“Ib Hlis Ntuj 2–8. Mathais 1; Lukas 1: ‘Thov Kom Muaj Raws Li Koj Hais Ko rau Kuv,’” Los, Nrog Kuv Mus—Rau Ib Leeg thiab Tsev Neeg: Phau Tshiab 2023 (2022)

“Ib Hlis Ntuj 2–8. Mathais 1; Lukas 1,” Los, Nrog Kuv Mus—Rau Ib Leeg thiab Tsev Neeg: 2023

Daim Duab

Maivliag thiab Elixanpes

Ib Hlis Ntuj 2–8

Mathais 1; Lukas 1

“Thov Kom Muaj Raws Li Koj Hais Ko rau Kuv”

Thaum koj nyeem thiab xav txog Mathais 1 thiab Lukas 1, cia li sau ntawv txog tej kev tshoov siab uas koj txais tau. Koj nrhiav tau tej lus qhuab qhia tseeb twg ntxiv? Tej zaj lus twg muaj nqis tshaj rau koj thiab koj tsev neeg? Tej lub tswv yim txog kev kawm ntawv nyob hauv zaj lus no yuav pab nej kawm ntxiv.

Sau Ntawv txog Koj tej Kev Tshoov Siab

Raws li tib neeg hauv lub ntiaj teb no xav, qhov no yeej ua tsis taus. Ib tug nkauj xwb muaj tsis taus ib tug me nyuam—thiab ib tug poj niam uas twb laus lawm muaj tsis taus me nyuam thiab. Tiam sis Vajtswv muaj ib txoj hau kev rau Nws Leej Tub txoj kev yug los thiab Yauhas tus uas Muab Neeg Ua Kev Cai Raus Dej txoj kev yug los, yog li ntawd Maivliag thiab Elixanpes, twb los ua leej niam. Qhov uas peb nco txog nkawd qhov txuj ci tseem ceeb no thaum peb raug ib yam dab tsi uas peb xav tias peb ua tsis taus yeej yog ib qho uas yuav pab peb. Peb puas muaj peev xwm kov yeej peb tej kev qaug zog? Peb puas muaj peev xwm pab ib tug hauv peb tsev neeg uas tsis xav kawm txog txoj moo zoo? Zoo li Khali-ees hais lus rau peb thaum nws hais rau Maivliag hais tias, “Yeej tsis muaj ib yam dab tsi uas Vajtswv yuav ua tsis tau li” (Lukas 1:37). Thiab Maivliag yeej zoo ib yam li peb thaum Vajtswv muab Nws lub siab nyiam tshwm sim thiab Maivliag teb hais tias: “Thov kom muaj raws li koj hais ko rau kuv” (Lukas 1:38).

Daim Duab

lub cim txog kev kawm ntawm yus ib leeg

Tej lub Tswv Yim Kawm Vaj Lug Kub ntawm Yus Ib Leeg

Mathais thiab Lukas yog leej twg?

Mathais yog ib tug neeg Yudais uas sau se, es Yexus tau hu nws los ua Yexus ib tug Thwj Tim (saib Mathais 10:3). Mathais sau nws phau Txoj Moo Zoo rau cov neeg Yudais; yog li ntawd nws tau xaiv kom hais cov yaj saub tej lus txog tus Mexiyas hauv Phau Qub uas tau muaj los nyob hauv Yexus lub neej thiab txoj hauj lwm qhuab qhia.

Lukas yog Lwm Haiv Neeg (tsis yog neeg Yudais) uas tau nrog tus Thwj Tim Povlauj taug mus. Nws tau sau nws phau Txoj Moo Zoo tom qab tus Cawm Seej tuag rau ib haiv neeg uas tsis yog neeg Yudais. Nws tau ua tim khawv tias Yexus Khetos yog tus Cawm Seej ntawm Lwm Haiv Neeg thiab cov neeg Yudais. Nws tau ceev cov neeg tej lus pov thawj txog tus Cawm Seej lub neej, thiab sau ntawv txog tej zaj dab neeg los ntawm cov poj niam ntau dua li lwm tus uas sau ib phau Txoj Moo Zoo.

Kuj saib Phau Qhia txog Vaj Lug Kub, “Plaub phau Txoj Moo Zoo,” “Mathais,” “Lukas.”

Mathais 1:18–25; Lukas 1:26–35

Yexus Khetos yug los ntawm ib leej niam uas txawj tuag thiab ib Leej Txiv uas tsis txawj tuag.

Nyob hauv Mathais 1:18–25 thiab Lukas 1:26–35, cia li saib tias Mathais thiab Lukas tau piav li cas txog qhov txuj ci tseem ceeb uas yog Yexus txoj kev yug los. Nkawd tej lus piav pab koj li cas kom txhawb nqa koj txoj kev ntseeg tus Cawm Seej txoj Kev Theej Txhoj? Vim li cas koj yuav tsum paub tias Yexus yog Vajtswv Leej Tub thiab yog Maivliag leej tub?

Thawj Tswj Hwm Russell M. Nelson piav tias Yexus Khetos txoj Kev Theej Txhoj “yuav tsum muaj ib tug neeg uas tsis txawj tuag ua kev txi. Tiam sis Nws yuav tsum tuag thiab rov qab sawv rov los. Tus Cawm Seej yog tib tug uas muaj peev xwm ua li no. Los ntawm Nws niam Nws tau txais lub hwj chim tuag. Los ntawm Nws Leej Txiv Nws thiaj li muaj hwj chim kov yeej kev tuag” (“Constancy amid Change,” Ensign, Kaum Ib Hlis Ntuj 1993, 34).

Lukas 1:5–25, 57–80

Vajtswv cov koob hmoov yuav los raws li Nws tau teem sij hawm.

Yog koj tos ntsoov kom txais tau ib txoj koob hmoov thiab koj xav tias Vajtswv tsis hnov koj tej lus thov, zaj dab neeg txog Elixanpes thiab Xakhaliyas yuav pab koj paub tias Nws yeej nco ntsoov koj. Txwj Laug Jeffrey R. Holland cog lus tias: “Thaum peb ua hauj lwm thiab tos ntsoov ua ke txog thaum Vajtswv teb peb tej lus thov no, kuv cog lus rau nej tias Nws yeej hnov thiab Nws yeej yuav teb, txawm tej zaum yuav tsis teb raws li lub sij hawm los sis raws li txoj kev uas peb xav tau. Tiam sis Nws yeej yuav teb thaum lub sij hawm thiab raws li txoj kev uas ib leej txiv uas paub tag nrho thiab muaj kev hlub mus ib txhis yuav teb” (“Cia Siab Tos Ntsoov tus Tswv,” Liahona, Kaum Ib Hlis Ntuj 2020, 115–16) Xakhaliyas thiab Elixanpes tau ua li cas kom rau siab ntseeg? (saib Lukas 1:5–25, 57–80). Koj puas tos ntsoov ib txoj koob hmoov? Koj xav tias tus Tswv xav kom koj ua dab tsi thaum koj tseem tos?

Tom qab nkawd rau siab ntseeg tos ntsoov, Elixanpes thiab Xakhaliyas tau muaj ib tug me nyuam tub.

Mathais 1:18–25; Lukas 1:26–38

Cov uas rau siab ntseeg txaus siab ua raws li Vajtswv lub siab nyiam.

Ib yam li Maivliag, tej lub sij hawm peb kawm tias tej yam uas Vajtswv tau npaj rau peb lub neej yeej txawv ntawm tej yam uas peb tau npaj lawm. Koj kawm dab tsi los ntawm Maivliag txog kev ua raws li Vajtswv lub siab nyiam? Nyob hauv ntawv teev kab lus, cia li sau ntawv txog tej lus ua tus tim tswv thiab Maivliag hais (saib Lukas 1:26–38), nrog rau tej ntsiab lus uas koj nyeem hauv lawv tej zaj lus:

Tus tim tswv cov lus rau Maivliag	Tej lus qhia rau kuv
Tus tim tswv cov lus rau Maivliag “Tus Tswv nrog nraim koj nyob” (nqe 28).	Tej lus qhia rau kuv Tus Tswv paub txog kuv tej xwm txheej thiab tej yam uas nyuaj rau kuv ua.
Tus tim tswv cov lus rau Maivliag	Tej lus qhia rau kuv
Tus tim tswv cov lus rau Maivliag	Tej lus qhia rau kuv

Maivliag xav li cas	Tej lus qhia rau kuv
Maivliag xav li cas “Yuav ua li cas muaj tau li ntawd?” (nqe 34).	Tej lus qhia rau kuv Yeej tsis ua li cas yog yus nug tej yam kom to taub Vajtswv lub siab nyiam zoo dua.
Maivliag xav li cas	Tej lus qhia rau kuv
Maivliag xav li cas	Tej lus qhia rau kuv

Thaum koj nyeem txog Yauxej txoj kev coj yam ntxwv zoo nyob hauv Mathais 1:18–25, koj kawm dab tsi txog kev coj raws li Vajtswv lub siab nyiam? Koj kawm dab tsi ntxiv los ntawm tej yam uas muaj los rau Xakhaliyas thiab Elixanpes? (saib Lukas 1).

Kuj saib Lukas 22:42; Phau Qhia txog Vaj Lug Kub, “Khali-ees.”

Lukas 1:46–55

Maivliag tau ua tim khawv txog Yexus Khetos ntiag tug hauj lwm.

Maivliag tej lus nyob hauv Lukas 1:46–55 tau qhia tej yam uas yuav muaj thaum yav tom ntej ntawm tus Cawm Seej txoj hauj lwm qhuab qhia. Koj kawm dab tsi txog Yexus Khetos los ntawm tej yam uas Maivliag hais? Tej zaum koj yuav xav muab tej nqe no piv rau Hanas tej lus nyob hauv 1 Xamuyees 2:1–10 thiab piv rau Yexus cov Lus Foom Koob Hmoov nyob hauv Mathais 5:3–12. Tus Ntsuj Plig qhia dab tsi rau koj thaum koj xav txog tej nqe vaj lug kub no?

Daim Duab

lub cim rau tsev neeg txoj kev kawm ua ke

Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke

Mathais 1:1–17.Thaum nej tsev neeg nyeem txog Yexus zaj keeb kwm, tej zaum nej yuav xav nyeem txog nej tsev neeg zaj keeb kwm thiab hais tej zaj dab neeg txog koj cov poj koob yawm txwv. Qhov uas nej paub txog nej tsev neeg zaj keeb kwm pab nej tsev neeg li cas? Yog xav ua tej yam ntxiv txog tsev neeg zaj keeb kwm, saib FamilySearch.org/discovery.

Mathais 1:20; Lukas 1:11–13, 30.Vim li cas cov neeg nyob hauv tej nqe no ntshai ua luaj? Tej yam twg ua rau peb ntshai heev? Vajtswv ua dab tsi kom pab peb “tsis txhob ntshai”?

Lukas 1:37.Kom pab nej tsev neeg muaj kev ntseeg tias “yeej tsis muaj ib yam dab tsi uas Vajtswv ua tsis tau li,” tej zaum nej yuav xav nyeem Lukas 1 ua ke thiab nrhiav tej yam uas Vajtswv tau ua uas lwm tus neeg xav tias ua tsis taus. Peb yuav hais tej zaj dab neeg twg—los ntawm cov vaj lug kub los sis peb lub neej—thaum Vajtswv tau ua tej yam uas neeg ua tsis taus? Tej zaum yog nej saib hauv Txoj Moo Zoo Pawg Duab ces nej yuav tawm tswv yim.

Lukas 1:46–55.Tus Cawm Seej tau ua tej yam twg uas “loj kawg nkaus” rau peb? Qhov uas peb “lub siab … qhuas tus Tswv” txhais li cas?

Yog xav tau tswv yim ntxiv txog kev qhia cov me nyuam, saib lub lim tiam no tus txheej txheem qhia nyob hauv Come, Follow Me—For Primary.

Zaj nkauj zoo hu: “He Sent His Son,” Children’s Songbook, 34–35.

Kev Qhia Zoo Dua Ntxiv

Ua neej raws li cov vaj lug kub qhia. Tom qab nej nyeem ib nqe vaj lug kub, caw nej tsev neeg ua raws li ntsiab lus ntawd hauv lawv lub neej (saib Teaching in the Savior’s Way, 21). Piv txwv hais tias, nej tsev neeg yuav ua li cas kom ua raws li tej yam lawv kawm los ntawm Mathais 1 thiab Lukas 1 txog kev teb tus Tswv txoj kev hu?