“Peb Hlis Ntuj 13–19. Mathais 11–12; Lukas 11: ‘Kuv Yuav Cia Nej So,’” Los, Nrog Kuv Mus—Rau Ib Leeg thiab Tsev Neeg: Phau Tshiab 2023 (2022)

“Peb Hlis Ntuj 13–19. Mathais 11–12; Lukas 11,” Los, Nrog Kuv Mus—Rau Ib Leeg thiab Tsev Neeg: 2023

Daim Duab

Yexus sawv hauv cov huab

Tsis Txhob Ntshai, los ntawm Michael Malm

Peb Hlis Ntuj 13–19

Mathais 11–12; Lukas 11

“Kuv Yuav Cia Nej So”

Thawj Tswj Hwm Dallin H. Oaks qhia tias: “Cov vaj lug kub, uas yog kev tshwm sim uas muaj dhau los, los peb yeej yuav tsis to taub yog tias peb tsis txais kev tshwm sim niaj hnub no. … Kev kawm vaj lug kub ua rau tib neeg muaj peev xwm txais tau kev tshwm sim” (“Scripture Reading and Revelation,” Ensign, Ib Hlis Ntuj 1995, 7).

Sau Ntawv txog Koj tej Kev Tshoov Siab

Cov Falixais thiab cov xib hwb qhia Vajtswv tej kev cai tau ua nyuaj rau tib neeg teev tiam Yehauvas. Lawv pheej hais ntau txog kev ua raws nraim li tej kev cai thiab hais tsawg txog tej yam tseeb nyob mus ib txhis li. Tej kev cai txog Hnub Caiv, uas yog ib hnub so, yeej ua rau tib neeg ris nra hnyav thiab.

Ces, Yehauvas Nws tus kheej tau los nrog Nws cov neeg nyob. Nws tau qhia lawv lub ntsiab ntawm kev teev ntuj tseeb tsis yog kom tsim tej nra hnyav tiam sis yog kev pab ris tej nra ntawd. Nws qhia tias Vajtswv muab cov lus txib rau peb, tsis hais txoj kev cai kom hwm Hnub Caiv, vim Nws xav foom koob hmoov rau peb tsis yog tsim txom peb. Yog li ntawd, txoj kev mus cuag Vajtswv yeej ti thiab nqaim, tiam sis tus Tswv tau los tshaj tawm tias peb tsis tas mus ib leeg xwb. Nws thov hais tias, “Los cuag kuv.” Nws tau caw tag nrho cov neeg uas “ris nra hnyav,” kom sawv ntawm Nws ib sab, khi peb tus kheej rau Nws, thiab cia Nws pab ris peb tej nra. Nws cog lus tias “Nej … yuav tau so.” Piv rau lwm txoj kev—uas yog kev mus ib leeg xwb los sis tso siab rau tej kev kho teeb meem ntawm neeg ntiaj teb—Nws “tus quab yooj yim kwv, thiab [Nws] lub nra yeej sib.” (Mathais 11:28–30.)

Daim Duab

lub cim txog kev kawm ntawm yus ib leeg

Tej lub Tswv Yim Kawm Vaj Lug Kub ntawm Yus Ib Leeg

Mathais 11:28–30

Yexus Khetos yuav cia kuv so thaum kuv tso siab rau Nws.

Peb txhua tus ris tej nra hnyav—ib feem yog vim peb ua txhaum thiab ua yuam kev, ib feem yog vim lwm tus xaiv tej yam tsis zoo, thiab ib feem tsis yog nyob ntawm leej twg tiam sis yog vim peb nyob hauv lub ntiaj teb no. Txawm yog vim li cas los xij, Yexus thov kom peb los cuag Nws, Nws thiaj li yuav pab peb ris peb tej nra thiab tau kev so (kuj saib Mauxiyas 24). Txwj Laug David A. Bednar qhia hais tias, “Qhov uas peb ua thiab ua raws li tej kev khi lus dawb huv ua rau peb kwv tus quab nrog tus Tswv Yexus Khetos” (“Bear Up Their Burdens with Ease,” Liahona, Tsib Hlis Ntuj 2014, 88). Thaum xav txog no, cia li xav txog tej lus nug xws li sau nram qab no kom to taub tus Cawm Seej tej lus zoo dua nyob hauv tej nqe no: Ua li cas kuv tej kev khi lus muab kuv khi rau tus Cawm Seej? Kuv yuav tsum ua dab tsi kom los cuag Khetos? Vim li cas tus Cawm Seej tus quab yooj yim kwv thiab Nws lub nra sib heev?

Koj xav txog lwm lo lus nug ntxiv thaum koj nyeem? Cia li sau ntawv txog tej no, thiab nrhiav lus teb hauv cov vaj lug kub thiab cov yaj saub tej lus thaum lub lim tiam no. Tej zaum koj yuav nrhiav lus teb nyob hauv Txwj Laug David A. Bednar zaj lus uas hais ua ntej no lawm.

Kuj saib John A. McCune, “Los Cuag Khetos—Kev Ua Tsoom Haiv Neeg Ntseeg hauv Hnub Nyoog Kawg,” Liahona, Tsib Hlis Ntuj 2020, 36–38; Lawrence E. Corbridge, “The Way,” Liahona, Kaum Ib Hlis Ntuj 2008, 34–36.

Daim Duab

cov txiv neej saib tsis taus cov thwj tim uas hla ib daim teb npleg

Cov Thwj Tim Noj Nplej Thaum Hnub Caiv, los ntawm James Tissot

Mathais 12:1–13

“Pab neeg [thaum txog] Hnub Xanpataus.”

Cov Falixais tej lus qhia yeej tsis zoo ib yam li tus Cawm Seej tej lus qhia, tiam sis qhov txawv tshaj yog lawv txoj kev qhia txog kev hwm Hnub Caiv. Thaum koj nyeem Mathais 12:1–13, tej zaum koj yuav xav seb tej yam koj xav thiab ua thaum Hnub Caiv puas sib haum nrog tej yam uas tus Cawm Seej qhia. Kom ua li no, tej zaum nej yuav xav txog tej zaj lus xws li no:

“Qhov uas kuv xav tau yog, kom nej muaj lub siab hlub, tsis yog tus tsiaj uas muab tua theej txhoj” (nqe 7; saib Hauxeyas 6:6).
“Neeg Leej Tub yog tus Tswv Hnub Xanpataus” (nqe 8).
“Txoj Kev Cai yeej pub peb pab neeg Hnub Xanpataus” (nqe 12).

Tej lus qhia no yuav hloov koj lub siab li cas ntawm koj txoj kev xav txog Hnub Caiv?

Kuj saib Malakaus 2:23–3:5.

Mathais 12:34–37; Lukas 11:33–44

Tej yam kuv hais thiab ua yeej qhia tias muaj dab tsi hauv kuv lub siab.

Tus Cawm Seej cem cov Falixais vim lawv pheej coj raws li kev ncaj ncees rau lwm tus pom tiam sis lawv tsis tau muaj lub siab dawb huv. Thaum koj kawm tus Cawm Seej tej lus ceeb toom rau cov Falixais nyob hauv Mathais 12:34–37 thiab Lukas 11:33–44, cia li xav txog qhov uas tej yam hauv peb lub siab thiab tej yam peb ua sib txuas li cas. Koj xav tias cov lus “siab zoo” txhais li cas? (Mathais 12:35). Vim li cas peb tej lus yuav ua rau peb txais tau kev rau txim los sis kev ncaj ncees? (saib Mathais 12:37). Qhov uas hais tias koj qhov muag “pom kev tseeb” txhais li cas? (Lukas 11:34). Cia li xav seb koj yuav ua li cas kom “kaj nrig” (Lukas 11:36) dhau los ntawm tus Cawm Seej lub hwj chim.

Kuj saib Amas 12:12–14; Lus Qhuab Qhia thiab Kev Khi Lus 88:67–68.

Daim Duab

lub cim rau tsev neeg txoj kev kawm ua ke

Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke

Mathais 11:28–30.Nej pab tau nej tsev neeg nco txog tus Cawm Seej tej lus qhia hauv tej nqe no thaum nej hais kom lawv rub ib yam hnyav heev ib leeg zuj zus, thaum xub thawj cia ib tug neeg ua nws ib leeg xwb ces hais kom txhua tus pab. Peb ris tej nra hnyav twg? Qhov uas peb kwv Yexus Khetos tus quab txhais li cas? Daim duab thaum kawg ntawm zaj no yuav pab nej piav ib tug quab yog dab tsi.

Mathais 12:10–13.Thaum nej nyeem txog Yexus txoj kev kho ib tug neeg mob nyob rau Hnub Caiv, tej zaum nej tsev neeg yuav xav sib tham txog qhov uas tus Cawm Seej ua rau peb “txawm zoo hlo” lawm. Yuav ua li cas kom Hnub Caiv ua rau peb rov qab zoo hlo?

Thaum nej txais kev tshoov siab los ntawm tus Cawm Seej tus yam ntxwv nyob hauv tej nqe no, tej zaum nej tsev neeg yuav xav sau tej yam nej ua tau kom “pab neeg” thaum txog Hnub Caiv (nqe 12). Ua tib zoo sau tej cib fim mus ua hauj lwm pab lwm tus. Tej zaum yuav zoo yog tias nej khaws daim ntawv uas nej sau thiab rov qab saib thaum txog txhua Hnub Caiv yav tom ntej.

Lukas 11:33–36.Xav seb yuav qhia nej tsev neeg dab tsi txog qhov uas “kaj nrig” muaj lub ntsiab dab tsi (nqe 34, 36). Kev siv ib yam khoom puas pab tau? Tej zaum nej yuav xav sib tham txog tej yam nej ua tau kom coj tus Cawm Seej txoj kev kaj rau hauv peb lub neej, peb lub tsev, thiab lub ntiaj teb. Yog xav tau tswv yim ntxiv, saib daim video “The Light That Shineth in Darkness,” ChurchofJesusChrist.org.

Lukas 11:37–44.Tej zaum nej tsev neeg yuav xav sib tham txog tej nqe no thaum nej ntxuav tais ua ke. Nej sib tham tau txog qhov uas vim li cas yog ib lub tswv yim tsis zoo kom ntxuav cov tais thiab cov khob sab nraud xwb. Ces nej hais tau tias yuav tsum tsis txhob ua ncaj ncees rau txhua tus pom xwb tiam sis yuav tsum xav zoo ua ncaj ncees hauv peb lub siab lub ntsws thiab.

Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.

Zaj nkauj zoo hu: “Vajtswv Lus Txib Mos Muag,” Cov Nkauj Qhuas Vajtswv, zaj 46.

Kev Kawm Zoo Dua Ntxiv ntawm Yus Ib Leeg

Ua kom tsis tu tsis tseg. Tej zaum muaj tej hnub thaum nyuaj rau koj kawm vaj lug kub los sis koj kawm tsis tshua tau zoo. Tsis txhob tso tseg. Txwj Laug David A. Bednar qhia tias, “Thaum peb ua txhua yam me me tsis tu tsis tseg ces yuav pab peb sab ntsuj plig muaj zog heev” (“More Diligent and Concerned at Home,” Liahona, Kaum Ib Hlis Ntuj 2009, 20).