“ວັນທີ 20–26 ເດືອນກຸມພາ. ມັດທາຍ 6–7: ‘ພຣະອົງໄດ້ສິດສອນດ້ວຍລິດອຳນາດ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີໃໝ່ 2023 (2022)

“ວັນທີ 20–26 ເດືອນກຸມພາ. ມັດທາຍ 6–7,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2023

ຮູບພາບ

ພຣະເຢຊູກຳລັງສິດສອນຢູ່ແຄມທະເລ

Jesus Teaching the People by the Seashore [ພຣະເຢຊູກຳລັງສິດສອນຜູ້ຄົນຢູ່ແຄມທະເລ], ໂດຍ ເຈມສ໌ ທີໂຊ

ວັນທີ 20–26 ເດືອນກຸມພາ

ມັດທາຍ 6–7

“ພຣະອົງໄດ້ສິດສອນດ້ວຍລິດອຳນາດ”

ເມື່ອເຮົາອ່ານພຣະຄຳພີໂດຍມີຄຳຖາມຢູ່ໃນໃຈ ແລະ ດ້ວຍຄວາມປາດຖະໜາອັນແທ້ຈິງ ທີ່ຈະເຂົ້າໃຈສິ່ງທີ່ພຣະບິດາເທິງສະຫວັນປະສົງໃຫ້ເຮົາຮູ້ຈັກ, ແລ້ວເຮົາຈະເຊື້ອເຊີນພຣະວິນຍານບໍລິສຸດໃຫ້ດົນໃຈເຮົາ. ຂະນະທີ່ທ່ານອ່ານ ມັດທາຍ 6–7, ໃຫ້ເອົາໃຈໃສ່ຕໍ່ຄວາມປະທັບໃຈເຫລົ່ານີ້.

ບັນທຶກຄວາມປະທັບໃຈຂອງທ່ານ

ຄຳເທດສະໜາຢູ່ເທິງໂນນພູແມ່ນສຸນທອນພົດທີ່ຮູ້ຈັກກັນດີທີ່ສຸດໃນສາດສະໜາຄຣິດສະຕຽນ. ພຣະຜູ້ຊ່ວຍໃຫ້ລອດໄດ້ສິດສອນດ້ວຍພາບຢ່າງຫລາກຫລາຍ, ດັ່ງເຊັ່ນເມືອງທີ່ຕັ້ງຢູ່ເທິງໂນນພູ, ດອກໄມ້ປ່າ, ແລະ ໝາໄນປອມຕົວເປັນໂຕແກະ. ແຕ່ຄຳເທດສະໜາຢູ່ເທິງໂນນພູແມ່ນເດັ່ນກວ່າຄຳເວົ້າທີ່ສວຍງາມ. ພະລັງແຫ່ງຄຳສອນຂອງພຣະຜູ້ຊ່ວຍໃຫ້ລອດຕໍ່ສານຸສິດຂອງພຣະອົງ ສາມາດປ່ຽນຊີວິດຂອງເຮົາໄດ້, ໂດຍສະເພາະເມື່ອເຮົາດຳລົງຊີວິດຕາມນັ້ນ. ແລ້ວພຣະຄຳຂອງພຣະອົງຈະມີຄວາມໝາຍຫລາຍກວ່າຄຳເວົ້າ; ມັນຈະກາຍເປັນຮາກຖານທີ່ແນ່ນອນສຳລັບຊີວິດທີ່, ຄືກັນກັບເຮືອນຂອງຄົນສະຫລາດ, ສາມາດຕ້ານທານກັບຝົນຕົກຟ້າລົມຂອງໂລກໄດ້ (ເບິ່ງ ມັດທາຍ 7:24–25).

ຮູບພາບ

ຮູບເຄື່ອງໝາຍການສຶກສາສ່ວນຕົວ

ແນວຄິດສຳລັບການສຶກສາພຣະຄຳພີເປັນສ່ວນຕົວ

ມັດທາຍ 6–7

ການດຳລົງຊີວິດຕາມຄຳສອນຂອງພຣະຜູ້ຊ່ວຍໃຫ້ລອດ ສາມາດຊ່ວຍເຮົາໃຫ້ກາຍເປັນເໝືອນດັ່ງພຣະອົງໄດ້.

ຄຳເທດສະໜາຢູ່ເທິງໂນນພູບັນຈຸຫລັກທຳພຣະກິດຕິຄຸນຫລາຍຢ່າງ. ຂະນະທີ່ທ່ານສຶກສາບົດເຫລົ່ານີ້, ໃຫ້ທູນຖາມພຣະຜູ້ເປັນເຈົ້າວ່າ ພຣະອົງປະສົງໃຫ້ທ່ານຮຽນຮູ້ຫຍັງ.

ຫລັກທຳໜຶ່ງທີ່ທ່ານອາດພົບເຫັນແມ່ນ ຄວາມຈຳເປັນທີ່ຈະໃຫ້ສິ່ງທີ່ເປັນຂອງພຣະເຈົ້າມີຄວາມສຳຄັນຫລາຍກວ່າສິ່ງທີ່ເປັນຂອງໂລກ. ຄຳສອນຂອງພຣະຜູ້ຊ່ວຍໃຫ້ລອດຢ່າງໃດແດ່ໃນ ມັດທາຍ 6–7 ຊ່ວຍທ່ານໃຫ້ເອົາໃຈໃສ່ຕໍ່ສິ່ງທີ່ເປັນຝ່າຍສະຫວັນ? ທ່ານມີຄວາມຄິດ ຫລື ຄວາມປະທັບໃຈຢ່າງອື່ນອີກໃດແດ່? ທ່ານຖືກດົນໃຈໃຫ້ເຮັດຫຍັງ? ໃຫ້ຄິດທີ່ຈະບັນທຶກຄວາມປະທັບໃຈຂອງທ່ານໄວ້. ຍົກຕົວຢ່າງ:

ມັດທາຍ 6:1–4	ເຮົາຢາກສົນໃຈກັບສິ່ງທີ່ພຣະເຈົ້າຄິດກ່ຽວກັບເຮົາຫລາຍກວ່າສິ່ງທີ່ຄົນອື່ນຄິດ.

ຫລັກທຳອີກຢ່າງໜຶ່ງໃນ ມັດທາຍ 6–7 ແມ່ນການອະທິຖານ. ໃຫ້ໃຊ້ເວລາບຶດໜຶ່ງເພື່ອປະເມີນເບິ່ງການອະທິຖານຂອງທ່ານ. ທ່ານຮູ້ສຶກແນວໃດໃນຄວາມພະຍາຍາມຂອງທ່ານທີ່ຈະເຂົ້າໃກ້ພຣະເຈົ້າຫລາຍກວ່າເກົ່າ ຜ່ານທາງການອະທິຖານ? ຄຳສອນໃດແດ່ຢູ່ໃນ ມັດທາຍ 6–7 ດົນໃຈທ່ານໃຫ້ປັບປຸງວິທີທີ່ທ່ານອະທິຖານ? ບັນທຶກຄວາມປະທັບໃຈທີ່ທ່ານໄດ້ຮັບ. ຍົກຕົວຢ່າງ:

ມັດທາຍ 6:9	ເມື່ອເຮົາອະທິຖານ, ເຮົາຢາກກ່າວເຖິງພຣະນາມຂອງພຣະບິດາດ້ວຍຄວາມຄາລະວະ.
ມັດທາຍ 6:10	ເມື່ອເຮົາອະທິຖານ, ເຮົາສາມາດສະແດງຄວາມປາດຖະໜາຂອງເຮົາໃຫ້ເປັນໄປຕາມພຣະປະສົງຂອງພຣະຜູ້ເປັນເຈົ້າ.

ທ່ານອາດຄິດທີ່ຈະອ່ານຄຳເທດສະໜາຢູ່ເທິງໂນນພູອີກຄັ້ງ, ເພື່ອຊອກຫາຫລັກທຳຢ່າງອື່ນໆ ຫລື ຂ່າວສານທີ່ກ່ຽວຂ້ອງກັບທ່ານໂດຍສະເພາະ. ບັນທຶກສິ່ງທີ່ທ່ານພົບເຫັນ ໄວ້ໃນປຶ້ມບັນທຶກການສຶກສາ, ພ້ອມທັງແນວຄິດ ແລະ ຄວາມປະທັບໃຈຂອງທ່ານ.

ເຮົາສາມາດໃກ້ຊິດກັບພຣະເຈົ້າໄດ້ຜ່ານທາງການອະທິຖານ.

ມັດທາຍ 6:7

ການ “ເວົ້າຊ້ຳຄຳເກົ່າ” ໃນຄຳອະທິຖານ ໝາຍຄວາມວ່າແນວໃດ?

ສ່ວນຫລາຍຜູ້ຄົນຈະເຂົ້າໃຈວ່າ ການ “ເວົ້າຊ້ຳຄຳເກົ່າ” ຄືການເວົ້າຄຳເກົ່າເທື່ອແລ້ວເທື່ອອີກ. ເຖິງຢ່າງໃດກໍຕາມ, ຄຳວ່າ ເວົ້າຊ້ຳ ສາມາດແປຄວາມວ່າເປັນບາງສິ່ງທີ່ບໍ່ມີຄວາມໝາຍ. ການ “ເວົ້າຊ້ຳຄຳເກົ່າ” ໃນຄຳອະທິຖານ ສາມາດໝາຍເຖິງການອະທິຖານແບບບໍ່ຈິງໃຈ, ແບບບໍ່ມີຄວາມຮູ້ສຶກຈາກໃຈ (ເບິ່ງ ແອວມາ 31:12–23).

ມັດທາຍ 7:1–5

ເຮົາສາມາດຕັດສິນຢ່າງຊອບທຳ.

ໃນ ມັດທາຍ 7:1, ພຣະຜູ້ຊ່ວຍໃຫ້ລອດເບິ່ງຄືກ່າວວ່າ ເຮົາບໍ່ຄວນຕັດສິນ, ແຕ່ຢູ່ໃນພຣະຄຳພີອື່ນໆ (ລວມທັງຂໍ້ອື່ນໆຢູ່ໃນບົດນີ້), ພຣະອົງໄດ້ໃຫ້ຄຳແນະນຳເລື່ອງການຕັດສິນ. ຖ້າສິ່ງນັ້ນເຮັດໃຫ້ງົງງັນ, ການແປຂອງໂຈເຊັບ ສະມິດ ກ່ຽວກັບຂໍ້ນີ້ ອາດຊ່ວຍໄດ້: “ຢ່າຕັດສິນ ຢ່າງບໍ່ຊອບທຳ, ເພື່ອເຈົ້າຈະບໍ່ຖືກຕັດສິນ; ແຕ່ຈົ່ງຕັດສິນຢ່າງຊອບທຳ” (ໃນ ມັດທາຍ 7:1, ໝາຍເຫດຢູ່ທາງລຸ່ມໜ້າປຶ້ມ ກ). ທ່ານພົບເຫັນຫຍັງແດ່ຢູ່ໃນ ມັດທາຍ 7:1–5, ພ້ອມທັງສ່ວນທີ່ເຫລືອຂອງບົດນີ້, ທີ່ຊ່ວຍທ່ານໃຫ້ຮູ້ຈັກວິທີທີ່ຈະ “ຕັດສິນຢ່າງຊອບທຳ”?

ເບິ່ງ Gospel Topics, “Judging Others,” topics.ChurchofJesusChrist.org; Lynn G. Robbins, “The Righteous Judge,” Liahona, Nov. 2016, 96–98 ນຳອີກ.

ມັດທາຍ 7:21–23

ເຮົາມາຮູ້ຈັກພຣະເຢຊູຄຣິດໂດຍການເຮັດຕາມພຣະປະສົງຂອງພຣະອົງ.

ວະລີທີ່ວ່າ “ເຮົາບໍ່ເຄີຍຮູ້ພວກເຈົ້າ” ໃນ ມັດທາຍ 7:23 ຖືກປ່ຽນຢູ່ໃນການແປຂອງໂຈເຊັບ ສະມິດ ເປັນ “ພວກເຈົ້າບໍ່ເຄີຍຮູ້ເຮົາ” (ມັດທາຍ 7:23, ໝາຍເຫດຢູ່ທາງລຸ່ມໜ້າປຶ້ມ ກ). ການປ່ຽນນີ້ຊ່ວຍທ່ານໃຫ້ເຂົ້າໃຈຫລາຍຂຶ້ນໃນສິ່ງທີ່ພຣະຜູ້ເປັນເຈົ້າໄດ້ສິດສອນຢູ່ໃນຂໍ້ທີ 21–22 ກ່ຽວກັບການເຮັດຕາມພຣະປະສົງຂອງພຣະອົງແນວໃດ? ທ່ານຮູ້ສຶກວ່າ ທ່ານຮູ້ຈັກພຣະຜູ້ເປັນເຈົ້າຫລາຍປານໃດ? ທ່ານຈະເຮັດແນວໃດ ຈຶ່ງຈະໄດ້ຮູ້ຈັກພຣະອົງດີຂຶ້ນກວ່າເກົ່າ?

ເບິ່ງ David A. Bednar, “If Ye Had Known Me,” Liahona, Nov. 2016, 102–5 ນຳອີກ.

ມັດທາຍ 7:24–27

ການເຊື່ອຟັງຄຳສອນຂອງພຣະຜູ້ຊ່ວຍໃຫ້ລອດຈະສ້າງຮາກຖານທີ່ໝັ້ນຄົງໃຫ້ກັບຊີວິດຂອງເຮົາ.

ການດຳລົງຊີວິດຕາມພຣະກິດຕິຄຸນຈະບໍ່ຍົກຄວາມຍາກລຳບາກອອກໄປຈາກຊີວິດເຮົາ. ເຮືອນທັງສອງຫລັງຢູ່ໃນຄຳອຸປະມາຂອງພຣະຜູ້ຊ່ວຍໃຫ້ລອດໃນ ມັດທາຍ 7:24–27 ໄດ້ປະເຊີນກັບຝົນຕົກຟ້າລົມອັນດຽວກັນ. ແຕ່ເຮືອນຫລັງໜຶ່ງສາມາດຕ້ານທານກັບມັນໄດ້. ການດຳລົງຊີວິດຕາມຄຳສອນຂອງພຣະຜູ້ຊ່ວຍໃຫ້ລອດໄດ້ສ້າງຮາກຖານອັນແໜ້ນໜາໃຫ້ແກ່ທ່ານແນວໃດ? ທ່ານຮູ້ສຶກໄດ້ຮັບການດົນໃຈໃຫ້ເຮັດຫຍັງແດ່ ເພື່ອຈະໄດ້ສືບຕໍ່ສ້າງ “ເຮືອນ [ຂອງທ່ານ] ຢູ່ເທິງດານຫີນ”? (ເບິ່ງ ຂໍ້ທີ 24).

ເບິ່ງ ຮີລາມັນ 5:12 ນຳອີກ.

ຮູບພາບ

ຮູບເຄື່ອງໝາຍການສຶກສາເປັນຄອບຄົວ

ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ

ມັດທາຍ 6–7.ວິທີໜຶ່ງທີ່ຈະຮຽນຮູ້ຈາກ ມັດທາຍ 6–7 ເປັນຄອບຄົວ ແມ່ນການເບິ່ງວິດີໂອ “Sermon on the Mount: The Lord’s Prayer” ແລະ “Sermon on the Mount: Treasures in Heaven” (ChurchofJesusChrist.org). ສະມາຊິກໃນຄອບຄົວສາມາດອ່ານພຣະຄຳພີຕາມ ແລະ ຢຸດສາຍວິດີໂອ ເມື່ອໃດກໍຕາມທີ່ເຂົາເຈົ້າໄດ້ຍິນບາງສິ່ງທີ່ເຂົາເຈົ້າຢາກເອົາມາສົນທະນາ. ກິດຈະກຳນີ້ສາມາດເຮັດຕື່ມໄດ້ຫລາຍວັນ, ຖ້າຈຳເປັນ.

ມັດທາຍ 6:5–13.ເຮົາຮຽນຮູ້ຫຍັງແດ່ກ່ຽວກັບການອະທິຖານ ຈາກວິທີທີ່ພຣະຜູ້ຊ່ວຍໃຫ້ລອດໄດ້ອະທິຖານ? ເຮົາຈະໃຊ້ຄຳອະທິຖານຂອງພຣະອົງເປັນຕົວຢ່າງເພື່ອປັບປຸງການອະທິຖານເປັນສ່ວນຕົວ ແລະ ເປັນຄອບຄົວຂອງເຮົາໄດ້ແນວໃດ? (ເບິ່ງ ລູກາ 11:1–13 ນຳອີກ) ຖ້າຫາກທ່ານມີລູກທີ່ຍັງນ້ອຍ, ທ່ານອາດຢາກຝຶກການອະທິຖານນຳກັນ.

ມັດທາຍ 6:33.ຄຳວ່າ “ແຕ່ກ່ອນອື່ນໝົດ … ຈົ່ງສະແຫວງຫາອານາຈັກຂອງພຣະເຈົ້າ” ໝາຍຄວາມວ່າແນວໃດ? ເຮົາຈະເຮັດຢ່າງນີ້ເປັນສ່ວນຕົວ ແລະ ເປັນຄອບຄົວໄດ້ແນວໃດ?

ມັດທາຍ 7:1–5.ເພື່ອໃຫ້ເຫັນພາບຄຳສອນຢູ່ໃນຂໍ້ເຫລົ່ານີ້, ຄອບຄົວຂອງທ່ານສາມາດຊອກຫາຂີ້ເຫຍື້ອ (ສ້ຽນໄມ້) ແລະ ທ່ອນໄມ້ (ຕ່ອນໄມ້). ການປຽບທຽບທັງສອງໃສ່ກັນ ສິດສອນເຮົາຢ່າງໃດກ່ຽວກັບການຕັດສິນ? ຖ້າຫາກທ່ານຢາກຄົ້ນຄວ້າຫົວຂໍ້ນີ້ຕື່ມອີກ, ທ່ານສາມາດໃຊ້ແຫລ່ງຕ່າງໆຢູ່ໃນ “Judging Others” (Gospel Topics, topics.ChurchofJesusChrist.org).

ມັດທາຍ 7:24–27.ເພື່ອຊ່ວຍຄອບຄົວຂອງທ່ານໃຫ້ເຂົ້າໃຈຄຳອຸປະມາຂອງພຣະຜູ້ຊ່ວຍໃຫ້ລອດຫລາຍກວ່າເກົ່າ ກ່ຽວກັບຄົນສະຫລາດ ແລະ ຄົນໂງ່, ທ່ານສາມາດປ່ອຍໃຫ້ເຂົາເຈົ້າຖອກນ້ຳໃສ່ດິນຊາຍ ແລະ ແລ້ວໃຫ້ຖອກນ້ຳໃສ່ກ້ອນຫີນ. ເຮົາຈະສ້າງຮາກຖານທາງວິນຍານຂອງເຮົາໃສ່ເທິງດານຫີນໄດ້ແນວໃດ?

ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ this week’s outline ໃນ Come, Follow Me—For Primary.

ເພງແນະນຳ: “ກ້າເຮັດສິ່ງຖືກ,” ເພງສວດ ແລະ ເພງຂອງເດັກນ້ອຍ, 70.

ການປັບປຸງການສຶກສາສ່ວນຕົວ

ແບ່ງປັນຄວາມຮູ້. ໃຫ້ສົນທະນາຫລັກທຳທີ່ພວກທ່ານໄດ້ຮຽນຮູ້ຈາກການສຶກສາສ່ວນຕົວ ວ່າມັນບໍ່ໄດ້ເປັນພຽງວິທີທີ່ດີໃນການສິດສອນຄົນອື່ນ; ແຕ່ກໍຍັງຊ່ວຍເພີ່ມຄວາມເຂົ້າໃຈຂອງທ່ານເອງນຳອີກ. ພະຍາຍາມແບ່ງປັນຫລັກທຳທີ່ທ່ານໄດ້ຮຽນຮູ້ໃນອາທິດນີ້ກັບສະມາຊິກໃນຄອບຄົວ ຫລື ໃນຫ້ອງຮຽນຢູ່ໂບດຂອງທ່ານ.