“ວັນທີ 30 ເດືອນມັງກອນ–ວັນທີ 5 ເດືອນກຸມພາ. ມັດທາຍ 4; ລູກາ 4–5: ‘ພຣະວິນຍານຂອງພຣະຜູ້ເປັນເຈົ້າຊົງສະຖິດຢູ່ເທິງຂ້ານ້ອຍ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີໃໝ່ 2023 (2022)

“ວັນທີ 30 ເດືອນມັງກອນ–ວັນທີ 5 ເດືອນກຸມພາ. ມັດທາຍ 4; ລູກາ 4–5,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2023

ຮູບພາບ

ພຣະເຢຊູກຳລັງຢືນຢູ່ໃນຖິ່ນແຫ້ງແລ້ງກັນດານ

Into the Wilderness [ເຂົ້າໄປໃນຖິ່ນແຫ້ງແລ້ງກັນດານ], ໂດຍ ອີວາ ໂຄເລວາ ທິມະຕີ

ວັນທີ 30 ເດືອນມັງກອນ–ວັນທີ 5 ກຸມພາ

ມັດທາຍ 4; ລູກາ 4–5

“ພຣະວິນຍານຂອງພຣະຜູ້ເປັນເຈົ້າຊົງສະຖິດຢູ່ເທິງຂ້ານ້ອຍ”

ພຣະຜູ້ຊ່ວຍໃຫ້ລອດໄດ້ໃຊ້ພຣະຄຳພີເພື່ອຕໍ່ຕ້ານກັບການລໍ້ລວງຂອງຊາຕານ ແລະ ເພື່ອເປັນພະຍານເຖິງພາລະກິດແຫ່ງສະຫວັນຂອງພຣະອົງເອງ (ເບິ່ງ ລູກາ 4:1–21). ໃຫ້ໄຕ່ຕອງວິທີທີ່ພຣະຄຳພີສາມາດສ້າງສັດທາຂອງທ່ານ ແລະ ແກ້ໄຂບັນຫາຂອງທ່ານໃນການຕໍ່ຕ້ານກັບການລໍ້ລວງແນວໃດ.

ບັນທຶກຄວາມປະທັບໃຈຂອງທ່ານ

ຈາກໄວເຍົາຂອງພຣະອົງ, ພຣະເຢຊູເບິ່ງຄືຮູ້ວ່າ ພຣະອົງມີພາລະກິດທີ່ພິເສດ ແລະ ສັກສິດ. ແຕ່ຂະນະທີ່ພຣະເຢຊູກະກຽມທີ່ຈະເລີ່ມຕົ້ນການປະຕິບັດສາດສະໜາກິດຢູ່ເທິງໂລກ, ຜູ້ປໍລະປັກໄດ້ວາງແຜນເອົາຄວາມສົງໄສໃສ່ໄວ້ໃນຈິດໃຈຂອງພຣະຜູ້ຊ່ວຍໃຫ້ລອດ. “ຖ້າ ທ່ານເປັນພຣະບຸດຂອງພຣະເຈົ້າ,” ຊາຕານກ່າວ (ລູກາ 4:3, ເນັ້ນຄຳເນີ້ງ). ແຕ່ພຣະຜູ້ຊ່ວຍໃຫ້ລອດໄດ້ສົນທະນາກັບພຣະບິດາຜູ້ສະຖິດຢູ່ໃນສະຫວັນຂອງພຣະອົງ. ພຣະອົງຮູ້ຈັກພຣະຄຳພີ, ແລະ ພຣະອົງຮູ້ວ່າພຣະອົງແມ່ນໃຜ. ຕໍ່ພຣະອົງ, ຄຳສະເໜີຂອງຊາຕານ—“ເຮົາຈະໃຫ້ອຳນາດທັງໝົດນີ້ແກ່ທ່ານ” (ລູກາ 4:6)—ແມ່ນຕື້ນໆ, ເພາະການກະກຽມຕະຫລອດພຣະຊົນຊີບຂອງພຣະຜູ້ຊ່ວຍໃຫ້ລອດ ໄດ້ເຮັດໃຫ້ພຣະອົງໄດ້ຮັບ “ລິດອຳນາດຂອງພຣະວິນຍານບໍລິສຸດ” (ລູກາ 4:14). ສະນັ້ນເຖິງແມ່ນຈະຖືກລໍ້ລວງ, ຖືກທົດລອງ, ແລະ ຖືກປະຕິເສດ, ພຣະເຢຊູຄຣິດກໍບໍ່ເຄີຍຫວັ່ນໄຫວຈາກວຽກງານທີ່ມອບໝາຍໃຫ້ພຣະອົງ: “ເຮົາຕ້ອງປະກາດຂ່າວປະເສີດ ເລື່ອງອານາຈັກຂອງພຣະເຈົ້າ … ທີ່ພຣະເຈົ້າຊົງໃຊ້ເຮົາມາ ກໍເພາະພາລະກິດນີ້ແຫລະ” (ລູກາ 4:43).

ຮູບພາບ

ຮູບເຄື່ອງໝາຍການສຶກສາສ່ວນຕົວ

ແນວຄິດສຳລັບການສຶກສາພຣະຄຳພີເປັນສ່ວນຕົວ

ມັດທາຍ 4:1–2

ການສົນທະນາກັບພຣະເຈົ້າກະກຽມເຮົາໃຫ້ຮັບໃຊ້ພຣະອົງ.

ເພື່ອກະກຽມສຳລັບພາລະກິດຂອງພຣະອົງ, ພຣະເຢຊູໄດ້ເຂົ້າໄປໃນຖິ່ນແຫ້ງແລ້ງກັນດານ “ເພື່ອໄປຢູ່ກັບພຣະເຈົ້າ” (ການແປຂອງໂຈເຊັບ ສະມິດ, ມັດທາຍ 4:1 [ໃນ ມັດທາຍ 4:1, ໝາຍເຫດຢູ່ທາງລຸ່ມໜ້າປຶ້ມ ຂ]). ໃຫ້ຄິດກ່ຽວກັບສິ່ງທີ່ທ່ານເຮັດເພື່ອຈະຮູ້ສຶກໃກ້ຊິດກັບພຣະເຈົ້າ. ສິ່ງນີ້ກະກຽມທ່ານສຳລັບວຽກງານທີ່ພຣະອົງປະສົງໃຫ້ທ່ານເຮັດແນວໃດ?

ມັດທາຍ 4:1–11; ລູກາ 4:1–13

ພຣະເຢຊູຄຣິດໄດ້ຕັ້ງຕົວຢ່າງໄວ້ໃຫ້ເຮົາໂດຍການຕໍ່ຕ້ານກັບການລໍ້ລວງ.

ບາງເທື່ອຜູ້ຄົນຮູ້ສຶກຜິດເມື່ອພວກເຂົາຖືກລໍ້ລວງໃຫ້ເຮັດບາບ. ແຕ່ເຖິງແມ່ນພຣະຜູ້ຊ່ວຍໃຫ້ລອດ, ຜູ້ໃຊ້ຊີວິດຢ່າງ “ບໍ່ມີບາບ” (ເຮັບເຣີ 4:15), ກໍຍັງຖືກລໍ້ລວງ. ພຣະເຢຊູຄຣິດຮູ້ຈັກເຖິງການລໍ້ລວງທີ່ເຮົາປະເຊີນ ແລະ ຮູ້ຈັກວິທີທີ່ຈະຊ່ວຍເຮົາໃຫ້ເອົາຊະນະມັນ (ເບິ່ງ ເຮັບເຣີ 2:18; ແອວມາ 7:11–12).

ຂະນະທີ່ທ່ານອ່ານ ມັດທາຍ 4:1–11 ແລະ ລູກາ 4:1–13, ທ່ານໄດ້ຮຽນຮູ້ຫຍັງແດ່ທີ່ສາມາດຊ່ວຍທ່ານ ເວລາທ່ານປະເຊີນກັບການລໍ້ລວງ? ທ່ານສາມາດຈັດລະບຽບຄວາມຄິດຂອງທ່ານ ໃນຕາຕະລາງຄືກັບອັນນີ້:

ພຣະເຢຊູຄຣິດ	ເຮົາ
ພຣະເຢຊູຄຣິດ ຊາຕານລໍ້ລວງໃຫ້ພຣະຄຣິດເຮັດຫຍັງ?	ເຮົາ ຊາຕານລໍ້ລວງໃຫ້ເຮົາເຮັດຫຍັງ?
ພຣະເຢຊູຄຣິດ ພຣະຄຣິດໄດ້ກະກຽມຫຍັງເພື່ອຕໍ່ຕ້ານກັບການລໍ້ລວງ?	ເຮົາ ເຮົາຈະກະກຽມເພື່ອຕໍ່ຕ້ານກັບການລໍ້ລວງໄດ້ແນວໃດ?
ພຣະເຢຊູຄຣິດ	ເຮົາ

ຄວາມຮູ້ເພີ່ມເຕີມຢ່າງໃດແດ່ທີ່ທ່ານໄດ້ຮັບຈາກ ການແປຂອງໂຈເຊັບ ສະມິດ ໃນ ມັດທາຍ 4? (ເບິ່ງ ໝາຍເຫດຢູ່ທາງລຸ່ມໜ້າປຶ້ມ ຕະຫລອດທົ່ວ ມັດທາຍ 4).

ເບິ່ງ 1 ໂກຣິນໂທ 10:13; ແອວມາ 13:28; ໂມເຊ 1:10–22; Gospel Topics, “Temptation,” topics.ChurchofJesusChrist.org ນຳອີກ.

ລູກາ 4:16–32

ພຣະເຢຊູຄຣິດຄືພຣະເມຊີອາທີ່ຖືກທຳນາຍໄວ້.

ຖ້າຫາກທ່ານຖືກຂໍໃຫ້ບັນຍາຍເຖິງສິ່ງທີ່ພຣະເຢຊູຄຣິດໄດ້ຖືກສົ່ງມາສູ່ໂລກໃຫ້ເຮັດ, ທ່ານຈະວ່າແນວໃດ? ໂດຍການກ່າວເຖິງຄຳທຳນາຍຂອງເອຊາຢາກ່ຽວກັບພຣະເມຊີອາ, ພຣະຜູ້ຊ່ວຍໃຫ້ລອດໄດ້ບັນຍາຍເຖິງພາກສ່ວນພາລະກິດຂອງພຣະອົງເອງ (ເບິ່ງ ລູກາ 4:18–19; ເອຊາຢາ 61:1–2). ທ່ານຮຽນຮູ້ຫຍັງແດ່ກ່ຽວກັບພາລະກິດຂອງພຣະອົງ ຂະນະທີ່ທ່ານອ່ານຂໍ້ເຫລົ່ານີ້?

ມີວິທີໃດແດ່ທີ່ພຣະຜູ້ຊ່ວຍໃຫ້ລອດເຊື້ອເຊີນທ່ານໃຫ້ມີພາກສ່ວນໃນວຽກງານຂອງພຣະອົງ?

ຮູບພາບ

ພຣະເຢຊູກຳລັງຢືນຢູ່ໃນທຳມະສາລາ

ເຖິງແມ່ນວ່າຊາວຢິວໄດ້ລໍຖ້າເປັນເວລາຫລາຍສັດຕະວັດ ເພື່ອໃຫ້ຄຳທຳນາຍຂອງເອຊາຢາສຳເລັດຄົບຖ້ວນ, ແຕ່ຫລາຍຄົນບໍ່ໄດ້ຮັບຮູ້ວ່າພຣະເຢຊູເປັນພຣະເມຊີອາ ເມື່ອພຣະອົງປະກາດວ່າ, “ພຣະທຳຕອນນີ້ໄດ້ເປັນຈິງໃນວັນນີ້ ຕາມທີ່ພວກເຈົ້າໄດ້ຍິນນັ້ນແຫລະ” (ລູກາ 4:21). ຂະນະທີ່ທ່ານອ່ານ ລູກາ 4:20–30 (ເບິ່ງ ມາຣະໂກ 6:1–6 ນຳອີກ), ໃຫ້ລອງຄິດວ່າຕົວທ່ານເອງເປັນຜູ້ໜຶ່ງໃນຜູ້ຄົນຂອງເມືອງນາຊາເຣັດ. ມີສິ່ງໃດບໍທີ່ອາດກີດກັນທ່ານຈາກການຮັບຮູ້ວ່າພຣະຄຣິດເປັນພຣະຜູ້ຊ່ວຍໃຫ້ລອດສ່ວນຕົວຂອງທ່ານ?

ເບິ່ງ ໂມໄຊຢາ 3:5–12; “Jesus Declares He Is the Messiah” (ວິດີໂອ), ChurchofJesusChrist.org ນຳອີກ.

ມັດທາຍ 4:18–22; ລູກາ 5:1–11

ຂະນະທີ່ເຮົາໄວ້ວາງໃຈໃນພຣະຜູ້ເປັນເຈົ້າ, ພຣະອົງຈະຊ່ວຍເຮົາເອື້ອມເຖິງສັກກະຍະພາບແຫ່ງສະຫວັນຂອງເຮົາ.

ປະທານເອຊະຣາ ແທັບ ເບັນສັນ ໄດ້ສິດສອນວ່າ, “ຊາຍ ແລະ ຍິງຜູ້ມອບຊີວິດໃຫ້ແກ່ພຣະເຈົ້າ ຈະພົບເຫັນວ່າ ພຣະອົງສາມາດພັດທະນາຊີວິດຂອງພວກເຂົາ ໄດ້ຫລາຍກວ່າທີ່ພວກເຂົາສາມາດເຮັດໄດ້” (Teachings of Presidents of the Church: Ezra Taft Benson [2014], 42). ໃຫ້ສັງເກດເບິ່ງວິທີນີ້ໄດ້ເກີດຂຶ້ນກັບຊີໂມນເປໂຕ ແລະ ກັບເພື່ອນຄົນຫາປາຄົນອື່ນໆແນວໃດ. ພຣະເຢຊູໄດ້ເຫັນບາງສິ່ງທີ່ຍິ່ງໃຫຍ່ໃນຕົວຂອງພວກເພິ່ນ ຫລາຍກວ່າທີ່ພວກເພິ່ນເຫັນຕົວເອງ. ພຣະອົງຢາກເຮັດໃຫ້ພວກເພິ່ນເປັນ “ຜູ້ຫາຄົນ” (ມັດທາຍ 4:19; ເບິ່ງ ລູກາ 5:10 ນຳອີກ).

ຂະນະທີ່ທ່ານອ່ານ ມັດທາຍ 4:18–22 ແລະ ລູກາ 5:1–11, ໃຫ້ໄຕ່ຕອງສິ່ງທີ່ພຣະເຢຊູຄຣິດກຳລັງຊ່ວຍທ່ານໃຫ້ກາຍເປັນ. ທ່ານຮູ້ສຶກວ່າພຣະອົງໄດ້ເຊື້ອເຊີນທ່ານໃຫ້ຕິດຕາມພຣະອົງແນວໃດ? ທ່ານຈະສາມາດສະແດງໃຫ້ພຣະຜູ້ເປັນເຈົ້າເຫັນວ່າ ທ່ານເຕັມໃຈທີ່ຈະປະຖິ້ມທຸກສິ່ງເພື່ອຕິດຕາມພຣະອົງໄດ້ແນວໃດ? (ເບິ່ງ ລູກາ 5:11).

ຮູບພາບ

ຮູບເຄື່ອງໝາຍການສຶກສາເປັນຄອບຄົວ

ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ

ມັດທາຍ 4:1–2; ລູກາ 4:1–2.ຄວາມຮູ້ໃດແດ່ທີ່ເຮົາສາມາດໄດ້ຮັບຈາກເລື່ອງນີ້ ກ່ຽວກັບພະລັງຂອງການຖືສິນອົດເຂົ້າ? ເພື່ອຊ່ວຍຄອບຄົວຂອງທ່ານໃຫ້ຮຽນຮູ້ກ່ຽວກັບການຖືສິນອົດເຂົ້າ, ທ່ານສາມາດໃຊ້ “Fasting and Fast Offerings” ໃນ Gospel Topics (topics.ChurchofJesusChrist.org). ສະມາຊິກໃນຄອບຄົວສາມາດແບ່ງປັນປະສົບການທີ່ເຂົາເຈົ້າມີ ໃນການຖືສິນອົດເຂົ້າ. ບາງທີພວກທ່ານສາມາດວາງແຜນດ້ວຍການອະທິຖານ ເພື່ອຖືສິນອົດເຂົ້ານຳກັນ ສຳລັບຈຸດປະສົງໃດໜຶ່ງໂດຍສະເພາະ.

ມັດທາຍ 4:3–4; ລູກາ 4:3–4.ເມື່ອຊາຕານໄດ້ລໍ້ລວງພຣະຄຣິດໃຫ້ປ່ຽນກ້ອນຫີນເປັນເຂົ້າຈີ່, ມັນໄດ້ທ້າທາຍເອກະລັກແຫ່ງສະຫວັນຂອງພຣະຄຣິດ ໂດຍການເວົ້າວ່າ, “ຖ້າ ທ່ານເປັນພຣະບຸດຂອງພຣະເຈົ້າ” (ມັດທາຍ 4:3, ເນັ້ນຄຳເນີ້ງ). ເປັນຫຍັງຊາຕານຈຶ່ງພະຍາຍາມເຮັດໃຫ້ເຮົາສົງໄສເອກະລັກແຫ່ງສະຫວັນຂອງເຮົາ—ແລະ ຂອງພຣະຜູ້ຊ່ວຍໃຫ້ລອດ? ມັນພະຍາຍາມເຮັດສິ່ງນີ້ໃນທາງໃດ? (ເບິ່ງ ໂມເຊ 1:10–23 ນຳອີກ.)

ການແປຂອງໂຈເຊັບ ສະມິດ, ມັດທາຍ 4:11.ຫລັງຈາກພຣະເຢຊູໄດ້ຖືກທົດລອງທາງຮ່າງກາຍ ແລະ ທາງວິນຍານແລ້ວ, ພຣະອົງໄດ້ຫັນຄວາມຄິດໄປຫາຄວາມຕ້ອງການຂອງໂຢຮັນບັບຕິສະໂຕ, ຜູ້ຢູ່ໃນຄຸກ ດັ່ງນີ້: “ແລະ ບັດນີ້ ພຣະເຢຊູໄດ້ຮູ້ວ່າ ໂຢຮັນຖືກສົ່ງເຂົ້າຄຸກ, ແລະ ພຣະອົງໄດ້ສົ່ງທູດໄປ, ແລະ, ຈົ່ງເບິ່ງ, ພວກເພິ່ນໄດ້ໄປ ແລະ ປະຕິບັດສາດສະໜາກິດແກ່ລາວ [ໂຢຮັນ]” (ການແປຂອງໂຈເຊັບ ສະມິດ, ມັດທາຍ 4:11 [ໃນ ມັດທາຍ 4:11, ໝາຍເຫດຢູ່ທາງລຸ່ມໜ້າປຶ້ມ ກ). ເຮົາໄດ້ຮັບພອນແນວໃດແດ່ ຂະນະທີ່ເຮົາເຮັດຕາມຕົວຢ່າງຂອງພຣະຄຣິດ ໃນການຄິດກ່ຽວກັບຄົນອື່ນ?

ລູກາ 4:16–21.ເຮົາຮູ້ຈັກໃຜບໍທີ່ຫົວໃຈຊອກຊ້ຳ ຫລື ຜູ້ທີ່ຕ້ອງການ “ປົດປ່ອຍໃຫ້ເປັນອິດສະລະ”? (ລູກາ 4:18). ເຮົາຈະສາມາດຊ່ວຍຄົນອື່ນໃຫ້ໄດ້ຮັບການປິ່ນປົວ ແລະ ການປົດປ່ອຍຈາກພຣະຜູ້ຊ່ວຍໃຫ້ລອດໄດ້ແນວໃດ? ພວກທ່ານກໍສາມາດສົນທະນາກ່ຽວກັບວິທີທີ່ການປະຕິບັດພິທີການໃນພຣະວິຫານ ຊ່ວຍ “ປົດປ່ອຍຜູ້ຖືກກົດຂີ່” ແນວໃດ (ລູກາ 4:18).

ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ this week’s outline ໃນ Come, Follow Me—For Primary.

ເພງແນະນຳ: “ມາເຖີດ, ທ່ານລູກຫລານພຣະເຈົ້າ,” ເພງສວດ ແລະ ເພງຂອງເດັກນ້ອຍ, 4.

ການປັບປຸງການສິດສອນຂອງເຮົາ

ດຳລົງຊີວິດຕາມພຣະກິດຕິຄຸນຂອງພຣະເຢຊູຄຣິດ. “ບາງທີ ສິ່ງທີ່ສຳຄັນທີ່ສຸດ ທີ່ທ່ານສາມາດເຮັດ [ໃນຖານະພໍ່ແມ່ ຫລື ຄູສອນ] ແມ່ນການ … ດຳລົງຊີວິດຕາມພຣະກິດຕິຄຸນ ດ້ວຍສຸດໃຈຂອງທ່ານ. … ນີ້ຄືວິທີທາງທີ່ສຳຄັນທີ່ສຸດ ທີ່ຈະເໝາະສົມກັບການເປັນເພື່ອນຂອງພຣະວິນຍານບໍລິສຸດ. ທ່ານບໍ່ຈຳເປັນຕ້ອງດີພ້ອມທຸກຢ່າງ, ພຽງແຕ່ໃຫ້ພະຍາຍາມດ້ວຍຄວາມພາກພຽນ—ແລະ ສະແຫວງຫາການໃຫ້ອະໄພ ຜ່ານທາງການຊົດໃຊ້ຂອງພຣະຜູ້ຊ່ວຍໃຫ້ລອດ ເມື່ອໃດກໍຕາມທີ່ທ່ານສະດຸດລົ້ມ” (Teaching in the Savior’s Way, 13).