“Ob Hlis Ntuj 20–26. Mathais 6–7: ‘Yexus Muaj Hwj Chim Qhia,’” Los, Nrog Kuv Mus—Rau Ib Leeg thiab Tsev Neeg: Phau Tshiab 2023 (2022)
“Ob Hlis Ntuj 20–26. Mathais 6–7,” Los, Nrog Kuv Mus—Rau Ib Leeg thiab Tsev Neeg: 2023
Yexus Qhia cov Neeg Nyob Tom Ntug Hiav Txwv, los ntawm James Tissot
Ob Hlis Ntuj 20–26
Mathais 6–7
“Yexus Muaj Hwj Chim Qhia”
Thaum peb muaj lus nug thiab xav to taub tej yam uas Leej Txiv Saum Ntuj Ceeb Tsheej xav kom peb paub tiag, ces peb mus nyeem vaj lug kub, peb thiaj li cas tus Vaj Ntsuj Plig Dawb Huv tshoov peb lub siab. Thaum koj nyeem Mathais 6–7, tsom ntsoov rau tej kev tshoov siab no.
Sau Ntawv txog Koj tej Kev Tshoov Siab
Zaj Lus Qhia Hais Pem Roob yeej yog ib zaj lus uas neeg feem coob paub zoo lawm. Tus Cawm Seej tau siv tej qhov uas yooj yim xav txog, xws li ib lub nroog uas nyob saum roob, tej paj ntoos tom tiaj nras, thiab cov hma uas ua txuj ua li lawv yog cov yaj. Tiam sis Zaj Lus Qhia Hais Pem Roob yeej tsis yog tej lus zoo nkauj xwb. Lub hwj chim ntawm tus Cawm Seej tej lus qhia rau Nws cov thwj tim yeej hloov tau peb lub neej, qhov tseem ceeb yog thaum peb ua neej raws li tej lus qhia ntawd. Ces Nws tej lus tsis yog tej lus xwb; Nws tej lus yog ib lub hauv paus ruaj nrees rau peb lub neej uas zoo li tus neeg muaj lub tswv yim lub tsev, tiv taus lub ntiaj teb cua tshuab hlob thiab dej nyab (saib Mathais 7:24–25).
Tej lub Tswv Yim Kawm Vaj Lug Kub ntawm Yus Ib Leeg
Kev ua raws li tus Cawm Seej tej lus qhia yuav pab kuv hloov los ua neeg zoo li Nws.
Zaj Lus Qhia Hais Pem Roob yeej qhia txog ntau lub ntsiab cai ntawm txoj moo zoo. Thaum koj kawm tej tshooj no, thov tus Tswv seb Nws xav kom koj kawm dab tsi.
Tej zaum ib lub ntsiab cai uas koj yuav kawm yog qhov uas koj yuav tsum saib tej yam los ntawm Vajtswv yeej tseem ceeb tej yam los ntawm lub ntiaj teb. Tus Cawm Seej tej lus qhia twg nyob hauv Mathais 6–7 pab koj tsom ntsoov rau tej yam nyob saum ntuj? Ua rau koj xav txog dab tsi ntxiv thiab? Koj txais kev tshoov siab kom koj ua dab tsi? Xav seb koj puas sau ntawv txog koj tej kev xav. Piv txwv hais tias:
|
Tej uas Vajtswv xav txog kuv yeej tseem ceeb dua li tej yam uas lwm tus xav txog kuv. |
Ib lub ntsiab cai ntxiv nyob hauv Mathais 6–7 yog kev thov Vajtswv. Siv ib me ntsis kom xav txog koj txoj kev thov Vajtswv. Koj xav tias koj ua zoo npaum li cas thaum koj sim nyob ze Vajtswv thaum koj thov Nws? Tej lus qhia twg nyob hauv Mathais 6–7 ua rau koj xav paub thov Vajtswv zoo dua? Sau ntawv txog tej kev tshoov siab uas koj txais. Piv txwv hais tias:
|
Thaum kuv thov Vajtswv, kuv xav saib Leej Txiv Saum Ntuj Ceeb Tsheej lub npe rau nqi heev. | |
|
Thaum kuv thov Vajtswv, kuv hais tau tias kuv xav kom muaj raws li tus Tswv lub siab nyiam. |
Tej zaum koj yuav xav rov qab nyeem Zaj Lus Qhia Hais Pem Roob ib zaug ntxiv, es saib puas muaj tej ntsiab cai los sis tej zaj lus uas yeej tseem ceeb rau koj ua. Sau ntawv txog tej yam uas koj kawm nyob hauv ib phau ceev xwm txheej, nrog rau koj tej kev xav thiab tej kev tshoov siab.
Peb yuav nyob ze Vajtswv thaum peb thov Vajtswv.
Kev “hais mus hais los tej lus uas tsis muaj qab hau” thaum thov Vajtswv txhais li cas?
Tib neeg to taub tias kev “hais mus hais los tej lus uas tsis muaj qab hau” txhais tias yus pheej rov qab hais tib co lus xwb. Tiam sis, lo lus vain txhais tias ib yam uas tsis muaj qab hau. Qhov uas yus “hais mus hais los tej lus uas tsis muaj qab hau” thaum thov Vajtswv txhais tias yus lam thov Vajtswv tsis muaj siab xav thov (saib Amas 31:12–23).
Kuv muaj peev xwm txiav txim raws li kev ncaj ncees.
Nyob hauv Mathais 7:1, zoo li tus Cawm Seej hais tias peb yuav tsum tsis txhob txiav txim hlo li, tiam sis nyob hauv lwm nqe vaj lug kub (tsis hais tej nqe nyob hauv tshooj no los yog), Nws qhia peb kom paub txiav txim. Yog tias qhov no ua rau koj tsis to taub, tej zaum Joseph Smith Kev Txhais nqe no yuav pab koj: “Tsis txhob txiav txim tsis ncaj ncees, kom nej thiaj tsis raug txiav txim; tiam sis cia li txiav txim kom ncaj ncees” (nyob hauv Mathais 7:1, lub cim nram qab a). Koj kawm dab tsi nyob hauv Mathais 7:1–5, nrog lwm yam hauv tshooj no, uas pab koj paub “txiav txim kom ncaj ncees”?
Kuj saib Lynn G. Robbins, “The Righteous Judge,” Liahona, Kaum Ib Hlis Ntuj 2016, 96–98.
Kuv los paub Yexus Khetos thaum kuv ua raws li Nws lub siab nyiam.
Cov lus “Kuv tsis paub nej” nyob hauv Mathais 7:23 los Joseph Smith Kev Txhais tau muab hloov los hais “Nej tsis paub kuv” (Mathais 7:23, lub cim nram qab a). Txoj kev hloov no tau pab koj li cas kom to taub zoo dua txog tej uas tus Tswv tau qhia nyob hauv nqe 21–22 txog txoj kev ua raws li Nws lub siab nyiam? Koj xav tias koj paub tus Tswv zoo npaum li cas? Koj yuav ua dab tsi kom paub Nws zoo dua?
Kuj saib David A. Bednar, “Yog tias Nej Tau Paub Kuv,” Liahona, Kaum Ib Hlis Ntuj 2016, 102–5.
Qhov uas kuv ua raws li tus Cawm Seej tej lus qhia yeej tsim ib lub hauv paus ruaj nrees rau kuv lub neej.
Kev ua raws li txoj moo zoo yeej tsis tshem kev nyuaj siab tawm ntawm peb lub neej. Ob lub tsev nyob hauv tus Cawm Seej zaj lus piv txwv nyob hauv Mathais 7:24–27 raug tib qho nag xob nag cua. Tiam sis ib lub tsev xwb khov txaus kom tiv taus. Qhov uas koj ua raws li tus Cawm Seej tej lus qhia ua li cas ho tsim ib lub hauv paus ruaj nrees rau koj? Koj txais kev tshoov siab ua dab tsi kom ua koj “lub tsev rau saum pob zeb” ntxiv? (saib nqe 24).
Kuj saib Hilamas 5:12.
Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke
-
Mathais 6–7.Ib txoj kev rau nej kawm los ntawm Mathais 6–7 ua ke nrog nej tsev neeg yog kev saib ob daim video “Sermon on the Mount: The Lord’s Prayer” thiab “Sermon on the Mount: Treasures in Heaven” (ChurchofJesusChrist.org). Tej zaum nej tsev neeg yuav xav nyeem hauv vaj lug kub thaum lawv saib thiab nres daim video thaum lawv hnov ib yam uas lawv xav sib tham txog. Tej zaum nej ua tau li no tau ob peb hnub, yog xav tau.
-
Mathais 6:5–13.Peb kawm dab tsi los ntawm tus Cawm seej txoj kev thov Vajtswv? Peb yuav siv Nws txoj kev thov Vajtswv li cas ua yam ntxwv rau peb xyaum kom peb txoj kev thov Vajtswv zoo dua tsis hais thaum peb thov peb tus kheej thiab nrog peb tsev neeg ua ke thov? (Kuj saib Lukas 11:1–13.) Yog nej muaj me nyuam yaus, tej zaum nej yuav xav xyaum thov Vajtswv ua ke.
-
Mathais 6:33.“Nej yuav tsum xub nrhiav Vajtswv lub [nceeg vaj]” txhais li cas? Peb puas ua li no nyob peb tus kheej thiab nrog peb tsev neeg ua ke?
-
Mathais 7:1–5.Kom txawj xav txog tej lus qhia hauv tej nqe no, tej zaum nej tsev neeg yuav xav nrhiav ib hmoov ntoo thiab ib tug nqaj. Qhov uas yus muab ib qho piv rau ib qho qhia dab tsi rau peb txog kev txiav txim rau lwm tus? Yog nej xav kawm txog lub ntsiab lus no ntxiv, tej zaum nej yuav xav siv tej ntaub ntawv pab nyob hauv “Judging Others” (Gospel Topics, topics.ChurchofJesusChrist.org).
-
Mathais 7:24–27.Kom pab nej tsev neeg to taub tus Cawm Seej zaj lus piv txwv txog tus neeg uas muaj tswv yim thiab tus neeg uas tsis muaj tswv yim, tej zaum nej yuav xav kom lawv muab dej nchuav rau cov hmoov av ces muab nchuav rau ib lub pob zeb. Peb yuav ua li cas kom ua ib lub hauv paus rau peb sab ntsuj plig nyob rau saum pob zeb?
Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.
Zaj nkauj zoo hu: “The Wise Man and the Foolish Man,” Children’s Songbook, 281.
Kev Kawm Zoo Dua Ntxiv ntawm Yus Ib Leeg
Qhia txog koj tej lub tswv yim. Kev sib tham txog tej ntsiab cai uas koj kawm koj tus kheej yeej yog ib txoj kev zoo qhia lwm tus; tiam sis qhov no kuj ua rau koj to taub zoo dua thiab. Sim qhia ib lub ntsiab cai uas koj tau kawm lub lim tiam no nrog ib tug hauv koj tsev neeg los sis hauv koj chav kawm hauv lub Koom Txoos.
Kuv Twb Thov Vajtswv Pab Koj Lawm, los ntawm Del Parson