“Ib Hlis Ntuj 30–Ob Hlis Ntuj 5. Mathais 4; Lukas 4–5: ‘Tus Tswv tus Ntsuj Plig Nrog Nraim Kuv,’” Los, Nrog Kuv Mus—Rau Ib Leeg thiab Tsev Neeg: Phau Tshiab 2023 (2022)

“Ib Hlis Ntuj 30–Ob Hlis Ntuj 5. Mathais 4; Lukas 4–5,” Los, Nrog Kuv Mus—Rau Ib Leeg thiab Tsev Neeg: 2023

Daim Duab

Yexus nyob hauv roob moj sab qhua

Mus rau tom Roob Moj Sab Qhua, los ntawm Eva Koleva Timothy

Ib Hlis Ntuj 30–Ob Hlis Ntuj 5

Mathais 4; Lukas 4–5

“Tus Tswv tus Ntsuj Plig Nrog Nraim Kuv”

Tus Cawm Seej tau siv cov vaj lug kub kom tiv taus Dab Ntxwg Nyoog tej kev ntxias thiab ua tim khawv txog Nws ntiag tug hauj lwm (saib Lukas 4:1–21). Cia li xav seb cov vaj lug kub yuav txhawb koj txoj kev ntseeg li cas thiab pab koj cog lus tias yuav tiv taus kev ntxias.

Sau Ntawv txog Koj tej Kev Tshoov Siab

Txij thaum Nws yog ib tug tub hluas, zoo li Yexus paub tias Nws muaj ntiag tug hauj lwm tseem ceeb thiab dawb ceev. Tiam sis thaum Yexus npaj mus ua Nws txoj hauj lwm qhuab qhia hauv lub ntiaj teb, tus yeeb ncuab xav ua kom tus Cawm Seej ua xyem xyav. Dab Ntxwg Nyoog hais tias, “Yog koj yog Vajtswv tus Tub tiag” (Lukas 4:3, ntxiv qhov uas ntawv qaij). Tiam sis tus Cawm Seej twb tau sib txuas lus nrog Nws Leej Txiv Saum Ntuj Ceeb Tsheej. Nws paub cov vaj lug kub, thiab Nws paub Nws yog leej twg. Raws li Yexus xav, qhov uas Dab Ntxwg Nyoog hais—“Kuv yuav muab hlo lub hwj chim … huv tib si rau koj” (Lukas 4:6)—yeej yog kev dag xwb, vim tus Cawm Seej txoj kev npaj siab tas Nws lub neej tau pab Nws txais tau “Vaj Ntsuj Plig Dawb Huv lub hwj chim” (Lukas 4:14). Yog li ntawd txawm Yexus Khetos raug kev sim siab, kev sim ntxias, thiab lwm tus txoj kev xyeej Nws, Nws yeej tsis tau ua xyem xyav txog Nws txoj hauj lwm uas Vajtswv txib Nws ua: “Kuv yuav tsum mus qhia Txoj Moo Zoo uas hais txog Vajtswv lub Teb Chaws … rau qhov Vajtswv yeej txib kuv los ua tes hauj lwm no” (Lukas 4:43).

Daim Duab

lub cim txog kev kawm ntawm yus ib leeg

Tej lub Tswv Yim Kawm Vaj Lug Kub ntawm Yus Ib Leeg

Mathais 4:1–2

Kev sib txuas lus nrog Vajtswv pab kuv npaj ua hauj lwm rau Nws.

Kom npaj siab ua Nws ntiag tug hauj lwm, Yexus tau mus rau tom roob moj sab qhua “mus nyob nrog Vajtswv” (Joseph Smith Kev Txhais, Mathais 4:1 [in Mathais 4:1, lub cim nram qab b]). Cia li xav txog tej yam uas koj ua kom koom siab nrog Vajtswv. Vim li cas tej no npaj koj ua hauj lwm li Nws xav kom koj ua?

Mathais 4:1–11; Lukas 4:1–13

Yexus Khetos tau coj yam ntxwv rau kuv xyaum thaum nws tiv taus kev ntxias.

Tej lub sij hawm tib neeg xav phem txog lawv tus kheej thaum lawv raug kev ntxias kom ua txhaum. Tiam sis tus Cawm seej, tus uas “tsis tau ua ib qho txhaum li” (Henplais 4:15), twb raug sim ntxias thiab. Yexus Khetos paub txog tej kev ntxias uas peb raug thiab paub ua li cas kom peb kov yeej tej ntawd (saib Henplais 2:18; Amas 7:11–12).

Thaum koj nyeem Mathais 4:1–11 thiab Lukas 4:1–13, koj kawm dab tsi uas pab tau koj thaum koj yuav tsum tiv taus tej kev ntxias? Tej zaum koj yuav xav sau koj tej kev xav nyob hauv ib daim duab zoo li no:

Yexus Khetos	Kuv
Yexus Khetos Dab Ntxwg Nyoog tau sim ntxias Yexus Khetos ua dab tsi?	Kuv Dab Ntxwg Nyoog sim ntxias kuv ua dab tsi?
Yexus Khetos Yexus Khetos tau ua li cas kom npaj tiv taus kev ntxias?	Kuv Kuv yuav ua li cas kom npaj tiv taus kev ntxias?

Koj kawm dab tsi ntxiv los ntawm Joseph Smith Kev Txhais Mathais 4? (saib tej lub cim nram qab hauv Mathais 4).

Kuj saib 1 Kauleethaus 10:13; Amas 13:28; Mauxes 1:10–22.

Lukas 4:16–32

Yexus Khetos yog tus Mexiyas uas cov yaj saub hais txog.

Yog tias koj yuav tsum piav txog tej yam uas Vajtswv txib Yexus Khetos ua nyob hauv lub ntiaj teb no, koj yuav hais li cas? Thaum tus Cawm Seej tau hais Yaxayas tej lus txog tus Mexiyas, tus Cawm Seej tau piv txog Nws ntiag tug hauj lwm (saib Lukas 4:18–19; Yaxayas 61:1–2). Koj kawm dab tsi txog Nws ntiag tug hauj lwm thaum koj nyeem tej nqe no?

Tus Cawm Seej caw nej li cas kom koom tes ua Nws txoj hauj lwm?

Daim Duab

Yexus sawv hauv lub tsev sab laj

Txawm yog cov Neeg Yudais twb tos ntsoov ntau pua xyoo kom muaj raws li Yaxayas tej lus txog yav tom ntej, neeg coob tsis tau ntseeg tias Yexus yog tus Mexiyas thaum nws hais tias, “Vajtswv Txoj Lus uas hnub no nej hnov twb tiav lawm” (Lukas 4:21). Thaum koj nyeem Lukas 4:20–30 (kuj saib Malakaus 6:1–6), cia li xav seb koj yuav ua li cas yog koj yog ib tug neeg nyob hauv Naxales. Puas muaj dab tsi uas yuav ua rau koj tsis lees txais Yexus Khetos los ua koj tus Cawm Seej?

Kuj saib Mauxiyas 3:5–12; “Jesus Declares He Is the Messiah” (video), ChurchofJesusChrist.org.

Mathais 4:18–22; Lukas 5:1–11

Thaum kuv tso siab rau tus Tswv, Nws yuav pab kuv hloov los ua neeg zoo li Vajtswv.

Thawj Tswj Hwm Ezra Taft Benson qhia hais tias, “Cov txiv neej thiab cov poj niam uas muab lawv txoj sia tso rau Vajtswv yuav kawm tias Nws yeej pab tau lawv zoo tshaj lawv pab tau lawv tus kheej” (Teachings of Presidents of the Church: Ezra Taft Benson [2014], 42). Cia li pom tias tau muaj li no rau Ximoos Petus thiab cov uas nrog nws nuv ntse. Yexus pom ib yam zoo tshaj uas lawv pom tau txog lawv tus kheej. Nws xav kom lawv “paub mus nrhiav neeg” (Mathais 4:19; kuj saib Lukas 5:10).

Thaum koj nyeem Mathais 4:18–22 thiab Lukas 5:1–11, cia li xav txog qhov uas Yexus Khetos pab koj hloov los ua ib tug neeg zoo li cas. Koj puas tau hnov Nws caw koj coj raws li Nws? Koj yuav ua li cas kom qhia tus Tswv tias koj txaus siab tso txhua yam tseg kom coj raws li Nws? (saib Lukas 5:11).

Daim Duab

lub cim rau tsev neeg txoj kev kawm ua ke

Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke

Mathais 4:1–2; Lukas 4:1–2.Peb kawm dab tsi los ntawm zaj no txog qhov uas kev yoo mov muaj hwj chim npaum li cas? Kom pab nej tsev neeg kawm txog kev yoo mov, tej zaum nej yuav xav siv “Fasting and Fast Offerings” nyob hauv Gospel Topics (topics.ChurchofJesusChrist.org). Tej zaum nej tsev neeg yuav xav qhia txog tej yam uas muaj los thaum lawv yoo mov. Tej zaum nej yuav xav thov Vajtswv kom pab nej npaj yoo mov ua ke rau ib lub hom phiaj.

Mathais 4:3–4; Lukas 4:3–4.Thaum Dab Ntxwg Nyoog sim ntxias Yexus Khetos kom lub pob zeb txia ua mov, nws kuj hais tias Yexus tsis yog Vajtswv tus tub, “Yog koj yog Vajtswv tus tub tiag” (Mathais 4:3, ntxiv qhov uas ntawv qaij). Vim li cas Dab Ntxwg Nyoog xav ua kom peb tsis ntseeg tias peb yog Vajtswv cov me nyuam—thiab tus Cawm Seej tsis yog los ntawm Vajtswv? Nws ua dab tsi kom sim ua li no? (Kuj saib Mauxes 1:10–23.)

Joseph Smith Kev Txhais, Mathais 4:11.Tom qab Yexus raug sim siab ntawm sab cev nqaij daim tawv thiab sab ntsuj plig, Nws tau xav txog Yauhas tus Muab Neeg Ua Kev Cai Raus Dej, uas nyob hauv ib lub tsev kaw: “Thiab nim no Yexus tau paub hais tias luag muab Yauhas tso rau hauv lub tsev kaw, thiab Yexus tau xa cov tim tswv, thiab, saib seb, lawv tau los thiab txhawb pab Yauhas” (Joseph Smith Kev Txhais, Mathais 4:11 [nyob hauv Mathais 4:11, lub cim nram qab a). Peb tau koob hmoov li cas thaum peb coj raws li Yexus Khetos tus yam ntxwv xav txog lwm tus?

Lukas 4:16–21.Peb puas paub leej twg uas muaj lub siab mob heev los sis yuav tsum “tso … kom dim”? (Lukas 4:18). Peb yuav ua li cas kom pab lwm tus txais tus Cawm Seej txoj kev kho mob thiab txoj kev cawm dim? Tej zaum nej yuav xav sib tham txog qhov uas kev ua kab ke hauv lub tuam tsev yuav pab kom “qhia txoj kev cawm dim rau cov neeg uas raug kaw” (Lukas 4:18).

Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.

Zaj nkauj zoo hu: “Los, Nrog Kuv Mus,” Cov Nkauj Qhuas Vajtswv, zaj 41.

Kev Qhia Zoo Dua Ntxiv

Ua neej raws li Yexus Khetos txoj moo zoo. “Qhov tseem ceeb uas nej ua tau yog nej ua ib tug niam tsev txiv tsev [los sis tus xib hwb] yog ua raws li txoj moo zoo kawg siab kawg ntsws. … Nov yog txoj kev tseem ceeb tshaj plaws kom muaj tus Vaj Ntsuj Plig Dawb Huv nrog nraim nej nyob. Nej tsis tas ua neeg zoo tag nrho, cia li rau siab ua zoo npaum li nej ua tau—thiab thov kev zam txim rau nej los ntawm tus Cawm Seej txoj Kev Theej Txhoj thaum twg nej ua yuam kev” (Teaching in the Savior’s Way, 13).