“ການລວມເພງສັກສິດເຂົ້າກັບການຮຽນຮູ້ພຣະກິດຕິຄຸນຂອງທ່ານ,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີໃໝ່ 2023 (2022)
“ການລວມເພງສັກສິດເຂົ້າກັບການຮຽນຮູ້ພຣະກິດຕິຄຸນຂອງທ່ານ,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2023
ການລວມເພງສັກສິດເຂົ້າກັບການຮຽນຮູ້ພຣະກິດຕິຄຸນຂອງທ່ານ
ການຮ້ອງເພງຊັ້ນປະຖົມໄວ ແລະ ເພງສວດ ສາມາດເປັນພອນໃຫ້ແກ່ທ່ານ ແລະ ຄອບຄົວຂອງທ່ານໃນຫລາຍວິທີທາງ. ແນວຄິດເຫລົ່ານີ້ສາມາດຊ່ວຍທ່ານໃຫ້ໃຊ້ເພງສັກສິດຂະນະທີ່ທ່ານພະຍາຍາມຮຽນຮູ້ ແລະ ດຳລົງຊີວິດຕາມພຣະກິດຕິຄຸນ.
-
ຮຽນຮູ້ຫລັກທຳຄຳສອນ. ໃຫ້ຊອກຫາຄວາມຈິງທີ່ສິດສອນຢູ່ໃນເພງທີ່ທ່ານຮ້ອງ ຫລື ຟັງ. ສິ່ງນີ້ອາດນຳໄປສູ່ການສົນທະນາເລື່ອງພຣະກິດຕິຄຸນກ່ຽວກັບຄວາມຈິງເຫລົ່ານີ້ຕະຫລອດທັງວັນ. ໃຫ້ຮ້ອງ ຫລື ຟັງເພງຊັ້ນປະຖົມໄວ ຫລື ເພງສວດທີ່ສິດສອນກ່ຽວກັບພຣະເຢຊູຄຣິດ ແລະ ພຣະກິດຕິຄຸນຂອງພຣະອົງ. ໃຫ້ເອົາໃຈໃສ່ຕໍ່ວິທີທີ່ພຣະວິນຍານບໍລິສຸດເປັນພະຍານເຖິງພຣະຜູ້ຊ່ວຍໃຫ້ລອດ ແລະ ຄຳສອນຂອງພຣະອົງ.
-
ຮັບຮູ້ພະລັງຂອງເພງ. ການຮ້ອງເພງ ແລະ ການຟັງເພງຊັ້ນປະຖົມໄວ ແລະ ເພງສວດ ສາມາດເປັນພອນໃນເວລາທີ່ຕ້ອງການໄດ້. ຍົກຕົວຢ່າງ, ການຮ້ອງເພງສາມາດເຮັດໃຫ້ເດັກສະຫງົບກ່ອນນອນ, ໃຫ້ຄວາມສຸກຂະນະທີ່ຄອບຄົວເຮັດວຽກງານນຳກັນ, ໃຫ້ກຳລັງໃຈເພື່ອນບ້ານທີ່ເຈັບປ່ວຍ, ຫລື ປອບໃຈບາງຄົນທີ່ມີຄວາມກັງວົນໄດ້.
-
ແບ່ງປັນປະສົບການ. ໃຫ້ແບ່ງປັນປະສົບການສ່ວນຕົວ ແລະ ປະສົບການຄອບຄົວທີ່ກ່ຽວຂ້ອງກັບຂ່າວສານຂອງເພງ. ທ່ານກໍຍັງສາມາດແບ່ງປັນເລື່ອງລາວພຣະຄຳພີທີ່ກ່ຽວຂ້ອງນຳອີກ.
-
ໃຫ້ຄອບຄົວຂອງທ່ານມີສ່ວນຮ່ວມ. ຄອບຄົວຂອງທ່ານຈະຮຽນຮູ້ຫລາຍຂຶ້ນຈາກເພງ ຖ້າຫາກເຂົາເຈົ້າມີພາກສ່ວນທີ່ແຂງຂັນ. ເພື່ອໃຫ້ສະມາຊິກໃນຄອບຄົວມີສ່ວນຮ່ວມ, ທ່ານສາມາດເຊື້ອເຊີນລູກຜູ້ໃຫຍ່ໃຫ້ຊ່ວຍສອນເພງໃຫ້ກັບນ້ອງໆ ຫລື ເຊື້ອເຊີນເດັກນ້ອຍໃຫ້ສອນເພງໜຶ່ງທີ່ພວກເຂົາໄດ້ຮຽນຢູ່ໃນຊັ້ນປະຖົມໄວໃຫ້ກັບຄອບຄົວ. ທ່ານກໍສາມາດໃຫ້ສະມາຊິກໃນຄອບຄົວປ່ຽນຜຽນກັນນຳເພງ.
-
ມີຄວາມຄິດສ້າງສັນ. ໃຫ້ໃຊ້ຫລາຍໆວິທີທາງເພື່ອຮຽນຮູ້ເພງສັກສິດເປັນຄອບຄົວ. ຍົກຕົວຢ່າງ, ທ່ານສາມາດສະແດງທ່າທີທີ່ເຂົ້າກັບຄຳ ແລະ ວະລີຢູ່ໃນເພງ. ຫລື ພວກທ່ານສາມາດປ່ຽນຜຽນກັນສະແດງຕາມເນື້ອເພງ ຂະນະທີ່ສະມາຊິກໃນຄອບຄົວຄົນອື່ນໆພະຍາຍາມເດົາຊື່ເພງ. ຄອບຄົວຂອງທ່ານອາດມັກຮ້ອງເພງໃນຄວາມໄວ ຫລື ໃນນ້ຳສຽງທີ່ແຕກຕ່າງກັນ. ແອັບຫ້ອງສະໝຸດພຣະກິດຕິຄຸນ ແລະ ແອັບພຣະກິດຕິຄຸນສຳລັບເດັກນ້ອຍມີແຟມສຽງ ແລະ ວິດີໂອທີ່ສາມາດຊ່ວຍພວກທ່ານຮຽນຮ້ອງເພງຕ່າງໆໄດ້. ທ່ານກໍສາມາດຮວບຮວມເພງສັກສິດໄວ້ນຳກັນໄດ້ ເພື່ອເອົາໄວ້ຟັງ.
ສຳລັບແນວຄິດເພີ່ມເຕີມ, ໃຫ້ເບິ່ງພາກ “Using Music to Teach Doctrine” ແລະ “Helping Children Learn and Remember Primary Songs and Hymns,” ຢູ່ໃນ “Instructions for Singing Time and the Children’s Sacrament Meeting Presentation” ໃນປຶ້ມ Come, Follow Me—For Primary.