Ang Pagkakabig mao ang Atong Tumong

Ang katuyoan sa tanang pagkat-on ug pagtudlo sa ebanghelyo mao ang pagpalig-on sa atong pagkakabig ug pagtabang nato nga mas mahisama ni Jesukristo. Tungod niini nga rason, magtuon kita sa ebanghelyo, wala lang ta mangita og bag-ong impormasyon; gusto kitang mahimong “bag-o nang binuhat” (tan-awa sa 2 Mga Taga-Corinto 5:17). Nagpasabut kini sa pagsalig ni Kristo sa pag-usab sa atong mga kasingkasing, sa atong panglantaw, sa atong mga aksyon, ug sa atong mga kinaiya.

Apan ang matang sa pagkat-on sa ebanghelyo nga makapalig-on sa atong pagtuo ug mosangpot ngadto sa milagroso nga kausaban sa pagkakabig dili mahitabo diha-diha. Molapas pa kini sa klasrom ngadto sa kasingkasing sa indibidwal ug sa panimalay. Nagkinahanglan kini og kanunay, inadlaw nga paningkamot sa pagsabut ug pagsunod sa ebanghelyo. Ang tinuod nga pagkakabig nagkinahanglan sa impluwensya sa Espiritu Santo.

Ang Espiritu Santo naggiya nato ngadto sa kamatuoran ug nagsaksi niana nga kamatuoran (tan-awa sa Juan 16:13). Lamdagan Niya ang atong mga hunahuna, mopalagsik sa atong panabut, ug motandog sa atong mga kasingkasing uban sa pagpadayag gikan sa Dios, ang tinubdan sa tanang kamatuoran. Ang Espiritu Santo molimpyo sa atong mga kasingkasing. Modasig Siya kanato og usa ka tinguha sa pagsunod sa kamatuoran, ug mohunghong Siya kanato sa mga paagi sa pagbuhat niini. Sa tinuod, “ang Espiritu Santo … magatudlo [kanato] sa tanang butang” (Juan 14:26).

Tungod niini nga mga rason, ang atong mga paningkamot sa pagsunod, pagkat-on, ug pagtudlo sa ebanghelyo, kinahanglan nga kita una ug labaw sa tanan magtinguha nga ubanan sa Espiritu. Kini nga tumong kinahanglang modumala sa atong mga pagpili ug mogiya sa atong mga hunahuna ug mga aksyon. Kinahanglang tinguhaon nato ang bisan unsa nga modapit sa impluwensya sa Espiritu ug mosalikway sa bisan unsa nga moabug niana nga impluwensya—kay nasayud kita nga kon takus kita sa presensya sa Espiritu Santo, takus usab kita nga mopuyo sa presensya sa Langitnong Amahan ug ni Jesukristo.