“ວັນທີ 16–22 ເດືອນມັງກອນ. ໂຢຮັນ 1: ພວກເຮົາໄດ້ພົບເຫັນພຣະເມຊີອາ,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີໃໝ່ 2023 (2022)

“ວັນທີ 16–22 ເດືອນມັງກອນ. ໂຢຮັນ 1,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2023

ຮູບພາບ

ຜູ້ຍິງກຳລັງແບ່ງປັນພຣະກິດຕິຄຸນຢູ່ໃນສະຖານີລົດໄຟ

ວັນທີ 16–22 ເດືອນມັງກອນ

ໂຢຮັນ 1

ພວກເຮົາໄດ້ພົບເຫັນພຣະເມຊີອາ

ຂະນະທີ່ທ່ານອ່ານ ແລະ ໄຕ່ຕອງ ໂຢຮັນ 1, ໃຫ້ບັນທຶກຄວາມປະທັບໃຈທີ່ທ່ານໄດ້ຮັບ. ມີຂ່າວສານໃດແດ່ທີ່ທ່ານພົບເຫັນວ່າຈະມີຄ່າຫລາຍທີ່ສຸດຕໍ່ທ່ານ ແລະ ຄອບຄົວຂອງທ່ານ? ທ່ານສາມາດແບ່ງປັນຫຍັງແດ່ຢູ່ໃນຫ້ອງຮຽນທີ່ໂບດ?

ບັນທຶກຄວາມປະທັບໃຈຂອງທ່ານ

ທ່ານເຄີຍສົງໄສບໍວ່າ ທ່ານຈະສາມາດຮັບຮູ້ພຣະເຢຊູແຫ່ງນາຊາເຣັດໄດ້ ວ່າເປັນພຣະບຸດຂອງພຣະເຈົ້າ ຖ້າຫາກທ່ານມີຊີວິດຢູ່ ລະຫວ່າງການປະຕິບັດສາດສະໜາກິດຢູ່ໃນໂລກຂອງພຣະອົງ? ເປັນເວລາຫລາຍປີ, ຊາວອິດສະຣາເອນທີ່ຊື່ສັດ, ລວມທັງ ອັນເດອາ, ເປໂຕ, ຟີລິບ, ແລະ ນະທານາເອັນ, ໄດ້ລໍຖ້າ ແລະ ອະທິຖານສຳລັບການສະເດັດມາຂອງພຣະເມຊີອາທີ່ສັນຍາໄວ້. ເມື່ອພວກເພິ່ນໄດ້ພົບກັບພຣະອົງ, ພວກເພິ່ນຮູ້ໄດ້ແນວໃດວ່າ ພຣະອົງຄືຜູ້ທີ່ພວກເພິ່ນໄດ້ຊອກຫາ? ໃນວິທີດຽວກັນກັບທີ່ເຮົາທຸກຄົນມາຮູ້ຈັກພຣະຜູ້ຊ່ວຍໃຫ້ລອດ—ໂດຍການຮັບເອົາຄຳເຊື້ອເຊີນທີ່ວ່າ “ເຊີນມາ ແລະ ເບິ່ງເອົາ” ດ້ວຍຕົວເອງ (ໂຢຮັນ 1:39). ເຮົາອ່ານກ່ຽວກັບພຣະອົງຢູ່ໃນພຣະຄຳພີ. ເຮົາໄດ້ຍິນຄຳສອນຂອງພຣະອົງ. ເຮົາດຳລົງຊີວິດຕາມວິທີຂອງພຣະອົງ. ເຮົາຮູ້ສຶກເຖິງພຣະວິນຍານຂອງພຣະອົງ. ຕາມເສັ້ນທາງ, ເຮົາຄົ້ນພົບ, ເໝືອນດັ່ງນະທານາເອັນໄດ້ຄົ້ນພົບ, ວ່າພຣະຜູ້ຊ່ວຍໃຫ້ລອດຮູ້ຈັກເຮົາ ແລະ ຮັກເຮົາ ແລະ ຢາກກະກຽມເຮົາໃຫ້ຮັບເອົາ “ເຫດການອັນຍິ່ງໃຫຍ່ກວ່ານີ້” (ໂຢຮັນ 1:50).

ຮູບພາບ

ຮູບເຄື່ອງໝາຍການສຶກສາສ່ວນຕົວ

ແນວຄິດສຳລັບການສຶກສາພຣະຄຳພີເປັນສ່ວນຕົວ

ໂຢຮັນແມ່ນໃຜ?

ໂຢຮັນແມ່ນສາວົກຄົນໜຶ່ງຂອງໂຢຮັນບັບຕິສະໂຕ ແລະ ຕໍ່ມາໄດ້ກາຍເປັນຜູ້ຕິດຕາມຄົນທຳອິດຂອງພຣະເຢຊູຄຣິດ ແລະ ເປັນຄົນໜຶ່ງໃນອັກຄະສາວົກສິບສອງຄົນຂອງພຣະອົງ. ເພິ່ນໄດ້ຂຽນພຣະທຳໂຢຮັນ, ໄດ້ຂຽນສານຫລາຍສະບັບ, ແລະ ໄດ້ຂຽນພຣະທຳພຣະນິມິດ. ໃນພຣະທຳຂອງເພິ່ນ, ເພິ່ນໄດ້ກ່າວເຖິງຕົວເອງວ່າເປັນສາວົກ “ທີ່ພຣະອົງຊົງຮັກ” ແລະ “ສາວົກຄົນອື່ນ” (ໂຢຮັນ 13:23; 20:3). ໂຢຮັນມີຄວາມກະຕືລືລົ້ນຫລາຍທີ່ສຸດໃນການສັ່ງສອນພຣະກິດຕິຄຸນ ຈົນວ່າເພິ່ນໄດ້ຂໍຢູ່ໃນໂລກຈົນເຖິງການສະເດັດມາຄັ້ງທີສອງຂອງພຣະຜູ້ຊ່ວຍໃຫ້ລອດ ເພື່ອວ່າເພິ່ນຈະສາມາດນຳຈິດວິນຍານມາສູ່ພຣະຄຣິດ (ເບິ່ງ ຄຳສອນ ແລະ ພັນທະສັນຍາ 7:1–6).

ເບິ່ງ Bible Dictionary, “John,” “John, Gospel of” ນຳອີກ.

ໂຢຮັນ 1:1–5

“ແຕ່ຕົ້ນເດີມນັ້ນ [ພຣະເຢຊູຄຣິດ] ໄດ້ສະຖິດຢູ່ກັບພຣະເຈົ້າ.”

ໂຢຮັນໄດ້ເລີ່ມຕົ້ນພຣະທຳຂອງເພິ່ນໂດຍການບັນຍາຍເຖິງວຽກງານທີ່ພຣະຄຣິດໄດ້ກະທຳ ກ່ອນພຣະອົງໄດ້ມາກຳເນີດ: “ແຕ່ຕົ້ນເດີມນັ້ນ … ພຣະທຳ [ພຣະເຢຊູຄຣິດ] ໄດ້ສະຖິດຢູ່ກັບພຣະເຈົ້າ.” ທ່ານຮຽນຮູ້ຫຍັງແດ່ຈາກ ຂໍ້ທີ 1–5 ກ່ຽວກັບພຣະຜູ້ຊ່ວຍໃຫ້ລອດ ແລະ ວຽກງານຂອງພຣະອົງ? ທ່ານສາມາດພົບເຫັນຄຳຊີ້ແຈງທີ່ເປັນປະໂຫຍດໄດ້ຫລາຍໃນ ການແປຂອງໂຈເຊັບ ສະມິດ, ໂຢຮັນ 1:1–5 (ໃນ ພຣະຄຣິສຕະທຳຄຳພີ ພາກຫ້ອຍທ້າຍ). ຂະນະທີ່ທ່ານເລີ່ມຕົ້ນສຶກສາພຣະຊົນຊີບຂອງພຣະຜູ້ຊ່ວຍໃຫ້ລອດ, ເປັນຫຍັງມັນຈຶ່ງສຳຄັນທີ່ຈະຕ້ອງຮູ້ຈັກກ່ຽວກັບວຽກງານໃນພຣະຊົນຊີບກ່ອນເກີດຂອງພຣະອົງ?

ເບິ່ງ Gospel Topics, “Jesus Christ Chosen as Savior,” topics.ChurchofJesusChrist.org ນຳອີກ.

ໂຢຮັນ 1:1–18

ພຣະເຢຊູຄຣິດແມ່ນ “ຄວາມສະຫວ່າງອັນແທ້ຈິງ,” ພຣະບຸດຂອງພຣະເຈົ້າ.

ໂຢຮັນໄດ້ຖືກດົນໃຈໃຫ້ຊອກຫາພຣະຜູ້ຊ່ວຍໃຫ້ລອດ ເພາະປະຈັກພະຍານຂອງໂຢຮັນບັບຕິສະໂຕ, ຜູ້ໄດ້ປະກາດວ່າ ເພິ່ນ “ໄດ້ມາເພື່ອເປັນພະຍານເຖິງ … ຄວາມສະຫວ່າງອັນແທ້ຈິງ” (ໂຢຮັນ 1:8–9). ໂຢຮັນເອງກໍໄດ້ເປັນພະຍານຢ່າງມີພະລັງເຖິງພຣະຊົນຊີບ ແລະ ພາລະກິດຂອງພຣະຜູ້ຊ່ວຍໃຫ້ລອດ.

ມັນອາດເປັນສິ່ງທີ່ໜ້າສົນໃຈທີ່ຈະຂຽນຄວາມຈິງຕ່າງໆ ທີ່ໂຢຮັນໄດ້ລວມໄວ້ຢູ່ໃນປະຈັກພະຍານໃນຕອນຕົ້ນຂອງເພິ່ນເຖິງພຣະຄຣິດ (ຂໍ້ທີ 1–18; ເບິ່ງ ການແປຂອງໂຈເຊັບ ສະມິດ, ໂຢຮັນ 1:1–19 [ໃນ ພຣະຄຣິສຕະທຳຄຳພີ ພາກຫ້ອຍທ້າຍ]) ນຳອີກ. ທ່ານຄິດວ່າເປັນຫຍັງໂຢຮັນຈຶ່ງເລີ່ມຕົ້ນພຣະທຳຂອງເພິ່ນດ້ວຍຄວາມຈິງເຫລົ່ານີ້? ໃຫ້ຄິດທີ່ຈະຂຽນພະຍານຂອງທ່ານເຖິງພຣະເຢຊູຄຣິດ—ທ່ານຢາກແບ່ງປັນຫຍັງແດ່? ມີປະສົບການໃດແດ່ທີ່ຊ່ວຍທ່ານໃຫ້ມາຮູ້ຈັກ ແລະ ຕິດຕາມພຣະຜູ້ຊ່ວຍໃຫ້ລອດ? ໃຜຈະໄດ້ຮັບພອນໂດຍການໄດ້ຍິນປະຈັກພະຍານຂອງທ່ານ?

ໂຢຮັນ 1:11–13

ພຣະເຢຊູຄຣິດໄດ້ປະທານ “ສິດໃຫ້ [ເຮົາເພື່ອ] ກາຍເປັນ” ບຸດ ແລະ ທິດາຂອງພຣະເຈົ້າ.

ເຖິງແມ່ນວ່າເຮົາທຸກຄົນເປັນທິດາ ແລະ ບຸດທາງວິນຍານຂອງພຣະເຈົ້າອົງເປັນພຣະບິດາ, ເມື່ອເຮົາເຮັດບາບ ເຮົາໄດ້ເຫີນຫ່າງ, ຫລື ແຍກຕົວ, ອອກຈາກພຣະອົງ. ພຣະເຢຊູຄຣິດໄດ້ສະເໜີທິດທາງໃຫ້ແກ່ເຮົາເພື່ອກັບໄປ ຜ່ານທາງການເສຍສະລະຊົດໃຊ້ຂອງພຣະອົງ. ໃຫ້ໄຕ່ຕອງສິ່ງທີ່ ໂຢຮັນ 1:11–13 ສິດສອນກ່ຽວກັບການກາຍເປັນທິດາ ແລະ ບຸດຂອງພຣະເຈົ້າ. ໃຫ້ພິຈາລະນາຂໍ້ພຣະຄຳພີເຫລົ່ານີ້ນຳອີກ ທີ່ສິດສອນກ່ຽວກັບວິທີທີ່ເຮົາໄດ້ຮັບຂອງປະທານນີ້: ໂຣມ 8:14–18; ໂມໄຊຢາ 5:7–9; ຄຳສອນ ແລະ ພັນທະສັນຍາ 25:1. ການມີ “ສິດໃຫ້ກາຍເປັນ” ທິດາ ຫລື ບຸດຂອງພຣະເຈົ້າມີຄວາມໝາຍແນວໃດຕໍ່ທ່ານ?

ໂຢຮັນ 1:18

ພຣະບິດາເປັນພະຍານເຖິງພຣະບຸດຂອງພຣະອົງ.

ໂຢຮັນ 1:18 ກ່າວວ່າ ບໍ່ມີໃຜເຄີຍເຫັນພຣະເຈົ້າ. ເຖິງຢ່າງໃດກໍຕາມ, ການແປຂອງໂຈເຊັບ ສະມິດ ກ່ຽວກັບຂໍ້ນີ້ ຊີ້ແຈງວ່າ “ບໍ່ເຄີຍມີມະນຸດຄົນໃດເຄີຍເຫັນພຣະເຈົ້າ ບໍ່ວ່າຈະເປັນເວລາໃດ, ຍົກເວັ້ນແຕ່ຕອນທີ່ພຣະອົງເປັນພະຍານເຖິງພຣະບຸດ” (ເບິ່ງ ໂຢຮັນ 1:18, ໝາຍເຫດຢູ່ທາງລຸ່ມໜ້າປຶ້ມ ຄ ). ໃຫ້ຄິດທີ່ຈະທົບທວນຂໍ້ພຣະຄຳພີດັ່ງຕໍ່ໄປນີ້ ຊຶ່ງໃນນັ້ນພຣະເຈົ້າອົງເປັນພຣະບິດາໄດ້ກ່າວເປັນພະຍານເຖິງພຣະບຸດ: ມັດທາຍ 3:17; 17:5; 3 ນີໄຟ 11:6–7; ໂຈເຊັບ ສະມິດ—ປະຫວັດ 1:17.

ເປັນຫຍັງມັນຈຶ່ງເປັນພອນທີ່ມີຂໍ້ພຣະຄຳພີເຫລົ່ານີ້? ມັນສິດສອນທ່ານຫຍັງແດ່ກ່ຽວກັບຄວາມສຳພັນຂອງພຣະເຢຊູຄຣິດກັບພຣະບິດາຂອງພຣະອົງ?

ຮູບພາບ

ຮູບເຄື່ອງໝາຍການສຶກສາເປັນຄອບຄົວ

ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ

ຂະນະທີ່ເຮົາສຶກສາພຣະຄຳພີ, ເຮົາຈະໄດ້ຮັບການດົນໃຈສຳລັບຊີວິດຂອງເຮົາເອງ.

ໂຢຮັນ 1:4–10.ທ່ານຈະສາມາດຊ່ວຍຄອບຄົວຂອງທ່ານໃຫ້ວາດພາບເຫັນສິ່ງທີ່ເຂົາເຈົ້າອ່ານກ່ຽວກັບຄວາມສະຫວ່າງຢູ່ໃນຂໍ້ເຫລົ່ານີ້ໄດ້ແນວໃດ? ທ່ານສາມາດປ່ອຍໃຫ້ສະມາຊິກໃນຄອບຄົວປ່ຽນຜຽນກັນເຍືອງໄຟຢູ່ໃນຫ້ອງມືດ ແລະ ແບ່ງປັນວິທີທີ່ພຣະຜູ້ຊ່ວຍໃຫ້ລອດເປັນຄວາມສະຫວ່າງໃນຊີວິດເຂົາເຈົ້າແນວໃດ. ແລ້ວ, ຂະນະທີ່ທ່ານອ່ານ ໂຢຮັນ 1:4–10, ສະມາຊິກໃນຄອບຄົວອາດມີຄວາມຮູ້ເພີ່ມເຕີມໃສ່ກັບປະຈັກພະຍານຂອງໂຢຮັນ ເຖິງພຣະເຢຊູຄຣິດ, ຄວາມສະຫວ່າງຂອງໂລກ.

ໂຢຮັນ 1:35–36.ເປັນຫຍັງໂຢຮັນບັບຕິສະໂຕຈຶ່ງເອີ້ນພຣະເຢຊູວ່າ “ລູກແກະຂອງພຣະເຈົ້າ”? ເຮົາຮຽນຮູ້ຫຍັງແດ່ກ່ຽວກັບນາມນີ້ ຈາກຂ່າວສານຂອງແອວເດີ ແຈັບຟະຣີ ອາ ຮໍແລນ “Behold the Lamb of God” ຫລື ຂ່າວສານຂອງແອວເດີ ແກຣິດ ດັບເບິນຢູ ກອງ “Good Shepherd, Lamb of God”? (Liahona, May 2019, 44–46, 97–101)

ໂຢຮັນ 1:35–46.ແມ່ນຫຍັງຄືຜົນຮັບຂອງປະຈັກພະຍານຂອງໂຢຮັນ? ຄອບຄົວຂອງທ່ານສາມາດຮຽນຮູ້ຫຍັງແດ່ຈາກຜູ້ຄົນທີ່ກ່າວເຖິງຢູ່ໃນຂໍ້ເຫລົ່ານີ້ ກ່ຽວກັບວິທີທີ່ຈະແບ່ງປັນພຣະກິດຕິຄຸນ? ເບິ່ງ ວິດີໂອ “Inviting Others to ‘Come and See’” (ChurchofJesusChrist.org) ນຳອີກ.

ໂຢຮັນ 1:45–51.ນະທານາເອັນໄດ້ເຮັດສິ່ງໃດ ເພື່ອຊ່ວຍເພິ່ນໃຫ້ມີປະຈັກພະຍານເຖິງພຣະຜູ້ຊ່ວຍໃຫ້ລອດ? ເຊື້ອເຊີນສະມາຊິກໃນຄອບຄົວໃຫ້ເວົ້າລົມກັນກ່ຽວກັບວິທີທີ່ເຂົາເຈົ້າໄດ້ຮັບປະຈັກພະຍານຂອງເຂົາເຈົ້າແນວໃດ.

ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ this week’s outline ໃນ Come, Follow Me—For Primary.

ເພງແນະນຳ: “ພຣະຜູ້ໄຖ່ແຫ່ງອິດສະຣາເອນ,” ເພງສວດ ແລະ ເພງຂອງເດັກນ້ອຍ, 5.

ການປັບປຸງການສິດສອນຂອງເຮົາ

ແບ່ງປັນບົດຮຽນທີ່ໃຊ້ສິ່ງຂອງ. ເຊື້ອເຊີນສະມາຊິກໃນຄອບຄົວໃຫ້ຊອກຫາສິ່ງຂອງທີ່ເຂົາເຈົ້າສາມາດໃຊ້ ເພື່ອຊ່ວຍເຂົາເຈົ້າໃຫ້ເຂົ້າໃຈຫລັກທຳຢູ່ໃນພຣະຄຳພີ ທີ່ທ່ານກຳລັງອ່ານເປັນຄອບຄົວ. ຍົກຕົວຢ່າງ, ເຂົາເຈົ້າສາມາດໃຊ້ທຽນໄຂ ເພື່ອເປັນຕົວແທນໃຫ້ແກ່ຄວາມສະຫວ່າງຂອງພຣະຄຣິດ (ເບິ່ງ ໂຢຮັນ 1:4).