena nomu bula esa vakavulici iko ni sa rarama ka loloma na Kalou?

Raica talega na Joni 3:16–21; 15:9–17; 2 Nifai 26:24; Vunau kei na Veiyalayalati 50:24; 88:6, 12–13; 93:36–37.

1 Joni 2:24–3:3

Au rawa ni vakataki Jisu Karisito.

E dau rairai dredre beka vei iko na sasaga me vakataki Jisu Karisito? Vakasamataka na nona ivakasala veivakauqeti o Joni: “Ia oqo, na luvequ lomani, mo dou tu dei vua; meda doudou kina, ni na rairai mai ko koya, ka me da kakua ni madua vua … [ka] eda na tautauvata kaya” (1 Joni 2:28; 3:2). Na cava o kunea ena 1 Joni 2:24–3:3 e solia vei iko na nuidei kei na vakacegu vakatisaipeli i Jisu Karisito? Ni o vulica na ivola i Joni, vakaraica eso tale na ivakavuvuli se ivakasala ena rawa ni vukei iko ena nomu sasaga ena bula vakatisaipeli mo vakataka vakalevu cake na Karisito.

Raica talega na Moronai 7:48; Vunau kei na Veiyalayalati 88:67–68; “Yaco me Vakataka na Kalou,” iUlutaga vaka-Kosipeli, topics.lds.org.

Ai Vakadewa i Josefa Simici, 1 Joni 4:12

“Sa sega na tamata sa raica na Kalou … ena dua na gauna”?

Ai Vakadewa i Josefa Simici, 1 Joni 4:12 e vakamatatataka “ni sega na tamata e raica na Kalou ena dua na gauna, vakavo ga o ira, era sa vakabauta” (ena 1 Joni 4:12, ivakamacala e ra a; raica talega na Joni 6:46; 3 Joni 1:11). Na ivolanikalou e tiko kina e vica na itukutuku ni gauna e vakaraitaki Koya kina o Kalou na Tamada vei ira na tamata yalodina, oka kina o Joni (raica na Ai Vakatakila 4; raica talega na Cakacaka 7:55–56; 1 Nifai 1:8; Vunau kei na Veiyalayalati 76:23; Josefa Simici—Ai Tukutuku 1:16–17).

1 Joni 5

Niu vakayagataka na noqu vakabauti Jisu Karisito ka sucu tale, au rawa ni vorata na vuravura.

Na vakasama ni kena vorati o vuravura e basika vakavica ena nona itukutuku o Joni. “Dou na kunea e vuravura na rarawa: ia mo dou vakacegu; au sa vakamalumalumutaki vuravura” (Joni 16:33). Ena Ai Vakatakila 2–3, e vola kina o Joni na yalayala ni Turaga vei ira era sa vorati vuravura. Na cava e tukuna o Joni me baleti ira era sa vorati vuravura ena 1 Joni 5:3–5? Ni o wilika na 1 Joni 5, vakaraica na veika meda cakava meda vorati vuravura kina ka rawata na bula tawamudu. Ena vakaivei beka na irairai ni vorati vuravura ena nomu bula? Iko rawa talega kunea na isaunitaro kei na vakasama e Elder Neil L. Na itukutuku nei Andersen “Vakamalumalumutaki vuravura” (Ensign se Liaona, me 2017, 58 – 62).

iVakatakilakila

ivakatakilakila ni vuli vakavuvale

Eso na Vakasama me baleta na Vuli iVolanikalou Vakavuvale kei na Lotu Vakavuvale ena Moniti

Ni o wilika na ivolanikalou kei na nomu vuvale, ena rawa ni vukei iko na Yalo mo kila na ivakavuvuli cava mo vakabibitaka ka veivosakitaka me rawa ni sotavi kina na gagadre ni nomu vuvale. Oqo eso na vakatutu:

1 Joni 2:8–11

Me vukea na nomu matavuvale ena kena vakasamataki nai vakavuvuli i Joni, soqona vata mai na lewe ni matavuvale me ra vakila na duidui ni “sa tu ena butobuto” kei na “tu ena rarama.” E vakavuna vakacava vei keda na veileti meda tu ena butobuto ka tarabe? E kauta mai vakacava na rarama kina noda bula na loloma?

1 Joni 3:21–22

Na cava e tiko ena veitikina oqo e rawa ni vakalevutaka cake na noda “doudou” vua na Kalou kei na noda rawa ni ciqoma na isau ni noda masu? Ena rawa talega ni o vakasaqara ena “Prayer” ena Bible Dictionary, Guide to the Scriptures (scriptures.lds.org), se iUlutaga Va-Kosipeli (topics.lds.org).

1 Joni 5:2–3

E tiko beka eso nai vunau eda vakatoka me “sa sega ni ka bibi” se dredre me vakamuri? E rawa ni veisautaka vakacava na noda loloma vua na Kalou na sala meda muria kina na Nona ivunau?

Na vakamuri ni vunau ni Kalou e vukei keda meda vorati vuravura.

Juta 1: 3–4

E tiko beka eso na veika e rawa ni veivakaleqai vakayalo kina noda bula esa “curu lo mai” kina noda bula kei na noda vuvale? (Juta 1:4). Ena rawa vakacava ni da vakamuria na veivakaroti i Juta meda “gumatua sara me maroroya na vakabauta” ka vorata na veika vakarerevaki oqo?? (Juta 1:3). Na cava eda rawa ni cakava me “vakalevutaki vei kemudou na vakacegu, kei na loloma” ena nomu matavuvale?? (Juta 1:2).

Me ikuri ni tukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Me Baleta na Lalai.

Vakavinakataki ni Vuli Yadudua

Vakasaqara na loloma ni Kalou. E vakatavulica o Elder M. Russell Ballard ni, “Kosipeli e kosipeli ni loloma—vua na Kalou kei ira na wekamu” (“God’s Love for His Children,” Ensign, Me 1988, 59). Ni o wilika nai volanikalou, nanuma mo vakavola se makataka na vosa kei na veimalanivosa e vakaraitaka na loloma ni Kalou.