“ວັນທີ 13–19 ເດືອນກຸມພາ. ມັດທາຍ 5; ລູກາ 6: ‘ພວກເຈົ້າກໍເປັນສຸກ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີໃໝ່ 2023 (2022)

“ວັນທີ 13–19 ເດືອນກຸມພາ. ມັດທາຍ 5; ລູກາ 6,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2023

Jesus Preaching Sermon on the Mount [ພຣະເຢຊູກຳລັງເທດສະໜາສັ່ງສອນຢູ່ເທິງໂນນພູ], ໂດຍ ກູດສະຕາບ ໂດເຣ

ວັນທີ 13–19 ເດືອນກຸມພາ

ມັດທາຍ 5; ລູກາ 6

“ພວກເຈົ້າກໍເປັນສຸກ”

ໃຫ້ເອົາໃຈໃສ່ຕໍ່ຄວາມປະທັບໃຈທີ່ທ່ານໄດ້ຮັບ ຂະນະທີ່ທ່ານອ່ານ ມັດທາຍ 5 ແລະ ລູກາ 6, ແລະ ບັນທຶກມັນໄວ້ໃນປຶ້ມບັນທຶກການສຶກສາ ຫລື ໃນທາງອື່ນ. ໂຄງຮ່າງນີ້ສາມາດຊ່ວຍທ່ານຊີ້ບອກຫລັກທຳສຳຄັນບາງຢ່າງຢູ່ໃນບົດເຫລົ່ານີ້, ແຕ່ໃຫ້ເປີດໃຈກັບບົດອື່ນໆ ທີ່ທ່ານພົບເຫັນຢູ່ໃນການສຶກສາຂອງທ່ານ.

ບັນທຶກຄວາມປະທັບໃຈຂອງທ່ານ

ເມື່ອມາເຖິງຈຸດນີ້ ໃນການປະຕິບັດສາດສະໜາກິດຂອງພຣະອົງ, ເຫັນໄດ້ຢ່າງແຈ່ມແຈ້ງວ່າ ຄຳສອນຂອງພຣະເຢຊູເປັນແບບທີ່ຜູ້ຄົນໃນວັນເວລາຂອງພຣະອົງບໍ່ເຄີຍໄດ້ຍິນ. ຄົນຍາກຈົນຈະໄດ້ຮັບອານາຈັກຂອງພຣະເຈົ້າ? ຜູ້ໃດມີໃຈອ່ອນຫວານຈະໄດ້ຮັບແຜ່ນດິນໂລກເປັນມໍລະດົກ? ຜູ້ໃດຖືກຂົ່ມເຫັງກໍຈະເປັນສຸກ? ພວກທຳມະຈານ ແລະ ພວກຟາຣີຊາຍບໍ່ໄດ້ສິດສອນຢ່າງນັ້ນ. ແຕ່ຜູ້ທີ່ເຂົ້າໃຈກົດຂອງພຣະເຈົ້າແທ້ໆ ໄດ້ຮັບຮູ້ຄວາມຈິງໃນພຣະຄຳຂອງພຣະຜູ້ຊ່ວຍໃຫ້ລອດ. “ຕາແທນຕາ” ແລະ “ຊັງສັດຕູ” ແມ່ນກົດທີ່ຕ່ຳກວ່າ (ມັດທາຍ 5:38, 43). ແຕ່ພຣະເຢຊູຄຣິດໄດ້ສະເດັດມາເພື່ອສິດສອນກົດທີ່ສູງກວ່າ (ເບິ່ງ 3 ນີໄຟ 15:2–10), ຖືກອອກແບບເພື່ອຊ່ວຍເຮົາໃຫ້ກາຍເປັນ “ຄົນດີທີ່ສຸດໃນວັນໜຶ່ງ, ເໝືອນຢ່າງພຣະບິດາ [ຂອງພວກເຮົາ] ຜູ້ສະຖິດຢູ່ໃນສະຫວັນເປັນຜູ້ດີທີ່ສຸດ” (ມັດທາຍ 5:48).

ແນວຄິດສຳລັບການສຶກສາພຣະຄຳພີເປັນສ່ວນຕົວ

ມັດທາຍ 5:1–12; ລູກາ 6:20–26, 46–49

ຄວາມສຸກທີ່ຍືນຍົງມາຈາກການດຳລົງຊີວິດໃນທາງທີ່ພຣະເຢຊູຄຣິດໄດ້ສິດສອນ.

ທຸກຄົນກໍຢາກມີຄວາມສຸກ, ແຕ່ບໍ່ແມ່ນທຸກຄົນທີ່ຊອກຫາຄວາມສຸກໃນບ່ອນດຽວກັນ. ບາງຄົນຊອກຫາມັນໃນອຳນາດ ແລະ ໃນຖານະຂອງໂລກ, ບາງຄົນຊອກຫາຄວາມລ້ຳລວຍ ຫລື ຄວາມເພິ່ງພໍໃຈກັບການສະໜອງຄວາມຕ້ອງການຂອງຮ່າງກາຍ. ພຣະເຢຊູຄຣິດໄດ້ສະເດັດມາເພື່ອສິດສອນວິທີທີ່ຈະເຮັດໃຫ້ຄວາມສຸກຍືນຍົງ, ເພື່ອສິດສອນວ່າ ການໄດ້ຮັບພອນນັ້ນໝາຍຄວາມວ່າແນວໃດແທ້ໆ. ທ່ານຮຽນຮູ້ຫຍັງແດ່ກ່ຽວກັບການມີຄວາມສຸກທີ່ຍືນຍົງຈາກ ມັດທາຍ 5:1–12 ແລະ ລູກາ 6:20–26? ສິ່ງນີ້ແຕກຕ່າງຈາກມຸມມອງຂອງຊາວໂລກເລື່ອງຄວາມສຸກແນວໃດ?

ຂໍ້ເຫລົ່ານີ້, ພ້ອມທັງ ລູກາ 6:46–49, ສິດສອນທ່ານຫຍັງແດ່ກ່ຽວກັບການເປັນສານຸສິດຂອງພຣະເຢຊູຄຣິດ? ທ່ານຮູ້ສຶກໄດ້ຮັບການດົນໃຈໃຫ້ເຮັດຫຍັງແດ່ ເພື່ອພັດທະນາຄຸນສົມບັດທີ່ບັນຍາຍຢູ່ໃນຂໍ້ເຫລົ່ານີ້?

ເບິ່ງ ຄູ່ມືພຣະຄຳພີ, “ຄຳບູລົມສຸກ,” scriptures.ChurchofJesusChrist.org; “Sermon on the Mount: The Beatitudes” (ວິດີໂອ), ChurchofJesusChrist.org ນຳອີກ.

2:12

ມັດທາຍ 5:13

“ເຈົ້າທັງຫລາຍເປັນເກືອສຳລັບມວນມະນຸດໂລກ.”

ເກືອໄດ້ຖືກໃຊ້ມາຢ່າງຍາວນານເພື່ອຮັກສາ, ໃຫ້ຣົດຊາດ, ແລະ ເຮັດໃຫ້ບໍລິສຸດ. ເກືອກໍຍັງມີຄວາມໝາຍທາງສາດສະໜາສຳລັບຊາວອິດສະຣາເອນນຳອີກ. ມັນກ່ຽວຂ້ອງກັບການຖວາຍສັດໃນສະໄໝບູຮານ ພາຍໃຕ້ກົດຂອງໂມເຊ (ເບິ່ງ ລະບຽບພວກເລວີ 2:13; ຈົດບັນຊີ 18:19). ເມື່ອເກືອເສື່ອມຄຸນນະພາບຂອງມັນ, ມັນຈະໃຊ້ການບໍ່ໄດ້, ຫລື “ບໍ່ມີຄ່າເສຍແລ້ວ” (ມັດທາຍ 5:13). ມັນໝົດຄ່າເມື່ອມັນຖືກປະສົມ ຫລື ປະປົນເຂົ້າກັບທາດສານຢ່າງອື່ນ.

ໃຫ້ຈື່ຈຳສິ່ງນີ້ໄວ້ໃນໃຈຂະນະທີ່ທ່ານໄຕ່ຕອງ ມັດທາຍ 5:13. ທ່ານຈະຮັກສາຄຸນນະພາບຂອງທ່ານໃນຖານະສານຸສິດຂອງພຣະເຢຊູຄຣິດໄດ້ແນວໃດ? ທ່ານຈະສຳເລັດການຖະໜອມ ແລະ ການເຮັດໃຫ້ວຽກງານຂອງທ່ານບໍລິສຸດ ຄືກັນກັບເກືອສຳລັບມວນມະນຸດໂລກແນວໃດ?

ເບິ່ງ ຄຳສອນ ແລະ ພັນທະສັນຍາ 103:9–10 ນຳອີກ.

“ເຈົ້າທັງຫລາຍເປັນເກືອສຳລັບມວນມະນຸດໂລກ” (ມັດທາຍ 5:13).

ມັດທາຍ 5:17–48; ລູກາ 6:27–35

ກົດຂອງພຣະຄຣິດແທນກົດຂອງໂມເຊ.

ພວກສານຸສິດອາດແປກໃຈເມື່ອໄດ້ຍິນພຣະເຢຊູກ່າວວ່າ ຄວາມຊອບທຳຂອງພວກເຂົາຕ້ອງເກີນກວ່າພວກທຳມະຈານ ແລະ ພວກຟາຣີຊາຍ (ເບິ່ງ ມັດທາຍ 5:20), ຜູ້ພູມໃຈກັບຕົວເອງເລື່ອງການທີ່ພວກເຂົາສາມາດຮັກສາກົດຂອງໂມເຊໄດ້ດີທີ່ສຸດ.

ຂະນະທີ່ທ່ານອ່ານ ມັດທາຍ 5:21–48 ແລະ ລູກາ 6:27–35, ໃຫ້ຄິດທີ່ຈະໝາຍທັງການປະພຶດທີ່ຖືກຮຽກຮ້ອງໃນກົດຂອງໂມເຊ (“ເຈົ້າທັງຫລາຍເຄີຍໄດ້ຍິນຄຳທີ່ກ່າວໄວ້ວ່າ …”) ແລະ ສິ່ງທີ່ພຣະເຢຊູໄດ້ສິດສອນເພື່ອຍົກລະດັບການປະພຶດເຫລົ່ານີ້. ທ່ານຄິດວ່າເປັນຫຍັງວິທີຂອງພຣະຜູ້ຊ່ວຍໃຫ້ລອດຈຶ່ງເປັນກົດທີ່ສູງກວ່າ?

ຍົກຕົວຢ່າງ, ພຣະເຢຊູສິດສອນຫຍັງແດ່ໃນ ມັດທາຍ 5:27–28 ກ່ຽວກັບໜ້າທີ່ຮັບຜິດຊອບຂອງເຮົາກັບຄວາມຄິດຂອງເຮົາ? ທ່ານຈະສາມາດຄວບຄຸມຄວາມຄິດ ແລະ ຄວາມຮູ້ສຶກຂອງຕົວເອງ ກັບສິ່ງທີ່ເຂົ້າມາສູ່ຈິດໃຈ ແລະ ຫົວໃຈຂອງທ່ານໄດ້ແນວໃດ? (ເບິ່ງ ຄຳສອນ ແລະ ພັນທະສັນຍາ 121:45).

ເບິ່ງ “Sermon on the Mount: The Higher Law” (ວິດີໂອ), ChurchofJesusChrist.org ນຳອີກ.

2:28

ມັດທາຍ 5:48

ພຣະບິດາເທິງສະຫວັນຄາດຫວັງໃຫ້ເຮົາເປັນຄົນດີພ້ອມແທ້ໆບໍ?

ປະທານຣະໂຊ ເອັມ ແນວສັນ ໄດ້ສິດສອນວ່າ:

“ຄຳວ່າ ດີພ້ອມ ຖືກແປຈາກພາສາກຣີກ teleios, ຊຶ່ງໝາຍຄວາມວ່າ ‘ບໍລິບູນ.’ … ຮູບແບບພື້ນຖານຂອງຄຳກິລິຍາຄື teleiono, ຊຶ່ງໝາຍຄວາມວ່າ ‘ໄປເຖິງທີ່ສຸດ, ພັດທະນາເຕັມທີ່, ສົມບູນ, ຫລື ສຳເລັດ.’ ຂໍໃຫ້ຮູ້ໄວ້ວ່າ ຄຳນີ້ບໍ່ໄດ້ໝາຍເຖິງການເປັນ ‘ອິດສະລະຈາກຄວາມຜິດພາດ’; ມັນໝາຍເຖິງ ‘ການບັນລຸເປົ້າໝາຍອັນຍາວໄກ.’ …

“… ພຣະຜູ້ເປັນເຈົ້າໄດ້ສິດສອນວ່າ, ‘ພວກເຈົ້າບໍ່ສາມາດທົນຢູ່ຕໍ່ໜ້າທີ່ປະທັບຂອງພຣະເຈົ້າໄດ້ໃນຕອນນີ້ … ; ດັ່ງນັ້ນ, ຈົ່ງດຳເນີນຕໍ່ໄປດ້ວຍຄວາມອົດທົນຈົນກວ່າພວກເຈົ້າຈະຖືກເຮັດໃຫ້ດີພ້ອມ’ [ຄຳສອນ ແລະ ພັນທະສັນຍາ 67:13].

“ເຮົາບໍ່ຈຳເປັນຕ້ອງທໍ້ຖອຍໃຈຖ້າຫາກຄວາມພະຍາຍາມຢ່າງພາກພຽນຂອງເຮົາ ເພື່ອໄປສູ່ຄວາມດີພ້ອມໃນເວລານີ້ ເບິ່ງຄືຍາກລຳບາກ ແລະ ບໍ່ມີທີ່ສິ້ນສຸດ. ຄວາມດີພ້ອມກຳລັງລໍຖ້າຢູ່. ມັນຈະສົມບູນພຽງແຕ່ເມື່ອຫລັງຈາກການຟື້ນຄືນພຣະຊົນ ແລະ ພຽງແຕ່ຜ່ານທາງພຣະຜູ້ເປັນເຈົ້າເທົ່ານັ້ນ. ມັນລໍຖ້າທຸກຄົນທີ່ຮັກພຣະອົງ ແລະ ຮັກສາພຣະບັນຍັດຂອງພຣະອົງ” (“Perfection Pending,” Ensign, Nov. 1995, 86, 88).

ເບິ່ງ 2 ເປໂຕ 1:3–11; ໂມໂຣໄນ 10:32–33; ຄຳສອນ ແລະ ພັນທະສັນຍາ 76:69; Jeffrey R. Holland, “Be Ye Therefore Perfect—Eventually,” Liahona, Nov. 2017, 40–42 ນຳອີກ.

ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ

ມັດທາຍ 5:1–9.ຫລັກທຳຢ່າງໃດແດ່ທີ່ສິດສອນໃນ ມັດທາຍ 5:1–9 ສາມາດຊ່ວຍບ້ານເຮືອນຂອງທ່ານໃຫ້ເປັນສະຖານທີ່ ທີ່ມີຄວາມສຸກຫລາຍກວ່າເກົ່າ? ທ່ານສາມາດເລືອກຢ່າງໜຶ່ງ ຫລື ສອງຢ່າງທີ່ເບິ່ງຄືວ່າ ສຳຄັນຕໍ່ຄອບຄົວຂອງທ່ານໂດຍສະເພາະ. ຍົກຕົວຢ່າງ, ຄຳສອນໃດແດ່ທີ່ເຮົາພົບເຫັນວ່າ ສາມາດຊ່ວຍເຮົາໃຫ້ເປັນຄົນມັກຄວາມສະຫງົບ? (ເບິ່ງ ມັດທາຍ 5:21–25, 38–44). ເຮົາສາມາດຕັ້ງເປົ້າໝາຍຢ່າງໃດແດ່? ເຮົາຈະຕິດຕາມເບິ່ງໄດ້ແນວໃດ?

ມັດທາຍ 5:13.ໃຫ້ກິນອາຫານຢ່າງດຽວນຳກັນ ຈານໜຶ່ງໃສ່ເກືອ ແລະ ອີກຈານໜຶ່ງບໍ່ໃສ່ເກືອ. ເຮົາຈະເຫັນຄວາມແຕກຕ່າງແນວໃດ? ການ “ເປັນເກືອສຳລັບມວນມະນຸດໂລກ” ໝາຍຄວາມວ່າແນວໃດ? ເຮົາຈະເຮັດສິ່ງນີ້ໄດ້ແນວໃດ?

ມັດທາຍ 5:14–16.ເພື່ອຊ່ວຍຄອບຄົວຂອງທ່ານໃຫ້ເຂົ້າໃຈຄວາມໝາຍທີ່ວ່າ “ແສງສະຫວ່າງສຳລັບໂລກນີ້,” ພວກທ່ານສາມາດຊອກຫາແຫລ່ງທີ່ໃຫ້ແສງສະຫວ່າງຢູ່ໃນເຮືອນຂອງພວກທ່ານ, ຢູ່ໃນຄຸ້ມບ້ານຂອງພວກທ່ານ, ແລະ ຢູ່ໃນໂລກ. ມັນອາດເປັນປະໂຫຍດທີ່ຈະສະແດງໃຫ້ເຫັນວ່າ ຈະມີຫຍັງເກີດຂຶ້ນຖ້າຫາກທ່ານເຊື່ອງແສງສະຫວ່າງໄວ້. ພຣະເຢຊູໝາຍຄວາມວ່າແນວໃດ ເມື່ອພຣະອົງກ່າວວ່າ, “ພວກເຈົ້າເປັນແສງສະຫວ່າງສຳລັບໂລກນີ້”? (ມັດທາຍ 5:14). ແມ່ນໃຜທີ່ເປັນຄືກັບກັນແສງສະຫວ່າງໃຫ້ກັບຄອບຄົວຂອງທ່ານ? ເຮົາຈະສາມາດເປັນແສງສະຫວ່າງໃຫ້ກັບຄົນອື່ນໄດ້ແນວໃດ? (ເບິ່ງ 3 ນີໄຟ 18:16, 24–25).

ມັດທາຍ 5:43–45.ຂະນະທີ່ຄອບຄົວຂອງທ່ານອ່ານພຣະຄຳຂອງພຣະຜູ້ຊ່ວຍໃຫ້ລອດໃນຂໍ້ເຫລົ່ານີ້, ທ່ານອາດເວົ້າກ່ຽວກັບຜູ້ທີ່, ໂດຍສະເພາະ, ຜູ້ທີ່ທ່ານຮູ້ສຶກສາມາດຮັກ, ເປັນພອນ, ແລະ ອະທິຖານເພື່ອໄດ້. ເຮົາຈະສາມາດເພີ່ມຄວາມຮັກຂອງເຮົາໃຫ້ເຂົາເຈົ້າໄດ້ແນວໃດ?

ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ this week’s outline ໃນ Come, Follow Me—For Primary.

ເພງແນະນຳ: “ສອນເຮົາຍ່າງໃນແສງ,” ເພງສວດ ແລະ ເພງຂອງເດັກນ້ອຍ, 72.

ການປັບປຸງການສິດສອນຂອງເຮົາ

ຊ່າງສັງເກດ. “ຖ້າຫາກທ່ານເອົາໃຈໃສ່ຕໍ່ສິ່ງທີ່ເກີດຂຶ້ນຢູ່ໃນຊີວິດ [ຂອງລູກໆ] ຂອງທ່ານ, ແລ້ວທ່ານຈະພົບເຫັນໂອກາດທີ່ດີເລີດ ທີ່ຈະສິດສອນ. … ຄວາມຄິດຄວາມເຫັນທີ່ [ພວກເຂົາ] ມີ ຫລື ຄຳຖາມທີ່ພວກເຂົາຖາມ ກໍສາມາດນຳໄປສູ່ຊ່ວງເວລາການສິດສອນໄດ້” (Teaching in the Savior’s Way, 16).

ທຽນໄຂ — “ພວກເຈົ້າເປັນແສງສະຫວ່າງສຳລັບໂລກນີ້” (ມັດທາຍ 5:14).