Bae Yumi Wosipim Hem, i kam long Dana Mario Wood

9–15 Jenuware

Matiu 2; Luk 2

Mifala I Kam blong Wosipim Hem

Taem yufala i stap ridim Matiu 2 mo Luk 2, luklukgud long eni niu tingting long saed blong spirit, we yu kasem. Ol aedia blong stadi we oli stap long aotlaen ia, oli save helpem yu blong faenem ol prinsipol we oli impoten mo oli stret long yu, insaed long ol japta ia.

Raetemdaon Ol Filing mo Tingting blong Yu

Stat long dei ia we Hem i bon i kam long wol, hem i bin klia se Jisas i no wan pikinini olsem ol nara pikinini. Hem i no jes niu stat ia we i stap long ol heven, o i no jes glad nius blong ol enjel we i bin mekem se taem hem i smol pikinini, i bin wan spesel taem. Hem i tru we, plante defren fetful pipol—we oli kam long ol defren nesen, wok, mo bakgraon—oli filim se oli mas kam luk Hem, o oli gat intres long Hem. Iven bifo Hem i talem invitesen blong Hem blong “yu kam, yu biaen long mi,” olgeta oli bin go finis (Luk 18:22). Yes, i tru, i no evriwan we oli bin go long Hem. I gat plante we oli no wantem save long Hem, mo wan man blong rul we i man blong jalus i wantem kilimded Hem. Be olgeta we oli stap lukaotem stret mo gud fasin, we oli gat tingting i stap daon, mo gat klin tingting oli bin luk Hem mo huia stret Hem—we Hem i Mesaea we God i promesem. Strong tingting blong olgeta i givim insperesen long hemia blong yumi, from se “gud nius blong bigfala glad” we i go long ol man blong lukaot long sipsip, i blong “evri pipol,” mo blong “Sevya we i Kraes, we i Masta” we i bin bon i kam long dei ia (luk long Luk 2:10–11).

Sam Aedia blong Skripja Stadi blong Yuwan

Luk 2:1–7

Jisas Kraes i bon long wan ples mo situesen we i simpol nomo.

Nomata we Jisas Kraes i bin gat glori wetem God Papa “taem we wol ia i no stap yet” (Jon 17:5), Hem i bin glad blong i bon long wan ples mo situesen we i no gud tumas, mo blong stap laef long medel blong yumi long wol ia. Taem yu stap ridim Luk 2:1–7, tingting hevi long wanem nao stori blong taem we Hem i bon i kam long wol, i stap tijim yu abaot Hem. Traem blong faenemaot ol ditel, o ol niu samting insaed long stori ia, we yu no bin luk bifo. ?Olsem wanem nao, taem yu stap luksave ol samting ia, i jenisim ol filing blong yu abaot Hem?

Luk tu long “The Christ Child” (vidio), ChurchofJesusChrist.org.

Matiu 2:1–12; Luk 2:8–38

I gat plante we oli witnesem taem we Kraes i bon i kam long wol ia.

Taem we Kraes i bon i kam, mo laef blong Hem taem Hem i smol bebi, mak blong hem i kam tru long ol witnes mo ol man blong wosip we oli kam long ol defren kaen laef. Taem yu stap lukluk insaed long stori blong olgeta, ?wanem nao yu lanem abaot ol wei blong wosip, mo blong stap witnes blong Kraes?

Witnes blong Kraes	?Wanem nao mi bin lanem abaot fasin blong stap wosipim mo stap olsem witnes blong Kraes?
Witnes blong Kraes Ol Man blong Lukaot long Sipsip (Luk 2:8–20)	?Wanem nao mi bin lanem abaot fasin blong stap wosipim mo stap olsem witnes blong Kraes?
Witnes blong Kraes Simeon (Luk 2:25–35)	?Wanem nao mi bin lanem abaot fasin blong stap wosipim mo stap olsem witnes blong Kraes?
Witnes blong Kraes Ana (Luk 2:36–38)	?Wanem nao mi bin lanem abaot fasin blong stap wosipim mo stap olsem witnes blong Kraes?
Witnes blong Kraes Ol Waes Man (Matiu 2:1–12)	?Wanem nao mi bin lanem abaot fasin blong stap wosipim mo stap olsem witnes blong Kraes?

Luk tu long 1 Nifae 11:13–23; 3 Nifae 1:5–21; “Shepherds Learn of the Birth of Christ” mo “The Christ Child Is Presented at the Temple” (vidio), ChurchofJesusChrist.org.

Matiu 2:13–23

Ol mama mo papa oli save kasem revelesen blong protektem ol famli blong olgeta.

Josef bae i neva bin save mekem wanem we God i bin askem hem blong mekem—blong protektem Jisas taem Hem i bin smol i kam antap—sapos hem i no bin kasem help we i kam long heven. Semmak olsem Ol Waes Man, Josef i bin kasem wan revelesen we i bin givim hem woning abaot wan denja. Taem yu stap rid abaot eksperiens blong Josef, we i stap long Matiu 2:13–23, tingting abaot ol denja long saed blong bodi mo long saed blong spirit, we i stap fesem yumi tedei. Tingting hevi long ol eksperiens we yu bin filim se God i stap soem rod long yu blong stap protektem yu mo olgeta we yu lavem. Tingting blong stap serem ol eksperiens ia wetem ol narawan. ?Wanem nao yu yu save mekem blong God i save soem rod long yu olsem, long fiuja?

Antap long olgeta ia, maet bae yu wantem wajem vidio ia: “The First Christmas Spirit” (ChurchofJesusChrist.org) we i soemaot wanem maet Josef i bin filim taem hem i bin fesem responsabiliti ia blong kea long Pikinini blong God.

Luk 2:40–52

Iven taem Jisas i bin wan yut, Hem i bin lukluk nomo blong stap mekem tingting blong Papa blong Hem.

Taem Hem i bin wan yang man, Sevya i bin tijim gospel wetem bigfala paoa, mekem se iven ol tija insaed long tempol oli bin sapraes bigwan long “save blong hem, mo long ol ansa blong hem” (Luk 2:47). ?Wanem nao yu stap lanem aot long ol ves ia abaot Sevya taem Hem i bin wan yang man? ?Olsem wanem nao, ol yangfala pipol we yu yu save olgeta, oli stap traem blong go mekem wok blong Papa blong olgeta? (Luk 2:49). ?Olsem wanem nao, ol yut o ol pikinini blong yu oli bin helpem yu blong gat wan moa dip andastaning long saed blong gospel? ?Wanem moa yu yu lanem aot long eksampol blong yangfala laef blong Jisas, we i stap long Luk 2:40–52 mo long Joseph Smith Translation, Matthew 3:24–26 (insaed long Bible appendix)?

“?Yutufala i no save se mi mi mas stap long haos blong Papa blong mi?” (Luk 2:49).

?Wanem hem i Josef Smit Translesen?

From se i gat “plante klia mo gudgudfala” trutok we oli bin lus long Baebol ova long plante handred yia (1 Nifae 13:28; luk tu long Moses 1:41), Lod i bin givim komanmen long Josef Smit blong mekem wan revisen blong Baebol wetem insperesen, we yumi save olsem Josef Smit Translesen. Plante revisen we Profet i bin mekem, oli stap insaed long apendiks long Lata-dei Sent edisen skripja. Translesen blong Josef Smit long saed blong Matiu 24, oli save long hem olsem Josef Smit—Matiu, mo yu save faenem insaed long Perel we I Gat Bigfala Praes. Blong gat moa infomesen, luk long “Josef Smit Translesen (JST)” insaed long Gaed long Ol Skripja, luk long Inglis long Gospel Topics: “Bible, Inerrancy of” (topics.ChurchofJesusChrist.org).

Ol Aedia blong Famli Skripja Stadi mo Haos Naet

Luk 2.Invaetem ol memba blong famli blong oli jusum wan we oli tokbaot hem insaed long Luk 2, mo ridim samfala ves abaot hao Sevya i mekem samting wetem man o woman ia, mo serem wan samting we oli bin lanem, we i mekem se oli gat moa fet long Jisas Kraes. Singsing tugeta long “Mary’s Lullaby” o “The Nativity Song” (Children’s Songbook, 44–45, 52–53). ?Wanem nao yumi lanem aot long ol singsing ia, abaot taem ia we Sevya i bon i kam long wol?

Tingting long wei we artwok i save ademap samting long toktok storian blong yufala abaot taem ia we Kraes i bon i kam long wol. (Blong gat sam eksampol, luk long Gospel Art Buk o history.ChurchofJesusChrist.org/exhibit/birth-of-Christ.)

Matiu 2:1–12.?Wanem nao yumi lanem abaot fasin blong stap lukaotem mo stap faenem Sevya, hemia aot long eksampol blong Ol Waes Man?

Luk 2:41–49.?Wanem nao i wok blong Papa? (Luk 2:49; luk long Moses 1:39; Jeneral Hanbuk: Stap Givim Seves Insaed long Jos Ia blong Jisas Kraes blong Ol Lata-dei Sent, 1.2, ChurchofJesusChrist.org/study?lang=bis). ?Wanem nao yumi stap lanem abaot bisnis ia aot long stori blong Luk 2:41–49? Tingting blong raetemdaon samfala wei we famli blong yufala i save tekpat long wok blong Papa, mo putum ol tingting ia we yufala i raetem insaed long wan kontena. Long taem blong wik ia we i stap kam, taem famli blong yu i stap lukluk long samfala wei blong help wetem wok blong Papa long Heven, oli save jusum sam aedia we i stap long kontena. Mekem wan plan blong gat wan taem blong serem ol eksperiens blong yufala.

Luk 2:52?Wanem nao yumi stap lanem aot long Luk 2:52 abaot wei we Jisas i bin developem laef blong Hem? ?Wanem gol nao, blong yuwan o blong famli, we yu save putum i stap blong kam antap long “waes mo long bodi, mo blong God i lavem [yu] mo man i lavem [yu]?

Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.

Wan singsing: “Stars Were Gleaming,” Children’s Songbook, 37.

Stap Kam Antap long Stadi blong Yuwan

Yusum ol tul blong help blong stadi long skripja. Blong kasem moa niu tingting taem yu stap stadi long ol skripja, yusum ol risos olsem ol futnot,  , Bible Dictionary, Gaed long Ol Skripja, mo ol nara tul blong help blong stadi we oli stap long ChurchofJesusChrist.org/study?lang=bis.

Sevya blong Wol i bin kam long wol ia long sam ples we oli simpol nomo.