“Ob Hlis Ntuj 6–12. Yauhas 2–4: ‘Txhua Tus Yuav Tsum Yug Dua Tshiab,’” Los, Nrog Kuv Mus—Rau Ib Leeg thiab Tsev Neeg: Phau Tshiab 2023 (2022)
“Ob Hlis Ntuj 6–12. Yauhas 2–4,” Los, Nrog Kuv Mus—Rau Ib Leeg thiab Tsev Neeg: 2023
Ob Hlis Ntuj 6–12
Yauhas 2–4
“Txhua Tus Yuav Tsum Yug Dua Tshiab”
Thaum koj nyeem Yauhas 2–4, tus Ntsuj Plig yuav qhia koj txog koj txoj kev hloov siab los ntseeg. Cia li sau ntawv txog Nws tej kev tshoov siab. Tej zaum koj yuav nrhiav tau tej lub tswv yim ntawm sab ntsuj plig ntxiv los ntawm tej lub tswv yim hauv zaj lus no.
Sau Ntawv txog Koj tej Kev Tshoov Siab
Nyob hauv rooj tshoob nyob ntawm Kanas, Yexus Khetos tau muab cov dej hloov ua cawv txiv hmab—yog ib lub sij hawm Yauhas hu ua “thawj zaug txuj ci tseem ceeb” (Yauhas 2:11). Qhov no muaj tseeb ntawm ob peb txoj kev. Txawm yog nov yog thawj zaug txuj ci tseem ceeb rau cov pej xeem pom, qhov no kuj yog ib lub cim txog qhov txuj ci tseem ceeb uas ua thawj zaug thiab—tus txheej txheem hloov peb lub siab thaum peb hloov los ua neeg zoo li peb tus Cawm Seej. Qhov txuj ci tseem ceeb ntawm lub neej no pib thaum peb txiav txim siab coj raws li Yexus Khetos, hloov siab thiab ua neej zoo dua dhau los ntawm Nws. Qhov txuj ci tseem ceeb no yeej hloov peb lub siab tag nrho ces ntshe kev “yug dua tshiab” yog ib lo lus zoo tshaj piav txog qhov no (Yauhas 3:7). Tiam sis kev yug dua tshiab yeej yog qhov pib ntawm txoj kev ua ib tug thwj tim. Yexus Khetos cov lus rau tus poj niam Xamalis nyob ntawm lub qhov dej qhia peb tias yog peb taug txoj kev no mus li, ces thaum sij hawm dhau mus txoj moo zoo yuav “txhawv hauv [peb] lub siab thiab cawm [peb] txoj sia mus ib txhis” (Yauhas 4:14).
Tej lub Tswv Yim Kawm Vaj Lug Kub ntawm Yus Ib Leeg
Yexus Khetos tej txuj ci tseem ceeb tau “qhia nws lub hwj chim rau sawv daws pom.”
Thaum koj nyeem txog tus Cawm Seej txoj kev muab cov dej hloov los ua cawv txiv hmab nyob hauv Yauhas 2:1–11, tej zaum koj yuav tawm tswv yim ntxiv yog koj xav txog cov neeg uas nyob ntawd tej kev xav txog qhov no, xws li Maivliag, cov thwj tim, thiab lwm tus. Yog tias koj tau pom tej xwm txheej nyob ntawd, koj yuav xav li cas txog Yexus? Qhov txuj ci tseem ceeb no qhia dab tsi rau koj txog Nws?
Kuv yuav tsum yug dua tshiab kom nkag mus hauv Vajtswv lub nceeg vaj.
Thaum Nikaudemaus los rau Yexus, nws ceev faj heev thiab tsis xav pub leej twg pom. Tiam sis, tom qab ntawd, nws tab meeg hais lus txhawb nqa Yexus (saib Yauhas 7:45–52) thiab koom nrog cov ntseeg thaum lawv muab tus Cawm Seej faus (saib Yauhas 19:38–40). Koj kawm tej lus qhia twg nyob hauv Yauhas 3:1–21 uas tej zaum tau pab Nikaudemaus coj raws li Yexus qhia thiab yug dua tshiab?
Tus Yaj Saub Joseph Smith qhia hais tias, “Txoj kev yug dua tshiab, yeej los ntawm Vajtswv tus Ntsuj Plig los thaum ua tej kab ke” (Teachings of Presidents of the Church: Joseph Smith [2007], 95). Thaum koj ua kev cai raus dej thiab txais kev pom zoo—thaum koj “yug los ntawm dej thiab ntawm Vaj Ntsuj Plig” (Yauhas 3:5)—ces ob qho no tau pab koj li cas kom yug dua tshiab? Koj ua dab tsi ntxiv kom hloov siab li no mus li? (saib Amas 5:11–14).
Kuj saib Mauxiyas 5:7; 27:25–26; David A. Bednar, “Ye Must Be Born Again,” Liahona, Tsib Hlis Ntuj 2007, 19–22.
Leej Txiv Saum Ntuj Ceeb Tsheej qhia tias Nws hlub kuv dhau los ntawm Yexus Khetos.
Txwj Laug Jeffrey R. Holland qhia tias, “Qhov tseeb thib ib uas nyob mus ib txhis yog qhov uas Vajtswv hlub peb kawg Nws lub siab ntsws thiab lub dag zog” (“Tag Kis tus Tswv Yuav Ua tej Txuj Ci Tseem Ceeb rau Nej Pom,” Liahona, Tsib Hlis Ntuj 2016, 127) Koj tau hnov Vajtswv txoj kev hlub rau koj li cas dhau los ntawm lub txiaj ntsim uas yog Nws Leej Tub?
Kev txais lub cim nco txog yog ib lub sij hawm rau koj xav txog Vajtswv txoj kev hlub thiab lub txiaj ntsim Nws foom pub rau peb uas yog Nws Leej Tub. Tej zaj nkauj thaum txais lub cim nco txog twg yuav pab koj paub txog txoj kev hlub no? Koj ua tau dab tsi kom kev txais lub cim nco txog muaj nqis dua ntxiv?
Thaum koj nyeem ntxiv txog tus Cawm Seej tej lus qhia thiab txoj hauj lwm qhuab qhia, nug koj tus kheej seb tej yam uas koj nyeem pab koj li cas kom to taub thiab paub txog Vajtswv txoj kev hlub.
Vajtswv puas yog ib tug ntsuj plig xwb?
Tej zaum ib txhia yuav tsis to taub Yexus cov lus thaum Nws hais tias Vajtswv yog ib tug ntsuj plig. Joseph Smith Kev Txhais nqe no piav meej txog ib qho tseem ceeb: “Vim Vajtswv tau cog lus yuav muab nws tus Ntsuj Plig rau cov zoo li ntawd” (nyob hauv Yauhas 4:24, lub cim nram qab a). Kev tshwm sim hauv hnub nyoog no kuj qhia tias Vajtswv muaj ib lub cev uas muaj nqaij thiab pob txha (saib Lus Qhuab Qhia thiab Kev Khi Lus 130:22–23; kuj saib Chiv Keeb 5:1–3; Henplais 1:1–3).
Yexus Khetos muab Nws cov dej uas cawm txoj sia rau kuv.
Qhov uas Yexus hais txhais li cas thaum Nws qhia tus poj niam Xamalis tias tus uas haus cov dej uas Nws muab rau tus ntawd yuav tsis nqhis ib zaug li lawm? Vim li cas txoj moo zoo yeej zoo li cov dej uas cawm txoj sia?
Yexus Khetos txoj moo zoo yog cov dej uas pub peb sab ntsuj plig muaj dag muaj zog.
Ib yam uas tus Cawm Seej qhia rau tus poj niam Xamalis yog qhov uas peb teev tiam Vajtswv li cas yeej tseem ceeb tshaj qhov uas peb teev tiam Nws nyob qhov twg (saib Yauhas 4:21–24). Koj ua dab tsi kom “pe hawm Leej Txiv … pe hawm ntawm sab ntsuj plig thiab qhov tseeb”? (Yauhas 4:23).
Kuj saib Phau Qhia txog Vaj Lug Kub, “Teev Tiam,” scriptures.ChurchofJesusChrist.org; Dean M. Davies, “Cov Koob Hmoov ntawm Kev Teev Tiam,” Liahona, Kaum Ib Hlis Ntuj 2016, 93–95.
Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke
-
Yauhas 2–4.Thaum nej tsev neeg nyeem tej tshooj no hauv lub lim tiam no, tsom ntsoov rau tej yam uas tus Cawm Seej siv—xws li kev yug los, cua, dej, thiab khoom noj khoom haus—kom qhia txog tej yam tseeb ntawm sab ntsuj plig. Nej yuav siv tej khoom twg hauv nej lub tsev kom qhia txog tej yam tseeb ntawm sab ntsuj plig?
Thaum nej kawm tej tshooj no, xav seb nej puas saib video ua ke txog tej lub sij hawm no: “Jesus Turns Water into Wine,” “Jesus Cleanses the Temple,” “Jesus Teaches of Being Born Again,” thiab “Jesus Teaches a Samaritan Woman” (ChurchofJesusChrist.org).
-
Yauhas 2:13–17.Nej tsev neeg yuav tsum muab tej yam tsis dawb huv tshem tawm ntawm nej lub tsev thiaj li yuav ua ib qho chaw dawb ceev—xws li lub tuam tsev? Nej yuav ua li cas kom txhob muaj tej ntawd tas li?
-
Yauhas 3:1–6.Nrog nej tsev neeg tham txog qhov uas kev xeeb me nyuam thiab kev yug los yog ib qho txuj ci tseem ceeb—tus txheej txheem kom tsim ib tug neeg uas muaj txoj sia thiab muaj kev txawj ntse. Yexus qhia tias peb yuav tsum yug dua tshiab ua ntej peb nkag hauv Vajtswv lub nceeg vaj. Vim li cas kev yug dua tshiab yog ib zaj lus piv txwv zoo qhia peb tias peb yuav tsum hloov siab li cas ua ntej peb nkag mus hauv Vajtswv lub nceeg vaj? Peb yuav ua li cas kom ua raws li tus txheej txheem yug dua tshiab ntawm sab ntsuj plig?
-
Yauhas 3:16–17.Caw nej tsev neeg rov qab hais tej nqe no raws li lawv mam li hais yog tias lawv piav rau ib tug phooj ywg. Yexus Khetos tau ua li cas kom pab peb paub txog Vajtswv txoj kev hlub?
-
Yauhas 4:5–15.Tus Cawm Seej qhia dab tsi rau peb thaum Nws muab Nws txoj moo zoo piv rau cov dej uas cawm txoj sia? Tej zaum nej tsev neeg yuav xav saib cov dej uas ntws mus thiab piav tias cov dej zoo li cas. Vim li cas peb yuav tsum haus cov dej txhua hnub? Vim li cas Yexus Khetos txoj moo zoo yeej “txhawv hauv [peb] lub siab thiab cawm [peb] txoj sia mus ib txhis”? (Yauhas 4:14).
Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.
Zaj nkauj zoo hu: “God’s Love,” Children’s Songbook, 97.
Kev Kawm Zoo Dua Ntxiv ntawm Yus Ib Leeg
Nrhiav tej lub cim. Cov vaj lug kub yeej ib txwm siv tej khoom, tej lub sij hawm, los sis tej yam uas neeg ua siv ua lub cim txog tej yam tseeb ntawm sab ntsuj plig. Tej lub cim no yuav pab koj to taub cov lus qhuab qhia uas yuav tsum kawm. Piv txwv tias, tus Cawm Seej hais tias kev hloov siab los ntseeg yeej zoo li kev yug dua tshiab.
Dej Cawm Neeg Txoj Sia, los ntawm Simon Dewey