cov nplej siav lawm

Peb Hlis Ntuj 20–26

Mathais 13; Lukas 8; 13

“Yog Leej Twg Muaj Pob Ntseg, Cia Li Mloog”

Thaum koj nyeem Mathais 13 thiab Lukas 8; 13, cia li xav txog qhov uas koj yuav npaj koj tus kheej li cas kom “mloog” thiab ua raws li tus Cawm Seej tej lus qhia nyob hauv tej zaj lus piv txwv no. Koj yuav ua li cas kom siv tej lus qhia no hauv koj lub neej?

Sau Ntawv txog Koj tej Kev Tshoov Siab

Ib feem ntawm tus Cawm Seej tej lus qhia uas peb nco ntsoov yog tej zaj dab neeg hu ua zaj lus piv txwv. Tej zaj no tsis yog hais txog tej khoom los sis tej xwm txheej uas txhua leej txhua tus paub txog. Tej zaj no tau qhia qhov tseeb tseem ceeb txog Vajtswv lub nceeg vaj rau cov neeg uas npaj siab txais tau. Thawj zaj lus piv txwv nyob hauv Phau Tshiab—zaj lus piv txwv txog tus tseb nplej (saib Mathais 13:3–23)—caw peb kom xyuas seb peb puas npaj siab txais Vajtswv txoj lus. Yexus hais tias “Rau qhov tus uas twb muaj lawm, yeej yuav muab ntxiv kom nws muaj nplua mias” (Joseph Smith Kev Txhais, Mathais 13:10 [nyob hauv Mathais 13:12, lub cim nram qab a]). Yog li ntawd thaum peb npaj kawm tus Cawm Seej tej zaj lus piv txwv—los sis Nws tej lus qhia twg los yog—yeej zoo yog peb pib xyuas seb peb lub siab zoo li cas thiab txiav txim seb peb puas cog Vajtswv txoj lus nyob hauv “qhov av zoo” (Mathais 13:8) kom loj hlob tuaj, tawg paj txi txiv kom foom koob hmoov rau peb thiab peb tsev neeg ntau nplua mias.

lub cim txog kev kawm ntawm yus ib leeg

Tej lub Tswv Yim Kawm Vaj Lug Kub ntawm Yus Ib Leeg

Mathais 13:3–23; Lukas 8:4–15; 13:6–9

Kuv yuav tsum npaj siab txais tau Vajtswv txoj lus.

Vim li cas tej lub sij hawm peb txaus siab txais qhov tseeb, tiam sis lwm lub sij hawm peb raug kev ntxias kom txhob txais tau? Kev nyeem zaj lus piv txwv txog tus tseb nplej yog ib lub cib fim zoo xav txog qhov uas koj txais tau qhov tseeb los ntawm tus Tswv zoo npaum li cas. Tej zaum yuav pab koj yog koj nyeem nqe 3–8 ntawm Mathais 13 ua ke nrog tej kev txhais lus nyob hauv nqe 18–23. Koj ua tau dab tsi kom muaj “qhov av zoo” nyob hauv koj tus kheej? Tej “tsob pos” twg ua rau koj tsis mloog thiab tsis ua raws li Vajtswv txoj lus? Koj yuav ua li cas kom kov yeej tej “tsob pos” no?

Koj txoj kev kawm zaj lus piv txwv no tej zaum yuav hloov koj txoj kev nyeem zaj lus piv txwv nyob hauv Lukas 13:6–9. Tus Tswv xav kom peb txi cov “txiv” twg? Peb yuav tsum ua li cas tu peb qhov av kom peb thiaj li “txi txiv”

Kuj saib Mauxiyas 2:9; Amas 12:10–11; 32:28–43; Dallin H. Oaks, “The Parable of the Sower,” Liahona, Tsib Hlis Ntuj 2015, 32–35.

Mathais 13:24–35, 44–52; Lukas 13:18–21

Yexus tej zaj lus piv txwv pab kuv to taub tias Nws lub Koom Txoos yuav loj tuaj thaum yav tom ntej.

Tus Yaj Saub Joseph Smith qhia tias tej zaj lus piv txwv nyob hauv Mathais 13 piav txog lub Koom Txoos txoj kev loj tuaj nyob hauv hnub nyoog kawg. Tej zaum koj yuav xav nyeem tus Yaj Saub tej lus nyob hauv Teachings of Presidents of the Church: Joseph Smith (2007), 293–303, thaum koj xav txog tej yam uas tej zaj lus piv txwv no qhia koj txog tus Tswv lub Koom Txoos:

• Cov nplej thiab cov txhauv (13:24–30, 36–43)

• Lub noob zaub (13:31–32)

• Poov xab (13:33)

• Nyiaj uas muab faus thiab lub hlaws uas muaj nqis heev (13:44–46)

• Lub vas (13:47–50)

• Tus tswv tsev (13:52)

Tom qab koj xav txog tej zaj lus piv txwv no, ua rau koj txais kev tshoov siab twg kom koom tes pab ua hauj lwm hauv Yexus Khetos lub Koom Txoos hauv hnub nyoog kawg no?

Kuj saib Phau Qhia txog Vaj Lug Kub, “Vajtswv lub Nceeg Vaj los sis lub Nceeg Vaj Ceeb Tsheej,” “Zaj Lus Piv Txwv,” scriptures.ChurchofJesusChrist.org.

lub hlaws

Yexus Khetos txoj moo zoo yog ib lub “hlaws uas muaj nqis heev” (Mathais 13:46).

Mathais 13:24–30, 36–43

Cov neeg ncaj ncees yuav tsum nyob hauv cov neeg siab phem mus txog thaum lub ntiaj teb qhov kawg.

Ib txoj kev tshuaj ntsuam zaj lus piv txwv no yog kom kos duab txog qhov no thiab sau tej lus txog lub ntsiab nyob hauv Mathais 13:36–43 thiab Lus Qhuab Qhia thiab Kev Khi Lus 86:1–7. Cov txhauv yog “nroj tsuag uas muaj ntsis zoo ib yam li txhuv, es yeej tsis paub cov txhauv txawv txhuv li cas mus txog thaum loj hlob tuaj txaus lawm” (Phau Qhia txog Vaj Lug Kub, “Txhauv”). Tej yam tseeb twg hauv zaj lus piv txwv no ua rau koj xav rau siab ntseeg txawm yog muaj kev phem ntau hauv lub ntiaj teb no?

Lukas 8:1–3

“Cov poj niam qee leej” tau ua dab tsi kom txhawb pab tus Cawm Seej?

“Cov thwj tim uas yog poj niam tau nrog Yexus thiab Kaum Ob tug Thwj Tim, es [Yexus] tau qhia lawv sab ntsuj plig thiab lawv tau ua hauj lwm txhawb nqa Nws sab cev nqaij daim tawv. … Tsis yog lawv tau txais kev txhawb pab los ntawm Yexus xwb—uas yog Nws txoj moo zoo thiab cov koob hmoov uas los ntawm Nws lub hwj chim kho mob—cov poj niam no tau txhawb pab Nws, muab lawv tej khoom thiab teev tiam Nws” (Daughters in My Kingdom [2017], 4). Cov poj niam uas coj raws li tus Cawm Seej kuj tau ua tim khawv txog Nws (saib Linda K. Burton, “Cov Poj Niam Paub Meej,” Liahona, Tsib Hlis Ntuj 2017, 12–15).

lub cim rau tsev neeg txoj kev kawm ua ke

Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke

Mathais 13.Thaum nej tsev neeg nyeem tus Cawm Seej tej zaj lus piv txwv, tej zaum lawv yuav nyiam xav txog tej zaj lus piv txwv los ntawm lawv lub neej uas qhia tib yam li lub ntsiab tseeb no txog Vajtswv lub nceeg vaj (uas yog lub Koom Txoos), uas siv tej khoom los yog tej xwm txheej uas lawv paub zoo lawm.

Mathais 13:3–23; Lukas 8:4–15.Tom qab nej nyeem zaj lus piv txwv txog tus tseb nplej ua ke, tej zaum nej tsev neeg yuav xav sib tham txog tej lus nug zoo li no: Muaj dab tsi uas ua rau peb “cov av” (peb lub siab) “muaj pob zeb” los sis “laum” tus Tswv txoj lus? Peb yuav tsum ua dab tsi kom peb cov av thiaj li zoo thiab txi tau txiv ntau?

Yog tias nej muaj cov me nyuam yaus hauv nej tsev neeg, tej zaum yuav lom zem yog nej caw ib tug hauv tsev neeg ua yeeb yam tsis hais lus txog tej kev npaj peb lub siab kom mloog Vajtswv txoj lus es cia lwm tus twv seb lawv ua dab tsi.

Mathais 13:13–16.Nej yuav pab nej tsev neeg li cas kom to taub tias kev txaus siab txais tau Yexus Khetos txoj lus tseem ceeb npaum li cas? Kom piav txog kev “ntsaws pob ntseg,” tej zaum nej yuav xav npog ib tug hauv nej tsev neeg pob ntseg thaum nej ua lub suab yau nyeem Mathais 13:13–16. Tus ntawd to taub ntau npaum li cas los ntawm tej nqe ntawd? Peb ua tau dab tsi kom qhib peb qhov muag, pob ntseg, thiab lub siab kom txais tau Vajtswv txoj lus?

Mathais 13:44–46.Ob tug txiv neej hauv ob zaj lus piv txwv no zoo sib xws li cas? Puas muaj dab tsi ntxiv uas peb ua tau peb tus kheej thiab nrog peb tsev neeg kom saib Vajtswv lub nceeg vaj tseem ceeb tshaj plaws hauv peb lub neej?

Lukas 13:11–17.Nej tsev neeg puas tau raug xwm txheej uas ua rau lawv xav tias lawv “sawv tsis tau ntseg”? Peb puas paub leej twg uas xav li no? Peb yuav ua dab tsi kom pab tau? Tus Cawm Seej ua dab tsi kom “daws” peb dim peb tej kev mob?

Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.

Zaj nkauj zoo hu: “We Are Sowing,” Hymns, zaj 216.

Kev Qhia Zoo Dua Ntxiv

Cim ntsoov ib nqe vaj lug kub. Xaiv ib nqe vaj lug kub uas muaj nqis heev rau nej tsev neeg ces caw nej tsev neeg cim ntsoov. Txwj Laug Richard G. Scott qhia hais tias, “Ib nqe vaj lug kub uas yus cim ntsoov yeej zoo li ib tug phooj ywg khov kho uas tsis khiav mus txawm yog sij hawm dhau mus lawm los” (“The Power of Scripture,” Liahona, Kaum Ib Hlis Ntuj 2011, 6).

txiv neej uas tseb nplej

Zaj Lus Piv Txwv txog tus Tseb Nplej, los ntawm George Soper