Yexus qhia pem roob

Yexus Qhia Pem Roob, los ntawm Gustave Doré

Ob Hlis Ntuj 13–19

Mathais 5; Lukas 6

“Nej Tau Koob Hmoov”

Tsom ntsoov rau tej kev tshoov siab uas koj txais tau thaum koj nyeem Mathais 5 thiab Lukas 6, ces muab sau cia rau hauv ib phau ceev tej kev kawm los yog lwm txoj kev. Zaj no yuav pab koj kawm tej ntsiab cai tseem ceeb nyob hauv tej tshooj no, tiam sis cia li qhib siab rau lwm yam uas koj kawm tau.

Sau Ntawv txog Koj tej Kev Tshoov Siab

Thaum txog lub sij hawm no nyob hauv Nws txoj hauj lwm qhuab qhia, txhua tus yeej paub meej tias Yexus tej lus qhia tsis zoo li tej lus uas tib neeg nyob hauv Nws lub caij nyoog tau hnov dua. Cov tsis muaj yuav txais tau Vajtswv lub nceeg vaj? Cov siab mos siab muag yuav tau lub ntiaj teb ua lawv tug? Cov neeg uas raug tsim txom tau koob hmoov? Cov xib hwb qhia Vajtswv txoj kev cai thiab cov Falixais yeej tsis qhia tej yam zoo li no. Tiam sis cov uas to taub Vajtswv txoj kev cai tiag tiag twb paub tias tus Cawm Seej tej lus muaj tseeb. “Qhov muag pauj qhov muag” thiab “ntxub nej cov yeeb ncuab” yog tej kev cai uas qis dua (Mathais 5:38, 43). Tiam sis Yexus Khetos tau los qhia ib txoj kev cai siab dua (saib 3 Nifais 15:2–10), kom pab peb los “ua zoo kawg nkaus ib yam li [peb] Leej Txiv tus uas nyob saum ntuj ceeb tsheej, nws yog tus zoo kawg nkaus” (Mathais 5:48).

lub cim txog kev kawm ntawm yus ib leeg

Tej lub Tswv Yim Kawm Vaj Lug Kub ntawm Yus Ib Leeg

Mathais 5:1–12; Lukas 6:20–26, 46–49

Kev zoo siab uas kav ib txhis yeej los ntawm txoj kev ua neej raws li Yexus Khetos qhia.

Txhua tus xav tau kev zoo siab, tiam sis tsis yog txhua tus nrhiav kev zoo siab hauv tib qho chaw. Ib txhia nrhiav kev zoo siab los ntawm kev muaj hwj chim thiab meej mom hauv lub ntiaj teb no, lwm tus xav tau nyiaj txiag los sis ua raws li lawv sab cev nqaij daim tawv ntshaw. Yexus Khetos tau los qhia txoj kev rau peb kom muaj kev zoo siab kav ib txhis, kom qhia tias kev tau koob hmoov tiag yog dab tsi. Koj kawm dab tsi txog kev txais kev zoo siab uas kav ib txhis los ntawm Mathais 5:1–12 thiab Lukas 6:20–26? Qhov no txawv li cas ntawm neeg ntiaj teb txoj kev xav txog kev zoo siab?

Tej nqe no, ua ke nrog Lukas 6:46–49, qhia dab tsi rau koj txog kev ua Yexus Khetos tus thwj tim? Koj txais kev tshoov siab ua dab tsi kom muaj tej cwj pem nyob hauv tej nqe no?

Kuj saib Phau Qhia txog Vaj Lug Kub, “Lus Foom Koob Hmoov, cov,” scriptures.ChurchofJesusChrist.org; “Sermon on the Mount: The Beatitudes” (video), ChurchofJesusChrist.org.

Mathais 5:13

“Nej yog cov ntsev uas las neeg ntiaj teb.”

Neeg ib txwm siv cov ntsev kom muab zaub mov tseg cia, ua txuj lom, thiab ua kom dawb huv. Cov ntsev kuj muaj nqis rau cov neeg Ixayees txoj kev teev ntuj. Lawv siv thaum ua kab ke muab tsiaj txi raws li Mauxes txoj kev cai (saib Levis Kev Cai 2:13; Teev Npe 18:19). Thaum cov ntsev tsuag lawm, ces tsis zoo lawm, los sis “tsis muaj nqis dab tsi” (Mathais 5:13). Yuav muaj li no thaum muab cov ntsev xyaw nrog lwm yam.

Cia li xav txog qhov no thaum nej xav txog Mathais 5:13. Koj yuav ua li cas kom tsis txhob tsuag thaum koj ua Yexus Khetos ib tug thwj tim? Koj yuav ua li cas kom ua koj txoj hauj lwm dawb huv thaum koj las neeg ntiaj teb?

Kuj saib Lus Qhuab Qhia thiab Kev Khi Lus 103:9–10.

ntsev

“Nej yog cov ntsev uas las neeg ntiaj teb” (Mathais 5:13).

Mathais 5:17–48; Lukas 6:27–35

Khetos txoj kev cai yeej pauv Mauxes txoj kev cai chaw.

Tej zaum cov thwj tim xav tsis thoob thaum lawv hnov Yexus hais tias lawv yuav tsum ua ncaj ncees tshaj cov xib hwb qhia Vajtswv txoj kev cai thiab cov Falixais (saib Mathais 5:20), cov uas xav zoo txog lawv tus kheej vim lawv ua raws nraim li Mauxes txoj kev cai.

Thaum koj nyeem Mathais 5:21–48 thiab Lukas 6:27–35, xav seb koj puas sau lub cim rau tej yam uas yuav tsum ua kom raws li Mauxes txoj kev cai (“Nej twb hnov tej lus uas …”) thiab Yexus tau qhia dab tsi kom muab tej kev yam no hloov ua tej yam siab dua. Koj xav tias yog vim li cas tus Cawm Seej txoj kev yog ib txoj kev siab dua?

Piv txwv hais tias, Yexus tau qhia dab tsi nyob hauv Mathais 5:27–28 txog peb txoj kev lav ris tswj hwm peb tej kev xav? Koj yuav ua li cas kom tswj hwm tej kev xav uas nkag hauv nej lub siab lub ntsws? (saib Lus Qhuab Qhia thiab Kev Khi Lus 121:45).

Kuj saib “Sermon on the Mount: The Higher Law” (video), ChurchofJesusChrist.org.

Mathais 5:48

Leej Txiv Saum Ntuj Ceeb Tsheej puas xav kom kuv ua neeg zoo tag nrho tiag?

Thawj Tswj Hwm Russell M. Nelson tau qhia hais tias:

“Lo lus perfect los yog zoo tag nrho yog kev txhais lo lus Kilis teleios, uas txhais tias ‘tiav.’ … Lo lus hauv paus ntawm lo lus no yog teleiono, uas txhais tias yus ‘mus txog ntua qhov deb, loj hlob tas lawm, ua tiav lawm, los sis ua kom tas.’ Cia li paub hais tias lo lus no tsis txhais tias ‘tsis ua yuam kev hlo li’; lo lus no txhais tias ‘kev ua raws li ib lub hom phiaj.’ …

“… Tus Tswv qhia hais tias, ‘Nej nyiaj tsis taus Vajtswv lub yeeb haum nim no … ; yog li ntawd, ua siab ntev mus ntxiv kom txog thaum nej ua tau zoo tag nrho’ [Lus Qhuab Qhia thiab Kev Khi Lus 67:13].

“Peb tsis tas txhawj xeeb yog tias peb tej kev siv zog ua neeg zoo tag nrho tam sim no yeej nyuaj heev thiab zoo li tsis muaj qhov kawg. Peb tseem tos ntsoov kom ua neeg zoo tag nrho. Yeej yuav muaj li no tom qab txoj Kev Sawv Rov Los thiab dhau los ntawm tus Tswv xwb. Cov uas hlub nws thiab coj raws li nws cov lus txib yuav los ua neeg zoo tag nrho” (“Perfection Pending,” Ensign, Kaum Ib Hlis Ntuj 1995, 86, 88).

Kuj saib 2 Petus 1:3–11; Maulaunais 10:32–33; Lus Qhuab Qhia thiab Kev Khi Lus 76:69; Jeffrey R. Holland, “Ua Neeg Zoo Tag Nrho—Thaum Kawg,” Liahona, Kaum Ib Hlis Ntuj 2017, 40–42.

lub cim rau tsev neeg txoj kev kawm ua ke

Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke

Mathais 5:1–9.Tej ntsiab cai twg nyob hauv Mathais 5:1–9 yuav pab nej tsev neeg zoo siab dua? Tej zaum nej yuav xaiv ib los sis ob lub ntsiab cai uas tseem ceeb heev rau nej tsev neeg. Piv txwv hais tias, tej lus qhia twg yuav pab peb los ua neeg uas sib haum xeeb? (saib Mathais 5:21–25, 38–44). Peb yuav cuab tej lub hom phiaj twg? Peb ua dab tsi kom nco txog tej no?

Mathais 5:13.Noj ib yam zaub mov uas las ntsev ces noj tib co zaub mov uas tsis tau las ntsev. Ob qho no sib txawv li cas? Qhov hais tias yus yog “cov ntsev uas las neeg ntiaj teb” txhais li cas? Peb yuav ua li cas kom ua li no?

Mathais 5:14–16.Kom pab nej tsev neeg to taub tias “lub teeb uas ci rau neeg ntiaj teb pom kev” txhais li cas, xav txog tej lub teeb nyob hauv nej lub tsev, nej zej zog, thiab lub ntiaj teb. Tej zaum yuav pab yog tias nej npog ib lub teeb kom qhia tias zoo li cas. Yexus cov lus txhais li cas thaum Nws hais tias, “Nej yog lub teeb uas ci rau neeg ntiaj teb pom kev”? (Mathais 5:14). Leej twg yog ib lub teeb uas ci rau peb tsev neeg pom kev? Peb yuav ua li cas kom ci rau lwm tus pom kev? (saib 3 Nifais 18:16, 24–25).

Mathais 5:43–45.Thaum nej tsev neeg nyeem tus Cawm Seej tej lus nyob hauv tej nqe no, tej zaum nej yuav xav sib tham txog qhov uas nej xav hlub, foom koob hmoov rau, thiab thov Vajtswv kom pab leej twg. Peb yuav ua li cas kom peb hlub lawv ntxiv?

Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.

Zaj nkauj zoo hu: “Shine On,” Children’s Songbook, 144.

Kev Qhia Zoo Dua Ntxiv

Saib ntsoov. “Thaum nej tsom ntsoov rau tej yam uas muaj hauv nej cov me nyuam lub neej, nej yuav muaj cib fim zoo qhia lawv. … Tej lus uas [lawv] hais los sis tej lus uas lawv nug los tej zaum kuj yog cib fim qhia lawv” (Teaching in the Savior’s Way, 16).

tswm ciab

“Nej yog lub teeb uas ci rau neeg ntiaj teb pom kev” (Mathais 5:14).