“ວັນທີ 27 ເດືອນກຸມພາ–ວັນທີ 5 ເດືອນມີນາ. ມັດທາຍ 8; ມາຣະໂກ 2–4; ລູກາ 7: ‘ຄວາມເຊື່ອຂອງເຈົ້າໄດ້ເຮັດໃຫ້ເຈົ້າພົ້ນແລ້ວ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີໃໝ່ 2023 (2022)

“ວັນທີ 27 ເດືອນກຸມພາ–ວັນທີ 5 ເດືອນມີນາ. ມັດທາຍ 8; ມາຣະໂກ 2–4; ລູກາ 7,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2023

ຮູບພາບ

ພຣະເຢຊູກຳລັງຍົກຜູ້ຊາຍຂຶ້ນຈາກຕຽງ

ວັນທີ 27 ເດືອນກຸມພາ–ວັນທີ 5 ເດືອນມີນາ

ມັດທາຍ 8; ມາຣະໂກ 2–4; ລູກາ 7

“ຄວາມເຊື່ອຂອງເຈົ້າໄດ້ເຮັດໃຫ້ເຈົ້າພົ້ນແລ້ວ”

ຈົ່ງລະວັງຢ່າຮີບຮ້ອນເລື່ອງການສຶກສາພຣະຄຳພີຂອງທ່ານ. ໃຫ້ໃຊ້ເວລາໄຕ່ຕອງດ້ວຍການອະທິຖານ, ແມ່ນແຕ່ຖ້າໝາຍຄວາມວ່າ ທ່ານບໍ່ມີເວລາທີ່ຈະອ່ານທຸກໆຂໍ້ກໍຕາມ. ຊ່ວງເວລາເຫລົ່ານີ້ຂອງການໄຕ່ຕອງ ມັກຈະພາໄປສູ່ການເປີດເຜີຍສ່ວນຕົວ.

ບັນທຶກຄວາມປະທັບໃຈຂອງທ່ານ

ຂ່າວສານທີ່ແຈ່ມແຈ້ງທີ່ສຸດຢ່າງໜຶ່ງໃນພຣະຄຳພີໃໝ່ຄື ພຣະເຢຊູຄຣິດແມ່ນຜູ້ປິ່ນປົວ. ມີຫລາຍເລື່ອງກ່ຽວກັບພຣະຜູ້ຊ່ວຍໃຫ້ລອດປິ່ນປົວຄົນເຈັບປ່ວຍ ແລະ ຄົນເປັນທຸກ—ຈາກຍິງທີ່ເປັນໄຂ້ເຖິງລູກຊາຍຂອງແມ່ໝ້າຍທີ່ໄດ້ຕາຍໄປ. ເປັນຫຍັງຈຶ່ງເນັ້ນເລື່ອງການປິ່ນປົວທາງຮ່າງກາຍ? ມີຂ່າວສານຢ່າງໃດແດ່ສຳລັບເຮົາໃນການອັດສະຈັນເຫລົ່ານີ້? ແນ່ນອນ ຂ່າວສານຢ່າງໜຶ່ງທີ່ເຫັນໄດ້ຢ່າງແຈ້ງຊັດຄື ພຣະເຢຊູຄຣິດເປັນພຣະບຸດຂອງພຣະເຈົ້າ, ພ້ອມດ້ວຍອຳນາດເໜືອທຸກສິ່ງທັງປວງ, ລວມທັງຄວາມເຈັບປວດທາງຮ່າງກາຍ ແລະ ຄວາມບໍ່ດີພ້ອມຂອງເຮົາ. ແຕ່ຄວາມໝາຍຢ່າງໜຶ່ງແມ່ນພົບເຫັນຢູ່ໃນພຣະຄຳຂອງພຣະອົງ ທີ່ກ່າວກັບພວກທຳມະຈານທີ່ສົງໄສວ່າ: “ຢາກໃຫ້ພວກເຈົ້າເຫັນວ່າ ບຸດມະນຸດມີອຳນາດເທິງແຜ່ນດິນໂລກ ອະໄພຜິດບາບຂອງມະນຸດໄດ້” (ມາຣະໂກ 2:10). ສະນັ້ນເມື່ອທ່ານອ່ານກ່ຽວກັບຄົນຕາບອດ ຫລື ຄົນລ່ອຍໄດ້ຮັບການປິ່ນປົວ, ທ່ານອາດຄິດເຖິງການປິ່ນປົວ—ທັງທາງວິນຍານ ແລະ ທາງຮ່າງກາຍ—ທີ່ທ່ານສາມາດໄດ້ຮັບຈາກພຣະຜູ້ຊ່ວຍໃຫ້ລອດ ແລະ ໄດ້ຍິນພຣະອົງກ່າວກັບທ່ານວ່າ, “ຄວາມເຊື່ອຂອງເຈົ້າໄດ້ເຮັດໃຫ້ເຈົ້າພົ້ນແລ້ວ” (ລູກາ 7:50).

ຮູບພາບ

ຮູບເຄື່ອງໝາຍການສຶກສາສ່ວນຕົວ

ແນວຄິດສຳລັບການສຶກສາພຣະຄຳພີເປັນສ່ວນຕົວ

ມັດທາຍ 8; ມາຣະໂກ 2–3; ລູກາ 7

ພຣະຜູ້ຊ່ວຍໃຫ້ລອດສາມາດປິ່ນປົວຄວາມອ່ອນແອ ແລະ ຄວາມເຈັບປ່ວຍ.

ສອງສາມບົດເຫລົ່ານີ້ບັນທຶກການປິ່ນປົວທີ່ຫາຍດີທັນທີຢ່າງໜ້າອັດສະຈັນ ຊຶ່ງກະທຳໂດຍພຣະຜູ້ຊ່ວຍໃຫ້ລອດ. ຂະນະທີ່ທ່ານສຶກສາການປິ່ນປົວເຫລົ່ານີ້, ໃຫ້ຊອກຫາຂ່າວສານທີ່ເປັນໄປໄດ້ສຳລັບທ່ານ. ທ່ານອາດຖາມຕົວເອງວ່າ: ເລື່ອງນີ້ສິດສອນຢ່າງໃດແດ່ກ່ຽວກັບສັດທາໃນພຣະເຢຊູຄຣິດ? ເລື່ອງນີ້ສິດສອນຢ່າງໃດແດ່ກ່ຽວກັບພຣະຜູ້ຊ່ວຍໃຫ້ລອດ? ພຣະເຈົ້າປະສົງໃຫ້ເຮົາຮຽນຮູ້ຫຍັງແດ່ຈາກການອັດສະຈັນນີ້? ຕໍ່ໄປນີ້ແມ່ນບາງຕົວຢ່າງ, ແຕ່ກໍມີຕົວຢ່າງອື່ນໆຫລາຍຕື່ມອີກ:

ຊາຍທີ່ເປັນພະຍາດຂີ້ທູດ (ມັດທາຍ 8:1–4)
ຂ້ອຍໃຊ້ຂອງນາຍທະຫານ (ມັດທາຍ 8:5–13; ລູກາ 7:1–10)
ແມ່ເຖົ້າຂອງເປໂຕ (ມັດທາຍ 8:14–15)
ຊາຍທີ່ເປັນເປ້ຍ (ມາຣະໂກ 2:1–12)
ຊາຍມືລີບ (ມາຣະໂກ 3:1–5)
ລູກຊາຍແມ່ໝ້າຍແຫ່ງເມືອງນາອິນ (ລູກາ 7:11–16)

ເບິ່ງ David A. Bednar, “Accepting the Lord’s Will and Timing,” Liahona, Aug. 2016, 17–23; Neil L. Andersen, “Wounded,” Liahona, Nov. 2018, 83–86 ນຳອີກ.

ມາຣະໂກ 2:15–17; ລູກາ 7:36–50

ພຣະເຢຊູຄຣິດໄດ້ສະເດັດມາ ບໍ່ແມ່ນເພື່ອປະນາມຄົນບາບ ແຕ່ເພື່ອປິ່ນປົວພວກເຂົາ.

ຂະນະທີ່ອ່ານຂໍ້ເຫລົ່ານີ້ກ່ຽວກັບການປະຕິສຳພັນຂອງພຣະເຢຊູຄຣິດກັບພວກທຳມະຈານ ແລະ ພວກຟາຣີຊາຍ, ທ່ານອາດພິຈາລະນາຖ້າຫາກວ່າທ່ານເຫັນຕົວເອງຢູ່ໃນເລື່ອງລາວເຫລົ່ານີ້ຫລືບໍ່. ຍົກຕົວຢ່າງ, ຄວາມຄິດ ແລະ ການກະທຳຂອງທ່ານເປັນຄືຊີໂມນທີ່ເປັນຟາຣີຊາຍຫລືບໍ່? ທ່ານຈະອະທິບາຍຄວາມແຕກຕ່າງລະຫວ່າງວິທີທີ່ພຣະເຢຊູເຫັນຄົນບາບ ແລະ ວິທີທີ່ຟາຣີຊາຍເຊັ່ນຊີໂມນເຫັນພວກເຂົາແນວໃດ? ໃຫ້ພິຈາລະນາກ່ຽວກັບຜູ້ທີ່ໜັກໜ່ວງດ້ວຍຄວາມບາບ ອາດຮູ້ສຶກແນວໃດເມື່ອພວກເຂົາຢູ່ກັບພຣະຜູ້ຊ່ວຍໃຫ້ລອດ. ພວກເຂົາຈະຮູ້ສຶກແນວໃດເມື່ອພວກເຂົາຢູ່ກັບທ່ານ?

ທ່ານອາດໄຕ່ຕອງວ່າ ທ່ານອາດເປັນຄືກັນກັບຜູ້ຍິງທີ່ບັນຍາຍຢູ່ໃນ ລູກາ 7:36–50 ແນວໃດ. ທ່ານເຄີຍປະສົບກັບຄວາມອ່ອນນ້ອມ ແລະ ຄວາມເມດຕາທີ່ພຣະຜູ້ຊ່ວຍໃຫ້ລອດໄດ້ສະແດງຕໍ່ນາງເມື່ອໃດ? ທ່ານຮຽນຮູ້ຢ່າງໃດແດ່ຈາກຕົວຢ່າງແຫ່ງສັດທາ, ຄວາມຮັກ, ແລະ ຄວາມຖ່ອມຕົວຂອງນາງ?

ເບິ່ງ ໂຢຮັນ 3:17; ລູກາ 9:51–56; Dieter F. Uchtdorf, “The Gift of Grace,” Liahona, May 2015, 107–10 ນຳອີກ.

ມັດທາຍ 8:18–22; ມາຣະໂກ 3:31–35

ການເປັນສານຸສິດຂອງພຣະເຢຊູຄຣິດໝາຍຄວາມວ່າ ເຮົາໃຫ້ພຣະອົງມາກ່ອນໃນຊີວິດຂອງເຮົາ.

ໃນຂໍ້ເຫລົ່ານີ້, ພຣະເຢຊູໄດ້ສິດສອນວ່າ ການເປັນສານຸສິດຮຽກຮ້ອງເຮົາໃຫ້ພຣະອົງມາກ່ອນໃນຊີວິດຂອງເຮົາ, ແມ່ນແຕ່ຖ້າຫາກບາງຄັ້ງເຮົາຈະຕ້ອງເສຍສະລະສິ່ງອື່ນທີ່ເຮົາຖືວ່າມີຄ່າ. ຂະນະທີ່ທ່ານສຶກສາຂ່າວສານເຫລົ່ານີ້, ໃຫ້ໄຕ່ຕອງການເປັນສານຸສິດຂອງທ່ານເອງ. ເປັນຫຍັງສານຸສິດຈະຕ້ອງເຕັມໃຈທີ່ຈະໃຫ້ພຣະຜູ້ຊ່ວຍໃຫ້ລອດມາກ່ອນ? ທ່ານອາດຕ້ອງໄດ້ປະຖິ້ມຫຍັງແດ່ເພື່ອຈະໄດ້ໃຫ້ພຣະເຢຊູມາກ່ອນ? (ເບິ່ງ ລູກາ 9:57–62 ນຳອີກ.)

ມັດທາຍ 8:23–27; ມາຣະໂກ 4:35–41

ພຣະເຢຊູຄຣິດມີອຳນາດທີ່ຈະນຳຄວາມສະຫງົບມາໃຫ້ທ່າມກາງມໍລະສຸມຊີວິດ.

ທ່ານເຄີຍຮູ້ສຶກຄືກັນກັບສານຸສິດຂອງພຣະເຢຊູຮູ້ສຶກບໍ ໃນທະເລທີ່ເກີດພະຍຸ—ຫລຽວເບິ່ງຄື້ນນ້ຳທະເລຊັດເຂົ້າເຮືອ ແລະ ສົງໄສວ່າ, “ອາຈານເອີຍ, ທ່ານບໍ່ເປັນຫ່ວງພວກຂ້ານ້ອຍບໍ?”

ໃນ ມາຣະໂກ 4:35–41, ທ່ານຈະພົບເຫັນຄຳຖາມສີ່ຂໍ້. ໃຫ້ຂຽນແຕ່ລະຢ່າງລົງໄວ້, ແລະ ໄຕ່ຕອງສິ່ງທີ່ມັນສິດສອນທ່ານກ່ຽວກັບການປະເຊີນກັບການທ້າທາຍໃນຊີວິດດ້ວຍສັດທາໃນພຣະເຢຊູຄຣິດ. ພຣະຜູ້ຊ່ວຍໃຫ້ລອດຈະຊ່ວຍໃຫ້ມໍລະສຸມຊີວິດສະຫງົບລົງໄດ້ແນວໃດ?

ເບິ່ງ Lisa L. Harkness, “Peace, Be Still,” Liahona, Nov. 2020, 80–82 ນຳອີກ.

ຮູບພາບ

ພຣະເຢຊູຢູ່ໃນເຮືອກຳລັງຢຸດລົມພະຍຸ

From Fear to Faith [ຈາກຄວາມຢ້ານກົວສູ່ສັດທາ], ໂດຍ ຮາວເວີດ ລີອອນ

ຮູບພາບ

ຮູບເຄື່ອງໝາຍການສຶກສາເປັນຄອບຄົວ

ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ

ມັດທາຍ 8; ມາຣະໂກ 2–4; ລູກາ 7.ໃຫ້ຄິດທີ່ຈະຂຽນການອັດສະຈັນທີ່ບັນຍາຍຢູ່ໃນບົດເຫລົ່ານີ້ໄວ້. ພະຍາຍາມຊອກຫາ ຫລື ແຕ້ມຮູບຂອງບາງເລື່ອງ (ເບິ່ງ ປຶ້ມຮູບພາບພຣະກິດຕິຄຸນ ຫລື ChurchofJesusChrist.org). ສະມາຊິກໃນຄອບຄົວແຕ່ລະຄົນສາມາດໃຊ້ຮູບເພື່ອບອກກ່ຽວກັບການອັດສະຈັນຢ່າງໜຶ່ງ ແລະ ແບ່ງປັນສິ່ງທີ່ເຂົາເຈົ້າຮຽນຮູ້ຈາກເລື່ອງນັ້ນ. ທ່ານອາດແບ່ງປັນບາງຕົວຢ່າງເລື່ອງການອັດສະຈັນທີ່ທ່ານໄດ້ເຫັນ ຫລື ອ່ານກ່ຽວກັບມັນ ໃນວັນເວລາຂອງເຮົາ.

ເບິ່ງ ວິດີໂອ “Widow of Nain” ແລະ “Calming the Tempest” (ChurchofJesusChrist.org) ນຳອີກ.

ມັດທາຍ 8:5–13; ລູກາ 7:1–10.ສັດທາຂອງນາຍທະຫານເປັນຢ່າງໃດທີ່ປະທັບໃຈພຣະເຢຊູ? ເຮົາຈະສະແດງສັດທາໃນພຣະເຢຊູຄຣິດທີ່ຄ້າຍຄືກັນນັ້ນໄດ້ແນວໃດ?

ມາຣະໂກ 2:1–12.“ບົດທີ 23: ຊາຍທີ່ບໍ່ສາມາດຍ່າງ” (ໃນ ເລື່ອງພຣະຄຳພີໃໝ່, 57–58, ຫລື ວິດີໂອທີ່ກ່ຽວຂ້ອງໃນ ChurchofJesusChrist.org) ສາມາດຊ່ວຍຄອບຄົວຂອງທ່ານສົນທະນາ ມາຣະໂກ 2:1–12. (ເບິ່ງ ວິດີໂອ “Jesus Forgives Sins and Heals a Man Stricken with Palsy” ໃນ ChurchofJesusChrist.org.) ເຮົາຈະເປັນຄືກັນກັບເພື່ອນຂອງຊາຍທີ່ບໍ່ສາມາດຍ່າງນັ້ນໄດ້ແນວໃດ? ໃຜທີ່ເປັນເພື່ອນແບບນັ້ນກັບເຮົາ?

ມາຣະໂກ 4:35–41.ເລື່ອງນີ້ສາມາດຊ່ວຍສະມາຊິກໃນຄອບຄົວໄດ້ບໍ ເມື່ອເຂົາເຈົ້າຮູ້ສຶກຢ້ານກົວ? ບາງທີເຂົາເຈົ້າສາມາດອ່ານ ຂໍ້ທີ 39 ແລະ ແບ່ງປັນປະສົບການເມື່ອພຣະຜູ້ຊ່ວຍໃຫ້ລອດໄດ້ຊ່ວຍເຂົາເຈົ້າໃຫ້ຮູ້ສຶກສະຫງົບ.

ເດັກນ້ອຍອາດມັກທຳທ່າເປັນເຮືອຢູ່ໃນທະເລທີ່ເກີດພະຍຸ ຂະນະທີ່ບາງຄົນອ່ານ ມາຣະໂກ 4:35–38. ແລ້ວ, ເມື່ອບາງຄົນອ່ານ ຂໍ້ທີ 39, ເຂົາເຈົ້າສາມາດທຳທ່າເປັນເຮືອໃນທະເລທີ່ສະຫງົບ. ພວກທ່ານກໍສາມາດຮ້ອງເພງນຳກັນກ່ຽວກັບການຊອກຫາຄວາມສະຫງົບໃນພຣະຜູ້ຊ່ວຍໃຫ້ລອດນຳອີກ, ດັ່ງເຊັ່ນ “ພຣະຜູ້ໄຖ່ແຫ່ງອິດສະຣາເອນ” (ເພງສວດ ແລະ ເພງຂອງເດັກນ້ອຍ, 5). ວະລີໃດໃນເພງນີ້ທີ່ສິດສອນເຮົາກ່ຽວກັບຄວາມສະຫງົບທີ່ພຣະເຢຊູໄດ້ສະເໜີມອບໃຫ້?

ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ this week’s outline ໃນ Come, Follow Me—For Primary.

ເພງແນະນຳ: “ພຣະຜູ້ໄຖ່ແຫ່ງອິດສະຣາເອນ,” ເພງສວດ ແລະ ເພງຂອງເດັກນ້ອຍ, 5.

ການປັບປຸງການສິດສອນຂອງເຮົາ

ມີເວລາ ແລະ ສາມາດເຂົ້າຫາໄດ້. ບາງເທື່ອເວລາສິດສອນທີ່ດີທີ່ສຸດແມ່ນເລີ່ມຕົ້ນດ້ວຍຄຳຖາມ ຫລື ຄວາມເປັນຫ່ວງໃນໃຈຂອງສະມາຊິກໃນຄອບຄົວ. ໃຫ້ສະມາຊິກໃນຄອບຄົວຮູ້ຜ່ານທາງຄຳເວົ້າ ແລະ ການກະທຳຂອງທ່ານວ່າ ທ່ານພ້ອມທີ່ຈະຮັບຟັງເຂົາເຈົ້າ. (ເບິ່ງ Teaching in the Savior’s Way, 16.)