“ວັນທີ 6–12 ເດືອນມີນາ. ມັດທາຍ 9–10; ມາຣະໂກ 5; ລູກາ 9: ‘ພຣະເຢຊູໄດ້ໃຊ້ສິບສອງຄົນນີ້ອອກໄປ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີໃໝ່ 2023 (2022)

“ວັນທີ 6–12 ເດືອນມີນາ. ມັດທາຍ 9–10; ມາຣະໂກ 5; ລູກາ 9,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2023

ວັນທີ 6–12 ເດືອນມີນາ

ມັດທາຍ 9–10; ມາຣະໂກ 5; ລູກາ 9

“ພຣະເຢຊູໄດ້ໃຊ້ສິບສອງຄົນນີ້ອອກໄປ”

ແນວຄິດສຶກສາໃນໂຄງຮ່າງນີ້ໄດ້ຖືກຈັດໄວ້ເພື່ອຊ່ວຍທ່ານໃຫ້ພົບເຫັນຄວາມໝາຍສ່ວນຕົວໃນພຣະຄຳພີ. ເຖິງຢ່າງໃດກໍຕາມ, ມັນບໍ່ຄວນທົດແທນການເປີດເຜີຍສ່ວນຕົວ ທີ່ທ່ານອາດໄດ້ຮັບກ່ຽວກັບຂ່າວສານໃດທີ່ທ່ານຈະສຶກສາ ຫລື ວິທີທີ່ຈະສຶກສາມັນ.

ບັນທຶກຄວາມປະທັບໃຈຂອງທ່ານ

ການປິ່ນປົວທີ່ໜ້າອັດສະຈັນຂອງພຣະເຢຊູໄດ້ແຜ່ລາມໄປທົ່ວຢ່າງວ່ອງໄວ. ຝູງຊົນໄດ້ຕິດຕາມພຣະອົງ, ຫວັງວ່າຈະໄດ້ຮັບການປິ່ນປົວຈາກຄວາມເຈັບປ່ວຍຂອງພວກເຂົາ. ແຕ່ເມື່ອພຣະຜູ້ຊ່ວຍໃຫ້ລອດຫລຽວເບິ່ງຝູງຊົນ, ພຣະອົງໄດ້ເຫັນຫລາຍກວ່າພະຍາດທາງຮ່າງກາຍຂອງພວກເຂົາ. ໂດຍທີ່ເຕັມໄປດ້ວຍຄວາມເຫັນອົກເຫັນໃຈ, ພຣະອົງໄດ້ເຫັນ “ຝູງແກະທີ່ບໍ່ມີຜູ້ລ້ຽງ” (ມັດທາຍ 9:36). “ເຂົ້າທີ່ພໍເກັບກ່ຽວກໍຫລາຍແທ້,” ພຣະອົງສັງເກດ, “ແຕ່ຄົນງານຍັງມີໜ້ອຍຢູ່” (ມັດທາຍ 9:37). ສະນັ້ນພຣະອົງຈຶ່ງໄດ້ເອີ້ນເອົາອັກຄະສາວົກສິບສອງຄົນ, “ໃຫ້ອຳນາດ,” ແລະ ສົ່ງພວກເພິ່ນອອກໄປສິດສອນ ແລະ ປະຕິບັດສາດສະໜາກິດຕໍ່ “ຝູງແກະທີ່ເສຍແຫ່ງ [ເຊື້ອສາຍ] ອິດສະຣາເອນ” (ມັດທາຍ 10:1, 6). ທຸກວັນນີ້ ກໍຕ້ອງການຄົນງານເພື່ອຮັບໃຊ້ລູກໆຂອງພຣະບິດາເທິງສະຫວັນຄືກັບທີ່ຜ່ານມາ. ຍັງມີອັກຄະສາວົກສິບສອງ, ແຕ່ມີສານຸສິດຂອງພຣະເຢຊູຄຣິດຫລາຍກວ່າທີ່ຜ່ານມາ—ຜູ້ຄົນທີ່ສາມາດປະກາດຕໍ່ທຸກຄົນໃນໂລກວ່າ, “ອານາຈັກສະຫວັນມາໃກ້ແລ້ວ” (ມັດທາຍ 10:7).

ແນວຄິດສຳລັບການສຶກສາພຣະຄຳພີເປັນສ່ວນຕົວ

ມັດທາຍ 9:18–26; ມາຣະໂກ 5:22–43

“ຢ່າວິຕົກເລີຍ, ຈົ່ງເຊື່ອເທົ່ານັ້ນ.”

ເມື່ອຢາອີໂຣໄດ້ຂໍໃຫ້ພຣະເຢຊູປິ່ນປົວລູກສາວຂອງລາວ, ຜູ້ທີ່ “ເຈັບໜັກໃກ້ຕາຍ,” ຢາອີໂຣໄດ້ເວົ້າແບບສຸກເສີນແຕ່ດ້ວຍຄວາມຫວັງທີ່ວ່າ: “ຂໍທ່ານກະລຸນາໄປວາງມືໃສ່ນາງດ້ວຍເຖີດ, … ເພື່ອລາວຈະຫາຍດີ” (ມາຣະໂກ 5:23). ແຕ່ໃນຂະນະທີ່ກຳລັງໄປ, ມີຄົນມາບອກຢາອີໂຣວ່າ ມັນສາຍເກີນໄປເສຍແລ້ວ: “ລູກສາວຂອງເຈົ້າຕາຍແລ້ວ: ຍັງລົບກວນອາຈານເຮັດຫຍັງ?” (ຂໍ້ທີ 35). ເຊັ່ນດຽວກັນ, ອາດເບິ່ງຄືວ່າ ມັນສາຍເກີນໄປເສຍແລ້ວສຳລັບຜູ້ຍິງທີ່ບັນຍາຍຢູ່ໃນ ມາຣະໂກ 5:25–34, ຜູ້ໄດ້ທົນທຸກທໍລະມານກັບພະຍາດເປັນເວລາ 12 ປີ.

ຂະນະທີ່ທ່ານອ່ານເລື່ອງລາວເຫລົ່ານີ້, ທ່ານອາດຄິດກ່ຽວກັບສິ່ງທີ່ຕ້ອງການ ການປິ່ນປົວໃນຊີວິດຂອງທ່ານ ຫລື ຄອບຄົວຂອງທ່ານ—ລວມທັງສິ່ງທີ່ອາດເບິ່ງຄືວ່າ “ເຈັບໜັກໃກ້ຕາຍ” ຫລື ສາຍເກີນໄປທີ່ຈະປິ່ນປົວ. ແມ່ນຫຍັງທີ່ປະທັບໃຈທ່ານກ່ຽວກັບການສະແດງສັດທາໃນເລື່ອງລາວເຫລົ່ານີ້? ໃຫ້ສັງເກດສິ່ງທີ່ພຣະເຢຊູກ່າວຕໍ່ຜູ້ຍິງ ແລະ ຕໍ່ຢາອີໂຣນຳອີກ. ທ່ານຮູ້ສຶກວ່າພຣະອົງກຳລັງເວົ້າຫຍັງກັບທ່ານ?

ເບິ່ງ ລູກາ 8:41–56; Russell M. Nelson, “Drawing the Power of Jesus Christ into Our Lives,” Liahona, May 2017, 39–42; Teachings of Presidents of the Church: Gordon B. Hinckley (2016), 333–42 ນຳອີກ.

Trust in the Lord [ຈົ່ງໄວ້ວາງໃຈໃນພຣະຜູ້ເປັນເຈົ້າ], ໂດຍ ລີສ໌ ລີມັນ ສະວິນໂດ

ມັດທາຍ 10; ລູກາ 9:1–6

ພຣະຜູ້ເປັນເຈົ້າມອບອຳນາດໃຫ້ແກ່ຜູ້ຮັບໃຊ້ຂອງພຣະອົງ ເພື່ອເຮັດວຽກງານຂອງພຣະອົງ.

ຄຳແນະນຳທີ່ພຣະເຢຊູໄດ້ມອບໃຫ້ໃນ ມັດທາຍ 10 ແກ່ອັກຄະສາວົກຂອງພຣະອົງ ສາມາດນຳໃຊ້ກັບເຮົາໄດ້ຄືກັນ, ເພາະວ່າເຮົາທຸກຄົນເປັນພາກສ່ວນໃນວຽກງານຂອງພຣະຜູ້ເປັນເຈົ້າ. ອຳນາດຢ່າງໃດທີ່ພຣະຄຣິດໄດ້ມອບໃຫ້ແກ່ອັກຄະສາວົກຂອງພຣະອົງ ເພື່ອຊ່ວຍພວກເພິ່ນບັນລຸພາລະກິດຂອງພວກເພິ່ນ? ທ່ານຈະເຂົ້າເຖິງອຳນາດຂອງພຣະອົງໄດ້ແນວໃດ ໃນວຽກງານທີ່ທ່ານຖືກເອີ້ນໃຫ້ເຮັດ? (ເບິ່ງ 2 ໂກຣິນໂທ 6:1–10; ຄຳສອນ ແລະ ພັນທະສັນຍາ 121:34–46).

ຂະນະທີ່ທ່ານອ່ານການມອບໝາຍທີ່ພຣະຄຣິດໄດ້ມອບໃຫ້ແກ່ອັກຄະສາວົກຂອງພຣະອົງ, ທ່ານອາດໄດ້ຮັບຄວາມປະທັບໃຈກ່ຽວກັບວຽກງານທີ່ພຣະຜູ້ເປັນເຈົ້າປະສົງໃຫ້ທ່ານເຮັດ. ຕາຕະລາງທີ່ຄືກັນກັບດັ່ງຕໍ່ໄປນີ້ ສາມາດຊ່ວຍທ່ານໃຫ້ຈັດລະບຽບຄວາມຄິດຂອງທ່ານໄດ້:

ມັດທາຍ 10	ຄວາມປະທັບໃຈທີ່ເຮົາໄດ້ຮັບ
ພຣະຜູ້ຊ່ວຍໃຫ້ລອດໄດ້ມອບອຳນາດໃຫ້ພວກສາວົກຂອງພຣະອົງ.	ພຣະເຈົ້າຈະປະທານອຳນາດທີ່ເຮົາຕ້ອງການໃຫ້ເຮົາ ເພື່ອເຮັດວຽກງານຂອງເຮົາ.

ເບິ່ງ ມາຣະໂກ 6:7–13; ຫລັກແຫ່ງຄວາມເຊື່ອ 1:6; Bible Dictionary, “Apostle”; “Jesus Calls Twelve Apostles to Preach and Bless Others” (ວິດີໂອ), ChurchofJesusChrist.org ນຳອີກ.

1:39

ມັດທາຍ 10:17–20

ເມື່ອເຮົາຢູ່ໃນການຮັບໃຊ້ຂອງພຣະຜູ້ເປັນເຈົ້າ, ພຣະອົງຈະດົນໃຈເຮົາໃຫ້ຮູ້ສິ່ງທີ່ຈະເວົ້າ.

ພຣະຜູ້ເປັນເຈົ້າໄດ້ບອກລ່ວງໜ້າວ່າ ສານຸສິດຂອງພຣະອົງຈະຖືກຂົ່ມເຫັງ ແລະ ຖືກສອບຖາມກ່ຽວກັບສັດທາຂອງພວກເຂົາ—ບາງສິ່ງທີ່ຄ້າຍຄືກັນກັບສິ່ງທີ່ສານຸສິດໃນທຸກວັນນີ້ປະເຊີນ. ແຕ່ພຣະອົງໄດ້ສັນຍາກັບສານຸສິດວ່າ ພວກເຂົາຈະຮູ້ໂດຍພຣະວິນຍານເຖິງສິ່ງທີ່ຈະເວົ້າ. ທ່ານເຄີຍມີປະສົບການກັບຕອນທີ່ຄຳສັນຍາແຫ່ງສະຫວັນນີ້ໄດ້ບັນລຸໃນຊີວິດຂອງທ່ານຫລືບໍ່, ບາງທີອາດເປັນຕອນທີ່ທ່ານສະແດງປະຈັກພະຍານ, ໃຫ້ພອນ, ຫລື ສົນທະນາກັບບາງຄົນ? ໃຫ້ຄິດທີ່ຈະແບ່ງປັນປະສົບການຂອງທ່ານກັບຄົນທີ່ທ່ານຮັກ ຫລື ບັນທຶກມັນໄວ້ຢູ່ໃນປຶ້ມບັນທຶກສ່ວນຕົວ. ທ່ານຮູ້ສຶກໄດ້ຮັບການດົນໃຈໃຫ້ເຮັດສິ່ງໃດ ເພື່ອວ່າທ່ານຈະສາມາດມີປະສົບການເຊັ່ນນັ້ນເລື້ອຍໆ?

ເບິ່ງ ລູກາ 12:11–12; ຄຳສອນ ແລະ ພັນທະສັນຍາ 84:85 ນຳອີກ.

ມັດທາຍ 10:34–39

ພຣະເຢຊູໝາຍຄວາມວ່າແນວໃດ ທີ່ວ່າ “ເຮົາບໍ່ໄດ້ມາເພື່ອນຳຄວາມສະຫງົບສຸກມາໃຫ້, ແຕ່ໃຫ້ມີດາບ”?

ແອວເດີ ດີ ທອດ ຄຣິສໂຕເຟີສັນ ໄດ້ສິດສອນວ່າ: “ຂ້າພະເຈົ້າແນ່ໃຈວ່າ ພວກທ່ານຫລາຍຄົນເຄີຍຖືກພໍ່ແມ່, ອ້າຍເອື້ອຍນ້ອງປະຕິເສດ ຫລື ຕັດສຳພັນ ເມື່ອທ່ານຮັບເອົາພຣະກິດຕິຄຸນຂອງພຣະເຢຊູຄຣິດ ແລະ ເຂົ້າເຮັດພັນທະສັນຍາ. ບໍ່ວ່າໃນທາງໃດ ຫລື ທາງໜຶ່ງ, ຄວາມຮັກທີ່ເໜືອກວ່າຂອງທ່ານຕໍ່ພຣະຄຣິດ ຮຽກຮ້ອງໃຫ້ເສຍສະລະຄວາມສຳພັນອັນເປັນທີ່ຮັກຕໍ່ທ່ານ, ແລະ ທ່ານກໍໄດ້ຫລັ່ງນ້ຳຕາບໍ່ໜ້ອຍ. ແຕ່ດ້ວຍຄວາມຮັກທີ່ບໍ່ລົດນ້ອຍຂອງທ່ານເອງ, ທ່ານຍຶດໝັ້ນຢູ່ກ້ອງໄມ້ກາງແຂນນີ້, ສະແດງຕົວບໍ່ອັບອາຍກ່ຽວກັບພຣະບຸດຂອງພຣະເຈົ້າ” (“Finding Your Life,” Ensign, Mar. 2016, 28).

ຄວາມເຕັມໃຈທີ່ຈະສູນເສຍຄວາມສຳພັນທີ່ເຄີຍທະນຸຖະໜອມນີ້ ເພື່ອຈະໄດ້ຕິດຕາມພຣະຜູ້ຊ່ວຍໃຫ້ລອດ ມາກັບຄຳສັນຍາທີ່ວ່າ “ຜູ້ທີ່ເສຍຊີວິດຂອງຕົນເພື່ອເຫັນແກ່ເຮົາ ກໍຈະໄດ້ຮັບຊີວິດ” (ມັດທາຍ 10:39).

ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ

ມາຣະໂກ 5:22–43.ຂະນະທີ່ຄອບຄົວຂອງທ່ານອ່ານເລື່ອງນີ້ນຳກັນ, ທ່ານຄວນຢຸດເພື່ອຖາມສະມາຊິກໃນຄອບຄົວວ່າ ເຂົາເຈົ້າຈະຮູ້ສຶກແນວໃດ ຖ້າຫາກເຂົາເຈົ້າເປັນຢາອີໂຣ, ເປັນຜູ້ຍິງຄົນນັ້ນ, ຫລື ຄົນອື່ນໆຢູ່ໃນເລື່ອງນີ້. ທ່ານກໍສາມາດສະແດງຮູບພາບກ່ຽວກັບເລື່ອງນີ້ນຳອີກ, ດັ່ງເຊັ່ນຮູບຢູ່ໃນໂຄງຮ່າງນີ້. ຮູບພາບເຫລົ່ານີ້ສະແດງເຖິງສັດທາຂອງຜູ້ຄົນຢູ່ໃນເລື່ອງເລົ່າແນວໃດ? (ເບິ່ງ ວິດີໂອ “Jesus Raises the Daughter of Jairus” ແລະ “Jesus Heals a Woman of Faith” ທີ່ ChurchofJesusChrist.org ນຳອີກ.) ທ່ານກໍຄວນພິຈາລະນາການທ້າທາຍບາງຢ່າງທີ່ຄອບຄົວຂອງທ່ານປະເຊີນນຳອີກ. ເຮົາຈະນຳໃຊ້ພຣະຄຳຂອງພຣະອົງທີ່ວ່າ, “ຢ່າວິຕົກເລີຍ, ຈົ່ງເຊື່ອເທົ່ານັ້ນ” ແນວໃດ? (ມາຣະໂກ 5:36).

3:26

1:39

ມັດທາຍ 10:39; ລູກາ 9:23–26.ຄຳວ່າ “ເສຍ” ຊີວິດຂອງເຮົາ ແລະ “ໄດ້” ມັນ ໝາຍຄວາມວ່າແນວໃດ? (ມັດທາຍ 10:39). ບາງທີສະມາຊິກໃນຄອບຄົວສາມາດແບ່ງປັນປະສົບການທີ່ສະແດງເຖິງຄຳສອນຂອງພຣະເຢຊູ ໃນຂໍ້ເຫລົ່ານີ້.

ມັດທາຍ 10:40.ທ່ານ ແລະ ຄອບຄົວຂອງທ່ານເປັນຈັ່ງໃດ ໃນການໄດ້ຮັບ ແລະ ການເຮັດຕາມຄຳແນະນຳຂອງອັກຄະສາວົກສະໄໝໃໝ່? ການເຊື່ອຟັງຂອງເຮົາຕໍ່ຄຳແນະນຳຂອງພວກເພິ່ນ ໄດ້ຊ່ວຍເຮົາໃຫ້ເຂົ້າໃກ້ຊິດພຣະເຢຊູຄຣິດແນວໃດ?

ລູກາ 9:61–62.ຄຳວ່າ ຈັບງ້ອນໄຖແລ້ວຍັງຫລຽວຄືນຫລັງ ໝາຍຄວາມວ່າແນວໃດ? ທັດສະນະຄະຕິແບບນີ້ເຮັດໃຫ້ເຮົາບໍ່ເໝາະສົມກັບອານາຈັກຂອງພຣະເຈົ້າແນວໃດ?

ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ this week’s outline ໃນ Come, Follow Me—For Primary.

ເພງແນະນຳ: “ມາເຖີດ, ທ່ານລູກຫລານພຣະເຈົ້າ,” ເພງສວດ ແລະ ເພງຂອງເດັກນ້ອຍ, 4.

ການປັບປຸງການສຶກສາສ່ວນຕົວ

ຮັບຟັງພຣະວິນຍານ. ຂະນະທີ່ທ່ານສຶກສາ, ໃຫ້ເອົາໃຈໃສ່ຕໍ່ຄວາມຄິດ ແລະ ຄວາມຮູ້ສຶກຂອງທ່ານ (ເບິ່ງ ຄຳສອນ ແລະ ພັນທະສັນຍາ 8:2–3), ເຖິງແມ່ນເບິ່ງຄືວ່າ ມັນບໍ່ກ່ຽວຂ້ອງກັບສິ່ງທີ່ທ່ານກຳລັງອ່ານກໍຕາມ. ຄວາມປະທັບໃຈເຫລົ່ານັ້ນ ສາມາດເປັນສິ່ງທີ່ພຣະເຈົ້າປະສົງໃຫ້ທ່ານຮູ້ ແລະ ເຮັດ.

ພຣະເຢຊູກຳລັງດຶງເດັກຍິງໃຫ້ລຸກຂຶ້ນຈາກຕຽງນອນ — Talitha Cumi [ທາລິຕາ ຄູມີ], ໂດຍ ອີວາ ໂຄເລວາ ທິມະຕີ