“ວັນທີ 2–8 ເດືອນມັງກອນ. ມັດທາຍ 1; ລູກາ 1: ‘ຂໍໃຫ້ເຫດການນີ້ເກີດກັບຂ້ານ້ອຍຕາມທີ່ທ່ານໄດ້ກ່າວນັ້ນເທີ້ນ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີໃໝ່ 2023 (2022)
“ວັນທີ 2–8 ເດືອນມັງກອນ. ມັດທາຍ 1; ລູກາ 1,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2023
ວັນທີ 2–8 ເດືອນມັງກອນ
ມັດທາຍ 1; ລູກາ 1
“ຂໍໃຫ້ເຫດການນີ້ເກີດກັບຂ້ານ້ອຍຕາມທີ່ທ່ານໄດ້ກ່າວນັ້ນເທີ້ນ”
ຂະນະທີ່ທ່ານອ່ານ ແລະ ໄຕ່ຕອງ ມັດທາຍ 1 ແລະ ລູກາ 1, ໃຫ້ບັນທຶກຄວາມປະທັບໃຈທາງວິນຍານທີ່ທ່ານໄດ້ຮັບ. ມີຄວາມຈິງໃດແດ່ໃນຄຳສອນທີ່ທ່ານພົບເຫັນ? ຂ່າວສານໃດແດ່ທີ່ມີຄ່າຫລາຍທີ່ສຸດຕໍ່ທ່ານ ແລະ ຄອບຄົວທ່ານ? ແນວຄິດສຶກສາໃນໂຄງຮ່າງນີ້ ອາດຊ່ວຍທ່ານໃຫ້ຄົ້ນພົບຄວາມຮູ້ເພີ່ມເຕີມໄດ້.
ບັນທຶກຄວາມປະທັບໃຈຂອງທ່ານ
ຈາກມຸມມອງຂອງມະນຸດ, ມັນເປັນໄປບໍ່ໄດ້. ຍິງສາວພົມມະຈັນຈະບໍ່ສາມາດຕັ້ງທ້ອງ—ທັງແມ່ໝັນຜູ້ອາຍຸແກ່ເກີນໄວກໍເປັນໄປບໍ່ໄດ້. ແຕ່ພຣະເຈົ້າໄດ້ມີແຜນໃນການກຳເນີດຂອງພຣະບຸດຂອງພຣະອົງ ແລະ ໂຢຮັນບັບຕິສະໂຕ, ເພື່ອວ່າທັງນາງມາຣີ ແລະ ນາງເອລີຊາເບັດ, ເຖິງແມ່ນເປັນໄປບໍ່ໄດ້ອີງຕາມຄວາມຮູ້ ແລະ ສະຕິປັນຍາຂອງມະນຸດ, ຈະໄດ້ກາຍເປັນແມ່. ມັນຈະຊ່ວຍໄດ້ຫລາຍທີ່ຈະຈື່ຈຳປະສົບການທີ່ອັດສະຈັນຂອງເຂົາເຈົ້າ ເມື່ອໃດກໍຕາມທີ່ເຮົາປະເຊີນກັບບາງສິ່ງທີ່ເບິ່ງຄືວ່າເປັນໄປບໍ່ໄດ້. ເຮົາຈະສາມາດເອົາຊະນະຄວາມອ່ອນແອຂອງເຮົາໄດ້ບໍ? ເຮົາຈະສາມາດສຳພັດຫົວໃຈຂອງສະມາຊິກໃນຄອບຄົວທີ່ບໍ່ຕອບຮັບໄດ້ບໍ? ໃຫ້ຄິດຄືກັບວ່າ ຄັບຣີເອນໄດ້ກ່າວກັບເຮົາ ເມື່ອເພິ່ນກ່າວເຕືອນນາງມາຣີວ່າ, “ບໍ່ມີສິ່ງໃດທີ່ພຣະເຈົ້າເຮັດບໍ່ໄດ້” (ລູກາ 1:37). ແລະ ຄຳຕອບຂອງນາງມາຣີກໍສາມາດເປັນຄຳຕອບຂອງເຮົາໄດ້ ເມື່ອພຣະເຈົ້າເປີດເຜີຍພຣະປະສົງຂອງພຣະອົງ ທີ່ວ່າ: “ຂໍໃຫ້ເຫດການນີ້ເກີດກັບຂ້ານ້ອຍຕາມທີ່ທ່ານໄດ້ກ່າວນັ້ນເທີ້ນ” (ລູກາ 1:38).
ແນວຄິດສຳລັບການສຶກສາພຣະຄຳພີເປັນສ່ວນຕົວ
ມັດທາຍ ແລະ ລູກາແມ່ນໃຜ?
ມັດທາຍເປັນຄົນຢິວທີ່ເກັບພາສີ, ຜູ້ຊຶ່ງພຣະເຢຊູໄດ້ເອີ້ນໃຫ້ເປັນອັກຄະສາວົກຄົນໜຶ່ງຂອງພຣະອົງ (ເບິ່ງ ມັດທາຍ 10:3; ເບິ່ງ Bible Dictionary, “Publicans” ນຳອີກ). ມັດທາຍໄດ້ຂຽນພຣະທຳຂອງເພິ່ນ ສ່ວນຫລາຍແມ່ນສຳລັບເພື່ອນຊາວຢິວດ້ວຍກັນ; ດັ່ງນັ້ນ, ເພິ່ນຈຶ່ງໄດ້ເລືອກທີ່ຈະເນັ້ນເຖິງຄຳທຳນາຍໃນພຣະຄຳພີເດີມ ກ່ຽວກັບພຣະເມຊີອາ ທີ່ໄດ້ສຳເລັດຜ່ານທາງພຣະຊົນຊີບ ແລະ ການປະຕິບັດສາດສະໜາກິດຂອງພຣະເຢຊູຄຣິດ.
ລູກາແມ່ນຄົນຕ່າງຊາດ (ບໍ່ແມ່ນຊາວຢິວ) ເປັນໝໍທີ່ເດີນທາງໄປກັບອັກຄະສາວົກໂປໂລ. ເພິ່ນໄດ້ຂຽນພຣະທຳຂອງເພິ່ນຫລັງຈາກການສິ້ນພຣະຊົນຂອງພຣະຜູ້ຊ່ວຍໃຫ້ລອດ ສຳລັບຜູ້ທີ່ບໍ່ແມ່ນຊາວຢິວ. ເພິ່ນໄດ້ເປັນພະຍານເຖິງພຣະເຢຊູຄຣິດ ວ່າເປັນພຣະຜູ້ຊ່ວຍໃຫ້ລອດຂອງທັງຄົນຕ່າງຊາດ ແລະ ຊາວຢິວ. ເພິ່ນໄດ້ບັນທຶກການເປັນພະຍານດ້ວຍຕາກ່ຽວກັບເຫດການທີ່ໄດ້ເກີດຂຶ້ນໃນພຣະຊົນຊີບຂອງພຣະຜູ້ຊ່ວຍໃຫ້ລອດ, ແລະ ເພິ່ນໄດ້ລວມເລື່ອງລາວຕ່າງໆກ່ຽວກັບພວກຜູ້ຍິງຫລາຍກວ່າພຣະທຳເຫລັ້ມອື່ນໆ.
ເບິ່ງ Bible Dictionary, “Gospels,” “Matthew,” “Luke” ນຳອີກ.
ມັດທາຍ 1:18–25; ລູກາ 1:26–35
ພຣະເຢຊູຄຣິດໄດ້ມາກຳເນີດນຳມານດາທີ່ເປັນມະນຸດ ແລະ ມີພຣະບິດາທີ່ບໍ່ໄດ້ເປັນມະນຸດ.
ໃນ ມັດທາຍ 1:18–25 ແລະ ລູກາ 1:26–35, ໃຫ້ສັງເກດເບິ່ງວິທີທີ່ມັດທາຍ ແລະ ລູກາ ບັນຍາຍເຖິງການອັດສະຈັນຂອງການກຳເນີດຂອງພຣະເຢຊູ. ການບັນຍາຍຂອງພວກເພິ່ນໄດ້ເພີ່ມຄວາມເຂັ້ມແຂງໃຫ້ແກ່ສັດທາຂອງທ່ານໃນພຣະຜູ້ຊ່ວຍໃຫ້ລອດແນວໃດ? ເປັນຫຍັງມັນຈຶ່ງສຳຄັນຕໍ່ທ່ານທີ່ຈະຮູ້ວ່າພຣະເຢຊູເປັນທັງພຣະບຸດຂອງພຣະເຈົ້າ ແລະ ເປັນບຸດຂອງນາງມາຣີ?
ປະທານຣະໂຊ ເອັມ ແນວສັນ ໄດ້ອະທິບາຍວ່າ ການຊົດໃຊ້ຂອງພຣະເຢຊູຄຣິດ “ຮຽກຮ້ອງການເສຍສະລະສ່ວນຕົວຂອງຜູ້ທີ່ບໍ່ໄດ້ເປັນມະນຸດ ທີ່ບໍ່ຂຶ້ນກັບການທີ່ຕ້ອງຕາຍ. ແຕ່ພຣະອົງຈະຕ້ອງສິ້ນພຣະຊົນ ແລະ ຮັບເອົາພຣະກາຍຂອງພຣະອົງຄືນອີກຄັ້ງ. ພຣະຜູ້ຊ່ວຍໃຫ້ລອດເປັນພຽງຜູ້ດຽວທີ່ສາມາດສຳເລັດສິ່ງນີ້ໄດ້. ຈາກມານດາຂອງພຣະອົງ ພຣະອົງມີອຳນາດທີ່ຈະສິ້ນພຣະຊົນ. ຈາກພຣະບິດາຂອງພຣະອົງ ພຣະອົງມີອຳນາດທີ່ຈະເອົາຊະນະຄວາມຕາຍ” (“Constancy amid Change,” Ensign, Nov. 1993, 34).
ພອນຈາກພຣະເຈົ້າຈະມີມາຕາມເວລາຂອງພຣະອົງເອງ.
ຖ້າຫາກທ່ານພົບເຫັນຕົວເອງວ່າກຳລັງລໍຖ້າພອນ ຫລື ຖ້າຫາກມັນເບິ່ງຄືວ່າພຣະເຈົ້າບໍ່ໄດ້ຍິນຄຳອະທິຖານຂອງທ່ານ, ເລື່ອງລາວຂອງນາງເອລີຊາເບັດ ແລະ ຊາຂາຣີຢາ ສາມາດເຕືອນໃຈວ່າ ພຣະອົງບໍ່ເຄີຍລືມທ່ານ. ແອວເດີ ແຈັບຟະຣີ ອາ ຮໍແລນ ໄດ້ສັນຍາວ່າ: “ຂະນະທີ່ເຮົາອອກແຮງງານ ແລະ ທັງຄອຍຖ້າຄຳຕອບຕໍ່ຄຳຖາມບາງຢ່າງຂອງເຮົາ, ຂ້າພະເຈົ້າໃຫ້ຄຳສັນຍາຂອງອັກຄະສາວົກກັບທ່ານວ່າ ພຣະເຈົ້າໄດ້ຍິນ ແລະ ຈະຕອບ, ເຖິງແມ່ນວ່າມັນຈະບໍ່ເກີດຂຶ້ນຕາມເວລາ ຫລື ໃນວິທີທີ່ເຮົາຕ້ອງການກໍຕາມ. ແຕ່ຈະໄດ້ຮັບຄຳຕອບ ສະເໝີ ຕາມເວລາ ແລະ ວິທີທາງທີ່ພຣະບິດາທີ່ຮອບຮູ້ ແລະ ເຫັນອົກເຫັນໃຈຊົ່ວນິລັນດອນຄວນຕອບ” (“Waiting on the Lord,” Liahona, Nov. 2020, 115–16). ຊາຂາຣີຢາ ແລະ ນາງເອລີຊາເບັດຍັງຄົງຊື່ສັດເໝືອນເດີມແນວໃດ? (ເບິ່ງ ລູກາ 1:5–25, 57–80). ທ່ານພົບເຫັນຕົວເອງກຳລັງລໍຖ້າພອນຢູ່ບໍ? ທ່ານຮູ້ສຶກວ່າພຣະຜູ້ເປັນເຈົ້າຄາດໝາຍສິ່ງໃດຈາກທ່ານ ຂະນະທີ່ທ່ານລໍຖ້າ?
ຫລັງຈາກການລໍຄອຍຢ່າງຊື່ສັດເປັນເວລາດົນນານ, ນາງເອລີຊາເບັດ ແລະ ຊາຂາຣີຢາກໍໄດ້ຮັບພອນ ໂດຍການມີລູກຊາຍຄົນໜຶ່ງ.
ມັດທາຍ 1:18–25; ລູກາ 1:26–38
ຄົນທີ່ຊື່ສັດຈະຍອມເຮັດຕາມພຣະປະສົງຂອງພຣະເຈົ້າ.
ເໝືອນດັ່ງນາງມາຣີ, ບາງເທື່ອເຮົາກໍພົບເຫັນວ່າ ແຜນຂອງພຣະເຈົ້າສຳລັບຊີວິດເຮົາແມ່ນແຕກຕ່າງຫລາຍກັບສິ່ງທີ່ເຮົາໄດ້ວາງແຜນ. ທ່ານຮຽນຮູ້ຫຍັງແດ່ຈາກນາງມາຣີ ກ່ຽວກັບການຍອມຮັບພຣະປະສົງຂອງພຣະເຈົ້າ? ໃນຕາຕະລາງດັ່ງຕໍ່ໄປນີ້, ໃຫ້ຂຽນຖ້ອຍຄຳຂອງທູດ ແລະ ນາງມາຣີ (ເບິ່ງ ລູກາ 1:26–38), ພ້ອມດ້ວຍຂ່າວສານທີ່ທ່ານພົບເຫັນຢູ່ໃນຖ້ອຍຄຳຂອງເຂົາເຈົ້າ:
|
ຄຳເວົ້າຂອງທູດຕໍ່ນາງມາຣີ |
ຂ່າວສານສຳລັບເຮົາ |
|---|---|
ຄຳເວົ້າຂອງທູດຕໍ່ນາງມາຣີ “ພຣະຜູ້ເປັນເຈົ້າຊົງສະຖິດຢູ່ກັບເຈົ້າ” (ຂໍ້ທີ 28). | ຂ່າວສານສຳລັບເຮົາ ພຣະຜູ້ເປັນເຈົ້າຮູ້ເຖິງສະຖານະການ ແລະ ການດີ້ນລົນຂອງເຮົາ. |
ຄຳເວົ້າຂອງທູດຕໍ່ນາງມາຣີ
| ຂ່າວສານສຳລັບເຮົາ
|
ຄຳເວົ້າຂອງທູດຕໍ່ນາງມາຣີ
| ຂ່າວສານສຳລັບເຮົາ
|
|
ຄຳເວົ້າຂອງນາງມາຣີ |
ຂ່າວສານສຳລັບເຮົາ |
|---|---|
ຄຳເວົ້າຂອງນາງມາຣີ “ເຫດການນີ້ຈະເປັນໄປໄດ້ຢ່າງໃດ?” (ຂໍ້ທີ 34). | ຂ່າວສານສຳລັບເຮົາ ບໍ່ເປັນຫຍັງທີ່ຈະຖາມ ເພື່ອໃຫ້ເຂົ້າໃຈພຣະປະສົງຂອງພຣະເຈົ້າຫລາຍຂຶ້ນ. |
ຄຳເວົ້າຂອງນາງມາຣີ
| ຂ່າວສານສຳລັບເຮົາ
|
ຄຳເວົ້າຂອງນາງມາຣີ
| ຂ່າວສານສຳລັບເຮົາ
|
ຂະນະທີ່ທ່ານອ່ານກ່ຽວກັບຕົວຢ່າງທີ່ຊອບທຳຂອງໂຢເຊັບໃນ ມັດທາຍ 1:18–25, ທ່ານຮຽນຮູ້ຫຍັງແດ່ກ່ຽວກັບການຍອມຮັບພຣະປະສົງຂອງພຣະເຈົ້າ? ຄວາມຮູ້ເພີ່ມເຕີມໃດແດ່ທີ່ທ່ານໄດ້ຮຽນຮູ້ຈາກປະສົບການຂອງຊາຂາຣີຢາ ແລະ ນາງເອລີຊາເບັດ? (ເບິ່ງ ລູກາ 1).
ເບິ່ງ ລູກາ 22:42; Bible Dictionary, “Gabriel” ນຳອີກ.
ນາງມາຣີໄດ້ເປັນພະຍານເຖິງພາລະກິດຂອງພຣະເຢຊູຄຣິດ.
ຖ້ອຍຄຳຂອງນາງມາຣີໃນ ລູກາ 1:46–55 ໄດ້ບອກລ່ວງໜ້າເຖິງພາລະກິດຂອງພຣະຜູ້ຊ່ວຍໃຫ້ລອດ. ທ່ານຮຽນຮູ້ຫຍັງແດ່ກ່ຽວກັບພຣະເຢຊູຄຣິດ ຈາກຖ້ອຍຄຳຂອງນາງມາຣີ? ທ່ານສາມາດປຽບທຽບຖ້ອຍຄຳເຫລົ່ານີ້ໃສ່ກັບຄຳເວົ້າຂອງນາງຮັນນາໃນ 1 ຊາມູເອນ 2:1–10 ແລະ ກັບຄຳບູລົມສຸກຂອງພຣະເຢຊູໃນ ມັດທາຍ 5:3–12. ພຣະວິນຍານສິດສອນທ່ານຫຍັງແດ່ ຂະນະທີ່ທ່ານໄຕ່ຕອງຂໍ້ເຫລົ່ານີ້?
ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ
-
ມັດທາຍ 1:1–17.ຂະນະທີ່ຄອບຄົວຂອງທ່ານອ່ານລຳດັບເຊື້ອສາຍຂອງພຣະເຢຊູ, ພວກທ່ານສາມາດສົນທະນາກ່ຽວກັບປະຫວັດຄອບຄົວຂອງພວກທ່ານເອງ ແລະ ເລົ່າເລື່ອງລາວກ່ຽວກັບບັນພະບຸລຸດຂອງພວກທ່ານ. ການຮູ້ຈັກກ່ຽວກັບປະຫວັດຄອບຄົວຂອງພວກທ່ານ ໄດ້ເປັນພອນໃຫ້ແກ່ຄອບຄົວຂອງພວກທ່ານແນວໃດ? ສຳລັບກິດຈະກຳສືບປະຫວັດຄອບຄົວເພີ່ມເຕີມ, ໃຫ້ເບິ່ງ FamilySearch.org/discovery.
-
ມັດທາຍ 1:20; ລູກາ 1:11–13, 30.ເປັນຫຍັງຜູ້ຄົນຢູ່ໃນຂໍ້ເຫລົ່ານີ້ຈຶ່ງມີຄວາມຢ້ານກົວ? ແມ່ນຫຍັງທີ່ເຮັດໃຫ້ເຮົາຮູ້ສຶກຢ້ານກົວ? ພຣະເຈົ້າໄດ້ເຊື້ອເຊີນເຮົາວ່າ “ຢ່າສູ່ຢ້ານ” ແນວໃດ?
-
ລູກາ 1:37.ເພື່ອຊ່ວຍຄອບຄົວຂອງທ່ານໃຫ້ສ້າງສັດທາວ່າ “ບໍ່ມີສິ່ງໃດທີ່ພຣະເຈົ້າເຮັດບໍ່ໄດ້,” ພວກທ່ານສາມາດຄົ້ນຄວ້າ ລູກາ 1 ນຳກັນ ແລະ ຊອກຫາສິ່ງທີ່ພຣະເຈົ້າໄດ້ກະທຳ ທີ່ຖືວ່າເປັນໄປບໍ່ໄດ້. ມີເລື່ອງລາວອື່ນອີກໃດແດ່ທີ່ເຮົາສາມາດແບ່ງປັນ—ຈາກພຣະຄຳພີ ຫລື ຈາກຊີວິດຂອງເຮົາເອງ—ຊຶ່ງໃນນັ້ນ ພຣະເຈົ້າໄດ້ກະທຳສິ່ງທີ່ເບິ່ງຄືວ່າເປັນໄປບໍ່ໄດ້? ການຄົ້ນຫາຢູ່ໃນ ປຶ້ມຮູບພາບພຣະກິດຕິຄຸນ ສາມາດໃຫ້ແນວຄິດໄດ້.
-
ລູກາ 1:46–55.ມີສິ່ງ “ຍິ່ງໃຫຍ່” ໃດແດ່ ທີ່ພຣະຜູ້ຊ່ວຍໃຫ້ລອດໄດ້ກະທຳເພື່ອເຮົາ? ຄຳວ່າ “ຈົ່ງສັນລະເສີນພຣະຜູ້ເປັນເຈົ້າ” ໝາຍຄວາມວ່າແນວໃດ?
ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ this week’s outline ໃນ Come, Follow Me—For Primary.
ເພງແນະນຳ: “ເຮົາຮ້ອງສັນເສີນນາມເຢຊູເຈົ້າ,” ເພງສວດ ແລະ ເພງຂອງເດັກນ້ອຍ, 27.
ການປັບປຸງການສິດສອນຂອງເຮົາ
ນຳໃຊ້ພຣະຄຳພີໃນຊີວິດຂອງທ່ານ. ຫລັງຈາກໄດ້ອ່ານຂໍ້ພຣະຄຳພີແລ້ວ, ໃຫ້ເຊື້ອເຊີນສະມາຊິກໃນຄອບຄົວໃຫ້ນຳໃຊ້ມັນໃນຊີວິດຂອງເຂົາເຈົ້າ (ເບິ່ງ Teaching in the Savior’s Way, 21). ຍົກຕົວຢ່າງ, ສະມາຊິກໃນຄອບຄົວຈະນຳໃຊ້ສິ່ງທີ່ເຂົາເຈົ້າຮຽນຮູ້ຈາກ ມັດທາຍ 1 ແລະ ລູກາ 1 ກ່ຽວກັບການຕອບຮັບການເອີ້ນຂອງພຣະຜູ້ເປັນເຈົ້າໄດ້ແນວໃດ?
Blessed Art Thou among Women [ສັນຕິສຸກຈົ່ງມີແກ່ເຈົ້າເທີ້ນ], ໂດຍ ວາວເຕີ ເຣນ