Mga Ideya sa Pagpalambo sa Inyong Pagtuon sa Kasulatan sa Pamilya

Ang kanunay nga pagtuon sa kasulatan sa pamilya usa ka gamhanan nga paagi sa pagtabang sa imong pamilya nga makat-on sa ebanghelyo. Unsa kadaghan ug unsa ka taas ang basahon isip pamilya nga dili importante kay sa imong paningkamot kanunay. Kon himoon nimo ang pagtuon sa kasulatan nga importante nga bahin sa kinabuhi sa imong pamilya, matabangan nimo ang mga sakop sa imong pamilya nga mas mahiduol ngado ni Jesukristo ug motukod sa ilang mga pagpamatuod sa pundasyon sa Iyang pulong. Ikonsiderar ang mosunod nga mga pangutana:

• Unsaon nimo sa pag-awhag ang mga sakop sa pamilya sa pagtuon sa mga kasulatan sa ilang kaugalingon?

• Unsay imong mabuhat sa pag-awhag sa mga sakop sa pamilya nga mopakigbahin unsay ilang nakat-unan?

• Unsaon nimo sa paghatag og gibug-aton sa mga baruganan nga imong nakat-unan sa Bag-ong Tugon sa matag adlaw nga kahigayunan sa pagtudlo?

Hinumdumi nga ang panimalay mao ang maayong dapit sa pagkat-on sa ebanghelyo. Makat-on ka ug makatudlo sa ebanghelyo sa panimalay sa mga paagi nga dili posible sa klase sa Simbahan. Paghunahuna og mga maayong paagi sa pagtabang sa imong pamilya nga makat-on gikan sa mga kasulatan. Gamita ang mosunod nga mga ideya sa pagpalambo sa imong pagtuon sa kasulatan sa pamilya:

Pagpakigbahin og Makahuluganong mga Kasulatan

Hatagi og panahon ang mga sakop sa klase sa pagpakigbahin sa mga tudling sa kasulatan nga ilang nakit-an nga makahuluganon panahon sa ilang personal nga pagtuon.

Gamita ang Imong Kaugalingon nga mga Pulong

Dapita ang mga sakop sa pamilya sa pag-summarize sa ilang kaugalingong mga pulong unsay ilang nakat-unan gikan sa mga kasulatan nga imong gitun-an.

Gamita ang mga Kasulatan sa Imong Kinabuhi

Human makabasa og tudling sa kasulatan, hangyoa ang mga sakop sa pamilya sa pagpakigbahin og mga paagi nga magamit ang mga tudling sa ilang mga kinabuhi.

Pangutana

Dapita ang mga sakop sa pamilya sa pagpangutana bahin sa ebanghelyo, ug dayon gahini og panahon nga mangita og mga bersikulo nga makatabang og tubag sa pangutana.

Ipakita ang usa ka Kasulatan

Pilia ang usa ka bersikulo nga makahuluganon nimo, ug i-display kini diin makita kanunay sa mga sakop sa pamilya. Dapita ang ubang mga sakop sa pamilya sa pagpuli-puli sa pagpili og kasulatan nga ipakita.

Paghimo og Listahan sa Kasulatan

Isip pamilya, pagpili og pipila ka mga bersikulo nga gusto nimong hisgutan sa umaabut nga semana.

Sag-uloha ang mga Kasulatan

Pilia ang usa ka tudling sa kasulatan nga makahuluganon sa imong pamilya, ug dapita ang mga sakop sa pamilya nga sag-ulohon kini pinaagi sa pagbalik-balik og basa niini kada adlaw o paghimo og dula sa pagsag-ulo.

Pakigbahin og mga Leksyon nga Maggamit og Butang

Pangita og mga butang nga may kalabutan sa mga kapitulo ug mga bersikulo nga inyong gibasa isip pamilya. Dapita ang mga sakop sa klase sa paghisgot kon sa unsa nga paagi nga ang butang may kalabutan sa mga pagtulun-an diha sa mga kasulatan.

Pilia ang usa ka Hilisgutan

Papuli-puliha ang mga sakop sa pamilya sa pagpili og hilisgutan nga tun-an sa tibuok pamilya. Gamita ang Giya ngadto sa mga Kasulatan (scriptures.lds.org) sa pagpangita og mga tudling sa kasulatan bahin sa hilisgutan.

Pagdrowing og Litrato

Basaha ang pipila ka bersikulo isip pamilya, ug dayon hatagi og panahon ang mga sakop sa pamilya sa pagdrowing og butang nga may kalabutan sa unsay inyong gibasa. Paggahin og panahon sa paghisgot sa gidrowing sa usag usa.

I-drama Kini nga Istorya

Human mabasa ang istorya, dapita ang mga sakop sa klase sa pag-drama niini. Pagkahuman, hisguti kon sa unsa nga paagi may kalabutan ang istorya sa mga butang nga nasinati sa indibidwal ug isip pamilya.

Si Elder David A. Bednar mitudlo: “Ang matag pamilya nga pag-ampo, ang matag hitabo sa pamilya nga pagtuon sa kasulatan, ug ang matag family home evening usa ka badlis diha sa hulagway sa atong mga kalag. Walay usa ka panghitabo nga makita nga madanihon kaayo o halandumon. Apan sama sa yellow ug sa gold ug brown nga mga linya sa pintal nagtinabangay sa usag usa ug nimugna og usa ka makadani kaayo nga buhat sa kahanas, mao nga ang atong pagkamakanunayon sa paghimo og daw gagmay nga mga butang modala ngadto sa mahinungdanong mga sangputanan nga espiritwal” (“Labaw nga Makugihon ug Mabuhaton diha sa Panimalay,” Liahona, Nob. 2009, 20).