“Peb Hlis Ntuj 6–12. Mathais 9–10; Malakaus 5; Lukas 9: ‘Yexus Txib Kaum Ob tug Thwj Tim Mus,’” Los, Nrog Kuv Mus—Rau Ib Leeg thiab Tsev Neeg: Phau Tshiab 2023 (2022)
“Peb Hlis Ntuj 6–12. Mathais 9–10; Malakaus 5; Lukas 9,” Los, Nrog Kuv Mus—Rau Ib Leeg thiab Tsev Neeg: 2023
Peb Hlis Ntuj 6–12
Mathais 9–10; Malakaus 5; Lukas 9
“Yexus Txib Kaum Ob tug Thwj Tim Mus”
Tej lub tswv yim txog kev kawm ntawv nyob hauv zaj lus no yuav pab koj nrhiav tau tej lub ntsiab rau koj nyob hauv cov vaj lug kub. Tiam sis, tej lus tswv yim no yeej tsis pauv tej kev tshwm sim uas koj txais tau txog qhov uas koj yuav tsum kawm dab tsi los sis siv txoj kev twg kawm vaj lug kub.
Sau Ntawv txog Koj tej Kev Tshoov Siab
Kev paub txog Yexus tej txuj ci tseem ceeb twb nthuav mus thoob plaws sai heev. Cov neeg coob lawv Nws qab, xav kom Nws kho lawv tus mob zoo lawm. Tiam sis thaum tus Cawm Seej saib cov neeg no, Nws tsis tau kho lawv sab cev nqaij daim tawv xwb. Nws muaj kev khuv leej hlub lwm tus, Nws pom tias lawv “zoo ib yam li pab yaj uas tsis muaj tus tswv yug” (Mathais 9:36). Nws hais tias, “Cov nplej uas zoo hlais lawm muaj ntau, tiam sis cov neeg uas hlais muaj tsawg” (Mathais 9:37). Yog li ntawd Nws hu kaum ob tug Thwj Tim, “muab hwj chim rau lawv,” ces txib lawv mus qhia thiab txhawb pab “cov Ixayees uas yog pab yaj uas ploj lawm” (Mathais 10:1, 6). Niaj hnub no yeej xav tau cov neeg ua hauj lwm kom pab Leej Txiv Saum Ntuj Ceeb Tsheej cov me nyuam ib yam thiab. Tseem muaj kaum ob tug Thwj Tim, tiam sis muaj Yexus Khetos cov thwj tim coob dua li muaj yav tas los—cov neeg uas yuav tshaj tawm rau neeg ntiaj teb tag nrho hais tias, “Ntuj Ceeb Tsheej [Vajtswv lub nceeg vaj] twb los ze lawm” (Mathais 10:7)
Tej lub Tswv Yim Kawm Vaj Lug Kub ntawm Yus Ib Leeg
Mathais 9:18–26; Malakaus 5:22–43
“Tsis txhob ntshai, cia li ntseeg xwb.”
Thaum Yailus thov Yexus kho nws tus ntxhais zoo, tus uas “twb yuav tuag,” Yailus mob siab hais lus tiam sis nws kuj muaj kev cia siab: “Thov koj mus cev tes tuav nws, nws thiaj yuav zoo” (Malakaus 5:23). Tiam sis thaum lawv mus, ib tug tub txib qhia Yailus tias lig dhau lawm: “Koj tus ntxhais twb tuag lawm. Ua li cas koj tseem yuav tab kaum xib hwb ua dab tsi thiab?” (nqe 35). Ib yam li ntawd, tej zaum yus xav tias lig dhau kom pab tus poj niam nyob hauv Malakaus 5:25–34, tus uas raug mob rau 12 xyoos.
Thaum koj nyeem tej zaj no, cia li xav txog tej yam uas yuav tsum hloov kho hauv koj lub neej los sis koj tsev neeg—tsis hais tej yam uas “twb yuav tuag” los sis lig dhau ntshe kho tsis taus. Tib neeg txoj kev ntseeg nyob hauv ob zag no ua rau koj txais tej kev tshoov siab twg? Cia li nco qab tej yam uas Yexus hais rau tus poj niam thiab Yailus. Koj xav tias Nws hais li cas rau koj thiab?
Kuj saib Lukas 8:41–56; Russell M. Nelson, “Txais Tau Yexus Khetos lub Hwj Chim rau Hauv Peb lub Neej,” Liahona, Tsib Hlis Ntuj 2017, 39–42; Teachings of Presidents of the Church: Gordon B. Hinckley (2016), 333–42.
Tso Siab rau tus Tswv, los ntawm Liz Lemon Swindle
Tus Tswv muab hwj chim rau Nws cov tub qhe ua Nws txoj hauj lwm.
Tej lus qhia uas Yexus hais nyob hauv Mathais 10 rau Nws cov Thwj Tim los muaj nqi rau peb thiab, vim peb txhua tus muaj feem ua tus Tswv txoj hauj lwm. Yexus Khetos tau muab lub hwj chim twg rau Nws cov Thwj Tim kom pab lawv ua lawv ntiag tug hauj lwm? Koj yuav ua li cas kom txais tau Nws lub hwj chim thaum koj ua txoj hauj lwm uas Nws tau hu koj ua? (saib 2 Kauleethaus 6:1–10; Lus Qhuab Qhia thiab Kev Khi Lus 121:34–46).
Thaum koj nyeem txog Yexus Khetos txoj kev txib Nws cov Thwj Tim, tej zaum koj yuav txais kev tshoov siab txog txoj hauj lwm uas tus Tswv xav kom koj ua. Ib daim zoo li muaj nram qab no tej zaum yuav pab koj sau koj tej kev xav tseg cia:
|
Tej kev tshoov siab uas kuv tau txais | |
|
Tus Cawm Seej muab hwj chim rau Nws cov thwj tim. |
Vajtswv yuav muab hwj chim uas kuv xav tau kom kuv ua tau kuv txoj hauj lwm. |
Kuj saib Malakaus 6:7–13; Tej Nqe Kev Ntseeg 1:6; Phau Qhia txog Vaj Lug Kub, “Thwj Tim”; “Jesus Calls Twelve Apostles to Preach and Bless Others” (video), ChurchofJesusChrist.org.
Thaum kuv pab ua tus Tswv txoj hauj lwm, Nws yuav tshoov kuv lub siab kom kuv paub hais li cas.
Tus Tswv paub tias Nws cov thwj tim yuav raug tsim txom thiab luag yuav thuam lawv vim lawv ntseeg Nws—tej zaum zoo li cov thwj tim niaj hnub nim no raug thiab. Tiam sis Nws cog lus tias cov thwj tim yuav paub los ntawm tus Ntsuj Plig tias lawv yuav tsum hais li cas. Puas muaj tej lub sij hawm thaum muaj raws li kev cog lus no hauv koj lub neej, xws li thaum koj tau hais lus tim khawv, tau foom ib txoj koob hmoov, los sis tau sib tham nrog lwm tus? Xav seb koj puas qhia txog tej yam no rau ib tug uas koj hlub los sis sau rau hauv ib phau ceev xwm txheej. Koj txais kev tshoov siab twg kom koj thiaj li yuav muaj tej lub sij hawm no ntau ntxiv?
Kuj saib Lukas 12:11–12; Lus Qhuab Qhia thiab Kev Khi Lus 84:85.
Qhov uas Yexus hais tias “Kuv tsis coj kev thaj yeeb los, tiam sis kuv coj rab ntaj los” txhais li cas?
Txwj Laug D. Todd Christofferson qhia tias: “Kuv paub tias muaj ib txhia uas twb raug xyeej thiab raug cais tawm ntawm nej niam nej txiv, cov kwv tij thiab cov muam thaum nej lees yuav Yexus Khetos txoj moo zoo thiab los ua raws li Nws tej kev khi lus. Qhov uas nej hlub Yexus Khetos tshaj txhua yam los ntshe nej yuav tsum tso tej kev sib raug zoo tseg uas muaj nqis rau nej, thiab ua rau nej los kua muag ntau heev. Tiam sis nej txoj kev hlub yeej tsis ploj mus, es nej khov kho ris tus ntoo khaub lig no, qhia hais tias nej tsis txaj muag koom nrog Vajtswv Leej Tub” (“Finding Your Life,” Ensign, Peb Hlis Ntuj 2016, 28).
Txoj kev txaus siab tso tej kev sib raug zoo tseg kom coj raws li tus Cawm Seej yeej ua rau neeg txais kev cog lus tias “tus uas tsis khuv xim nws txoj sia, vim nws ntseeg kuv, tus ntawd yuav tau txoj sia” (Mathais 10:39).
Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke
-
Malakaus 5:22–43.Thaum nej tsev neeg nyeem zaj no ua ke, tej zaum nej yuav xav nres thov cov neeg hauv nej tsev neeg seb lawv yuav xav li cas yog tias lawv yog Yailus, tus poj niam, los sis lwm tus neeg hauv zaj no. Tej zaum nej yuav saib muab daim duab txog zaj no rau lawv saib, zoo li cov duab uas nyob hauv tshooj no. Cov duab no ua li cas kom qhia txog cov neeg txoj kev ntseeg nyob hauv tej zaj no? (Kuj saib ob daim video “Jesus Raises the Daughter of Jairus” thiab “Jesus Heals a Woman of Faith” nyob ntawm ChurchofJesusChrist.org.) Tej zaum nej yuav xav txog tej yam nyuaj rau nej tsev neeg raug tam sim no. Nej yuav ua li cas kom ua raws li Yexus tej lus, “[Nej] tsis txhob ntshai, cia li ntseeg”? (Malakaus 5:36).
-
Mathais 10:39; Lukas 9:23–26.Qhov uas peb “khuv xim” los sis “tsis khuv xim” peb txoj sia txhais li cas? (Mathais 10:39). Tej zaum nej tsev neeg yuav xav qhia tej yam uas tau muaj los lawm uas qhia txog Yexus tej lus qhia hauv tej nqe no.
-
Mathais 10:40.Nej tsev neeg ua li cas kom txais tau thiab ua raws li cov Thwj Tim hauv hnub nyoog kawg no tej lus ntuas? Peb txoj kev mloog lawv lus ua li cas pab peb nyob ze Yexus Khetos ntxiv?
-
Lukas 9:61–62.Qhov uas peb tig saib rov tom qab thaum peb tab tom tuav khais laij liag txhais li cas? Vim li cas txoj kev ua li no yuav ua rau peb tsis tsim nyog rau Vajtswv lub nceeg vaj?
Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.
Zaj nkauj zoo hu: “Thaum Ntseeg Tiag,” Cov Nkauj Qhuas Vajtswv, naj npawb 45.
Kev Kawm Zoo Dua Ntxiv ntawm Yus Ib Leeg
Mloog tus Ntsuj Plig. Thaum koj kawm vaj lug kub, tsom ntsoov rau koj tej kev xav (saib Lus Qhuab Qhia thiab Kev Khi Lus 8:2–3), txawm yog tej kev xav ntawd tsis zoo li tej yam uas koj nyeem. Tej zaum tej kev tshoov siab no yog tej yam uas Vajtswv xav kom koj paub thiab ua.
Talitha Cumi, los ntawm Eva Koleva Timothy