“ວັນທີ 13–19 ເດືອນມີນາ. ມັດທາຍ 11–12; ລູກາ 11: ‘ເຮົາຈະໃຫ້ພວກເຈົ້າໄດ້ຮັບຄວາມເຊົາເມື່ອຍ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີໃໝ່ 2023 (2022)
“ວັນທີ 13–19 ເດືອນມີນາ. ມັດທາຍ 11–12; ລູກາ 11,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2023
Be Not Afraid [ຢ່າສູ່ຢ້ານ], ໂດຍ ໄມໂກ ມອມ
ວັນທີ 13–19 ເດືອນມີນາ
ມັດທາຍ 11–12; ລູກາ 11
“ເຮົາຈະໃຫ້ພວກເຈົ້າໄດ້ຮັບຄວາມເຊົາເມື່ອຍ”
ປະທານດາລິນ ເອັຈ ໂອກສ໌ ໄດ້ສິດສອນວ່າ: “ພຣະຄຳພີ, ຊຶ່ງເປັນການເປີດເຜີຍຈາກອະດີດ, ບໍ່ສາມາດເຂົ້າໃຈໄດ້ປາດສະຈາກການເປີດເຜີຍໃນປະຈຸບັນ. … ການສຶກສາພຣະຄຳພີຊ່ວຍໃຫ້ຊາຍ ແລະ ຍິງໄດ້ຮັບການເປີດເຜີຍ” (“Scripture Reading and Revelation,” Ensign, Jan. 1995, 7).
ບັນທຶກຄວາມປະທັບໃຈຂອງທ່ານ
ໃນຫລາຍວິທີທາງ, ພວກຟາຣີຊາຍ ແລະ ພວກທຳມະຈານໄດ້ເຮັດໃຫ້ການນະມັດສະການພຣະເຢໂຮວາໜັກໜ່ວງເຕັມທີ່. ພວກເຂົາມັກເນັ້ນເຖິງກົດທີ່ເຄັ່ງຄັດເລື່ອງຄວາມຈິງນິລັນດອນ. ກົດກ່ຽວກັບວັນຊະບາໂຕ, ຊຶ່ງຄວນເປັນວັນພັກ, ກໍໜັກໜ່ວງຢູ່ແລ້ວ.
ແລະ ແລ້ວ, ພຣະເຢໂຮວາເອງໄດ້ສະເດັດມາຍັງທ່າມກາງຜູ້ຄົນຂອງພຣະອົງ. ພຣະອົງໄດ້ສິດສອນພວກເຂົາວ່າ ຈຸດປະສົງທີ່ແທ້ຈິງຂອງສາດສະໜາ ບໍ່ແມ່ນການສ້າງຄວາມໜັກໜ່ວງ ແຕ່ໃຫ້ການບັນເທົາແກ່ພວກເຂົາ. ພຣະອົງໄດ້ສິດສອນວ່າ ພຣະເຈົ້າໄດ້ປະທານພຣະບັນຍັດໃຫ້ເຮົາ, ລວມທັງຂໍ້ໜຶ່ງເພື່ອໃຫ້ກຽດແກ່ວັນຊະບາໂຕ, ບໍ່ແມ່ນເພື່ອກົດດັນເຮົາ ແຕ່ເພື່ອອວຍພອນເຮົາ. ແມ່ນແລ້ວ, ທາງໄປຫາພຣະເຈົ້າແມ່ນຄັບ ແລະ ແຄບ, ແຕ່ພຣະຜູ້ເປັນເຈົ້າໄດ້ສະເດັດມາເພື່ອປະກາດວ່າ ເຮົາບໍ່ຈຳເປັນຕ້ອງເດີນໄປຄົນດຽວ. “ຈົ່ງມາຫາເຮົາ,” ພຣະອົງໄດ້ອ້ອນວອນ. ຄຳເຊື້ອເຊີນຂອງພຣະອົງ, ຕໍ່ທຸກຄົນທີ່ຮູ້ສຶກ “ໜັກໜ່ວງ” ບໍ່ວ່າຈະເປັນດ້ວຍເຫດຜົນໃດກໍຕາມ, ຄືໃຫ້ຢືນຄຽງຂ້າງພຣະອົງ, ເພື່ອຜູກມັດຕົວເຮົາເອງໄວ້ກັບພຣະອົງ, ແລະ ອະນຸຍາດໃຫ້ພຣະອົງຊ່ວຍແບກຫາບພາລະໜັກໜ່ວງຂອງເຮົາ. ຄຳສັນຍາຂອງພຣະອົງຄື “ຈິດໃຈຂອງພວກເຈົ້າຈະໄດ້ພົບຄວາມເຊົາເມື່ອຍ.” ເມື່ອປຽບທຽບກັບທາງເລືອກອື່ນ—ການພະຍາຍາມແບກຫາບຄົນດຽວ ຫລື ເພິ່ງອາໄສວິທີແກ້ບັນຫາຂອງມະນຸດ—“ແອກ [ຂອງພຣະອົງ] ກໍພໍເໝາະ, ແລະ ພາລະກິດ [ຂອງພຣະອົງ] ກໍເບົາ.” (ມັດທາຍ 11:28–30.)
ແນວຄິດສຳລັບການສຶກສາພຣະຄຳພີເປັນສ່ວນຕົວ
ພຣະເຢຊູຄຣິດຈະໃຫ້ເຮົາໄດ້ພັກຜ່ອນຂະນະທີ່ເຮົາເພິ່ງອາໄສພຣະອົງ.
ເຮົາທຸກຄົນຈະແບກຫາບພາລະຄວາມໜັກໜ່ວງ—ບາງຢ່າງແມ່ນເກີດຈາກບາບ ແລະ ຄວາມຜິດພາດຂອງເຮົາເອງ, ບາງຢ່າງກໍເກີດຈາກການເລືອກຂອງຄົນອື່ນ, ແລະ ບາງຢ່າງກໍບໍ່ແມ່ນຄວາມຜິດຂອງຄົນໃດ ແຕ່ເປັນພຽງສ່ວນໜຶ່ງຂອງຊີວິດໃນໂລກ. ບໍ່ວ່າຈະເປັນດ້ວຍເຫດຜົນໃດກໍຕາມສຳລັບການຕໍ່ສູ້ດີ້ນລົງຂອງເຮົາ, ພຣະເຢຊູອ້ອນວອນເຮົາໃຫ້ມາຫາພຣະອົງ ເພື່ອວ່າພຣະອົງຈະຊ່ວຍເຮົາແບກຫາບພາລະໜັກໜ່ວງ ແລະ ພົບການບັນເທົາ (ເບິ່ງ ໂມໄຊຢາ 24 ນຳອີກ). ແອວເດີ ເດວິດ ເອ ແບ໊ດນາ ໄດ້ສິດສອນວ່າ, “ການເຮັດ ແລະ ການຮັກສາພັນທະສັນຍາສັກສິດໃຫ້ເຮົາເຂົ້າຮ່ວມ ແລະ ເປັນໜຶ່ງກັບອົງພຣະເຢຊູຄຣິດເຈົ້າ” (“Bear Up Their Burdens with Ease,” Liahona, May 2014, 88). ໃນການພິຈາລະນາສິ່ງນີ້, ໃຫ້ໄຕ່ຕອງຄຳຖາມທີ່ຄືກັນກັບດັ່ງຕໍ່ໄປນີ້ ເພື່ອຈະໄດ້ເຂົ້າໃຈພຣະຄຳຂອງພຣະຜູ້ຊ່ວຍໃຫ້ລອດຫລາຍຂຶ້ນ ໃນຂໍ້ເຫລົ່ານີ້: ພັນທະສັນຍາຂອງເຮົາ ໃຫ້ເຮົາເຂົ້າຮ່ວມ ແລະ ເປັນໜຶ່ງກັບພຣະຜູ້ຊ່ວຍໃຫ້ລອດໄດ້ແນວໃດ? ເຮົາຈະເຮັດຢ່າງໃດເພື່ອຈະໄດ້ມາຫາພຣະຄຣິດ? ໃນວິທີໃດແດ່ທີ່ແອກຂອງພຣະຜູ້ຊ່ວຍໃຫ້ລອດກໍພໍເໝາະ ແລະ ພາລະຂອງພຣະອົງກໍເບົາ?
ມີຄຳຖາມອື່ນອີກໃດແດ່ທີ່ທ່ານຄິດອອກຂະນະທີ່ທ່ານອ່ານ? ໃຫ້ຂຽນມັນໄວ້, ແລະ ຄົ້ນຫາຄຳຕອບໃນອາທິດນີ້ຢູ່ໃນພຣະຄຳພີ ແລະ ໃນຖ້ອຍຄຳຂອງສາດສະດາ. ທ່ານອາດພົບຄຳຕອບໃຫ້ກັບຄຳຖາມບາງຢ່າງຂອງທ່ານຢູ່ໃນຂ່າວສານຂອງແອວເດີ ເດວິດ ເອ ແບ໊ດນາ ທີ່ອ້າງເຖິງຢູ່ຂ້າງເທິງ.
ເບິ່ງ John A. McCune, “Come unto Christ—Living as Latter-day Saints,” Liahona, May 2020, 36–38; Lawrence E. Corbridge, “The Way,” Liahona, Nov. 2008, 34–36 ນຳອີກ.
The Disciples Eat Wheat on the Sabbath [ພວກສານຸສິດເດັດເອົາຮວງເຂົ້າມາເກັດກິນໃນວັນຊະບາໂຕ], ໂດຍ ເຈມສ໌ ທີໂຊ
“ເຮັດການດີໃນວັນຊະບາໂຕ.”
ຄຳສອນຂອງພວກຟາຣີຊາຍແຕກຕ່າງຈາກຂອງພຣະຜູ້ຊ່ວຍໃຫ້ລອດໃນຫລາຍວິທີທາງ, ໂດຍສະເພາະໃນວິທີການໃຫ້ກຽດແກ່ວັນຊະບາໂຕ. ຂະນະທີ່ທ່ານອ່ານ ມັດທາຍ 12:1–13, ທ່ານອາດພິຈາລະນາກ່ຽວກັບທັດສະນະຄະຕິ ແລະ ການກະທຳຂອງທ່ານໃນວັນຊະບາໂຕວ່າສອດຄ່ອງກັບຄຳສອນຂອງພຣະຜູ້ຊ່ວຍໃຫ້ລອດແນວໃດ. ໃນການເຮັດສິ່ງນີ້, ທ່ານສາມາດໄຕ່ຕອງຂໍ້ຄວາມທີ່ຄືກັນກັບດັ່ງຕໍ່ໄປນີ້:
-
“ເຮົາປະສົງຄວາມເມດຕາ, ແຕ່ບໍ່ແມ່ນເຄື່ອງບູຊາ” (ຂໍ້ທີ 7; ເບິ່ງ ໂຮເສອາ 6:6).
-
“ບຸດມະນຸດເປັນພຣະຜູ້ເປັນເຈົ້າຂອງວັນຊະບາໂຕ” (ຂໍ້ທີ 8).
-
“ຈົ່ງອະນຸຍາດໃຫ້ເຮັດການດີໃນວັນຊະບາໂຕ” (ຂໍ້ທີ 12).
ຄຳສອນເຫລົ່ານີ້ອາດເປັນອິດທິພົນໃຫ້ແກ່ວິທີທີ່ທ່ານເຂົ້າຫາວັນຊະບາໂຕແນວໃດ?
ເບິ່ງ ມາຣະໂກ 2:23–3:5; Gospel Topics, “Sabbath Day,” topics.ChurchofJesusChrist.org ນຳອີກ.
ມັດທາຍ 12:34–37; ລູກາ 11:33–44
ຄຳເວົ້າ ແລະ ການກະທຳຂອງເຮົາສະທ້ອນເຖິງສິ່ງທີ່ຢູ່ໃນໃຈເຮົາ.
ຄຳວິຈານຕົ້ນຕໍຢ່າງໜຶ່ງຂອງພຣະຜູ້ຊ່ວຍໃຫ້ລອດຕໍ່ພວກຟາຣີຊາຍແມ່ນ ພວກເຂົາພະຍາຍາມທຳຕົວວ່າຊອບທຳ ແຕ່ເຈດຕະນາຂອງພວກເຂົານັ້ນບໍ່ບໍລິສຸດ. ຂະນະທີ່ທ່ານສຶກສາຄຳເຕືອນຂອງພຣະຜູ້ຊ່ວຍໃຫ້ລອດຕໍ່ພວກຟາຣີຊາຍໃນ ມັດທາຍ 12:34–37 ແລະ ລູກາ 11:33–44, ໃຫ້ໄຕ່ຕອງຄວາມເຊື່ອມໂຍງລະຫວ່າງໃຈ ແລະ ການກະທຳຂອງເຮົາ. ວະລີທີ່ວ່າ “ຄັງແຫ່ງຄວາມດີ” ໝາຍຄວາມວ່າແນວໃດຕໍ່ທ່ານ? (ມັດທາຍ 12:35). ຖ້ອຍຄຳຂອງເຮົາຈະເຮັດໃຫ້ເຮົາພົ້ນໂທດ ຫລື ກ່າວໂທດເຮົາແນວໃດ? (ເບິ່ງ ມັດທາຍ 12:37). ຄຳວ່າ ຕາ “ແຈ້ງເປັນປົກກະຕິ” ໝາຍຄວາມວ່າແນວໃດຕໍ່ທ່ານ? (ລູກາ 11:34). ໃຫ້ໄຕ່ຕອງວິທີທີ່ທ່ານ “ເຕັມດ້ວຍຄວາມສະຫວ່າງ” (ລູກາ 11:36) ຜ່ານທາງອຳນາດຂອງພຣະຜູ້ຊ່ວຍໃຫ້ລອດ.
ເບິ່ງ ແອວມາ 12:12–14; ຄຳສອນ ແລະ ພັນທະສັນຍາ 88:67–68 ນຳອີກ.
ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ
-
ມັດທາຍ 11:28–30.ທ່ານສາມາດຊ່ວຍຄອບຄົວຂອງທ່ານໃຫ້ວາດພາບໃນໃຈເຖິງຄຳສອນຂອງພຣະຜູ້ຊ່ວຍໃຫ້ລອດໃນຂໍ້ເຫລົ່ານີ້ ໂດຍການໃຫ້ເຂົາເຈົ້າປ່ຽນຜຽນກັນລາກແກ່ສິ່ງຂອງທີ່ໜັກໆ, ທຳອິດໃຫ້ເຮັດຄົນດຽວ ແລະ ແລ້ວໃຫ້ຫລາຍຄົນຊ່ວຍ. ມີພາລະໜັກໜ່ວງຢ່າງໃດແດ່ທີ່ເຮົາແບກຫາບຢູ່? ຄຳວ່າ ຮັບເອົາແອກຂອງພຣະຄຣິດໄວ້ກັບເຮົາ ໝາຍຄວາມວ່າແນວໃດ? ຮູບພາບຢູ່ທ້າຍໂຄງຮ່າງນີ້ສາມາດຊ່ວຍທ່ານອະທິບາຍວ່າແອກຄືຫຍັງ.
-
ມັດທາຍ 12:10–13.ຂະນະທີ່ທ່ານອ່ານກ່ຽວກັບພຣະເຢຊູໄດ້ປິ່ນປົວຊາຍຄົນໜຶ່ງໃນວັນຊະບາໂຕ, ຄອບຄົວຂອງທ່ານສາມາດເວົ້າລົມກັນກ່ຽວກັບວິທີທີ່ເຮົາ “ດີເປັນປົກກະຕິ” ໂດຍພຣະຜູ້ຊ່ວຍໃຫ້ລອດ. ວັນຊະບາໂຕເປັນວັນທີ່ປິ່ນປົວສຳລັບເຮົາແນວໃດ?
ໂດຍທີ່ໄດ້ຮັບການດົນໃຈຈາກຕົວຢ່າງຂອງພຣະຜູ້ຊ່ວຍໃຫ້ລອດ ໃນຂໍ້ເຫລົ່ານີ້, ຄອບຄົວຂອງທ່ານສາມາດຂຽນວິທີທີ່ພວກທ່ານສາມາດ “ເຮັດການດີໃນວັນຊະບາໂຕ” ລົງໄວ້ (ຂໍ້ທີ 12). ໃຫ້ແນ່ໃຈວ່າໄດ້ລວມທັງໂອກາດທີ່ຈະຮັບໃຊ້ຄົນອື່ນ. ມັນອາດເປັນປະໂຫຍດທີ່ຈະເກັບສິ່ງທີ່ຂຽນໄວ້ເພື່ອອ້າງເຖິງໃນວັນອາທິດອື່ນໃນອະນາຄົດ.
-
ລູກາ 11:33–36.ໃຫ້ໄຕ່ຕອງວິທີທີ່ທ່ານຈະສິດສອນຄອບຄົວຂອງທ່ານກັບຄຳວ່າ “ເຕັມດ້ວຍຄວາມສະຫວ່າງ” ແນວໃດ (ຂໍ້ທີ 34, 36). ບົດຮຽນທີ່ໃຊ້ສິ່ງຂອງຈະຊ່ວຍໄດ້ບໍ? ພວກທ່ານກໍສາມາດສົນທະນາວິທີທີ່ຈະນຳຄວາມສະຫວ່າງຂອງພຣະຜູ້ຊ່ວຍໃຫ້ລອດມາສູ່ຊີວິດຂອງພວກທ່ານ, ບ້ານເຮືອນຂອງພວກທ່ານ, ແລະ ໂລກນີ້ນຳອີກ. ສຳລັບແນວຄິດ, ໃຫ້ເບິ່ງ ວິດີໂອ “The Light That Shineth in Darkness,” ChurchofJesusChrist.org.
4:16 -
ລູກາ 11:37–44.ບາງທີຄອບຄົວຂອງທ່ານສາມາດສົນທະນາຂໍ້ເຫລົ່ານີ້ ຂະນະທີ່ລ້າງຖ້ວຍນຳກັນ. ພວກທ່ານສາມາດເວົ້າລົມກັນກ່ຽວກັບວ່າ ເປັນຫຍັງມັນຈຶ່ງເປັນແນວຄິດທີ່ບໍ່ດີ ທີ່ຈະລ້າງພຽງແຕ່ຂ້າງນອກເທົ່ານັ້ນ ດັ່ງເຊັ່ນ ຖ້ວຍຊາມ ແລະ ຈອກ. ແລ້ວທ່ານສາມາດປຽບທຽບສິ່ງນີ້ໃສ່ກັບຄວາມຈຳເປັນທີ່ຈະເປັນຄົນຊອບທຳ ບໍ່ແມ່ນພຽງແຕ່ກັບການກະທຳພາຍນອກເທົ່ານັ້ນ ແຕ່ກັບຄວາມຄິດ ແລະ ຄວາມຮູ້ສຶກພາຍໃນນຳອີກ.
ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ this week’s outline ໃນ Come, Follow Me—For Primary.
ເພງແນະນຳ: “ສອນເຮົາຍ່າງໃນແສງ,” ເພງສວດ ແລະ ເພງຂອງເດັກນ້ອຍ, 72.
ການປັບປຸງການສຶກສາສ່ວນຕົວ
ໃຫ້ສະໝ່ຳສະເໝີ. ອາດມີບາງມື້ທີ່ການສຶກສາພຣະຄຳພີເບິ່ງຄືວ່າຫຍຸ້ງຍາກ ຫລື ມີຜົນກະທົບໜ້ອຍກວ່າທີ່ທ່ານຄາດຫວັງ. ຢ່າທໍ້ຖອຍໃຈ. ແອວເດີ ເດວິດ ເອ ແບ໊ດນາ ໄດ້ສິດສອນວ່າ, “ການກະທຳທີ່ເບິ່ງຄືວ່າເລັກໆນ້ອຍໆ ທີ່ສະໝ່ຳສະເໝີຂອງເຮົາ ກໍສາມາດນຳໄປສູ່ຜົນງານທີ່ສຳຄັນທີ່ສຸດທາງວິນຍານກໍໄດ້” (“More Diligent and Concerned at Home,” Liahona, Nov. 2009, 20).
“ຈົ່ງຮັບເອົາແອກຂອງເຮົາແບກໄວ້ ແລະ ຮຽນຮູ້ຈາກເຮົາ, ເພາະວ່າເຮົາມີໃຈສຸພາບ ແລະ ອ່ອນຫວານ: ແລະ ພວກທ່ານຈະໄດ້ພົບການພັກຜ່ອນ” (ມັດທາຍ 11:29). ຮູບພາບປະກອບ © iStockphoto.com/wbritten