tsev neeg saib ib phau duab

Kaum Ob Hlis Ntuj 26–Ib Hlis Ntuj 1

Peb Lav Ris Peb txoj Kev Kawm

Muaj cov vaj lug kub kom pab koj los cuag Khetos thiab hloov siab los ntseeg Nws txoj moo zoo. Phau Los, Nrog Kuv Mus—Rau Ib Leeg thiab Tsev Neeg yuav pab koj to taub cov vaj lug kub thiaj li ua rau koj muaj dag zog rau koj sab ntsuj plig uas koj thiab koj tsev neeg xav tau. Ces, nyob hauv koj tej chav kawm hauv lub Koom Txoos, koj yuav muaj cib fim hais txog koj tej lub

Sau Ntawv txog Koj tej Kev Tshoov Siab

“Neb nrhiav dab tsi?” Yexus tau nug Yauhas tus uas Muab Neeg Ua Kev Cai Raus Dej ob tug thwj tim (Yauhas 1:38). Tej zaum koj yuav xav nug koj tus kheej lo lus nug no—rau qhov xyoo no tej yam uas koj nrhiav tau hauv Phau Tshiab yuav nyob ntawm seb koj nrhiav dab tsi. Tus Cawm Seej cog lus tias “Nej nrhiav, nej thiaj yuav ntsib” (Mathais 7:7). Yog li ntawd cia li nug tej yam uas koj xav hauv koj lub siab thaum koj kawm vaj lug kub, ces ua tib zoo rau siab nrhiav tej lus teb. Nyob hauv Phau Tshiab koj yuav nyeem txog tej yam uas muaj los ntawm sab ntsuj plig rau Yexus Khetos cov thwj tim. Vim koj yog tus Cawm Seej ib tug thwj tim uas rau siab, koj muaj cai txais tau tej kev tshoov siab ntawm sab ntsuj plig uas muaj hwj huam heev thaum koj ua raws li tus Cawm Seej hais, raws li nyob hauv phau dawb ceev no, “Los, nrog kuv mus” (Lukas 18:22).

lub cim txog kev kawm ntawm yus ib leeg

Tej lub Tswv Yim Kawm Vaj Lug Kub ntawm Yus Ib Leeg

Yog kuv xav kawm los ntawm tus Cawm Seej, kuv yuav tsum ua raws li Nws hais, “Los, nrog kuv mus.”

Tus Cawm Seej tej lus, “Los, nrog kuv mus,” yeej hais rau txhua tus—tsis hais peb yog cov thwj tim tshiab los sis peb ib txwm yog Nws cov thwj tim. Nws tau caw tus tub hluas npluas nuj uas rau siab coj raws li cov lus txib ua li no (saib Mathais 19:16–22; Lukas 18:18–23). Tus tub hluas tau kawm qhov uas peb txhua tus yuav tsum kawm hais tias kev ua ib tug thwj tim txhais hais tias peb yuav tsum muab peb lub siab lub ntsws tag nrho rau peb Leej Txiv Saum Ntuj Ceeb Tsheej thiab Yexus Khetos. Peb ua cov thwj tim zoo zuj zus mus thaum peb pom tej yam uas peb tsis ua, hloov siab, thiab rau siab ua raws li Nkawd hais.

Peb pib kawm los ntawm tus Cawm Seej thaum peb siv zog xav to taub tej yam uas Nws tau qhia. Piv txwv hais tias, thaum koj kawm txog tej yam no ces ua rau koj to taub txoj kev txo hwj chim npaum li cas?

• Tus Cawm Seej tej lus qhia (saib Mathais 18:1–5; Lukas 18:9–14)

• Tus yam ntxwv los ntawm Nws lub neej (saib Yauhas 13:1–15)

Yog koj xav kawm ntxwv, cia li siv tus txheej txheem no xav txog ib lub ntsiab cai ntawm txoj moo zoo ntxiv, xws li kev hlub los sis kev zam txim.

Kuv lav ris kuv txoj kev kawm.

Txwj Laug David A. Bednar qhia tias: “Peb yuav tsum tsis txhob xav tias lub Koom Txoos yuav qhia los sis hais txhua yam peb yuav tsum paub thiab ua kom ua cov thwj tim rau siab heev thiab mob siab nyiaj kom mus txog thaum kawg. Tiam sis, peb txhua tus lav ris qhov uas peb yuav kawm tej yam uas peb yuav tsum kawm, ua neej raws li peb yuav tsum ua, thiab hloov los ua neeg zoo li tus Xib Hwb xav kom peb ua. Thiab peb lub tsev yog qhov chaw zoo tshaj plaws rau kev kawm, kev ua neej, thiab kev hloov los ua neeg zoo” (“Npaj Kom Tau Txhua Yam uas Yuav Tsum Muaj,” Liahona, Tsib Hlis Ntuj 2019, 102).

Qhov uas yus lav ris yus txoj kev kawm txhais li cas? Nrhiav tej lus teb nyob hauv Txwj Laug Bednar zaj lus thiab nyob hauv tej nqe vaj lug kub no: Yauhas 7:17; 1 Thexalaunikes 5:21; Yakaunpaus 1:5–6, 22; 2:17; 1 Nifais 10:17–19; 2 Nifais 4:15; Amas 32:27; thiab Lus Qhuab Qhia thiab Kev Khi Lus 18:18; 58:26–28; 88:118. Koj txais kev tshoov siab ua dab tsi kom rau siab ntxiv kawm txog txoj moo zoo?

Kuv yuav tsum paub qhov tseeb rau kuv tus kheej.

Tej zaum koj paub cov neeg uas yeej ib txwm tsis poob lawv txoj kev ntseeg, txawm muaj dab tsi los xij nyob hauv lawv lub neej los yog. Tej zaum lawv ua rau koj nco txog tsib tug nkauj xwb uas muaj tswv yim nyob hauv tus Cawm Seej zaj lus piv txwv (saib Mathais 25:1–13). Tiam sis ntshe koj tsis pom tej yam uas lawv rau siab ua kom lawv zaj lus tim khawv txog qhov tseeb muaj zog.

Peb yuav ua li cas kom paub qhov tseeb thiab ua rau peb zaj lus tim khawv muaj zog. Cia li sau ntawv koj xav li cas thaum koj xav txog tej nqe vaj lug kub no: Lukas 11:9–13; Yauhas 5:39; 7:14–17; Tes Hauj Lwm 17:10–12; 1 Kauleethaus 2:9–11; thiab Amas 5:45–46. (Kuj saib Gospel Topics, “Testimony,” topics.ChurchofJesusChrist.org.)

ntxhais hluas nyob ze ib txoj kev

Peb txhua tus yuav tsum paub qhov tseeb rau peb tus kheej.

Kuv yuav tsum ua li cas thaum twg kuv muaj lus nug?

Thaum koj nrhiav tej kev txawj ntse ntawm sab ntsuj plig, ces yuav ua rau koj muaj lus nug. Cov ntsiab cai nram qab no yuav pab koj nrhiav lus teb los ntawm ib txoj kev uas txhawb nqa kev ntseeg thiab koj zaj lus tim khawv.

• Thov Vajtswv kom pab koj to taub. Vajtswv yog lub hauv paus ntawm qhov tseeb tag nrho, thiab Nws qhia qhov tseeb dhau los ntawm tus Vaj Ntsuj Plig Dawb Huv, cov vaj lug kub, thiab Nws cov yaj saub thiab cov thwj tim.

• Ua raws li kev ntseeg. Yog tias koj tsis txais tej lus teb tam sim ntawd, cia li tso siab rau tus Tswv hais tias Nws yuav qhia koj thaum lub sij hawm zoo rau koj. Thaum koj tseem tos, ua raws li qhov tseeb uas koj twb paub lawm.

• Cia li xam pom mus ib txhis li. Cia li sim saib tej yam raws li tus Tswv saib, tsis yog raws li neeg ntiaj teb saib. Nco ntsoov txog peb Leej Txiv Saum Ntuj Ceeb Tsheej txoj hau kev cawm seej thaum koj xav txog koj tej lus nug.

lub cim rau tsev neeg txoj kev kawm ua ke

Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke

Mathais 13:1–23.Kom pab nej tsev neeg npaj kawm los ntawm Phau Tshiab xyoo no, tej zaum nej yuav xav nyeem zaj lus piv txwv txog tus tseb nplej. Tej zaum nej tsev neeg yuav nyiam mus nraum zoov thiab saib tej hom av uas piav txog nyob hauv zaj lus piv txwv. Peb yuav ua li cas hloov peb lub siab kom zoo li “qhov av zoo” uas Yexus piav txog? (Mathais 13:8).

Kalatias 5:22–23; Filipis 4:8.Thawj Tswj Hwm Russell M. Nelson tau caw nej kom “pauv [nej] lub tsev los ua ib qho chaw cawm sia vim muaj kev ntseeg” thiab “kho nej lub tsev kom ua lub hauv paus rau txoj kev kawm txoj moo zoo.” Nws cog lus rau cov uas ua tej yam no hais tias: “Nej cov me nyuam yuav zoo siab hlo kawm thiab ua raws li tus Cawm Seej tej kev qhia, thiab dab ntxwg nyoog lub hwj chim hauv nej lub neej thiab nej lub tsev yuav tsawg zuj zus mus. Yuav muaj tej kev pauv loj uas kav ntev mus hauv nej tsev neeg” (“Rais Los Ua Tsoom Haiv Neeg Ntseeg hauv Hnub Nyoog Kawg Ua Coj Yam Ntxwv Zoo,” Liahona, Kaum Ib Hlis Ntuj 2018, 113).

Xyoo tshiab yog ib lub sij hawm zoo muaj tsev neeg txoj kev sab laj sib tham txog kev ua kom nej lub tsev “ib qho chaw cawm sia vim muaj kev ntseeg” thiab “ib lub hauv paus rau txoj kev kawm txoj moo zoo.” Thaum peb nyeem Kalatias 5:22–23 thiab Filipis 4:8 ua rau peb tawm tswv yim dab tsi? Tej zaum nej tsev neeg yuav xav cuab hom phiaj rau txhua tus ua lawv tus kheej thiab rau tsev neeg ua ib ke kom kawm Phau Tshiab xyoo no. Peb yuav ua li cas kom pab peb tus kheej nco txog peb tej lub hom phiaj?

Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.

Zaj nkauj zoo hu: “Teach Me to Walk in the Light,” Children’s Songbook, 177.

Kev Kawm Zoo Dua Ntxiv ntawm Yus Ib Leeg

Nrhiav cov lus qhuab qhia. Cov lus qhuab qhia yog qhov tseeb uas nyob mus ib txhis thiab tsis hloov. Thawj Tswj Hwm Boyd K. Packer tau hais tias “cov lus qhuab qhia tseeb, thaum neeg to taub, ua rau lawv tej cwj pwm thiab xeeb ceem hloov” (“Little Children,” Ensign, Kaum Ib Hlis Ntuj 1986, 17). Thaum nej thiab nej tsev neeg kawm cov vaj lug kub, nrhiav cov lus tseeb uas yuav pab nej ua neej raws li tus Cawm Seej ntxiv.

Yexus Khetos

Txoj Kev Kaj ntawm lub Ntiaj Teb, los ntawm Brent Borup