Yexus muab ib tug txiv neej sawv hauv txaj los

Ob Hlis Ntuj 27–Peb Hlis Ntuj 5

Mathais 8; Malakaus 2–4; Lukas 7

“Koj txoj Kev Ntseeg Twb Cawm Tau Koj Dim Lawm”

Ceev faj kom tsis txhob rawm kawm vaj lug kub. Cia li siv sij hawm kom thov Vajtswv xav txog vaj lug kub, txawm yog koj tsis muaj sij hawm txaus nyeem txhua nqe. Ntau zaus tej lub sij hawm xav no yeej ua rau koj txais tau kev tshwm sim.

Sau Ntawv txog Koj tej Kev Tshoov Siab

Ib zaj lus meej heev hauv Phau Tshiab qhia tias Yexus Khetos yog ib tug neeg kho mob. Tej zaj lus txog tus Cawm Seej txoj kev kho cov neeg mob thiab cov neeg txom nyem los muaj ntau heev—xws li ib tug poj niam uas ua npaws thiab ib tug poj ntsuam tus tub uas tau tuag lawm. Vim li cas yuav hais ntau txog kev kho mob ntawm sab cev nqaij daim tawv? Muaj tej lub ntsiab twg rau peb los ntawm tej qhov txuj ci tseem ceeb no? Ib lub ntsiab meej yog qhov uas Yexus Khetos yog Vajtswv Leej Tub, uas muaj hwj chim kov yeej txhua yam, tsis hais peb txoj kev mob ntawm sab cev nqaij daim tawv thiab peb tej kev qaug zog. Tiam sis muaj ib lub ntsiab ntxiv nyob hauv Nws tej lus rau cov xib hwb uas tsis ntseeg: “Kuv ua li no qhia rau nej paub hais tias Neeg Leej Tub muab hwj chim nyob hauv ntiaj teb no zam txim tau rau neeg” (Malakaus 2:10). Yog li ntawd thaum koj nyeem txog ib tug neeg dig muag los sis ib tug neeg mob ruas uas Yexus kho zoo lawm, tej zaum yuav ua rau koj xav txog kev kho mob—ntawm sab ntsuj plig thiab sab cev nqaij daim tawv—uas koj txais tau los ntawm tus Cawm Seej thiab mloog Nws hais rau koj hais tias, “Koj txoj kev ntseeg twb cawm tau koj dim lawm” (Lukas 7:50).

lub cim txog kev kawm ntawm yus ib leeg

Tej lub Tswv Yim Kawm Vaj Lug Kub ntawm Yus Ib Leeg

Mathais 8; Malakaus 2–3; Lukas 7

Tus Cawm Seej txawj kho cov neeg txoj kev mob kev nkees.

Tej tshooj no hais txog ntau zaus uas tus Cawm Seej tau ua txuj ci tseem ceeb kho cov neeg mob. Thaum koj kawm txog tej lub sij hawm kho mob no, cia li seb puas muaj tej zaj rau koj kawm. Nug koj tus kheej: Zaj no qhia dab tsi txog kev ntseeg Yexus Khetos? Zaj no qhia dab tsi txog tus Cawm Seej? Vajtswv xav kom kuv kawm dab tsi los ntawm qhov txuj ci tseem ceeb no? Nov yog ob peb tug yam ntxwv, tiam sis tshuav ntau ntxiv:

• Tus neeg mob ruas (Mathais 8:1–4)

• Ib tug thawj tub rog tus tub qhe (Mathais 8:5–13; Lukas 7:1–10)

• Petus niam tais (Mathais 8:14–15)

• Txiv neej uas tuag tes tuag taw (Malakaus 2:1–12)

• Tus txiv neej qhuav tes (Malakaus 3:1–5)

• Tus poj ntsuam hauv Na-is tus tub (Lukas 7:11–16)

Kuj saib David A. Bednar, “Accepting the Lord’s Will and Timing,” Liahona, Yim Hli Ntuj 2016, 17–23; Neil L. Andersen, “Raug Mob,” Liahona, Kaum Ib Hlis Ntuj 2018, 83–86.

Malakaus 2:15–17; Lukas 7:36–50

Yexus Khetos tsis tau los kom rau txim rau cov neeg txhaum tiam sis Nws los kom kho lawv zoo.

Thaum koj nyeem tej nqe no txog Yexus tej kev sib tham nrog cov xib hwb qhia Vajtswv txoj kev cai thiab cov Falixais, sim seb koj puas pom koj tus kheej nyob hauv tej zaj no. Piv txwv hais tias, koj puas xav los sis ua tej yam zoo li Ximoos tus Falixais ua? Koj yuav hais li cas yog koj yuav tsum piav tias Yexus txoj kev xav txog cov neeg txhaum thiab cov Falixais zoo li Ximoos txoj kev xav txog lawv ob txoj kev no sib txawv li cas? Cia li xav seb cov uas ris nra hnyav vim lawv ua txhaum lawv yuav xav li cas thaum lawv nrog tus Cawm Seej nyob. Koj xav li cas thaum lawv nrog koj nyob?

Tej zaum koj kuj yuav xav txog qhov uas koj zoo li tus poj niam nyob hauv Lukas 7:36–50. Thaum twg koj tau txais kev hlub tshua zoo li tus Cawm Seej txoj kev hlub tus poj niam no? Koj kawm dab tsi los ntawm nws tus yam ntxwv txog kev ntseeg, kev hlub, thiab kev txo hwj chim?

Kuj saib Yauhas 3:17; Lukas 9:51–56; Dieter F. Uchtdorf, “Lub Txiaj Ntsim Tshav Ntuj,” Liahona, Tsib Hlis Ntuj 2015, 107–10.

Mathais 8:18–22; Malakaus 3:31–35

Kev ua Yexus Khetos tus thwj tim txhais tias kuv saib Nws yog tus tseem ceeb tshaj plaws hauv kuv lub neej.

Nyob hauv tej nqe no, Yexus qhia tias peb yuav tsum saib Nws yog tus tseem ceeb tshaj plaws hauv peb lub neej kom peb ua tau Nws cov thwj tim, tsis hais tej lub sij hawm thaum peb yuav tsum muab lwm yam uas peb saib rau nqi tso tseg. Thaum koj kawm tej zaj no, cia li xav txog koj txoj kev ua ib tug thwj tim. Vim li cas cov thwj tim yuav tsum txaus siab saib tus Cawm Seej yog tus tseem ceeb tshaj plaws? Koj yuav tsum tso tej yam twg tseg kom thiaj li saib Yexus yog tus tseem ceeb tshaj plaws? (Kuj saib Lukas 9:57–62.)

Mathais 8:23–27; Malakaus 4:35–41

Yexus Khetos muaj hwj chim muab kev kaj siab lug rau peb thaum muaj nag xob nag cua hauv peb lub neej.

Koj puas tau xav zoo li Yexus cov thwj tim xav thaum muaj nag xob nag cua—thaum lawv pom cov dej nphau nphwv puv lub nkoj thiab xav paub tias, “Xib hwb, koj tsis ntshai tsam peb tuag los?”

Nyob hauv Malakaus 4:35–41, koj yuav pom plaub lo lus nug. Sau txhua lo lus nug, ces xav seb lo lus ntawd qhia dab tsi rau koj txog kev tiv taus tej yam nyuaj hauv lub neej no nrog kev ntseeg Yexus Khetos. Tus Cawm Seej ua li cas kom muab kev kaj siab lug rau peb thaum muaj nag nag cua ntawm lub neej no?

Kuj saib Lisa L. Harkness, “Cia Li Tus,” Liahona, Kaum Ib Hlis Ntuj 2020, 80–82.

Yexus nyob hauv lub nkoj ua rau cua daj cua dub tus

Kev Ntshai Hloov Ua Kev Ntseeg, los ntawm Howard Lyon

lub cim rau tsev neeg txoj kev kawm ua ke

Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke

Mathais 8; Malakaus 2–4; Lukas 7.Cia li xav seb puas sau ntawv txog tej txuj ci tseem ceeb uas piav txog nyob hauv tej tshooj no. Nrhiav los sis kos duab txog ib txhia (saib Txoj Moo Zoo Pawg Duab los sis ChurchofJesusChrist.org). Tej zaum txhua tus hauv nej tsev neeg yuav xav siv ib daim duab kom pab qhia txog ib qho txuj ci tseem ceeb thiab qhia tias lawv tau kawm dab tsi los ntawm daim duab ntawd. Tej zaum nej yuav xav hais txog tej txuj ci tseem ceeb uas nej tau pom los sis nyeem nyob hauv peb lub caij nyoog.

Kuj saib ob daim video “Widow of Nain” thiab “Calming the Tempest” (ChurchofJesusChrist.org).

Mathais 8:5–13; Lukas 7:1–10.Vim li cas tus thawj tub rog txoj kev ntseeg ua rau Yexus qhuas nws? Peb yuav ua li cas kom muaj kev ntseeg Yexus Khetos zoo li no?

Malakaus 2:1–12.“Chapter 23: Tus Txiv Neej uas Mus Tsis Taus Kev” (nyob hauv Phau Tshiab cov Dab Neeg, 57–58, los sis daim video txog qhov no nyob ntawm ChurchofJesusChrist.org) los yuav pab nej tsev neeg sib tham txog Malakaus 2:1–12. (Kuj saib qhov video “Jesus Forgives Sins and Heals a Man Stricken with Palsy” nyob ntawm ChurchofJesusChrist.org.) Peb yuav ua li cas kom ua zoo li cov phooj ywg ntawm tus txiv neej uas tuag tes tuag taw? Leej twg tau ua phooj ywg zoo li no rau peb?

Malakaus 4:35–41.Zaj no puas pab tau peb tsev neeg thaum lawv ntshai heev? Tej zaum lawv yuav xav nyeem nqe 39 thiab hais txog tej lub sij hawm thaum tus Cawm Seej pab lawv nyob kaj siab lug.

Tej zaum cov me nyuam yuav nyiam ua yeeb yam hais tias lawv nyob hauv ib lub nkoj thaum nag xob nag cua thaum ib tug nyeem Malakaus 4:35–38. Ces, thaum ib tug nyeem nqe 39, lawv yuav ua zoo li lawv nyob hauv ib lub nkoj thaum hiav txwv nyob tus. Tej zaum nej kuj yuav xav hu ib zaj nkauj txog kev kaj siab lug uas los ntawm tus Cawm Seej, xws li “Xib Hwb, Muaj Cua Daj Cua Dub” (Cov Nkauj Qhuas Vajtswv, zaj 38). Tej kab lus twg hauv zaj nkauj no qhia peb txog txoj kev kaj siab lug uas Yexus muab rau peb?

Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.

Zaj nkauj zoo hu: “Xib Hwb, Muaj Cua Daj Cua Dub,” Cov Nkauj Qhuas Vajtswv, zaj 38.

Kev Qhia Zoo Dua Ntxiv

Cia li ua yooj yim rau lawv nrog nej sib tham. Tej lub sij hawm zoo tshaj plaws qhia lwm tus mas ib feem yog thaum ib tug hauv nej tsev neeg muaj lus nug los yog muaj kev txhawj xeeb. Cia nej tsev neeg paub los ntawm tej yam nej hais thiab ua tias nej xav hnov lawv. (Saib Teaching in the Savior’s Way, 16.)

Tus txiv neej mob hauv txaj uas lawv muab dauv mus ntsib Yexus

Khetos thiab tus Txiv Neej Tuag Tes Tuag Taw, los ntawm J. Kirk Richards