O Iesu o loo a‘oa‘o atu i luga o le mauga

O Iesu o Loo Tala‘i Atu le Lauga i luga o le Mauga, na saunia e Gustave Doré

13–19 Fepuari

Mataio 5; Luka 6

“Amuia outou”

Mata‘itu lagona uuna‘i e te maua a o e faitau i le Mataio 5 ma le Luka 6, ma tusifaamaumau i se api tala‘aga o su‘esu‘ega po o i se isi lava ala. E mafai ona fesoasoani lenei ‘oto‘otoga ia te oe e iloa ai nisi o mata‘upu faavae taua i nei mata‘upu, ae ia fetala’i lou mafaufau i isi mata‘upu faavae i au su‘esu‘ega.

Tusifaamaumau Ou Lagona Uuna‘i

O le taimi lenei o Lana galuega, sa manino lava o a‘oa‘oga a Iesu o le a le pei o mea sa masani ona faalogo i ai tagata o Ona taimi. O le a maua e e matitiva le malo o le Atua? O le a fai ma tofi o e agamalu le lalolagi? Amuia e sauaina? Sa lei aoaoina atu e le au tusiupu ma le au Faresaio ia ituaiga o mea. Ae peitai, o i latou o e na malamalama moni i le tulafono a le Atua, e iloaina upumoni i fetalaiga a le Faaola. “O le mata i le mata” ma le “ia inoino i le ua ita mai ia te oe” o ni tulafono maualalalo (Mataio 5:38, 43). Peitai na afio mai Iesu Keriso e aoao mai se tulafono maualuga atu (tagai 3 Nifae 15:2–10), lea na mamanuina e fesoasoani ia te i tatou ia i ai se aso tatou te “atoatoa ai e pei o [lo tatou] Tama o i le lagi e atoatoa ona lelei o ia” (Mataio 5:48).

aikona o suesuega faaletagata lava ia

Manatu mo Suesuega Faaletagata Lava Ia o Tusitusiga Paia

Mataio 5:1–12; Luka 6:20–26, 46–49

O le fiafia tumau e maua i le ola ai i le ala na aoao mai e Iesu Keriso

E mananao tagata uma e fiafia, ae e le o tagata uma o loo su’ea le fiafia i nofoaga lava e tasi. O nisi o loo sailia le fiafia i le malosiaga ma tulaga faalelalolagi, o isi i oa po o le faamalieina o manaoga faaletino. Na afio mai Iesu Keriso e aoao mai le ala i le fiafia tumau, e aoao mai le uiga moni o le faaamuia. O le a le mea ua e aoaoina e uiga i le mauaina o le fiafia tumau mai le Mataio 5:1–12 ma le Luka 6:20–26? Ua ese faapefea lea mai manatu o le lalolagi i le fiafia?

O a ni mea o aoao mai e nei fuaiupu, faatasi ai ma le Luka 6:46–49, ia te oe e uiga i le avea ma se soo o Iesu Keriso? O le a se mea ua musuia oe e fai e atiinae ai uiga auaumama o loo faamatalaina mai i nei fuaiupu?

Tagai foi i le Taiala i Tusitusiga Paia, “Faaamuia,” scriptures.ChurchofJesusChrist.org; “Sermon on the Mount: The Beatitudes” (vitio), ChurchofJesusChrist.org.

Mataio 5:13

“O outou o le masima o le lalolagi outou”

Ua leva ona faaaoga le masima e faasao ai, faamanogi, ma faamama. Sa i ai foi le uiga faalelotu o le masima mo tagata Isaraelu. Sa i ai se fesootaiga ma faiga anamua o taulaga sa osia i manu i lalo o le tulafono a Mose (tagai Levitiko 2:13; Numera 18:19). A leai se tofo o le masima, ona le aoga lea, pe “leai se mea e toe aoga ai” (Mataio 5:13). E tupu le mea lea pe a faafefiloi pe faaleagaina e isi elemene.

Teu le manatu lea i lou mafaufau a o e mafaufau loloto i le Mataio 5:13. O le a faapefea ona e tausisia lou tofo lelei i le avea ai o se soo o Iesu Keriso? O le a faapefea ona faataunuu lau galuega o le faasaosaoina ma le faamamaina i le avea ai ma masima o le lalolagi?

Tagai foi i le Mataupu Faavae ma Feagaiga 103:9–10.

masima

“O outou o le masima o le lalolagi” (Mataio 5:13).

Mataio 5:17–48; Luka 6:27–35

O le tulafono a Keriso ua suia ai le tulafono a Mose.

Atonu na ofo le au soo i le faalogo atu o fetalai Iesu faapea e manaomia ona sili atu o la latou amiotonu i lo tusiupu ma le au Faresaio (tagai Mataio 5:20), o e sa faamaualugaina i latou lava i le lelei o lo latou tausiga o tulafono a Mose.

A o e faitauina le Mataio 5:21–48 ma le Luka 6:27–35, fuafua e maka amioga e moomia i le tulafono a Mose (“Ua outou faalogo na …”) ma le mea na aoao mai e Iesu e siitia ai nei amioga. Aisea e te manatu ai o ala a le Faaola o se tulafono maualuga atu lea?

Mo se faataitaiga, o le a le mea na aoao mai e Iesu i le Mataio 5:27–28 e uiga i lo tatou tiutetauave i o tatou mafaufauga? E mafai faapefea ona e faafoea atili mafaufauga ma lagona e oo mai i lou mafaufau ma le loto? (tagai Mataupu Faavae ma Feagaiga 121:45).

Tagai foi “Sermon on the Mount: The Higher Law” (vitio, ChurchofJesusChrist.org.

Mataio 5:48

Pe o faamoemoe moni mai ea le Tama Faalelagi ia ou atoatoa?

Na aoao mai Peresitene Russell M. Nelson:

“O le upu atoatoa sa faaliliuina mai le faa-Eleni teleios,, o lona uiga ‘ua atoa.’ … O le fatuga faasino o le veape o le teleiono, o lona uiga o le “ia tau i se faaiuga mamao, ia atoatoa ona atiina ae, ia faamae’a, pe faauma.” Faamolemole ia maitau o le upu e le faauiga i le “saoloto mai mea sese”; ae o le “ausia o se faamoemoega mamao.’ …

“… Na aoao mai le Alii, ‘E le mafai ona outou gafatia luma o le Atua i le taimi nei … ; o le mea lea, ia outou faaauau pea i le onosai seia faaatoatoaina outou’ [Mataupu Faavae ma Feagaiga 67:13].

“E le tatau ona tatou lotovaivai pe afai ua foliga mai ua matua faigata ma le maea a tatou taumafaiga faamaoni agai atu i le atoatoaga. O loo faatalitali le atoatoaga. E oo mai lona atoatoaga pe a maea le Toetu ma e na o le Alii lava e ala ai. E faatalitali mai mo i latou uma o e alolofa ia te Ia ma tausia Ana poloaiga” (“Atoatoaga o Loo Faatalitali,” Ensign, Nov. 1995, 86, 88).

Tagai foi i le 2 Peteru 1:3–11; Moronae 10:32–33; Mataupu Faavae ma Feagaiga 76:69; Jeffrey R. Holland, “Ia Atoatoa Ona Lelei o La Outou Amio—I Le Iuga,” Liahona, Nov. 2017, 40–42.

aikona o suesuega faaleaiga

Manatu mo Suesuega Faaleaiga o Tusitusiga Paia ma Afiafi Faaleaiga

Mataio 5:1–9.O a mataupu faavae o loo aoao mai i le Mataio 5:1–9 e mafai ona fesoasoani ia avea ai le tou fale ma se nofoaga e sili ona fiafia? Atonu tou te filifilia se tasi pe lua e foliga mai e faapitoa le taua i lou aiga. Mo se faataitaiga, o a ni aoaoga tatou te maua ai e mafai ona fesoasoani ia avea ai i tatou ma e faatupuina le filemu? (tagai Mataio 5:21–25, 38–44). O a ni sini e mafai ona tatou faatuina? O le a faapefea ona tatou tulitataoina?

Mataio 5:13.Aai faatasi i ni meaai ua faamasimaina ma le meaai lava foi lena e aunoa ma le masima. O a ni eseesega tatou te maitauina? O le a le uiga o le avea “ma masima o le lalolagi”? E mafai faapefea ona tatou faia lenei mea?

Mataio 5:14–16.Ina ia fesoasoani ia malamalama lou aiga i le uiga o le avea ma “malamalama o le lalolagi,” e mafai ona outou suea nisi o faapogai o le malamalama i lo outou fale, o outou tuaoi, ma le lalolagi. E ono fesoasoani le faaali atu o le mea e tupu pe a e nanaina se malamalama. O le a le uiga o le o le fetalaiga a Iesu ina ua Ia fai mai, “O outou o le malamalama o le lalolagi”? (Mataio 5:14). O ai na pei o se malamalama mo lo tatou aiga? E mafai faapefea ona avea i tatou ma malamalama i isi? (see 3 Nifae 18:16, 24–25).

Mataio 5:43–45.A o faitau e lou aiga fetalaiga a le Faaola o loo i nei fuaiupu, atonu tou te talanoa i le po ai, tonu lava, tou te lagona e mafai ona outou alolofa, faamanuia, ma tatalo [e uiga] i ai. E faapefea ona faateleina lo tatou alolofa mo i latou?

Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Pese fautuaina: “Susulu Pea,” Tusipese a Tamaiti, 96.

Faaleleia o Lo Tatou Aoao Atu

Ia mataala. “A o e mataituina mea o loo tutupu i olaga o lau [fanau], o le a e maua ai avanoa sili ona lelei e aoao atu ai. … O faamatalaga e [latou te] faia po o fesili latou te fesili ai e mafai foi ona taitai atu i ni avanoa e aoao atu ai” (Aoao Atu i le Ala a le Faaola, 16).

lamepa

“O outou o le malamalama o le lalolagi” (Mataio 5:14).