6–12 Fepuari

Ioane 2–4

“E Ao Ina Toe Fanau Mai Outou”

A o e faitau i le Ioane 2–4, o le a a‘oa‘o oe e le Agaga i mea e uiga i lou lava liua. Tusi i lalo Ana uuna‘iga. E te ono maua ni malamalama‘aga faaopoopo faaleagaga mai manatu su‘esu‘e i lenei otootoga.

Tusifaamaumau Ou Lagona Uuna‘i

I le taumafataga o se faaipoipoga i Kana, sa suia ai e Keriso le vai i le uaina—o se mea na tupu na faaigoa e Ioane o le “ulua‘i faailoga” (Ioane 2:11). E moni lena mea i ni faauigaga e sili atu ma le tasi. E ui o le vavega muamua lea na faia e Iesu i nofoaga faitele, ae e mafai foi ona faatusa i se tasi amataga ofoofogia—o le faagasologa o le suia o o tatou loto a o tatou avea atili e faapei o lo tatou Faaola. O lenei vaega o le olaga atoa e amata i le filifiliga e mulimuli ia Iesu Keriso, ia suia ma ola i se olaga e lelei atu e ala atu ia te Ia. O lenei vavega e mafai ona matua suia atoa ai le olaga lea e avea ai le “toe fanau mai” o se tasi o auala sili ona lelei e faamatalaina ai (Ioane 3:7). Ae o le toefanau mai ua na o le amataga i le ala o le avea ai ma soo. O upu a Keriso i le fafine Samaria i le vaieli ua faamanatu mai ai ia te i tatou afai tatou te faaauau pea i luga o lenei ala, e iu ina avea le talalelei ma “se vaipuna” i totonu ia te i tatou, “e puna i luga i le ola e faavavau” (Ioane 4:14).

Manatu mo Suesuega Faaletagata Lava Ia o Tusitusiga Paia

Ioane 2:1–11

O vavega a Iesu Keriso na “faaali mai ai lona mamalu.”

A o e faitau e uiga i le suia e le Faaola o le vai i le uaina i le Ioane 2:1–11, e mafai ona e maua ni malamalamaaga faaopoopo e ala i le mafaufau i manatu o tagata eseese sa i ai iina, e aofia ai Maria, o soo, ma isi. Afai na e molimauina mea na tutupu o loo faamatalaina ii, mata o a ni ou lagona e i ai e uiga ia Iesu? O le a se mea ua aoao mai e lenei vavega ia te oe e uiga ia te Ia?

Ioane 3:1–21

E tatau ona toe fanauina a’u ina ia ou ulu atu ai i le malo o le Atua.

Ina ua sau Nikotemo na o ia ia Iesu, o ia o se tagata matau ma le faaeteete. Peitai, mulimuli ane, sa ia puipuia Iesu i nofoaga faitele (tagai Ioane 7:45–52) ma aufaatasi ma e talitonu i le falelauasiga o le Faaola (tagai Ioane 19:38–40). O a aoaoga ua e maua i le Ioane 3:1–21 atonu na musuia ai Nikotemo e mulimuli ia Iesu ma toe fanauina ai?

Na aoao mai le Perofeta o Iosefa Samita, “O le toefanaufouina, e sau mai le Agaga o le Atua e ala i sauniga” (Aoaoga a Peresitene o le Ekalesia: Iosefa Samita [2007],95). O le a le matafaioi a lou papatisoga ma le faamauga—o le “fanau i le vai ma i le Agaga” (Ioane 3:5)— e faia i le toe fanauina? O le a sau mea o fai e faaauau ai i lenei faagasologa o le suiga? (tagai Alema 5:11–14).

See also Mosaea 5:7; 27:25–26; David A. Bednar, “E Ao Ina Toe Fanau Mai Outou,” Liahona, Me 2007, 19–22.

Ioane 3:16–17

Ua faaalia mai e le Tama Faalelagi Lona alofa mo au e ala ia Iesu Keriso.

Na aoao mai Elder JeffreyR. Holland, “O le upumoni muamua ma le sili o le faavavau atoa, e alofa le Atua ia i tatou ma Lona finagalo atoa, manatu, mafaufau,ma le malosi atoa” (O a Taeao e Faia ai e le Alii o Vavega i o Outou Luma,” Liahona, Me 2016, 127). Na faapefea ona e lagonaina le alofa o le Atua e ala i le meaalofa o Lona Alo?

O le faamanatuga e maua ai se taimi e toemanatunatu ai i le alofa o le Atua ma le meaalofa o Lona Alo. O a viiga o le faamanatuga e fesoasoani e te lagonaina ai lenei alofa? O le a se mea e mafai ona e faia ia atili ai ona anoa le faamanatuga?

A o faaauau ona e faitau i aoaoga ma le auaunaga a le Faaola, fesili ifo ia oe lava, pe o faapefea ona fesoasoani mea o loo e faitaua e te malamalama ma lagona ai le alofa o le Atua.

Ioane 4:24

Pe o se agaga ea le Atua?

Atonu e fenumiai nisi i le fetalaiga a Iesu faapea o le Atua o se agaga. O le Faaliliuga a Iosefa Samita o lenei fuaiupu ua aumaia ai se faamaninoga taua: “Aua o ia lea ua folafola atu i ai e le Atua lona Agaga” (i le Ioane 4:24, vaefaamatalagaa). Ua aoao mai foi e faaaliga i ona po nei faapea, o le Atua e i ai se tino o aano ma ivi (tagai i le Mataupu Faavae ma Feagaiga 130:22–23; tagai foi i le Kenese 5:1–3; Eperu 1:1–3).

Ioane 4:5–26

Ua ofoina mai e Keriso ia te au Lana vai ola.

Mata o le a le uiga o le [fetalaiga] a Iesu ina ua Ia ta’u atu i le fafine Samaria po o ai lava e inu i le vai Na te avatu i ai o le a le toe fiainu lava ia? E faapefea ona pei le talalelei o le vai ola?

O le talalelei a Keriso o le vai ola lea e faafailele ai o tatou agaga.

O se tasi o savali a le Faaola i le fafine Samaria e faapea, e sili atu le ala tatou te tapuai atu ai nai lo le mea tatou te tapuai ai (tagai Ioane 4:21–24). O le a lau mea o fai e “tapuai ai i le Tama i le agaga ma le faamaoni”? (Ioane 4:23).

Tagai foi i le Taiala i Tusitusiga Paia, “Tapuai,” scriptures.ChurchofJesusChrist.org; Dean M. Davies, “O Faamanuiaga o le Tapuai,” Liahona, Nov. 2016, 93–95.

Manatu mo Suesuega Faaleaiga o Tusitusiga Paia ma Afiafi Faaleaiga

Ioane 2–4.A o faitauina e lou aiga nei mataupu i lenei vaiaso, ia mataitu le ala na faaaoga ai e le Faaola mea o aso faisoo—fanau mai, matagi, vai, ma meaai—e aoao atu ai upumoni faaleagaga. O a ni aitema o i lou fale e mafai ona e faaogaina e aoao atu ai upumoni faaleagaga?

A o e suesue i nei mataupu, mafaufau e matamata faatasi vitio o loo faaalia ai nei mea na tutupu: “Jesus Turns Water into Wine,” “Jesus Cleanses the Temple,” “Jesus Teaches of Being Born Again,” ma le “Jesus Teaches a Samaritan Woman” (ChurchofJesusChrist.org).

Ioane 2:13–17.O a faatosinaga le mama e manaomia e lou aiga ona tuu i fafo o lo outou fale ina ia avea ai o se nofoaga paia—e pei o le malumalu? O le a se mea o le a outou faia ia taofia ai na mea i fafo?

Ioane 3:1–6.Talanoa ma lou aiga e uiga i le vavega o le ma’itaga ma le fanau mai—o le faagasologa o le foafoaina o se tagata ola, ma atamai. Na aoao mai e Iesu e ao ona tatou toe fanau mai ae tatou te lei ulu atu i le malo o le Atua. Aisea ua avea ai le toe fanau mai o se upu valiata lelei mo le suiga o loo manaomia mo i tatou a o lei mafai ona tatou ulu atu i le malo o le Atua? E mafai faapefea ona tatou oo i le faagasologa o le toefanauina faaleagaga?

Ioane 3:16–17.Valaaulia tagata o le aiga e toe faaupu mai nei fuaiupu i a latou lava upu e faapei o loo latou faamalamalamaina atu i se uo. Na faapefea ona fesoasoani Iesu Keriso ia tatou lagona le alofa o le Atua?

Ioane 4:5–15.O le a le mea na aoao mai e le Faaola ia i tatou ina ua Ia faatusaina Lana talalelei i le vai ola? Atonu e mafai ona vaavaai lou aiga i se vai o loo faaalu ma faamatala tulaga o le vai. Aisea e manaomia ai ona tatou inu vai i aso uma? O a ni auala ua pei ai le talalelei a Iesu Keriso o “se vai e puna i luga i le ola e faavavau”? (Ioane 4:14).

Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Pese fautuaina: “God’s Love,” Children’s Songbook, 97.

Faaleleia o Suesuega Faaletagata Lava Ia

Vaavaai mo faatusa. O tusitusiga paia e tele ina faaaoga mea faitino, o mea na tutupu, taga e fai e faatusa i upumoni faaleagaga. O nei faatusa e mafai ona faamauoa ai lou malamalama i le aoaoga faavae o loo aoaoina. Mo se faataitaiga, na faatusa e le Faaola le liua i le toe fanau mai.

Vai Ola, saunia e Simon Dewey