“2–8 Ianuari. Mataio 1; Luka 1: ‘Ia Faia ia te A’u e tusa ma Lau Fetalaiga’” Sau, Mulimuli Mai ia te Au—Mo Tagata Taitoatasi ma Aiga; Feagaiga Fou 2023 (2022)

“2–8 Ianuari. Mataio 1; Luka 1,” Sau, Mulimuli mai ia te A’u—Mo Tagata Taitoatasi ma Aiga: 2023

Ata

Maria ma Elisapeta

2–8 Ianuari

Mataio 1; Luka 1

“Ia Faia ia te A’u e tusa ma Lau fetalaiga”

A o e faitau ma manatunatu loloto i le Mataio 1 ma le Luka 1, tusifaamaumau uuna’iga faaleagaga e te mauaina. O a upumoni faalea’oa’oga faavae ua e mauaina? O a savali o le a sili ona taua ia te oe ma lou aiga? E ono fesoasoani manatu e su’esu’e ai o i lenei otootoga e te maua ai ni malamalamaaga faaopoopo.

Tusifaamaumau Ou Lagona Uunai

Mai se vaaiga faaleolaga nei, sa le’i mafai. E le mafai ona maitaga se taupou—pe mafai foi e se fafine e pa o se ua te’a mamao tausaga e mafai ai ona fanauina ni fanau. Peitai, sa i ai se fuafuaga a le Atua mo le soifua mai o Lona Alo ma le fanau mai o Ioane le Papatiso, e ui lava sa ina mata faigata i le lalolagi, ae na avea lava Maria ma Elisapeta ma ni tina. E mafai ona fesoasoani le manatuaina o o la’ua aafiaga faavavega pe a tatou fetaiai ma se mea e foliga mai e le mafaia. Mata e mafai ona tatou faatoilalo o tatou vaivaiga? Mata e mafai ona tatou pa’i atu i le loto o se tagata o le aiga e le o ano mai? Semanu e faigofie lava le talanoa mai a Kaperielu ia i tatou ina ua ia faamanatu atu ia Maria, “E leai lava se mea e tasi e le mafaia e le Atua” (Luka 1:37). O le tali foi a Maria e mafai ona avea ma a tatou tali pe a faaalia mai e le Atua Lona finagalo: “Ia faia ia te au e tusa ma lau fetalaiga” (Luka 1:38).

Ata

aikona o suesuega faaletagata lava ia

Manatu mo Suesuega Faaletagata Lava Ia o Tusitusiga Paia

O ai Mataio ma Luka?

O Mataio o se telona Iutaia, po o se ao lafoga, lea sa valaauina e Iesu e avea ma se tasi o Ana Aposetolo (tagai Mataio 10:3; tagai foi Bible Dictionary, “Publicans”). Sa tusia faapitoa atu e Mataio lana Evagelia i tagata Iutaia; o le mea lea, sa ia filifili ai e faamamafa ia valoaga o le Feagaiga Tuai e uiga i le Mesia ia na faataunuuina e ala i le soifuaga ma le auaunaga a Iesu.

O Luka o se fomai o Nuuese (e le o se Iutaia) o le sa malaga faatasi ma le Aposetolo o Paulo. Sa ia tusia lana Evagelia ina ua mavae le maliu o le Faaola e faamuamua i se aofia e le o ni Iutaia. Sa ia molimau atu ia Iesu Keriso o le Faaola o Nuuese ma Iutaia. Sa ia tusifaamaumauina tala o molimautino o mea na tutupu i le soifuaga o le Faaola, ma sa ia tuu i ai ma nisi tala e aofia ai tamaitai pe a faatusatusa i isi Evagelia.

Tagai foi Bible Dictionary, “Gospels,” “Matthew,” “Luke.”

Mataio 1:18–25; Luka 1:26–35

Sa soifua mai Iesu Keriso i se tina faaletino ma se Tama tino ola pea.

I le Mataio 1:18–25 ma le Luka 1:26–35, maitau le ala na faamatala ai e Mataio ma Luka le vavega o le soifua mai o Iesu. E faapefea ona faamalosia e na faamatalaga lou faatuatua i le Faaola? Aisea e taua ai ona e iloa o Iesu sa soifua mai o le Alo o le Atua ma le tama a Maria?

Sa faamalamalama mai e Peresitene Russell M. Nelson, o le Togiola a Iesu Keriso “sa manaomia ai se taulaga patino a se tagata tino ola pea e le mafai ona oti. Peitai e tatau ona Ia maliu ma toe faatuina mai Lona lava tino. Sa na’o le Faaola lava le e mafai ona ausia lenei mea. Sa Ia maua mai Lona tina faaletino le mana e maliu ai. A e sa Ia maua mai Lona Tama le mana e manumalo ai i le oti” (“Constancy amid Change,” Ensign, Nov. 1993, 34).

Luka 1:5–25, 57–80

O faamanuiaga a le Atua e oo mai i Lona lava taimi.

Afai e iai se taimi ua e faatali ai mo se faamanuiaga, pe foliga mai foi e le o faafofoga mai le Atua i au tatalo, e mafai ona avea le tala ia Elisapeta ma Sakaria ma se faamanatu e le o galo ia te Ia oe. E pei ona folafola mai e Elder Jeffrey R. Holland: “A o tatou galulue ma faatalitali faatasi ai mo ni tali i nisi o a tatou tatalo, ou te ofo atu ia te outou la’u folafolaga faaaposetolo o loo faafofogaina ma taliina, e ui atonu e le o taimi tonu po o le ala tonu na tatou mananao i ai. Ae e tali mai lava tatalo e le aunoa i le taimi ma i le ala e tatau ai i se mătua ua silafia aoao mea uma ma le agaalofa e faavavau ona tali mai ai na tatalo” (“Faatalitali i le Alii,” Liahona, Nov. 2020, 115–16). Na faapefea ona tumau le faamaoni o Sakaria ma Elisapeta? (tagai Luka 1:5–25, 57–80). Pe ua i ai se taimi ua e faatalitali ai mo se faamanuiaga? O le a sou lagona i le mea ua faamoemoe mai le Alii ia te oe a o e faatalitali?

Ina ua mavae le faatalitali ma le faamaoni, sa faamanuiaina Elisapeta ma Sakaria i se atalii.

Mataio 1:18–25; Luka 1:26–38

E gauai atu ma le naunautai e faamaoni i le finagalo o le Atua.

E pei o Maria, o nisi taimi tatou te iloa ai e fai si ese o fuafuaga a le Atua mo o tatou olaga mai mea sa tatou fuafuaina. O le a se mea ua e aoaoina mai ia Maria e uiga i le taliaina o le finagalo o le Atua? I siata ia, tusi ai faamatalaga mai le agelu ma Maria (tagai Luka 1:26–38), faatasi ai ma savali e te mauaina mai a la faamatalaga:

O upu a le agelu ia Maria	O savali mo au
O upu a le agelu ia Maria “Ua ia te oe le Alii” (fuaiupu 28).	O savali mo au O loo silafia e le Alii lo’u tulaga ma o’u tauiviga.
O upu a le agelu ia Maria	O savali mo au
O upu a le agelu ia Maria	O savali mo au

Uiga faaalia o Maria	O savali mo au
Uiga faaalia o Maria “A faapefea le mea nei?” (fuaiupu 34).	O savali mo au E le afaina le fai o fesili ia malamalama lelei ai i le finagalo o le Atua.
Uiga faaalia o Maria	O savali mo au
Uiga faaalia o Maria	O savali mo au

A o e faitau e uiga i le faataitaiga amiotonu a Iosefa i le Mataio 1:18–25, o le a se mea ua e aoao mai ai e uiga i le taliaina o le finagalo o le Atua? O a ni malamalamaaga faaopoopo ua e aoao mai i aafiaga a Sakaria ma Elisapeta? (tagai Luka 1).

Tagai foi i le Luka 22:42; Bible Dictionary, “Gabriel.”

Luka 1:46–55

Na molimau mai Maria i le misiona a Iesu Keriso.

O upu a Maria i le Luka 1:46–55 ua muai ta’u mai ai itu o le misiona a le Faaola. O le a se mea ua e aoaoina mai e uiga ia Iesu Keriso mai faamatalaga a Maria? E te ono faatusatusaina nei fuaiupu i upu a Hana o i le 1 Samuelu 2:1–10 ma Faaamuia a Iesu o i le Mataio 5:3–12. O le a se mea o aoao atu e le Agaga ia te oe a o e manatunatu loloto i nei fuaiupu?

Ata

aikona o suesuega faaleaiga

Manatu mo Suesuega Faaleaiga o Tusitusiga Paia ma Afiafi Faaleaiga

Mataio 1:1–17.A o faitau e lou aiga le gafa o Iesu, atonu tou te talanoaina lo outou lava talafaasolopito o aiga ma faasoa mai ni tala e uiga i ou augatuaa. E faapefea ona faamanuiaina lou aiga i le iloaina o lou talafaasolopito o aiga? Mo nisi gaoioiga o le talafaasolopito o aiga, tagai FamilySearch.org/discovery.

Mataio 1:20; Luka 1:11–13, 30.Aisea atonu na fefefe ai tagata o loo i nei fuaiupu? O a ni faapogai o lo tatou fefefe? O faapefea ona valaaulia i tatou e le Atua ia “aua le fefe”?

Luka 1:37.Ina ia fesoasoani i lou aiga e fausia le faatuatua faapea “e leai se mea e tasi e le mafaia e le Atua,” e mafai ona outou sailiili faatasi i le Luka 1 ma sue mea na faia e le Atua e ono manatu i ai e le mafai. O a isi tala e mafai ona tatou faasoaina—mai tusitusiga paia po o o tatou lava olaga—ia na faia ai e le Atua ni mea na matua foliga mai e le mafai? Sue i le Tusiata O Le Talalelei e mafai ona aumai ai nisi manatu.

Luka 1:46–55.O a nisi o “mea silisili” ua faia e le Faaola mo i tatou? O le a le uiga mo o tatou loto ia “vivii i le Alii”?

Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Pese fautuaina: “Na Ia Auina Mai Lona Alo,” Tusipese a Tamaiti, 20.

Faaleleia o Lo Tatou Aoao Atu

Faaaoga mau i lou olaga. A uma ona faitau se mau, valaaulia ia tagata o le aiga e faaaoga i o latou olaga (tagai Aoao Atu i le Ala a le Faaola,21). Mo se faataitaiga, e mafai faapefea e tagata o le aiga ona faaaoga mea ua latou aoaoina mai le Mataio 1 ma le Luka 1 e uiga i le tali atu i le valaau a le Alii?