“Mawazo ya Kuboresha Kujifunza Maandiko Kwako Binafsi ,” Njoo, Unifuate—Kwa Ajili ya Watu Binafsi na Familia: Agano Jipya 2019 (2019)
“Mawazo ya Kuboresha Kujifunza Maandiko Kwako Binafsi ,” Njoo, Unifuate—Kwa Ajili ya Watu Binafsi na Familia: 2019
Mawazo ya Kuboresha Kujifunza Maandiko Kwako Binafsi
Hizi ni baadhi ya njia rahisi za kuboresha kujifunza kwako neno la Mungu katika maandiko:
Tafuta Ukweli kuhusu Yesu Kristo
Maandiko hutufundisha kwamba vitu vyote hushuhudia Kristo (ona 2 Nefi 11:4; Musa 6:63), kwa hivyo mtafute Yeye katika matukio, hadithi, na mafundisho ya Agano Jipya. Fikiria kuandika au kuwekea alama mistari inayofundisha kuhusu Mwokozi na jinsi ya kumfuata.
Tafuta Maneno na Vifungu Vyenye Mwongozo
Unaweza kukuta kwamba maneno na vifungu fulani katika maandiko hukugusa wewe, kana kwamba yaliandikwa mahususi kwa ajili yako. Yanaweza kuwa na maana kwako binafsi na yanakushawishi na kukuhamasisha. Fikiria kuyawekea alama katika maandiko yako au kuyaandika katika shajara ya kujifunza.
Tafuta Ukweli wa Injili
Wakati mwingine ukweli wa injili (mara nyingi huitwa mafundisho au kanuni) unasemwa wazi, na wakati mwingine unatolewa kupitia mfano au hadithi. Jiulize, “Ni ukweli upi wa milele unafundishwa katika mistari hii?”
Msikilize Roho
Kuwa makini na mawazo na hisia zako, hata kama hayahusiani na kile unachosoma. Mawazo hayo yanaweza kuwa mambo hasa ambayo Mungu anakutaka ujifunze.
Linganisha Maandiko na Maisha Yako
Fikiria jinsi hadithi na mafundisho unayosoma yanavyohusiana na maisha yako. Kwa mfano, unaweza kujiuliza, “Je ni uzoefu gani niliopata ambao unafanana na hiki ninachosoma?” au “Ni kwa jinsi gani ninaweza kufuata mfano wa mtu huyu katika maandiko?”
Uliza Maswali Unapojifunza
Unapojifunza maandiko, maswali yanaweza kuja akilini. Maswali haya yanaweza kuhusiana na kile unachosoma au maisha yako kwa ujumla. Tafakari maswali haya na tafuta majibu kadiri unavyoendelea kujifunza maandiko.
Tumia Misaada ya Kujifunza Maandiko.
Ili kupata umaizi wa ziada katika mistari unayosoma, tumia marejeo, Mwongozo wa Mada, Kamusi ya Biblia, Mwongozo wa Maandiko (scriptures.lds.org), na misaada mingine ya kujifunza.
Andika Mawazo na Hisia zako
Kuna njia nyingi za kuandika mawazo ambayo hukujia unapojifunza. Kwa mfano, unaweza kuwekea alama neno lenye maana au kifungu na kuandika mawazo yako kama neno la kukumbuka katika maandiko yako. Unaweza pia kuweka shajara ya umaizi, hisia, na mawazo unayopata.
Jifunze Maneno ya Manabii na Mitume wa Siku za Mwisho
Soma kile ambacho manabii na mitume wa siku za mwisho wamefundisha kuhusu kanuni unazopata ndani ya maandiko (kwa mfano, ona conference.lds.org na magazeti ya Kanisa).
Shiriki Umaizi
Kujadili umaizi kutokana na kujifunza kwako binafsi sio tu ni njia nzuri ya kuwafundisha wengine, bali pia husaidia kuimarisha uelewa wako katika kile ambacho umesoma.
Ishi kwa Kile Unachojifunza
Kujifunza maandiko hakupaswi tu kutupa sisi mwongozo—kunapaswa kutuongoze kwenye kubadilisha jinsi tunavyoishi. Sikiliza kile ambacho Roho anakushawishi kufanya unaposoma, na uweke sharti la kuufanyia kazi ushawishi huo.
Rais Thomas S. Monson alisema: “Tunaposoma na kutafakari maandiko, tutapata minong’ono mitamu ya Roho Mtakatifu katika nafsi zetu. Tunaweza kupata majibu ya maswali yetu. Tunajifunza kuhusu baraka ambazo huja kwa njia ya kutii amri za Mungu. Tunapata ushuhuda wa uhakika juu ya Baba yetu wa Mbinguni na Mwokozi wetu, Yesu Kristo, na wa upendo Wao kwetu. Kujifunza maandiko kunapoambatana na sala zetu, tunaweza kwa uhakika kujua kwamba injili ya Yesu Kristo ni ya kweli. … Tunapokumbuka sala na kupata muda wa kurejea kwenye maandiko, maisha yetu yatabarikiwa zaidi na mizigo yetu itafanywa iwe miepesi” (“Kamwe Hatutembei Peke yetu,” Ensign au Liahona, Nov. 2013, 122).