“ວັນທີ 9–15 ເດືອນມັງກອນ. ມັດທາຍ 2; ລູກາ 2: ພວກເຮົາໄດ້ມາເພື່ອຂາບໄຫວ້ນະມັດສະການເພິ່ນ,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີໃໝ່ 2023 (2022)

“ວັນທີ 9–15 ເດືອນມັງກອນ. ມັດທາຍ 2; ລູກາ 2,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2023

Let Us Adore Him [ໃຫ້ເຮົາຮັກພຣະອົງ], ໂດຍ ເດນາ ມາຣິໂອ ວູດ

ວັນທີ 9–15 ເດືອນມັງກອນ

ມັດທາຍ 2; ລູກາ 2

ພວກເຮົາໄດ້ມາເພື່ອຂາບໄຫວ້ນະມັດສະການເພິ່ນ

ຂະນະທີ່ທ່ານອ່ານ ມັດທາຍ 2 ແລະ ລູກາ 2, ໃຫ້ເອົາໃຈໃສ່ກັບຄວາມຮູ້ທາງວິນຍານໃດໆ ທີ່ທ່ານໄດ້ຮັບ. ແນວຄິດສຶກສາໃນໂຄງຮ່າງນີ້ສາມາດຊ່ວຍທ່ານໃຫ້ຊອກເຫັນຫລັກທຳທີ່ສຳຄັນ ແລະ ກ່ຽວຂ້ອງກັບບົດເຫລົ່ານີ້ໄດ້.

ບັນທຶກຄວາມປະທັບໃຈຂອງທ່ານ

ນັບຕັ້ງແຕ່ວັນກຳເນີດຂອງພຣະອົງ, ເຫັນໄດ້ຢ່າງແຈ່ມແຈ້ງວ່າ ພຣະເຢຊູບໍ່ໄດ້ເປັນເດັກທຳມະດາສາມັນ. ມັນບໍ່ແມ່ນພຽງດາວດວງໃໝ່ຢູ່ໃນທ້ອງຟ້າ ຫລື ການປະກາດທີ່ຊົມຊື່ນຍິນດີຂອງທູດເທົ່ານັ້ນ ທີ່ເຮັດໃຫ້ໄວທາລົກຂອງພຣະເຢຊູເປັນໜ້າງຶດງໍ້. ຍັງເປັນຄວາມຈິງທີ່ວ່າ ຜູ້ຄົນທີ່ຊື່ສັດຫລາກຫລາຍ—ຈາກປະຊາຊາດ, ມີອາຊີບ, ແລະ ມີເບື້ອງຫລັງທີ່ແຕກຕ່າງກັນ—ຮູ້ສຶກຖືກດຶງດູດເຂົ້າຫາພຣະອົງ. ແມ່ນແຕ່ກ່ອນທີ່ພຣະອົງໄດ້ກ່າວຄຳເຊື້ອເຊີນຂອງພຣະອົງ ທີ່ວ່າ “ຈົ່ງຕາມເຮົາມາ,” ເຂົາເຈົ້າກໍໄດ້ມາແລ້ວ (ລູກາ 18:22). ແນ່ນອນ, ບໍ່ແມ່ນທຸກຄົນທີ່ໄດ້ມາຫາພຣະອົງ. ມີຫລາຍຄົນທີ່ບໍ່ສົນໃຈໃນພຣະອົງ, ແລະ ຜູ້ປົກຄອງທີ່ອິດສາກໍຢາກຂ້າພຣະອົງ. ແຕ່ຜູ້ສະແຫວງຫາຄວາມຊອບທຳທີ່ຖ່ອມຕົວ, ບໍລິສຸດ, ແລະ ອຸທິດຕົນ ໄດ້ເຫັນພຣະອົງ ຕາມທີ່ພຣະອົງເປັນ—ພຣະເມຊີອາທີ່ສັນຍາໄວ້ຂອງພວກເຂົາ. ການອຸທິດຕົນຂອງພວກເຂົາໄດ້ດົນໃຈເຮົາ, ເພາະວ່າ “ຂ່າວທີ່ນຳຄວາມຊົມຊື່ນຍິນດີ” ທີ່ຖືກນຳມາໃຫ້ຄົນລ້ຽງແກະ ແມ່ນສຳລັບ “ເຈົ້າທັງຫລາຍ,” ແລະ “[ພຣະຜູ້ຊ່ວຍໃຫ້ລອດ], ຄືພຣະຄຣິດ [ພຣະຜູ້ເປັນເຈົ້າ]” ໄດ້ມາກຳເນີດໃນມື້ນັ້ນໃຫ້ແກ່ເຮົາທຸກຄົນ (ເບິ່ງ ລູກາ 2:10–11).

ແນວຄິດສຳລັບການສຶກສາພຣະຄຳພີເປັນສ່ວນຕົວ

ລູກາ 2:1–7

ພຣະເຢຊູຄຣິດໄດ້ມາກຳເນີດໃນສະພາບທີ່ຕ່ຳຕ້ອຍ.

ເຖິງແມ່ນວ່າພຣະເຢຊູຄຣິດມີລັດສະໝີພາບຮ່ວມກັບພຣະເຈົ້າອົງເປັນພຣະບິດາ “ກ່ອນສ້າງໂລກນັ້ນ” (ໂຢຮັນ 17:5), ແຕ່ພຣະອົງໄດ້ເຕັມພຣະໄທທີ່ຈະມາກຳເນີດໃນສະພາບທີ່ຕ່ຳຕ້ອຍ ແລະ ດຳລົງພຣະຊົນຊີບໃນທ່າມກາງພວກເຮົາຢູ່ໃນໂລກ. ຂະນະທີ່ທ່ານອ່ານ ລູກາ 2:1–7, ໃຫ້ໄຕ່ຕອງສິ່ງທີ່ເລື່ອງນີ້ກ່ຽວກັບການກຳເນີດຂອງພຣະອົງ ສິດສອນທ່ານກ່ຽວກັບພຣະອົງແນວໃດ. ໃຫ້ພະຍາຍາມຊອກຫາຂໍ້ຍ່ອຍ ຫລື ຄວາມຮູ້ຢູ່ໃນເລື່ອງນີ້ ທີ່ແຕ່ກ່ອນທ່ານບໍ່ໄດ້ສັງເກດເຫັນ. ການສັງເກດເຫັນສິ່ງເຫລົ່ານີ້ມີຜົນກະທົບຕໍ່ຄວາມຮູ້ສຶກຂອງທ່ານກັບພຣະອົງແນວໃດ?

ເບິ່ງ “The Christ Child” (ວິດີໂອ), ChurchofJesusChrist.org ນຳອີກ.

17:56

ມັດທາຍ 2:1–12; ລູກາ 2:8–38

ມີຫລາຍຄົນເປັນພະຍານເຖິງການກຳເນີດຂອງພຣະຄຣິດ.

ການກຳເນີດ ແລະ ໄວທາລົກຂອງພຣະຄຣິດຖືກຢ້ຽມຢາມໂດຍພະຍານ ແລະ ຜູ້ນະມັດສະການທີ່ແຕກຕ່າງກັນ. ຂະນະທີ່ທ່ານຄົ້ນຫາເລື່ອງລາວຂອງເຂົາເຈົ້າ, ທ່ານຮຽນຮູ້ຫຍັງແດ່ກ່ຽວກັບວິທີນະມັດສະການ ແລະ ເປັນພະຍານເຖິງພຣະຄຣິດ?

ພະຍານຂອງພຣະຄຣິດ	ເຮົາຮຽນຮູ້ຫຍັງແດ່ກ່ຽວກັບການນະມັດສະການ ແລະ ການເປັນພະຍານເຖິງພຣະຄຣິດ?
ພະຍານຂອງພຣະຄຣິດ ຄົນລ້ຽງແກະ (ລູກາ 2:8–20)	ເຮົາຮຽນຮູ້ຫຍັງແດ່ກ່ຽວກັບການນະມັດສະການ ແລະ ການເປັນພະຍານເຖິງພຣະຄຣິດ?
ພະຍານຂອງພຣະຄຣິດ ຊີເມໂອນ (ລູກາ 2:25–35)	ເຮົາຮຽນຮູ້ຫຍັງແດ່ກ່ຽວກັບການນະມັດສະການ ແລະ ການເປັນພະຍານເຖິງພຣະຄຣິດ?
ພະຍານຂອງພຣະຄຣິດ ນາງອານາ (ລູກາ 2:36–38)	ເຮົາຮຽນຮູ້ຫຍັງແດ່ກ່ຽວກັບການນະມັດສະການ ແລະ ການເປັນພະຍານເຖິງພຣະຄຣິດ?
ພະຍານຂອງພຣະຄຣິດ ພວກໂຫລາຈານ (ມັດທາຍ 2:1–12)	ເຮົາຮຽນຮູ້ຫຍັງແດ່ກ່ຽວກັບການນະມັດສະການ ແລະ ການເປັນພະຍານເຖິງພຣະຄຣິດ?

ເບິ່ງ 1 ນີໄຟ 11:13–23; 3 ນີໄຟ 1:5–21; “Shepherds Learn of the Birth of Christ” ແລະ “The Christ Child Is Presented at the Temple” (ວິດີໂອ), ChurchofJesusChrist.org ນຳອີກ.

2:50

2:3

ມັດທາຍ 2:13–23

ພໍ່ແມ່ສາມາດໄດ້ຮັບການເປີດເຜີຍເພື່ອປົກປ້ອງຄອບຄົວຂອງຕົນ.

ໂຢເຊັບຄົງບໍ່ສາມາດເຮັດສິ່ງທີ່ລາວໄດ້ຖືກຂໍໃຫ້ເຮັດ—ປົກປ້ອງພຣະເຢຊູໃນໄວເດັກຂອງພຣະອົງ—ຖ້າປາດສະຈາກຄວາມຊ່ວຍເຫລືອຈາກສະຫວັນ. ເໝືອນດັ່ງພວກໂຫລາຈານ, ລາວໄດ້ຮັບການເປີດເຜີຍທີ່ເຕືອນລາວເຖິງສິ່ງອັນຕະລາຍ. ຂະນະທີ່ທ່ານອ່ານກ່ຽວກັບປະສົບການຂອງໂຢເຊັບໃນ ມັດທາຍ 2:13–23, ໃຫ້ຄິດກ່ຽວກັບສິ່ງອັນຕະລາຍທາງຮ່າງກາຍ ແລະ ທາງວິນຍານ ທີ່ຢູ່ຕໍ່ໜ້າເຮົາໃນທຸກວັນນີ້. ໃຫ້ໄຕ່ຕອງປະສົບການຕອນທີ່ທ່ານຮູ້ສຶກເຖິງການນຳພາຂອງພຣະເຈົ້າ ໃນການປົກປ້ອງທ່ານ ແລະ ຄົນທີ່ທ່ານຮັກ. ໃຫ້ຄິດທີ່ຈະແບ່ງປັນປະສົບການເຫລົ່ານີ້ກັບຄົນອື່ນໆ. ທ່ານສາມາດເຮັດສິ່ງໃດເພື່ອຈະໄດ້ຮັບການນຳພາເຊັ່ນນັ້ນໃນອະນາຄົດ?

ນອກເໜືອຈາກນີ້, ທ່ານກໍສາມາດເບິ່ງວິດີໂອ “The First Christmas Spirit” (ChurchofJesusChrist.org) ນຳອີກ ທີ່ສະແດງເຖິງສິ່ງທີ່ໂຢເຊັບອາດຮູ້ສຶກ ຂະນະທີ່ລາວປະເຊີນກັບໜ້າທີ່ຮັບຜິດຊອບ ໃນການດູແລພຣະບຸດຂອງພຣະເຈົ້າ.

6:41

ລູກາ 2:40–52

ແມ່ນແຕ່ໃນໄວໜຸ່ມ, ພຣະເຢຊູຍັງໄດ້ເອົາໃຈໃສ່ຕໍ່ການເຮັດພາລະກິດຂອງພຣະບິດາຂອງພຣະອົງ.

ໃນໄວເຍົາ, ພຣະຜູ້ຊ່ວຍໃຫ້ລອດໄດ້ສິດສອນພຣະກິດຕິຄຸນຢ່າງມີພະລັງ ຈົນກັບວ່າແມ່ນແຕ່ພວກອາຈານຢູ່ໃນພຣະວິຫານກໍຍັງປະຫລາດໃຈໃນ “ສະຕິປັນຍາ ແລະ ຄຳຕອບ” ຂອງພຣະອົງ (ລູກາ 2:47). ທ່ານຮຽນຮູ້ຫຍັງແດ່ຈາກຂໍ້ເຫລົ່ານີ້ ກ່ຽວກັບພຣະຜູ້ຊ່ວຍໃຫ້ລອດໃນໄວເຍົາ? ຄົນໜຸ່ມທີ່ທ່ານຮູ້ຈັກ ພະຍາຍາມທີ່ຈະ “[ເຮັດພາລະກິດຂອງ] ພຣະບິດາ [ຂອງພວກເຂົາ]” ແນວໃດ? (ລູກາ 2:49). ຊາວໜຸ່ມ ແລະ ເດັກນ້ອຍໄດ້ຊ່ວຍທ່ານໃຫ້ມີຄວາມເຂົ້າໃຈພຣະກິດຕິຄຸນຢ່າງເລິກເຊິ່ງກວ່າເກົ່າແນວໃດ? ທ່ານຮຽນຮູ້ຫຍັງອີກແດ່ຈາກຕົວຢ່າງຂອງໄວເດັກຂອງພຣະເຢຊູໃນ ລູກາ 2:40–52 ແລະ ໃນ ການແປຂອງໂຈເຊັບ ສະມິດ, ມັດທາຍ 3:24–26 (ໃນ ພຣະຄຣິສຕະທຳຄຳພີ ພາກຫ້ອຍທ້າຍ)?

ພຣະເຢຊູໃນໄວເຍົາກັບພວກອາຈານໃນພຣະວິຫານ — “ພວກເຈົ້າບໍ່ຮູ້ບໍວ່າ ເຮົາຕ້ອງ [ເຮັດພາລະກິດຂອງ] ພຣະບິດາຂອງເຮົາ?” (ລູກາ 2:49).

ການແປຂອງໂຈເຊັບ ສະມິດ ຄືຫຍັງ?

ຍ້ອນວ່າຄວາມຈິງທີ່ “ແຈ່ມແຈ້ງ ແລະ ມີຄ່າ” ສູນຫາຍໄປຈາກພຣະຄຣິສຕະທຳຄຳພີ ເປັນເວລາຫລາຍສັດຕະວັດ (1 ນີໄຟ 13:28; ເບິ່ງ ໂມເຊ 1:41) ນຳອີກ, ພຣະຜູ້ເປັນເຈົ້າຈຶ່ງໄດ້ບັນຊາໂຈເຊັບ ສະມິດ ໃຫ້ດັດແປງພຣະຄຣິສຕະທຳຄຳພີດ້ວຍການດົນໃຈ, ທີ່ຮູ້ຈັກກັນວ່າ ການແປຂອງໂຈເຊັບ ສະມິດ. ການດັດແປງຫລາຍຢ່າງທີ່ສາດສະດາໄດ້ເຮັດ ແມ່ນລວມຢູ່ພາກຫ້ອຍທ້າຍ ໃນພຣະຄຳພີຂອງໄພ່ພົນຍຸກສຸດທ້າຍ. ການແປຂອງໂຈເຊັບ ສະມິດ ມັດທາຍ 24, ຮູ້ຈັກກັນວ່າ ໂຈເຊັບ ສະມິດ—ມັດທາຍ, ແມ່ນມີຢູ່ໃນ ໄຂ່ມຸກອັນລ້ຳຄ່າ. ສຳລັບລາຍລະອຽດເພີ່ມເຕີມ, ໃຫ້ເບິ່ງ “ການແປຂອງໂຈເຊັບ ສະມິດ (ປຈສ)” ໃນ Bible Dictionary and Gospel Topics article “Bible, Inerrancy of” (topics.ChurchofJesusChrist.org).

ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ

ລູກາ 2.ເຊື້ອເຊີນສະມາຊິກໃນຄອບຄົວໃຫ້ເລືອກເອົາຄົນໜຶ່ງທີ່ຖືກບັນຍາຍຢູ່ໃນ ລູກາ 2, ໃຫ້ອ່ານສອງສາມຂໍ້ກ່ຽວກັບຄວາມສຳພັນຂອງບຸກຄົນນັ້ນກັບພຣະຜູ້ຊ່ວຍໃຫ້ລອດ, ແລະ ແບ່ງປັນບາງສິ່ງທີ່ເຂົາເຈົ້າໄດ້ຮຽນຮູ້ ທີ່ເພີ່ມສັດທາຂອງເຂົາເຈົ້າໃນພຣະເຢຊູຄຣິດ. ຮ້ອງເພງ “ຄັ້ງໜຶ່ງເຢຊູເກີດຕ່ຳຕ້ອຍ” ຫລື “ເຮົາຮ້ອງສັນເສີນນາມເຢຊູເຈົ້າ” (ເພງສວດ ແລະ ເພງຂອງເດັກນ້ອຍ, 22, 27) ນຳກັນ. ເຮົາຮຽນຮູ້ຫຍັງແດ່ຈາກເພງເຫລົ່ານີ້ ກ່ຽວກັບການກຳເນີດຂອງພຣະຜູ້ຊ່ວຍໃຫ້ລອດ?

ໃຫ້ພິຈາລະນາວິທີທີ່ຮູບພາບສາມາດສົ່ງເສີມການສົນທະນາຂອງພວກທ່ານກ່ຽວກັບການກຳເນີດຂອງພຣະຄຣິດແນວໃດ. (ຍົກຕົວຢ່າງ, ໃຫ້ເບິ່ງ ປຶ້ມຮູບພາບພຣະກິດຕິຄຸນ ຫລື history.ChurchofJesusChrist.org/exhibit/birth-of-Christ.)

ມັດທາຍ 2:1–12.ເຮົາຮຽນຮູ້ຫຍັງແດ່ກ່ຽວກັບການສະແຫວງຫາ ແລະ ການພົບເຫັນພຣະຜູ້ຊ່ວຍໃຫ້ລອດ ຈາກຕົວຢ່າງຂອງພວກໂຫລາຈານ?

ລູກາ 2:41–49.“ພາລະກິດຂອງພຣະບິດາ” ຄືຫຍັງ? (ລູກາ 2:49; ເບິ່ງ ໂມເຊ 1:39; General Handbook: Serving in The Church of Jesus Christ of Latter-day Saints, 1.2, ChurchofJesusChrist.org). ເຮົາຮຽນຮູ້ຫຍັງແດ່ກ່ຽວກັບພາລະກິດນັ້ນຈາກເລື່ອງລາວໃນ ລູກາ 2:41–49? ໃຫ້ຄິດທີ່ຈະຂຽນບາງວິທີທີ່ຄອບຄົວຂອງທ່ານສາມາດມີພາກສ່ວນໃນພາລະກິດຂອງພຣະບິດາ ແລະ ເອົາມັນໃສ່ໄວ້ໃນໂຖ. ໃນລະຫວ່າງອາທິດທີ່ຈະມາເຖິງ, ຂະນະທີ່ຄອບຄົວຂອງທ່ານຊອກຫາວິທີທີ່ຈະຊ່ວຍໃນວຽກງານຂອງພຣະບິດາເທິງສະຫວັນ, ເຂົາເຈົ້າສາມາດເລືອກເອົາແນວຄິດຈາກໂຖນັ້ນ. ຈັດເວລາຕອນທີ່ພວກທ່ານຈະແບ່ງປັນປະສົບການຂອງພວກທ່ານ.

ລູກາ 2:52.ເຮົາຮຽນຮູ້ຫຍັງແດ່ຈາກ ລູກາ 2:52 ກ່ຽວກັບວິທີທີ່ພຣະເຢຊູພັດທະນາໃນພຣະຊົນຊີບຂອງພຣະອົງ? ເປົ້າໝາຍສ່ວນຕົວ ຫລື ເປົ້າໝາຍຄອບຄົວຢ່າງໃດແດ່ທີ່ເຮົາສາມາດຈັດຂຶ້ນເພື່ອເຕີບໂຕ “ໃນດ້ານສະຕິປັນຍາ ແລະ ໃນດ້ານຮ່າງກາຍ, ແລະ ເປັນທີ່ພໍພຣະໄທຕໍ່ພຣະເຈົ້າ ແລະ ຕໍ່ມະນຸດດ້ວຍ”?

ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ this week’s outline ໃນ Come, Follow Me—For Primary.

ເພງແນະນຳ: “ຂໍເພິ່ງພຣະທຸກຊົ່ວໂມງ,” ເພງສວດ ແລະ ເພງຂອງເດັກນ້ອຍ, 12.

ການປັບປຸງການສຶກສາສ່ວນຕົວ

ໃຊ້ສິ່ງຊ່ວຍເຫລືອການສຶກສາພຣະຄຳພີ. ເພື່ອຈະໄດ້ຮັບຄວາມຮູ້ເພີ່ມເຕີມຂະນະທີ່ທ່ານສຶກສາພຣະຄຳພີ, ໃຫ້ໃຊ້ແຫລ່ງຕ່າງໆເຊັ່ນ ໝາຍເຫດຢູ່ທາງລຸ່ມໜ້າປຶ້ມ, Topical Guide, Bible Dictionary, ຄູ່ມືພຣະຄຳພີ, ແລະ ສິ່ງຊ່ວຍການສຶກສາຢ່າງອື່ນໆ ທີ່ມີຢູ່ໃນ ChurchofJesusChrist.org.

ນາງມາຣີ, ໂຢເຊັບ, ແລະ ກຸມມານນ້ອຍເຢຊູ — ພຣະຜູ້ຊ່ວຍໃຫ້ລອດຂອງໂລກໄດ້ມາສູ່ໂລກໃນສະພາບທີ່ຕ່ຳຕ້ອຍ.