6–12 Maj

Matiu 9–10; Mak 5; Luk 9

“Jisas I Sanemaot Ol Twelef Man Ya Oli Go”

Ol aedia insaed long aotlaen ia oli stap blong helpem yu blong faenem wan mining we i blong yuwan, insaed long ol skripja ia. Be, oli no mas tekem ples blong revelesen we yu kasem blong yuwan, long saed blong wijwan skripja blong stadi long hem, mo wei blong stadi long hem.

Raetemdaon Ol Filing mo Tingting blong Yu

Toktok i go raon kwik se Jisas i stap mekem ol merikel blong hilim ol man. Ol bigfala grup blong ol man oli bin stap folem Hem, oli bin stap hop blong kam oraet long ol sik blong olgeta. Be taem Sevya i bin luk long bigfala grup blong ol pipol ia, Hem i bin luk moa bitim ol soa blong bodi blong olgeta. Hat blong Hem i fulap long sore, Hem i bin luk “oli olsem ol sipsip we i no gat man blong lukaot long olgeta” (Matiu 9:36). “Yufala i luk. I gat plante kakae tumas i stap long garen we i rere finis, be smol man nomo oli stap blong karem i go long haos” (Matiu 9:37). Mekem se Hem i singaotem Olgeta Twelef Aposol, “givim paoa long olgeta,” mo i sendem olgeta blong oli go tijim mo givhan long “ol laen blong Isrel, … oli olsem ol sipsip we oli lus” (Matiu 10:1, 6). Tedei, nid blong gat moa man blong wok blong helpem ol pikinini blong Papa long Heven, i bigwan i stap. I gat twelef Aposol i stap, be i gat moa disaepol blong Jisas Kraes i bitim bifo—ol pipol we oli save talemaot long wol: “Taem blong God i kam King blong olgeta man long wol, i kam kolosap finis” (Matiu 10:7).

Sam Aedia blong Skripja Stadi blong Yuwan

Matiu 9:18–26; Mak 5:22–43

Yufala i no fraet, yufala i biliv nomo.

Taem we Jaeras i bin askem Jisas blong hilim gel blong hem we “kolosap i ded,” Jaeras i toktok hariap be wetem hop: “Plis yu kam putum han blong yu long hem blong mekem hem i kam gud bakegen” (Mak 5:23). Be taem oli stap wokbaot i go, wan mesenja i talem long Jaeras se i let tumas: “Smol gel blong yu i lus finis. I gud yu talem long tija ya blong hem i no moa kam?” (ves 35). Semmak olsem, maet long woman ia we oli tokbaot long Mak 5:25–34, we i safa wetem wan sik blong 12 yia, maet hem i luk se i let finis.

Taem yu stap ridim ol stori ia, maet bae yu tingting long ol samting we i nid blong oli kam oraet insaed long laef blong yu, o long laef blong famli blong yu—wetem olgeta samting we yu luk se “kolosap bae i ded”, o i let tumas blong kam oraet bakegen. ?Wanem nao i tajem yu abaot ol wei blong soemaot fet, insaed long ol stori ia? Lukgud wanem we Jisas i stap talem long woman ia mo long Jaeras. ?Wanem nao yu filim se Hem i stap talem long yu?

Luk tu long Luk 8:41–56; Russell M. Nelson, “Pulum Paoa blong Jisas Kraes Insaed long Laef blong Yumi,” Jeneral Konfrens, Epril 2017, ChurchofJesusChrist.org/general-conference/conferences?lang=bis; Teachings of Presidents of the Church: Gordon B. Hinckley (2016), 333–42.

Gat Tras long Lod, i kam long Liz Lemon Swindle

Matiu 10; Luk 9:1–6

Lod i givim paoa long ol wokman blong Hem, blong oli mekem wok blong Hem.

Ol instraksen we Jisas i givim long ol Aposol blong Hem, we i stap long Matiu 10, hem i blong yumi tu, from se yumi evriwan i gat wan pat insaed long wok ia blong Lod. ?Wanem paoa nao Kraes i givim long ol Aposol blong Hem blong helpem olgeta blong mekem misin blong olgeta? ?Olsem wanem yu save yusum paoa ia blong Hem long wok ia we Hem i bin singaotem yu blong mekem? (luk long 2 Korin 6:1–10; Doktrin mo Ol Kavenan 121:34–46).

Taem yu stap ridim bigfala wok we Kraes i givim long ol Aposol blong Hem, maet bae yu kasem ol tingting mo ol filing abaot wok ia we Lod i wantem yu blong go mekem. Wan jat olsem hemia we i stap daon ia bae i save help blong yu oganaesem ol tingting blong yu:

Matiu 10	Ol Tingting mo Filing we mi kasem
Sevya i givim paoa long ol disaepol blong Hem.	God bae i givim mi paoa we mi nidim blong mekem wok blong mi.

Luk tu long Mak 6:7–13; Ol Toktok blong Bilif 1:6; Gaed long Ol Skripja, “Aposol”; “Jesus Calls Twelve Apostles to Preach and Bless Others” (vidio), ChurchofJesusChrist.org.

Matiu 10:17–20

Taem mi mi stap mekem wok blong Lod, bambae Hem i givim ol tingting long mi long wanem bae mi talem.

Lod i bin luk finis se bae ol man oli agensem ol disaepol blong Hem, mo bae oli gat kwestin abaot bilif blong olgeta—wan semmak samting long wanem ol disaepol, tedei, oli stap gotru long hem. Be Hem i bin promesem ol disaepol blong Hem se bae oli save, tru long Spirit, wanem bae oli talem. ?Yu yu gat ol eksperiens ia finis, taem we tabu promes i hapen insaed long laef blong yu?; maet i taem yu talem testemoni blong yu, givim wan blesing, o taem yu bin storian wetem wan. Tingting blong serem ol eksperiens blong yu wetem wan we yu lavem, o raetem olgeta insaed long wan jenol. ?Wanem nao yu filim insperesen blong mekem, blong yu save gat ol kaen eksperiens olsem ia, plante taem moa.

Luk tu long Luk 12:11–12; Doktrin mo Ol Kavenan 84:85.

Matiu 10:34–39

?Wanem nao Jisas i minim taem Hem i talem se: “Mi mi no kam blong putum pis nomo, mi kam blong mekem ol man oli seraot tu, oli faet”?

Elda D. Todd Christofferson i tijim: “Mi mi save se i gat plante long yufala we papa, mama, brata mo sista oli bin sakemaot mo poenem fingga long yufala taem yufala i bin akseptem gospel blong Jisas Kraes, mo kam mo mekem kavenan wetem Hem. Long wan wei, o long eni nara wei, bigfala lav blong yu we yu gat long Kraes i bin nidim blong yu givim ol rilesensip blong yu olsem sakrifaes, mo yu bin krae plante. Yet, wetem lav blong yu we i no godaon, yu bin stap strong andanit long kros ia, we yu soemaot se yu no sem long Pikinini blong God” (“Finding Your Life,” Ensign, Mar. 2016, 28).

Blong wantem lusum ol gudfala rilesensip ia blong save folem Sevya, i kam wetem promes ia se “man we i lusum laef blong hem from mi, hem bambae i save kasem laef blong hem” (Matiu 10:39).

Ol Aedia blong Famli Skripja Stadi mo Haos Naet

Mak 5:22–43.Taem famli blong yu i stap ridim stori ia tugeta, bae yufala i save stop smol blong askem ol memba blong famli se, bae oli filim olsem wanem sapos oli Jaeras, o woman ia, o eni nara pipol insaed long stori ia. Mo tu, yu save soem ol pikja blong stori, olsem olgeta we oli stap long aotlaen ia. ?Olsem wanem ol pikja ia oli soemaot fet blong ol pipol insaed long ol stori ia? (Luk tu long ol vidio ia: “Jesus Raises the Daughter of Jairus” mo “Jesus Heals a Woman of Faith” on ChurchofJesusChrist.org.) Yu save tingting tu long samfala jalenj we famli blong yu i stap fesem. ?Olsem wanem hemia i go wetem ol toktok ia blong Hem: “Yu no harem nogud. Yu bilif long mi nomo”? (Mak 5:36).

Matiu 10:39; Luk 9:23–26.?Hem i minim wanem blong “lusum” laef blong yu, o blong “kasem” laef? (Matiu 10:39). Maet ol memba blong famli oli save serem ol eksperiens we oli soemaot ol tijing blong Jisas insaed long ol ves ia.

Matiu 10:40.?Olsem wanem nao yu mo famli blong yu i stap mekem blong stap akseptem mo stap folem advaes blong ol Aposol blong tedei? ?Long wanem wei nao fasin blong yumi blong stap obei long advaes blong olgeta i tekem yumi i go kolosap moa long Jisas Kraes?

Luk 9:61–62.?Hem i minim wanem blong lukluk i gobak afta we yumi we yumi putum han long wok? ?From wanem fasin ia i mekem se yumi no fit long kingdom blong God?

Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.

Wan Singsing: “When Faith Endures,” Hymns, namba 128.

Stap Kam Antap long Stadi blong Yuwan

Lisin long Spirit Taem yu stap stadi, luklukgud long ol tingting mo filing blong yu (luk long Doktrin mo Ol Kavenan 8:2–3) iven sapos yu luk se i no wetem wanem we yu stap ridim. Olgeta tingting mo filing ia, maet oli ol stret samting ia we God i wantem yu blong save mo mekem.

Talitha Cumi, i kam long Eva Koleva Timothy