Let Us Adore Him [Dali Simbahon Nato Siya], ni Dana Mario Wood

Enero 9–15

Mateo 2; Lucas 2

Nanganhi Kami Aron sa Pagsimba Kaniya

Samtang ikaw magbasa sa Mateo 2 ug Lucas 2, hatagi og pagtagad ang bisan unsa nga espirituhanong mga panabot nga imong madawat. Ang mga ideya sa pagtuon niini nga latid makatabang kanimo sa pag-ila og importante ug tukma nga mga baroganan niini nga kapitulo.

I-rekord ang Imong mga Panghunahuna

Gikan sa adlaw sa Iyang pagkatawo, kini tataw nga si Jesus dili ordinaryo nga bata. Dili lamang kadtong bag-ong bitoon sa kalangitan o ang malipayong pamahayag sa anghel nga mihimo sa pagkabata ni Jesus nga talagsaon. Mao usab ang kamatuoran nga ang nagkalain-laing matinud-anong mga tawo—gikan sa lain-laing mga nasod, mga propesyon, ug mga kaagi—mibati dihadiha nga nadani ngadto Kaniya. Bisan sa wala pa Niya isulti ang Iyang pagdapit nga “dali, sunod kanako,” sila mianha (Lucas 18:22). Dili tanan mianha Kaniya, sa dayag. Dihay daghan nga wala manumbaling Kaniya, ug gani usa ka masinahon nga tigmando mitinguha sa Iyang kinabuhi. Apan ang mapainubsanon, putli, ug maunungon nga mga nagtinguha sa katarong mitan-aw Kaniya kon Kinsa siya––ang gisaad kanila nga Mesiyas. Ang ilang pagkamaunungon nagdasig sa atong kaugalingon, kay ang “maayong balita sa dakong kalipay” nga gidala ngadto sa magbalantay sa karnero alang sa “tanang mga tawo,” ug ang “Manluluwas, nga si Kristo ang Ginoo” natawo nianang adlawa alang kanatong tanan (tan-awa sa Lucas 2:10–11).

Mga Ideya alang sa Personal nga Pagtuon sa Kasulatan

Lucas 2:1–7

Si Jesukristo natawo sa ubos nga mga kahimtang.

Bisan og si Jesukristo adunay himaya uban sa Dios nga Amahan “sa wala pa ang kalib[o]tan” (Juan 17:5), andam Siya nga matawo sa ubos nga mga kahimtang ug magpuyo uban kanato dinhi sa yuta. Samtang ikaw magbasa sa Lucas 2:1–7, palandonga kon unsa ang gitudlo niini nga asoy sa Iyang pagkatawo nganha kanimo mahitungod Kaniya. Paningkamot sa pag-ila sa mga detalye o mga panabot niini nga istorya nga wala nimo mamatikdi kaniadto. Sa unsa nga paagi kini nga mga butanga nag-apekto sa imong mga pagbati ngadto Kaniya?

Mateo 2:1–12; Lucas 2:8–38

Adunay daghang saksi sa pagkatawo ni Kristo.

Ang pagkatawo ug pagkamasuso ni Kristo gitiman-an sa mga saksi ug mga maninimba gikan sa daghan nga nagkalain-laing matang sa kinabuhi. Samtang nagsusi ka sa ilang mga istorya, unsay imong nakat-onan mahitungod sa mga pamaagi sa pagsimba ug pagsaksi ni Kristo?

Saksi ni Kristo	Unsay akong nakat-onan mahitungod sa pagsimba ug pagsaksi ni Kristo?
Saksi ni Kristo Mga magbalantay sa karnero (Lucas 2:8–20)	Unsay akong nakat-onan mahitungod sa pagsimba ug pagsaksi ni Kristo?
Saksi ni Kristo Simeon (Lucas 2:25–35)	Unsay akong nakat-onan mahitungod sa pagsimba ug pagsaksi ni Kristo?
Saksi ni Kristo Ana (Lucas 2:36–38)	Unsay akong nakat-onan mahitungod sa pagsimba ug pagsaksi ni Kristo?
Saksi ni Kristo Maalamong mga Mago (Mateo 2:1–12)	Unsay akong nakat-onan mahitungod sa pagsimba ug pagsaksi ni Kristo?

Tan-awa usab sa 1 Nephi 11:13–23; 3 Nephi 1:5–21.

Mateo 2:13–23

Ang mga ginikanan makadawat og pagpadayag sa pagpanalipod sa ilang mga pamilya.

Dili gayod unta makahimo si Jose unsay gisugo kaniya nga buhaton—sa pagpanalipod ni Jesus sa Iyang pagkabata—nga walay tabang sa langit. Sama sa Maalamong mga Mago, nadawat niya ang pagpadayag nga nagpasidaan kaniya og kuyaw. Samtang ikaw nagbasa sa kasinatian ni Jose sa Mateo 2:13–23, paghunahuna mahitungod sa pisikal ug espirituhanong mga kakuyaw nga atong giatubang karon. Palandonga ang mga kasinatian sa dihang gibati nimo ang giya sa Dios sa pagpanalipod kanimo ug sa imong mga minahal. Hunahunaa ang pagpakigbahin niini nga mga kasinatian ngadto sa uban. Unsay imong mabuhat aron madawat ang maong giya sa umaabot?

Lucas 2:40–52

Bisan sa kabatan-onan, si Jesus nagtutok sa pagbuhat sa kabubut-on sa Iyang Amahan.

Isip usa ka batan-ong lalaki, ang Manluluwas gamhanan kaayong mitudlo sa ebanghelyo nga bisan ang mga magtutudlo sa templo natingala sa Iyang “pagpanabot ug pagpanubag” (Lucas 2:47). Unsay imong nakat-onan gikan niini nga mga bersikulo mahitungod sa Manluluwas isip usa ka batan-ong lalaki? Giunsa sa batan-ong mga tawo nga imong nailhan sa pagpaninguha sa paghimo “sa buhat sa [ilang] Amahan”? (Lucas 2:49). Sa unsa nga paagi ang mga kabatan-onan ug mga kabataan mitabang kanimo nga makaangkon og mas lig-on nga pagsabot sa ebanghelyo? Unsa pa ang imong nakat-onan gikan sa ehemplo sa pagkabata ni Jesus sa Lucas 2:40–52 ug diha sa Hubad ni Joseph Smith, Mateo 3:24–26 (diha sa Giya ngadto sa mga Kasulatan)?

“Wala ba diay kamo mahibalo nga kinahanglan anhi gay[o]d ako sa balay sa akong Amahan?” (Lucas 2:49).

Unsa ang Hubad ni Joseph Smith?

Tungod sa “daghan nga yano ug bililhon” nga mga kamatuoran ang nawala gikan sa Biblia sa milabay nga mga katuigan (1 Nephi 13:28; tan-awa usab sa Moises 1:41), misugo ang Ginoo ni Joseph Smith sa paghimo og dinasig nga pag-usab sa Biblia, nailhan nga Hubad ni Joseph Smith. Daghang mga pag-usab ang gihimo sa Propeta nga gilakip sa apendiks sa Santos sa Ulahing mga Adlaw nga edisyon sa mga kasulatan. Ang hubad ni Joseph Smith sa Mateo 24, nga nailhan nga Joseph Smith—Mateo, makita diha sa Perlas nga Labing Bililhon. Alang sa dugang nga impormasyon, tan-awa ang “Hubad ni Joseph Smith (HJS)” diha sa Giya ngadto sa mga Kasulatan ug ang artikulo sa Gospel Topics “Bible, Inerrancy of” diha sa (topics.ChurchofJesusChrist.org).

Mga Ideya alang sa Pamilya nga Pagtuon sa Kasulatan ug Home Evening

Lucas 2.Dapita ang mga sakop sa pamilya sa pagpili og usa ka tawo nga gihulagway sa Lucas 2, sa pagbasa sa pipila ka mga bersikulo mahitungod sa inter-aksyon niana nga tawo uban sa Manluluwas, ug sa pagpakigbahin og usa ka butang nga ilang nakat-onan nga nagdugang sa ilang hugot nga pagtuo diha ni Jesukristo. Kantaha og dungan ang “Lullaby ni Maria” o “Awit sa Pagkatawo” (Songbook sa mga Bata,, 28, 32). Unsa ang atong makat-onan gikan niini nga mga awit mahitungod sa pagkatawo sa Manluluwas?

Hunahunaa kon unsaon kaha sa artwork pagdugang sa inyong panaghisgotan mahitungod sa pagkatawo ni Kristo. (Sama pananglit, tan-awa sa Libro sa mga Hulagway sa Ebanghelyo o history.lds.org/exhibit/birth-of-christ.)

Mateo 2:1–12.Unsa ang atong makat-onan mahitungod sa pagpangita ug sa pagkakaplag sa Manluluwas gikan sa ehemplo sa Maalamong mga Mago?

Lucas 2:41–49.Unsa ang “buhat sa Amahan”? (Lucas 2:49; tan-awa sa Moises 1:39; Kinatibuk-ang Tamdanan nga Basahon: Pagserbisyo diha sa Ang Simbahan ni Jesukristo sa mga Santos sa Ulahing mga Adlaw, 1.2, ChurchofJesusChrist.org). Unsa ang atong makat-onan mahitungod niana nga buhat gikan sa istorya sa Lucas 2:41–49? Hunahunaa ang pagsulat sa pipila ka paagi nga ang imong pamilya makaapil sa buhat sa Amahan ug sa pagbutang niini diha sa usa ka sudlanan. Sa umaabot nga semana, samtang ang imong pamilya mangita og mga paagi sa pagtabang sa buhat sa Langitnong Amahan, makapili sila og mga ideya gikan sa sudlanan. Pagplano og panahon nga ikaw mopakigbahin sa imong mga kasinatian.

Lucas 2:52.Unsa ang atong makat-onan gikan sa Lucas 2:52 mahitungod kon giunsa ni Jesus pagpalambo ang Iyang kinabuhi? Unsa nga personal o pamilya nga mga tumong ang atong mahimo sa pagdugang sa “kaalam ug gidak-on, ug sa kahimuot sa Dios ug sa tawo”?

Alang sa dugang nga mga ideya sa pagtudlo sa mga bata, tan-awa sa latid karon nga semana diha sa Dali, Sunod Kanako—Alang sa Primary.

Gisugyot nga awit: “Kabitoonan Misanag,” Songbook sa mga Bata, 24.

Pagpalambo sa Personal nga Pagtuon

Gamita ang mga tabang sa pagtuon sa kasulatan. Aron makaangkon og dugang nga mga panabot samtang ikaw nagtuon sa mga kasulatan, gamit sa mga kapanguhaan sama sa mga footnote, , , Giya sa mga Kasulatan, ug ubang tabang sa pagtuon nga makaplagan sa ChurchofJesusChrist.org.

Ang Manluluwas sa Kalibotan mianhi sa yuta sa ubos nga mga kahimtang.