“ວັນທີ 26 ເດືອນທັນວາ–ວັນທີ 1 ເດືອນມັງກອນ. ເຮົາມີຄວາມຮັບຜິດຊອບຕໍ່ການຮຽນຮູ້ຂອງເຮົາເອງ,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີໃໝ່ 2023 (2022)

“ວັນທີ 26 ເດືອນທັນວາ–ວັນທີ 1 ເດືອນມັງກອນ. ເຮົາມີຄວາມຮັບຜິດຊອບຕໍ່ການຮຽນຮູ້ຂອງເຮົາເອງ,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2023

ວັນທີ 26 ເດືອນທັນວາ–ວັນທີ 1 ເດືອນມັງກອນ

ເຮົາມີຄວາມຮັບຜິດຊອບຕໍ່ການຮຽນຮູ້ຂອງເຮົາເອງ

ຈຸດປະສົງຂອງພຣະຄຳພີ ແມ່ນເພື່ອຊ່ວຍທ່ານໃຫ້ມາຫາພຣະຄຣິດ ແລະ ເຫລື້ອມໃສໃນພຣະກິດຕິຄຸນຂອງພຣະອົງຢ່າງເລິກເຊິ່ງກວ່າເກົ່າ. ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ ສາມາດຊ່ວຍທ່ານໃຫ້ເຂົ້າໃຈ ແລະ ພົບຄວາມເຂັ້ມແຂງທາງວິນຍານທີ່ທ່ານ ແລະ ຄອບຄົວຕ້ອງການໃນນັ້ນ. ແລ້ວ, ໃນຫ້ອງຮຽນຂອງທ່ານຢູ່ໂບດ, ທ່ານຈະມີໂອກາດແບ່ງປັນຄວາມຮູ້ ແລະ ຊຸກຍູ້ເພື່ອນໄພ່ພົນດ້ວຍກັນ ໃນຄວາມພະຍາຍາມຂອງເຂົາເຈົ້າທີ່ຈະຕິດຕາມພຣະຄຣິດ.

ບັນທຶກຄວາມປະທັບໃຈຂອງທ່ານ

“ພວກເຈົ້າຊອກຫາຫຍັງ?” ພຣະເຢຊູໄດ້ຖາມພວກສານຸສິດຂອງໂຢຮັນບັບຕິສະໂຕ (ໂຢຮັນ 1:38). ທ່ານອາດຖາມຕົວເອງຄຳຖາມອັນດຽວກັນນີ້—ເພາະສິ່ງທີ່ທ່ານຈະພົບເຫັນຢູ່ໃນພຣະຄຳພີໃໝ່ໃນປີນີ້ ແມ່ນຂຶ້ນກັບສິ່ງທີ່ທ່ານສະແຫວງຫາ. “ຈົ່ງໝັ່ນຊອກຫາ, ແລ້ວເຈົ້າກໍຈະໄດ້ພົບ” ແມ່ນຄຳສັນຍາຂອງພຣະຜູ້ຊ່ວຍໃຫ້ລອດ (ມັດທາຍ 7:7). ສະນັ້ນຈົ່ງຖາມຄຳຖາມອັນທີ່ມາສູ່ຈິດໃຈທ່ານ ຂະນະທີ່ທ່ານສຶກສາ, ແລະ ແລ້ວໃຫ້ສະແຫວງຫາຄຳຕອບຢ່າງພາກພຽນ. ໃນພຣະຄຳພີໃໝ່ ທ່ານຈະອ່ານກ່ຽວກັບປະສົບການທາງວິນຍານທີ່ມີພະລັງຂອງພວກສານຸສິດຂອງພຣະເຢຊູຄຣິດ. ໂດຍທີ່ເປັນສານຸສິດທີ່ຊື່ສັດຂອງພຣະຜູ້ຊ່ວຍໃຫ້ລອດ, ທ່ານສາມາດມີປະສົບການທາງວິນຍານທີ່ມີພະລັງໄດ້ ເມື່ອທ່ານຮັບເອົາຄຳເຊື້ອເຊີນຂອງພຣະຜູ້ຊ່ວຍໃຫ້ລອດ, ຊຶ່ງເຕັມຢູ່ໃນປຶ້ມເຫລັ້ມນີ້, “ຈົ່ງຕາມເຮົາມາ” (ລູກາ 18:22).

ແນວຄິດສຳລັບການສຶກສາພຣະຄຳພີເປັນສ່ວນຕົວ

ເພື່ອທີ່ຈະຮຽນຮູ້ຈາກພຣະຜູ້ຊ່ວຍໃຫ້ລອດແທ້ໆ, ເຮົາຕ້ອງຮັບເອົາຄຳເຊື້ອເຊີນຂອງພຣະອົງ ທີ່ວ່າ, “ຈົ່ງຕາມເຮົາມາ.”

ຄຳເຊື້ອເຊີນຂອງພຣະຜູ້ຊ່ວຍໃຫ້ລອດ ທີ່ວ່າ, “ຈົ່ງຕາມເຮົາມາ,” ແມ່ນກ່ຽວຂ້ອງກັບທຸກຄົນ—ບໍ່ວ່າເຮົາຫາກໍເຂົ້າມາສູ່ເສັ້ນທາງແຫ່ງການເປັນສານຸສິດ ຫລື ເຮົາໄດ້ຢູ່ໃນເສັ້ນທາງຕະຫລອດຊີວິດຂອງເຮົາກໍຕາມ. ນີ້ຄືຄຳເຊື້ອເຊີນຂອງພຣະອົງຕໍ່ເສດຖີໜຸ່ມຜູ້ພະຍາຍາມທີ່ຈະຮັກສາພຣະບັນຍັດ (ເບິ່ງ ມັດທາຍ 19:16–22; ລູກາ 18:18–23). ສິ່ງທີ່ເສດຖີໜຸ່ມໄດ້ຮຽນຮູ້—ແລະ ສິ່ງທີ່ເຮົາທຸກຄົນຈະຕ້ອງຮຽນຮູ້—ແມ່ນວ່າ ການເປັນສານຸສິດໝາຍເຖິງການມອບທັງຈິດວິນຍານໃຫ້ແກ່ພຣະບິດາເທິງສະຫວັນ ແລະ ພຣະເຢຊູຄຣິດ. ເຮົາກ້າວໜ້າໃນການເປັນສານຸສິດຂອງເຮົາ ເມື່ອເຮົາເຫັນສິ່ງທີ່ເຮົາຂາດເຂີນ, ເມື່ອເຮົາປ່ຽນແປງ, ແລະ ເມື່ອເຮົາສະແຫວງຫາທີ່ຈະຕິດຕາມພວກພຣະອົງຢ່າງເຕັມທີ່ຫລາຍຍິ່ງຂຶ້ນ.

ການຮຽນຮູ້ຈາກພຣະຜູ້ຊ່ວຍໃຫ້ລອດເລີ່ມຕົ້ນເມື່ອເຮົາພະຍາຍາມທີ່ຈະເຂົ້າໃຈສິ່ງທີ່ພຣະອົງໄດ້ສິດສອນ. ຍົກຕົວຢ່າງ, ຄວາມເຂົ້າໃຈຂອງທ່ານກ່ຽວກັບຄວາມຖ່ອມຕົວເລິກເຊິ່ງກວ່າເກົ່າແນວໃດ ຂະນະທີ່ທ່ານຄົ້ນຄວ້າຂໍ້ພຣະຄຳພີດັ່ງຕໍ່ໄປນີ້?

ຄຳສອນຂອງພຣະຜູ້ຊ່ວຍໃຫ້ລອດ (ເບິ່ງ ມັດທາຍ 18:1–5; ລູກາ 18:9–14)
ຕົວຢ່າງໜຶ່ງຈາກພຣະຊົນຊີບຂອງພຣະອົງ (ເບິ່ງ ໂຢຮັນ 13:1–15)

ຖ້າຫາກທ່ານຢາກຮຽນຮູ້ຕື່ມອີກ, ໃຫ້ລອງເຮັດກິດຈະກຳນີ້ກັບຫລັກທຳພຣະກິດຕິຄຸນອີກຢ່າງໜຶ່ງ, ດັ່ງເຊັ່ນການຮັກ ຫລື ການໃຫ້ອະໄພ.

ເຮົາຮັບຜິດຊອບຕໍ່ການຮຽນຮູ້ຂອງເຮົາເອງ.

ແອວເດີ ເດວິດ ເອ ແບ໊ດນາ ໄດ້ສິດສອນວ່າ: “ເຮົາບໍ່ຄວນຄາດຫວັງໃຫ້ສາດສະໜາຈັກ ໃນຖານະອົງການ ສິດສອນ ຫລື ບອກເຮົາທຸກສິ່ງທີ່ເຮົາຕ້ອງການທີ່ຈະຮູ້ ແລະ ເຮັດ ເພື່ອຈະກາຍເປັນສານຸສິດທີ່ອຸທິດຕົນ ແລະ ອົດທົນຢ່າງກ້າຫານຈົນເຖິງທີ່ສຸດ. ແຕ່, ຄວາມຮັບຜິດຊອບສ່ວນຕົວຂອງເຮົາແມ່ນທີ່ຈະຮຽນຮູ້ສິ່ງທີ່ເຮົາຄວນຮຽນຮູ້, ດຳລົງຊີວິດຕາມທີ່ເຮົາຮູ້ວ່າເຮົາຄວນເຮັດ, ແລະ ກາຍເປັນຜູ້ຄົນທີ່ພຣະອາຈານປະສົງໃຫ້ເຮົາກາຍເປັນ. ແລະ ບ້ານເຮືອນຂອງເຮົາກໍເປັນສະຖານທີ່ ທີ່ດີທີ່ສຸດສຳລັບການຮຽນຮູ້, ການດຳລົງຊີວິດ, ແລະ ການກາຍເປັນ” (“Prepared to Obtain Every Needful Thing,” Liahona, May 2019, 102).

ການມີຄວາມຮັບຜິດຊອບຕໍ່ການຮຽນຮູ້ຂອງທ່ານເອງໝາຍຄວາມວ່າແນວໃດ? ໃຫ້ຊອກຫາຄຳຕອບທີ່ເປັນໄປໄດ້ຢູ່ໃນຂໍ້ຄວາມຂອງແອວເດີ ແບ໊ດນາ ແລະ ຢູ່ໃນຂໍ້ພຣະຄຳພີດັ່ງຕໍ່ໄປນີ້: ໂຢຮັນ 7:17; 1 ເທສະໂລນິກ 5:21; ຢາໂກໂບ 1:5–6, 22; 2:17; 1 ນີໄຟ 10:17–19; 2 ນີໄຟ 4:15; ແອວມາ 32:27; ແລະ ຄຳສອນ ແລະ ພັນທະສັນຍາ 18:18; 58:26–28; 88:118. ທ່ານຮູ້ສຶກໄດ້ຮັບການດົນໃຈໃຫ້ເຮັດຫຍັງແດ່ ເພື່ອຈະຂະຫຍັນຫລາຍກວ່າເກົ່າໃນການຮຽນຮູ້ພຣະກິດຕິຄຸນ?

ເຮົາຢາກຮູ້ຄວາມຈິງໃຫ້ກັບຕົວເອງ.

ບາງທີທ່ານຮູ້ຈັກຜູ້ຄົນທີ່ເບິ່ງຄືວ່າບໍ່ເຄີຍສູນເສຍສັດທາຈັກເທື່ອ, ບໍ່ວ່າຈະມີຫຍັງເກີດຂຶ້ນໃນຊີວິດຂອງເຂົາເຈົ້າກໍຕາມ. ເຂົາເຈົ້າອາດເຕືອນໃຈທ່ານກ່ຽວກັບຍິງສາວບໍລິສຸດຫ້າຄົນ ຢູ່ໃນຄຳອຸປະມາຂອງພຣະຜູ້ຊ່ວຍໃຫ້ລອດ (ເບິ່ງ ມັດທາຍ 25:1–13). ສິ່ງທີ່ທ່ານອາດບໍ່ເຫັນແມ່ນຄວາມພາກພຽນພະຍາຍາມຂອງພວກນາງ ໃນການເພີ່ມຄວາມເຂັ້ມແຂງໃຫ້ແກ່ປະຈັກພະຍານຂອງພວກນາງກ່ຽວກັບຄວາມຈິງ.

ເຮົາຈະມີ ແລະ ບຳລຸງລ້ຽງປະຈັກພະຍານຂອງເຮົາໄດ້ແນວໃດ? ໃຫ້ຂຽນຄວາມຄິດຂອງທ່ານລົງໄວ້ ຂະນະທີ່ທ່ານໄຕ່ຕອງຂໍ້ພຣະຄຳພີດັ່ງຕໍ່ໄປນີ້: ລູກາ 11:9–13; ໂຢຮັນ 5:39; 7:14–17; ກິດຈະການ 17:10–12; 1 ໂກຣິນໂທ 2:9–11; ແລະ ແອວມາ 5:45–46. (ເບິ່ງ Gospel Topics, “Testimony,” topics.ChurchofJesusChrist.org ນຳອີກ.)

ຍິງໜຸ່ມຢູ່ຂ້າງທາງ — ເຮົາແຕ່ລະຄົນຈະຕ້ອງມີປະຈັກພະຍານຂອງຕົວເອງ.

ເຮົາຈະເຮັດແນວໃດເມື່ອເຮົາມີຄຳຖາມ?

ຂະນະທີ່ທ່ານສະແຫວງຫາຄວາມຮູ້ທາງວິນຍານ, ຄຳຖາມຈະມາສູ່ຈິດໃຈຂອງທ່ານ. ຫລັກທຳດັ່ງຕໍ່ໄປນີ້ສາມາດຊ່ວຍທ່ານຈັດການກັບຄຳຖາມໃນທາງທີ່ຈະສ້າງສັດທາ ແລະ ປະຈັກພະຍານໄດ້:

ສະແຫວງຫາຄວາມເຂົ້າໃຈຈາກພຣະເຈົ້າ. ພຣະເຈົ້າແມ່ນແຫລ່ງຂອງຄວາມຈິງທັງໝົດ, ແລະ ພຣະອົງເປີດເຜີຍຄວາມຈິງຜ່ານທາງພຣະວິນຍານບໍລິສຸດ, ພຣະຄຳພີ, ແລະ ສາດສະດາ ແລະ ອັກຄະສາວົກຂອງພຣະອົງ.
ກະທຳດ້ວຍສັດທາ. ຖ້າຫາກບໍ່ໄດ້ຮັບຄຳຕອບທັນທີ, ໃຫ້ໄວ້ວາງໃຈວ່າ ພຣະຜູ້ເປັນເຈົ້າຈະເປີດເຜີຍຄຳຕອບໃນເວລາທີ່ເໝາະສົມ. ໃນຂະນະທີ່ລໍຖ້າ, ໃຫ້ດຳລົງຊີວິດຕໍ່ໄປໃນຄວາມຈິງທີ່ທ່ານຮູ້ຢູ່ແລ້ວ.
ຮັກສາທັດສະນະນິລັນດອນ. ພະຍາຍາມເບິ່ງສິ່ງຕ່າງໆດັ່ງທີ່ພຣະຜູ້ເປັນເຈົ້າເບິ່ງມັນ, ບໍ່ແມ່ນດັ່ງທີ່ຊາວໂລກເບິ່ງ. ໃຫ້ຄິດກ່ຽວກັບຄຳຖາມຂອງທ່ານໃນທັດສະນະຂອງແຜນແຫ່ງຄວາມລອດຂອງພຣະບິດາເທິງສະຫວັນ.

ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ

ມັດທາຍ 13:1–23.ເພື່ອຊ່ວຍຄອບຄົວຂອງທ່ານໃຫ້ກະກຽມທີ່ຈະຮຽນຮູ້ຈາກພຣະຄຳພີໃໝ່ໃນປີນີ້, ທ່ານສາມາດອ່ານຄຳອຸປະມາກ່ຽວກັບຜູ້ຫວ່ານ. ຄອບຄົວຂອງທ່ານອາດມັກອອກໄປນອກເຮືອນ ເພື່ອຊອກຫາດິນທີ່ແຕກຕ່າງ ດັ່ງທີ່ກ່າວຢູ່ໃນຄຳອຸປະມາ. ເຮົາຈະສາມາດເຮັດໃຫ້ຫົວໃຈຂອງເຮົາເປັນເໝືອນດັ່ງ “ດິນດີ” ດັ່ງທີ່ພຣະເຢຊູໄດ້ບັນຍາຍໄດ້ແນວໃດ? (ມັດທາຍ 13:8).

ຄາລາເຕຍ 5:22–23; ຟີລິບປອຍ 4:8.ປະທານຣະໂຊ ເອັມ ແນວສັນ ໄດ້ເຊື້ອເຊີນທ່ານໃຫ້ “ປ່ຽນບ້ານເຮືອນ [ຂອງທ່ານ] ໃຫ້ເປັນສະຖານທີ່ສັກສິດແຫ່ງສັດທາ” ແລະ ເພື່ອ “ສ້ອມແປງບ້ານເຮືອນຂອງທ່ານໃຫ້ເປັນສູນກາງການຮຽນຮູ້ພຣະກິດຕິຄຸນ.” ຕໍ່ຜູ້ທີ່ເຮັດສິ່ງເຫລົ່ານີ້, ເພິ່ນໄດ້ສັນຍາວ່າ: “ລູກໆຂອງທ່ານ ຈະຕື່ນເຕັ້ນ ທີ່ຈະຮຽນຮູ້ ແລະ ດຳລົງຊີວິດຕາມຄຳສອນຂອງພຣະຜູ້ຊ່ວຍໃຫ້ລອດ, ແລະ ອິດທິພົນຂອງຜູ້ປໍລະປັກ ໃນຊີວິດ ຂອງທ່ານ ແລະ ໃນບ້ານເຮືອນ ຂອງທ່ານ ຈະລົດນ້ອຍຖອຍລົງ. ການປ່ຽນແປງໃນຄອບຄົວຂອງທ່ານ ຈະເປັນສິ່ງທີ່ໜ້າຕື່ນເຕັ້ນ ແລະ ຄ້ຳຈູນ” (“Becoming Exemplary Latter-day Saints,” Liahona, Nov. 2018, 113).

ຕົ້ນປີແມ່ນເວລາທີ່ດີ ທີ່ຈະປຶກສາຫາລືກັນເປັນຄອບຄົວກ່ຽວກັບການເຮັດໃຫ້ບ້ານເຮືອນຂອງທ່ານ “ເປັນສະຖານທີ່ສັກສິດແຫ່ງສັດທາ” ແລະ “ເປັນສູນກາງການຮຽນຮູ້ພຣະກິດຕິຄຸນ.” ເຮົາມີແນວຄິດໃດແດ່ກ່ຽວກັບວິທີທີ່ຈະເຮັດສິ່ງນີ້ ຂະນະທີ່ເຮົາອ່ານ ຄາລາເຕຍ 5:22–23 ແລະ ຟີລິບປອຍ 4:8? ບາງທີຄອບຄົວຂອງທ່ານສາມາດຕັ້ງເປົ້າໝາຍສ່ວນຕົວ ແລະ ຄອບຄົວ ເພື່ອສຶກສາພຣະຄຳພີໃໝ່ໃນປີທີ່ຈະມາເຖິງນີ້. ເຮົາຈະເຮັດແນວໃດເພື່ອເຕືອນຕົວເອງກ່ຽວກັບເປົ້າໝາຍຂອງເຮົາ?

ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ this week’s outline ໃນ Come, Follow Me—For Primary.

ເພງແນະນຳ: “ສອນເຮົາຍ່າງໃນແສງ,” ເພງສວດ ແລະ ເພງຂອງເດັກນ້ອຍ, 72.

ການປັບປຸງການສຶກສາສ່ວນຕົວ

ຊອກຫາຄຳສອນ. ຄຳສອນແມ່ນຄວາມຈິງນິລັນດອນ, ທີ່ບໍ່ປ່ຽນແປງ. ປະທານບອຍ ເຄ ແພ໊ກເກີ ໄດ້ປະກາດວ່າ “ຄຳສອນທີ່ແທ້ຈິງ, ເມື່ອເຂົ້າໃຈ, ມັນຈະປ່ຽນແປງທັດສະນະຄະຕິ ແລະ ພຶດຕິກຳ” (“Little Children,” Ensign, Nov. 1986, 17). ຂະນະທີ່ທ່ານ ແລະ ຄອບຄົວຂອງທ່ານສຶກສາ, ໃຫ້ຊອກຫາຄວາມຈິງທີ່ສາມາດຊ່ວຍພວກທ່ານໃຫ້ດຳລົງຊີວິດເໝືອນດັ່ງພຣະຜູ້ຊ່ວຍໃຫ້ລອດຫລາຍຂຶ້ນ.

ພຣະເຢຊູຄຣິດ — Light of the World [ຄວາມສະຫວ່າງຂອງໂລກ], ໂດຍ ບະເຣັ້ນ ໂບຣັບ