tus poj niam qhia txoj moo zoo nyob hauv tshav tos tsheb nqaj hlau

Ib Hlis Ntuj 16–22

Yauhas 1

Peb Twb Ntsib tus Mexiyas Lawm

Thaum koj nyeem thiab xav txog Yauhas 1, cia li sau tej kev tshoov siab uas koj tau txais. Koj nrhiav tau tej zaj lus twg uas koj xav tias yuav muaj nqis tshaj rau koj thiab koj tsev neeg? Koj xav tias koj yuav hais dab tsi nyob rau hauv koj tej chav kawm hauv lub Koom Txoos?

Sau Ntawv txog Koj tej Kev Tshoov Siab

Koj puas tau xav seb koj yuav paub los sis tsis paub tias Yexus los ntawm Naxales yog Vajtswv Leej Tub yog tias koj ua neej thaum lub sij hawm uas Nws tau ua Nws txoj hauj lwm qhuab qhia hauv lub ntiaj teb no? Ntau xyoo los lawm, cov neeg Ixayees uas rau siab ntseeg, xws li Adales, Petus, Filis, thiab Nathana-ees, twb tau tos ntsoov thiab thov Vajtswv kom tus Mexiyas los raws li tus Tswv tau cog lus. Thaum lawv ntsib Nws, lawv ua li cas ho paub tias Nws yog tus uas lawv ib txwm nrhiav? Lawv tau ua li peb txhua tus yuav tsum ua kom los paub tus Cawm Seej—thaum peb ua raws li Nws txoj kev caw “cia li los saib” (Yauhas 1:39). Peb nyeem txog Nws nyob hauv cov vaj lug kub. Peb mloog Nws cov lus qhuab qhia. Peb pom Nws txoj kev ua neej. Peb hnov Nws tus Ntsuj Plig. Thiab thaum peb ua neej, ib yam li Nathana-ees kawm, peb kawm tias tus Cawm Seej paub peb thiab hlub peb thiab xav npaj peb kom txais tau “tej yam tseem ceeb dua” (Yauhas 1:50).

lub cim txog kev kawm ntawm yus ib leeg

Tej lub Tswv Yim Kawm Vaj Lug Kub ntawm Yus Ib Leeg

Yauhas yog leej twg?

Yauhas yog ib tug thwj tim ntawm Yauhas tus uas Muab Neeg Ua Kev Cai Raus Dej thiab tom qab ntawd nws tau los ua ib tug hauv thaw pawg uas coj raws li Yexus Khetos thiab Nws ib tug ntawm Kaum Ob tug Thwj Tim. Nws tau sau Phau Yauhas, ob peb tsab ntawv, thiab phau Tshwm Sim. Nyob hauv nws Txoj Moo Zoo, nws sau hais tias nws yog tus thwj tim uas “Yexus hlub heev” thiab yog “tus thwj tim ntawd” (Yauhas 13:23; 20:3). Yauhas yeej xav xav qhia txog txoj moo zoo heev nws thiaj li thov nyob hauv lub ntiaj teb mus txog thaum tus Cawm Seej txoj Kev Los Zaum Ob ua rau nws muaj sij hawm coj neeg los cuag Khetos (saib Lus Qhuab Qhia thiab Kev Khi Lus 7:1–6).

Kuj saib Phau Qhia txog Vaj Lug Kub, “Yauhas,” “Yauhas Txoj Moo Zoo.”

Yauhas 1:1–5

“Thaum tsis tau tsim lub ntiaj teb” Yexus Khetos “yeej ib txwm nrog Vajtswv nyob.”

Yauhas pib nws phau Txoj Moo Zoo thaum nws hais txog txoj hauj lwm uas Khetos ua ua ntej Nws yug los: “Thaum tsis tau tsim lub ntiaj teb … Txoj Lus [Yexus Khetos] ib txwm nrog Vajtswv nyob.” Koj kawm dab tsi los ntawm nqe 1–5 txog tus Cawm Seej thiab Nws txoj hauj lwm? Koj yuav kawm tej yam uas pab koj to taub nyob hauv Joseph Smith Kev Txhais, Yauhas 1:1–5 (saib Phau Qhia txog Vaj Lug Kub). Thaum koj pib kawm txog tus Cawm Seej lub neej, vim li cas yuav tsum paub txog Nws txoj hauj lwm ua ntej Nws yug los hauv lub ntiaj teb no?

Kuj saib Gospel Topics, “Jesus Christ Chosen as Savior,” topics.ChurchofJesusChrist.org.

Yauhas 1:1–18

Yexus Khetos yog “qhov Kaj uas yog qhov tseeb,” Vajtswv Leej Tub.

Yauhas tau txais kev tshoov siab kom nrhiav tus Cawm Seej los ntawm Yauhas tus uas Muab Neeg Ua Kev Cai Raus Dej zaj lus tim khawv, tus uas tau hais tias nws “los qhia … qhov kaj uas yog qhov tseeb [ntawd]” (Yauhas 1:8–9). Yauhas nws tus kheej twb tau ua tim khawv txog tus Cawm Seej lub neej thiab txoj hauj lwm qhuab qhia.

Tej zaum yuav pab koj yog koj sau cov lus tseeb uas Yauhas hais nyob hauv nws zaj lus tim khawv txog Yexus Khetos no (nqe 1–18; kuj saib Joseph Smith Kev Txhais, Yauhas 1:1–19 [nyob hauv Phau Qhia txog Vaj Lug Kub]). Koj xav tias yog vim li cas Yauhas sau tej yam tseeb no thaum nws pib nws phau Txoj Moo Zoo? Xav seb koj puas sau koj zaj lus tim khawv txog Yexus Khetos—koj xav ua qhia dab tsi? Tej yam twg tau pab koj los paub thiab coj raws li tus Cawm Seej? Leej twg yuav tau koob hmoov thaum lawv mloog koj zaj lus tim khawv?

Yauhas 1:11–13

Yexus Khetos muab hwj chim rau peb kom peb hloov los ua Vajtswv cov tub thiab cov ntxhais.

Txawm yog peb txhua tus yog Vajtswv Leej Txiv cov tub thiab cov ntxhais ntsuj plig, thaum peb ua txhaum peb raug cais tawm ntawm Nws. Yexus Khetos muab ib txoj kev rau peb rov qab mus cuag Vajtswv dhau los ntawm Nws txoj kev theej txhoj. Cia li xav seb Yauhas 1:11–13 qhia dab tsi rau peb txog kev hloov los ua Vajtswv cov tub thiab cov ntxhais. about becoming daughters and sons of God. Xav seb cov vaj lug kub qhia dab tsi rau peb txog txoj kev txais lub txiaj ntsim no: Loos 8:14–18; Mauxiyas 5:7–9; Lus Qhuab Qhia thiab Kev Khi Lus 25:1. Qhov uas koj muaj hwj chim hloov los ua Vajtswv ib tug ntxhais los sis tus tub muaj nqis npaum li cas rau koj?

Yauhas 1:18

Leej Txiv ua pov thawj txog Nws Leej Tub.

Yauhas 1:18 hais tias tsis tau muaj leej twg pom Vajtswv ib zaug li. Tiam sis, Joseph Smith Kev Txhais nqe no piav meej tias “yeej tsis tau muaj leej twg pom Vajtswv ib zaug twg li, tsuas yog nws tau ua pov thawj txog Leej Tub tso” (saib Yauhas 1:18, lus cim c). Sav seb tej lub sij hawm no thaum muaj neeg hnov Vajtswv Leej Txiv tau ua tim khawv txog Nws Leej Tub: Mathais 3:17; 17:5; 3 Nifais 11:6–7; Joseph Smith—Keeb Kwm 1:17.

Vim li cas qhov uas peb muaj tej zaj no yog ib txoj koob hmoov? Tej zaj no qhia dab tsi rau koj txog Yexus Khetos txoj kev txheeb ze Nws Leej Txiv?

lub cim rau tsev neeg txoj kev kawm ua ke

Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke

me nyuam ntxhais nyeem vaj lug kub

Thaum peb kawm vaj lug kub, peb yuav txais kev tshoov siab rau peb lub neej.

Yauhas 1:4–10.Nej yuav ua li cas kom pab nej tsev neeg xav txog tej yam uas lawv nyeem nyob hauv tej nqe no? Tej zaum nej yuav xav cia nej tsev neeg ib leeg zuj zus mus muab ib lub teeb ci rau hauv ib lub chav uas tua teeb lawm thiab qhia tias vim li cas tus Cawm Seej yog txoj Kev Kaj rau lawv lub neej. Ces, thaum nej nyeem Yauhas 1:4–10, nej tsev neeg yuav muaj tswv yim ntxiv thaum lawv nyeem Yauhas zaj lus tim khawv txog Yexus Khetos, txoj Kev Kaj rau Neeg Ntiaj Teb.

Yauhas 1:35–36.Vim li cas Yauhas tus uas Muab Neeg Ua Kev Cai Raus Dej hu Yexus ua “Vajtswv tus Me Nyuam Yaj”? Peb kawm dab tsi los ntawm lub npe ntawm Txwj Laug Jeffrey R. Holland zaj lus “Saib Vajtswv tus Me Nyuam Yaj” los sis Txwj Laug Gerrit W. Gong zaj lus “Tus Tswv Yug Yaj Zoo, Vajtswv tus Me Nyuam Yaj”? (Liahona, Tsib Hlis Ntuj 2019, 44–46, 97–101)

Yauhas 1:35–46.Twb tau muaj dab tsi vim Yauhas ua tim khawv li no? Nej tsev neeg yuav kawm dab tsi los ntawm cov neeg hauv tej nqe no txog txoj kev qhia txoj moo zoo rau lwm tus? Kuj saib daim video “Inviting Others to ‘Come and See’” (ChurchofJesusChrist.org).

Yauhas 1:45–51.Nathana-ees tau ua li cas kom pab nws muaj ib zaj lus tim khawv txog tus Cawm Seej? Caw nej tsev neeg sib tham txog tej yam lawv tau ua kom muaj ib zaj lus tim khawv.

Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.

Zaj nkauj qhuas Vajtswv zoo hu: “Tus Tswv yog Qhov Kaj,” Cov Nkauj Qhuas Vajtswv, zaj 31.

Kev Qhia Zoo Dua Ntxiv

Cia li siv ib yam khoom qhia. Caw nej tsev neeg nrhiav tej khoom uas lawv yuav siv kom pab lawv to taub tej ntsiab cai nyob hauv cov vaj lug kub uas nej tsev neeg nyeem ua ke. Piv txwv hais tias, tej zaum lawv yuav xav siv ib tug tswm ciab kom piv txog Khetos txoj Kev Kaj (saib Yauhas 1:4).

Yexus Khetos tab tom tsim lub ntiaj teb

Yehauvas Tsim lub Ntiaj Teb, los ntawm Walter Rane