“ວັນທີ 23–29 ເດືອນມັງກອນ. ມັດທາຍ 3; ມາຣະໂກ 1; ລູກາ 3: ‘ຈົ່ງຕຽມທາງຂອງພຣະຜູ້ເປັນເຈົ້າ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີໃໝ່ 2023 (2022)

“ວັນທີ 23–29 ເດືອນມັງກອນ. ມັດທາຍ 3; ມາຣະໂກ 1; ລູກາ 3,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2023

ຮູບພາບ

ໂຢຮັນບັບຕິສະໂຕໃຫ້ບັບຕິສະມາແກ່ພຣະເຢຊູ

ປ່ອງຢ້ຽມແຜ່ນແກ້ວສີໃນພຣະວິຫານນາວູ ອິລິນອຍ, ໂດຍ ທອມ ໂຮນແມນ

ວັນທີ 23–29 ເດືອນມັງກອນ

ມັດທາຍ 3; ມາຣະໂກ 1; ລູກາ 3

“ຈົ່ງຕຽມທາງຂອງພຣະຜູ້ເປັນເຈົ້າ”

ເລີ່ມຕົ້ນໂດຍການອ່ານ ມັດທາຍ 3; ມາຣະໂກ 1; ແລະ ລູກາ 3. ຂະນະທີ່ທ່ານອະທິຖານຂໍໃຫ້ພຣະວິນຍານບໍລິສຸດຊ່ວຍທ່ານໃຫ້ເຂົ້າໃຈບົດເຫລົ່ານີ້, ພຣະອົງຈະປະທານຄວາມຮູ້ທີ່ພິເສດສຳລັບທ່ານໂດຍສະເພາະໃຫ້ແກ່ທ່ານ. ບັນທຶກຄວາມປະທັບໃຈເຫລົ່ານີ້, ແລະ ວາງແຜນທີ່ຈະປະຕິບັດຕາມນັ້ນ.

ບັນທຶກຄວາມປະທັບໃຈຂອງທ່ານ

ພຣະເຢຊູຄຣິດ ແລະ ພຣະກິດຕິຄຸນຂອງພຣະອົງສາມາດປ່ຽນແປງທ່ານໄດ້. ລູກາໄດ້ອ້າງເຖິງຄຳທຳນາຍບູຮານຂອງເອຊາຢາທີ່ບັນຍາຍເຖິງຜົນກະທົບຂອງການສະເດັດມາຂອງພຣະຜູ້ຊ່ວຍໃຫ້ລອດ ດັ່ງນີ້: “ຫ່ອມພູທຸກບ່ອນຈະເຕັມ, ພູ ແລະ ໂນນພູທຸກໜ່ວຍຈະຖືກເຮັດໃຫ້ຕ່ຳລົງ; ຫົນທາງທີ່ຄົດລ້ຽວຈະຖືກເຮັດໃຫ້ຊື່, ແລະ ທາງທີ່ມີຕໍແຂງຈະຖືກເຮັດໃຫ້ກ້ຽງດີ” (ລູກາ 3:5; ເບິ່ງ ເອຊາຢາ 40:4 ນຳອີກ). ນີ້ແມ່ນຂ່າວສານສຳລັບເຮົາທຸກຄົນ, ລວມທັງຜູ້ທີ່ຄິດວ່າຕົວເອງບໍ່ສາມາດປ່ຽນ. ຖ້າຫາກບາງສິ່ງທີ່ໝັ້ນຄົງເຊັ່ນພູເຂົາຍັງຈະຖືກເຮັດໃຫ້ຕ່ຳລົງໄດ້, ແນ່ນອນ ພຣະຜູ້ເປັນເຈົ້າຈະສາມາດຊ່ວຍເຮົາເຮັດໃຫ້ຫົນທາງທີ່ຄົດລ້ຽວຂອງເຮົາຊື່ຕົງໄດ້ (ເບິ່ງ ລູກາ 3:4–5). ເມື່ອເຮົາຮັບເອົາຄຳເຊື້ອເຊີນຂອງໂຢຮັນບັບຕິສະໂຕໃຫ້ກັບໃຈ ແລະ ປ່ຽນແປງ, ເຮົາຈະກະກຽມຈິດໃຈ ແລະ ຫົວໃຈ ທີ່ຈະຮັບເອົາພຣະເຢຊູຄຣິດ ເພື່ອວ່າເຮົາຈະສາມາດ “ເຫັນການທີ່ພຣະເຈົ້າຊ່ວຍໃຫ້ [ລອດ] ໄດ້” (ລູກາ 3:6).

ຮູບພາບ

ຮູບເຄື່ອງໝາຍການສຶກສາສ່ວນຕົວ

ແນວຄິດສຳລັບການສຶກສາພຣະຄຳພີເປັນສ່ວນຕົວ

ມາຣະໂກແມ່ນໃຜ?

ໃນບັນດາຜູ້ຂຽນພຣະທຳທັງຫລາຍ, ເຮົາຮູ້ໜ້ອຍທີ່ສຸດກ່ຽວກັບມາຣະໂກ. ເຮົາຮູ້ວ່າເພິ່ນເປັນຄູ່ສອນສາດສະໜາຂອງໂປໂລ, ເປໂຕ, ແລະ ຜູ້ສອນສາດສະໜາຄົນອື່ນໆຫລາຍຄົນ. ນັກປາດອາຈານຝ່າຍສາດສະໜາຫລາຍຄົນເຊື່ອວ່າ ເປໂຕໄດ້ຊີ້ນຳມາຣະໂກໃຫ້ບັນທຶກເຫດການທີ່ເກີດຂຶ້ນໃນພຣະຊົນຊີບຂອງພຣະຜູ້ຊ່ວຍໃຫ້ລອດ. ພຣະທຳມາຣະໂກອາດໄດ້ຖືກຂຽນກ່ອນພຣະທຳອື່ນໆສາມເຫລັ້ມ.

ເບິ່ງ Bible Dictionary, “Mark” ນຳອີກ.

ມັດທາຍ 3:1–12; ມາຣະໂກ 1:1–8; ລູກາ 3:2–18

ການກັບໃຈຄືການປ່ຽນແປງອັນຍິ່ງໃຫຍ່ຂອງຈິດໃຈ ແລະ ຫົວໃຈ.

ພາລະກິດຂອງໂຢຮັນບັບຕິສະໂຕແມ່ນການຕຽມໃຈຂອງຜູ້ຄົນໃຫ້ຮັບເອົາພຣະຜູ້ຊ່ວຍໃຫ້ລອດ ແລະ ກາຍເປັນເໝືອນດັ່ງພຣະອົງຫລາຍຂຶ້ນ. ເພິ່ນເຮັດແນວນັ້ນໄດ້ແນວໃດ? ເພິ່ນໄດ້ປະກາດວ່າ, “ຈົ່ງປ່ຽນໃຈເກົ່າເອົາໃຈໃໝ່” (ມັດທາຍ 3:2). ແລະ ເພິ່ນໄດ້ໃຊ້ຮູບພາບດັ່ງເຊັ່ນ ໝາກໄມ້ ແລະ ເຂົ້າຫວີດ ເພື່ອສິດສອນກ່ຽວກັບການກັບໃຈ (ເບິ່ງ ລູກາ 3:9, 17).

ທ່ານພົບເຫັນຮູບພາບອື່ນອີກຢ່າງໃດແດ່ໃນເລື່ອງລາວຕ່າງໆເຖິງການປະຕິບັດສາດສະໜາກິດຂອງໂຢຮັນບັບຕິສະໂຕ? (ເບິ່ງ ມັດທາຍ 3:1–12; ມາຣະໂກ 1:1–8; ລູກາ 3:2–18). ໃຫ້ຄິດທີ່ຈະໝາຍມັນໄວ້ຢູ່ໃນພຣະຄຳພີຂອງທ່ານ ຫລື ແຕ້ມຮູບເຫລົ່ານັ້ນ. ຮູບພາບເຫລົ່ານີ້ສິດສອນຫຍັງແດ່ກ່ຽວກັບຄຳສອນ ແລະ ຄວາມຈຳເປັນທີ່ຈະກັບໃຈ?

ການກັບໃຈທີ່ແທ້ຈິງແມ່ນ “ການປ່ຽນຈິດໃຈ, ການມອງພຣະເຈົ້າ, ການມອງຕົວເອງ, ແລະ ການມອງໂລກໃນຮູບແບບໃໝ່. … [ມັນໝາຍເຖິງ] ການຫັນຫົວໃຈ ແລະ ຄວາມປະສົງມາຫາພຣະເຈົ້າ” (Bible Dictionary, “Repentance”). ໃນ ລູກາ 3:7–14, ການປ່ຽນແປງໃດແດ່ທີ່ໂຢຮັນໄດ້ເຊື້ອເຊີນຜູ້ຄົນໃຫ້ເຮັດ ເພື່ອຕຽມຮັບເອົາພຣະຄຣິດ? ຄຳແນະນຳນີ້ກ່ຽວຂ້ອງກັບທ່ານແນວໃດ? ທ່ານຈະສະແດງວ່າທ່ານໄດ້ກັບໃຈຢ່າງແທ້ຈິງແນວໃດ? (ເບິ່ງ ລູກາ 3:8).

ເບິ່ງ Russell M. Nelson, “We Can Do Better and Be Better,” Liahona, May 2019, 67–69; Dallin H. Oaks, “Cleansed by Repentance,” Liahona, May 2019, 91–94 ນຳອີກ.

ມັດທາຍ 3:7; ລູກາ 3:7

ພວກຟາຣີຊາຍ ແລະ ພວກຊາດູກາຍແມ່ນໃຜ?

ພວກຟາຣີຊາຍແມ່ນສະມາຊິກໃນກຸ່ມສາດສະໜາຂອງຊາວຢິວ ຜູ້ພູມໃຈກັບຕົວເອງທີ່ໄດ້ຮັກສາກົດຂອງໂມເຊ ແລະ ພິທີກຳຂອງມັນຢ່າງເຄັ່ງຄັດ. ພວກຊາດູກາຍເປັນຊົນຊັ້ນຊາວຢິວທີ່ລ້ຳລວຍ ພ້ອມທັງມີອິດທິພົນທາງສາດສະໜາ ແລະ ການເມືອງ; ພວກເຂົາບໍ່ເຊື່ອໃນຄຳສອນເລື່ອງການຟື້ນຄືນຊີວິດ. ທັງສອງກຸ່ມບໍ່ໄດ້ປະຕິບັດຕາມເຈດຕະນາດັ້ງເດີມໃນກົດຂອງພຣະເຈົ້າ.

ເບິ່ງ ມັດທາຍ 23:23–28; Bible Dictionary, “Pharisees,” “Sadducees” ນຳອີກ.

ມັດທາຍ 3:11, 13–17; ມາຣະໂກ 1:9–11; ລູກາ 3:15–16, 21–22

ພຣະເຢຊູຄຣິດໄດ້ຮັບບັບຕິສະມາເພື່ອ “ໃຫ້ສຳເລັດຕາມຄວາມຊອບທຳທຸກຢ່າງ.”

ເມື່ອທ່ານຮັບບັບຕິສະມາ, ທ່ານໄດ້ເຮັດຕາມຕົວຢ່າງຂອງພຣະຜູ້ຊ່ວຍໃຫ້ລອດ. ໃຫ້ປຽບທຽບສິ່ງທີ່ທ່ານຮຽນຮູ້ຈາກເລື່ອງລາວການບັບຕິສະມາຂອງພຣະຜູ້ຊ່ວຍໃຫ້ລອດ ກັບສິ່ງທີ່ໄດ້ເກີດຂຶ້ນລະຫວ່າງການບັບຕິສະມາຂອງທ່ານ.

ການບັບຕິສະມາຂອງພຣະຜູ້ຊ່ວຍໃຫ້ລອດ	ການບັບຕິສະມາຂອງເຮົາ
ການບັບຕິສະມາຂອງພຣະຜູ້ຊ່ວຍໃຫ້ລອດ ໃຜໃຫ້ບັບຕິສະມາແກ່ພຣະເຢຊູ, ແລະ ເພິ່ນດຳລົງສິດອຳນາດອັນໃດ?	ການບັບຕິສະມາຂອງເຮົາ ໃຜໃຫ້ບັບຕິສະມາແກ່ທ່ານ, ແລະ ເພິ່ນດຳລົງສິດອຳນາດອັນໃດ?
ການບັບຕິສະມາຂອງພຣະຜູ້ຊ່ວຍໃຫ້ລອດ ພຣະເຢຊູໄດ້ຮັບບັບຕິສະມາຢູ່ໃສ?	ການບັບຕິສະມາຂອງເຮົາ ທ່ານໄດ້ຮັບບັບຕິສະມາຢູ່ໃສ?
ການບັບຕິສະມາຂອງພຣະຜູ້ຊ່ວຍໃຫ້ລອດ ພຣະເຢຊູໄດ້ຮັບບັບຕິສະມາໃນແບບໃດ?	ການບັບຕິສະມາຂອງເຮົາ ທ່ານໄດ້ຮັບບັບຕິສະມາໃນແບບໃດ?
ການບັບຕິສະມາຂອງພຣະຜູ້ຊ່ວຍໃຫ້ລອດ ເປັນຫຍັງພຣະເຢຊູຈຶ່ງຮັບບັບຕິສະມາ?	ການບັບຕິສະມາຂອງເຮົາ ເປັນຫຍັງທ່ານຈຶ່ງຮັບບັບຕິສະມາ?
ການບັບຕິສະມາຂອງພຣະຜູ້ຊ່ວຍໃຫ້ລອດ ພຣະບິດາເທິງສະຫວັນໄດ້ສະແດງໃຫ້ເຫັນວ່າພຣະອົງພໍພຣະໄທກັບພຣະເຢຊູໃນແບບໃດ?	ການບັບຕິສະມາຂອງເຮົາ ພຣະບິດາເທິງສະຫວັນໄດ້ສະແດງໃຫ້ເຫັນວ່າພຣະອົງພໍພຣະໄທຕອນທ່ານຮັບບັບຕິສະມາໃນແບບໃດ? ພຣະອົງໄດ້ສະແດງໃຫ້ເຫັນເຖິງຄວາມເຫັນດີເຫັນຊອບຂອງພຣະອົງ ນັບແຕ່ນັ້ນມາໃນແບບໃດ?

ເບິ່ງ 2 ນີໄຟ 31; ໂມໄຊຢາ 18:8–11; ຄຳສອນ ແລະ ພັນທະສັນຍາ 20:37, 68–74; “The Baptism of Jesus” (ວິດີໂອ), ChurchofJesusChrist.org ນຳອີກ.

ມັດທາຍ 3:16–17; ມາຣະໂກ 1:9–11; ລູກາ 3:21–22

ສະມາຊິກໃນຝ່າຍພຣະເຈົ້າມີຢູ່ດ້ວຍກັນສາມພຣະອົງ.

ພຣະຄຣິສຕະທຳຄຳພີບັນຈຸຫລັກຖານໃນຫລາຍໆບ່ອນ ທີ່ບົ່ງບອກວ່າ ສະມາຊິກໃນຝ່າຍພຣະເຈົ້າມີຢູ່ດ້ວຍກັນສາມພຣະອົງ. ເລື່ອງລາວຂອງການບັບຕິສະມາຂອງພຣະຜູ້ຊ່ວຍໃຫ້ລອດ ກໍເປັນຕົວຢ່າງໜຶ່ງ. ຂະນະທີ່ທ່ານອ່ານເລື່ອງລາວເຫລົ່ານີ້, ໃຫ້ໄຕ່ຕອງສິ່ງທີ່ທ່ານຮຽນຮູ້ກ່ຽວກັບຝ່າຍພຣະເຈົ້າ. ເປັນຫຍັງຄຳສອນເຫລົ່ານີ້ຈຶ່ງສຳຄັນຕໍ່ທ່ານ?

ເບິ່ງ ປະຖົມມະການ 1:26; ມັດທາຍ 17:1–5; ໂຢຮັນ 17:1–3; ກິດຈະການ 7:55–56; ຄຳສອນ ແລະ ພັນທະສັນຍາ 130:22 ນຳອີກ.

ຮູບພາບ

ຮູບເຄື່ອງໝາຍການສຶກສາເປັນຄອບຄົວ

ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ

ມັດທາຍ 3.ໂຢຮັນບັບຕິສະໂຕດຳລົງຖານະປະໂລຫິດແຫ່ງອາໂຣນ. ເຮົາສາມາດຮຽນຮູ້ຫຍັງແດ່ຈາກຕົວຢ່າງຂອງໂຢຮັນກ່ຽວກັບຈຸດປະສົງຂອງຖານະປະໂລຫິດແຫ່ງອາໂຣນ? ພອນຢ່າງໃດແດ່ທີ່ເຮົາໄດ້ຮັບຍ້ອນຖານະປະໂລຫິດແຫ່ງອາໂຣນ? ຖ້າຫາກທ່ານມີຊາຍໜຸ່ມຢູ່ໃນຄອບຄົວຂອງທ່ານ, ທ່ານອາດຢາກໃຊ້ເວລາອະທິບາຍໃຫ້ລາວເຂົ້າໃຈເຖິງວິທີທີ່ລາວສາມາດໃຊ້ຖານະປະໂລຫິດແຫ່ງອາໂຣນເພື່ອເປັນພອນໃຫ້ແກ່ຄົນອື່ນ. (ເບິ່ງ ຄຳສອນ ແລະ ພັນທະສັນຍາ 13:1; 20:46–60 ນຳອີກ.)

ເມື່ອເຮົາຮັບບັບຕິສະມາ, ບາບຂອງເຮົາໄດ້ຖືກຊຳລະລ້າງ.

ມັດທາຍ 3:11–17; ມາຣະໂກ 1:9–11; ລູກາ 3:21–22.ສະມາຊິກໃນຄອບຄົວຂອງທ່ານເຄີຍເຫັນບາງຄົນຮັບບັບຕິສະມາ ຫລື ຮັບການຢືນຢັນເປັນສະມາຊິກຂອງສາດສະໜາຈັກບໍ? ສະມາຊິກໃນຄອບຄົວຮູ້ສຶກແນວໃດ? ບາງທີທ່ານສາມາດສິດສອນເຂົາເຈົ້າກ່ຽວກັບສັນຍາລັກຂອງການບັບຕິສະມາ ແລະ ການຢືນຢັນ. ການຮັບບັບຕິສະມາ ແລະ ການຮັບເອົາການຢືນຢັນຄືກັນກັບການເກີດໃໝ່ແນວໃດ? ເປັນຫຍັງເຮົາຈຶ່ງລົງໄປໃນນ້ຳໝົດທັງຕົວ ຕອນເຮົາຮັບບັບຕິສະມາ? ເປັນຫຍັງເຮົາຈຶ່ງນຸ່ງຊຸດຂາວຕອນເຮົາຮັບບັບຕິສະມາ? ເປັນຫຍັງຂອງປະທານແຫ່ງພຣະວິນຍານບໍລິສຸດຈຶ່ງຖືກບັນຍາຍວ່າເປັນ “ການບັບຕິສະມາດ້ວຍໄຟ”? (ຄຳສອນ ແລະ ພັນທະສັນຍາ 20:41; ເບິ່ງ Bible Dictionary, “Baptism,” “Holy Ghost” ນຳອີກ).

ມັດທາຍ 3:17; ມາຣະໂກ 1:11; ລູກາ 3:22.ເມື່ອໃດທີ່ເຮົາຮູ້ສຶກວ່າພຣະເຈົ້າພໍພຣະໄທກັບເຮົາ? ເຮົາຈະເຮັດຢ່າງໃດເປັນຄອບຄົວເພື່ອໃຫ້ພຣະເຈົ້າພໍພຣະໄທ?

ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ this week’s outline ໃນ Come, Follow Me—For Primary.

ເພງແນະນຳ: “ສອນເຮົາຍ່າງໃນແສງ,” ເພງສວດ ແລະ ເພງຂອງເດັກນ້ອຍ, 72.

ການປັບປຸງການສຶກສາສ່ວນຕົວ

ທູນຂໍໃຫ້ພຣະຜູ້ເປັນເຈົ້າຊ່ວຍເຫລືອ. ພຣະຄຳພີຖືກມອບໃຫ້ໂດຍການເປີດເຜີຍ, ແລະ ກ່ອນທີ່ເຮົາຈະເຂົ້າໃຈມັນແທ້ໆ ເຮົາຈຳເປັນຕ້ອງໄດ້ຮັບການເປີດເຜີຍເປັນສ່ວນຕົວ. ພຣະຜູ້ເປັນເຈົ້າໄດ້ສັນຍາວ່າ, “ຈົ່ງໝັ່ນຂໍແລ້ວເຈົ້າຈະໄດ້ຮັບ, ຈົ່ງໝັ່ນຊອກຫາແລ້ວເຈົ້າກໍຈະໄດ້ພົບ; ຈົ່ງໝັ່ນເຄາະແລ້ວຈະມີຜູ້ໄຂໃຫ້ເຈົ້າ” (ມັດທາຍ 7:7).