“Ib Hlis Ntuj 23–29. Mathais 3; Malakaus 1; Lukas 3: ‘Kho Kev Tos tus Tswv,’” Los, Nrog Kuv Mus—Rau Ib Leeg thiab Tsev Neeg: Phau Tshiab 2023 (2022)
“Ib Hlis Ntuj 23–29. Mathais 3; Malakaus 1; Lukas 3,” Los, Nrog Kuv Mus—Rau Ib Leeg thiab Tsev Neeg: 2023
Qhov rais uas tsuas xim rau nyob hauv lub Tuam Tsev Nauvoo Illinois, los ntawm Tom Holdman
Ib Hlis Ntuj 23–29
Mathais 3; Malakaus 1; Lukas 3
“Kho Kev Tos tus ”Tswv
Pib nyeem Mathais 3; Malakaus 1; thiab Lukas 3. Thaum koj thov Vajtswv kom tus Vaj Ntsuj Plig Dawb Huv pab koj to taub tej tshooj no, Nws yuav qhia tej lub tswv yim uas tseem ceeb rau koj. Cia li sau ntawv txog tej kev tshoov siab no, thiab npaj ua raws li tej no.
Sau Ntawv txog Koj tej Kev Tshoov Siab
Yexus Khetos thiab Nws txoj moo zoo muaj hwj chim hloov koj lub siab. Lukas tau hais Yaxayas tej lus uas piav txog yam uas yuav muaj thaum tus Cawm Seej los hais tias: “Txhua txhua lub kwj ha kom puv, khawb txhua lub roob thiab txhua lub pov roob kom tiaj. Kho tej kev nkhaus kom ncaj, muab qhov siab thiab qhov qis pheej kom tiaj xwm yeem.” (Lukas 3:5; kuj saib Yaxayas 40:4). Nov yog ib zaj lus rau peb txhua tus, tsis hais cov uas xav tias lawv hloov tsis taus hlo li. Yog tias ib yam uas ruaj khov npaum li ib lub pov roob yuav tiaj, ces tus Tswv yeej txawj kho peb tej kev nkhaus kom ncaj (saib Lukas 3:4–5). Yog peb lees txais Yauhas tus Muab Neeg Ua Kev Cai Raus Dej txoj kev caw peb kom hloov siab lees txim, ces peb yuav npaj peb lub siab lub ntsws kom txais tau Yexus Khetos peb thiaj li yuav “pom Vajtswv txoj kev cawm dim” thiab (Lukas 3:6).
Tej lub Tswv Yim Kawm Vaj Lug Kub ntawm Yus Ib Leeg
Malakaus yog leej twg?
Hais txog cov uas sau plaub phau Txoj Moo Zoo, peb tsis tshua paub txog Malakaus. Peb paub tias nws yog Povlauj, Petus, thiab lwm tus tub txib tus khub. Cov kws kawm txog phau Npaivnpaum ntseeg tias Petus hais kom Malakaus sau txog tus Cawm Seej lub neej. Nyaj Malakaus sau nws phau Txoj Moo Zoo ua ntej tau sau lwm phau.
Kuj saib Phau Qhia txog Txoj Moo Zoo, “Malakaus.”
Mathais 3:1–12; Malakaus 1:1–8; Lukas 3:2–18
Kev hloov siab lees txim yog ib txoj kev hloov yus lub siab lub ntsws loj heev.
Yauhas tus Muab Neeg Ua Kev Cai Raus Dej ntiag tug hauj lwm yog kom npaj cov neeg lub siab txais tus Cawm Seej thiab hloov los ua neeg zoo li Nws. Nws ua li cas kom ua li ntawd? Nws hais kom peb hloov siab lees txim thaum nws hais tias, “Cia li tso plhuav nej tej kev txhaum tseg” (Mathais 3:2). Thiab nws tau siv tej lub cim xws li cov txiv ntoo thiab cov nplej kom qhia txog kev hloov siab lees txim (saib Lukas 3:9, 17).
Nej nrhiav tau lwm lub cim twg nyob hauv tej zaj lus txog Yauhas tus Muab Neeg Ua Kev Cai Raus Dej txoj hauj lwm qhuab qhia? (saib Mathais 3:1–12; Malakaus 1:1–8; Lukas 3:2–18). Xav seb koj puas sau tej lus cim nyob hauv koj cov vaj lug kub txog tej no los sis kos duab txog tej no. Tej lub cim no qhia dab tsi rau koj txog kev hloov siab lees txim thiab vim li cas yuav tsum muaj kev hloov siab lees txim?
Kev hloov siab lees txim tiag tiag yog ib txoj kev hloov siab hloov ntsws, ib txoj kev xav tshiab txog Vajtswv, txog tus kheej, thiab txog lub ntiaj teb. … Qhov no txhais tias yus muab yus lub siab ywj rau Vajtswv lub siab nyiam (Phau Qhia txog Vaj Lug Kub, “Hloov Siab Lees Txim”) Nyob hauv Lukas 3:7–14, Yauhas tau caw tib neeg hloov dab tsi kom npaj lees txais Yexus Khetos? Cov lus ntuas no muaj nqis npaum li cas rau koj lub neej? Koj yuav ua li cas kom qhia tias koj twb tau hloov siab lees txim tiag tiag? (saib Lukas 3:8).
Kuj saib Russell M. Nelson, “Peb Muaj Peev Xwm Ua Zoo Dua thiab Ua Neeg Zoo Dua,” Liahona, Tsib Hlis Ntuj 2019, 67–69; Dallin H. Oaks, “Ntxuav Huv Los ntawm Kev Hloov Siab Lees Txim,” Liahona, Tsib Hlis Ntuj 2019, 91–94.
Cov neeg Falixais thiab Xadukais yog leej twg?
Cov Falixais yog cov mej zeej hauv ib pawg teev ntuj Yudais uas yeej ua tib zoo ua raws nraim li Mauxes txoj kev cai thiab tej kab lig kev cai. Cov neeg Xadukais yog ib pawg Yudais nplua nuj uas yeej muaj hwj huam loj heev rau kev teev ntuj thiab kev coj teb chaws; lawv tsis tau ntseeg tias tib neeg yuav sawv rov los. Ob pawg no yeej tau ntseeg txawv ntawm Vajtswv tej kev cai lub ntsiab thaum xub thawj.
Kuj saib Mathais 23:23–28; Phau Qhia txog Vaj Lug Kub, “Falixais,” “Xadukais.”
Mathais 3:11, 13–17; Malakaus 1:9–11; Lukas 3:15–16, 21–22
Yexus Khetos tau ua kev cai raus dej kom ua raws li txhua txoj kev ncaj ncees.
Thaum koj tau ua kev cai raus dej, koj tau ua raws li tus Cawm Seej tus yam ntxwv. Cia li muab tej zaj lus txog lub sij hawm uas tus Cawm Seej ua kev cai raus dej piv rau thaum koj tau ua kev cai raus dej.
|
Thaum tus Cawm Seej Ua Kev Cai Raus Dej |
Thaum Kuv Ua Kev Cai Raus Dej |
|---|---|
Thaum tus Cawm Seej Ua Kev Cai Raus Dej Leej twg muab Yexus ua kev cai raus dej, thiab nws muaj txoj cai twg? | Thaum Kuv Ua Kev Cai Raus Dej Leej twg muab koj ua kev cai raus dej, thiab nws muaj txoj cai twg? |
Thaum tus Cawm Seej Ua Kev Cai Raus Dej Yexus ua kev cai raus dej qhov twg? | Thaum Kuv Ua Kev Cai Raus Dej Koj ua kev cai raus dej qhov twg? |
Thaum tus Cawm Seej Ua Kev Cai Raus Dej Tau ua li cas kom muab Yexus ua kev cai raus dej? | Thaum Kuv Ua Kev Cai Raus Dej Tau ua li cas kom muab koj ua kev cai raus dej? |
Thaum tus Cawm Seej Ua Kev Cai Raus Dej Vim li cas Yexus tau ua kev cai raus dej? | Thaum Kuv Ua Kev Cai Raus Dej Vim li cas koj tau ua kev cai raus dej? |
Thaum tus Cawm Seej Ua Kev Cai Raus Dej Leej Txiv Saum Ntuj Ceeb Tsheej tau ua li cas kom qhia tias Nws txaus siab rau Yexus? | Thaum Kuv Ua Kev Cai Raus Dej Leej Txiv Saum Ntuj Ceeb Tsheej tau ua li cas kom qhia tias Nws txaus siab thaum koj ua kev cai raus dej? Txij thaum ntawd los Nws tau ua li cas kom qhia tias Nws pom zoo rau koj? |
Kuj saib 2 Nifais 31; Mauxiyas 18:8–11; Lus Qhuab Qhia thiab Kev Khi Lus 20:37, 68–74; “The Baptism of Jesus” (video), ChurchofJesusChrist.org.
Mathais 3:16–17; Malakaus 1:9–11; Lukas 3:21–22
Pawg Vajtswv yog peb tug neeg.
Phau Npaivnpaum muaj tej qhov puav pheej ntau uas qhia tias Pawg Vajtswv yeej yog peb tug neeg uas nyias nyob nyias. Tej zaj lus hais txog thaum Yauhas muab tus Cawm Seej ua kev cai raus dej yeej hais li no. Thaum nej nyeem tej zaj no, cia li xav txog tej yam uas koj kawm txog Pawg Vajtswv. Vim li cas tej lus qhuab qhia no tseem ceeb rau koj?
Kuj saib Chiv Keeb 1:26; Mathais 17:1–5; Yauhas 17:1–3; Tes Hauj Lwm 7:55–56; Lus Qhuab Qhia thiab Kev Khi Lus 130:22.
Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke
-
Mathais 3.Yauhas tus Muab Neeg Ua Kev Cai Raus Dej tau tuav lub Pov Thawj Hwj Aloos. Peb yuav kawm dab tsi los ntawm Yauhas tus yam ntxwv txog lub hom phiaj ntawm lub Pov Thawj Hwj Aloos? Peb txais cov koob hmoov twg vim muaj lub Pov Thawj Hwj Aloos? Yog nej muaj ib tug tub hluas hauv nej tsev neeg, tej zaum nej yuav xav siv sij hawm me ntsis pab nws to taub nws yuav siv lub Pov Thawj Hwj Aloos li cas kom foom koob hmoov rau lwm tus. (Kuj saib Lus Qhuab Qhia thiab Kev Khi Lus 13:1; 20:46–60.)
Thaum peb ua kev cai raus dej, peb tej kev txhaum raug ntxuav mus.
-
Mathais 3:11–17; Malakaus 1:9–11; Lukas 3:21–22.Nej tsev neeg puas tau pom ib tug ua kev cai raus dej los sis pom zoo ua ib tug mej zeej hauv lub Koom Txoos? Nej tsev neeg tau xav li cas hauv lawv lub siab? Tej zaum nej yuav xav qhia lawv txog tej lub cim ntawm kev cai raus dej thiab kev pom zoo. Thaum ib tug ua kev cai raus dej thiab ua kev pom zoo es vim li cas qhov no zoo li nws yug dua tshiab? Vim li cas yuav tsum raus rau hauv dej kom tag nrho thaum peb ua txoj kev cai no? Vim li cas peb hnav ris tsho dawb thaum peb ua kev cai raus dej? Vim li cas peb hais tias lub txiaj ntsim Vaj Ntsuj Plig Dawb Huv yeej zoo li “kev cai raus ntawm hluav taws”? (Lus Qhuab Qhia thiab Kev Khi Lus 20:41; kuj saib Phau Qhia txog Vaj Lug Kub, “Kev Cai Raus Dej,” “Vaj Ntsuj Plig Dawb Huv”).
-
Mathais 3:17; Malakaus 1:11; Lukas 3:22.Thaum twg peb tau xav tias Vajtswv txaus siab rau peb? Peb tsev neeg yuav ua li cas kom Vajtswv txaus siab rau peb?
Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.
Zaj nkauj zoo hu: “Baptism,” Children’s Songbook, 100–101.
Kev Kawm Zoo Dua Ntxiv ntawm Yus Ib Leeg
Thov tus Tswv pab koj. Twb tau txais cov vaj lug kub los ntawm kev tshwm sim, thiab yog peb yuav to taub cov vaj lug kub peb yuav txais kev tshwm sim. Tus Tswv tau cog lus tias, “Nej thov, nej thiaj yuav tau; nej nrhiav, nej thiaj yuav ntsib; nej khob, Vajtswv thiaj yuav qhib qhov rooj rau nej” (Mathais 7:7).
Yauhas tus Muab Yexus Ua Kev Cai Raus Dej, los ntawm Greg K. Olsen