“ແນວຄິດເພື່ອປັບປຸງການສຶກສາພຣະຄຳພີເປັນຄອບຄົວຂອງທ່ານ,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີໃໝ່ 2023 (2022)
“ແນວຄິດເພື່ອປັບປຸງການສຶກສາພຣະຄຳພີເປັນຄອບຄົວຂອງທ່ານ,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2023
ແນວຄິດເພື່ອປັບປຸງການສຶກສາພຣະຄຳພີເປັນຄອບຄົວຂອງທ່ານ
ການສຶກສາພຣະຄຳພີເປັນຄອບຄົວເປັນປະຈຳ ເປັນວິທີທາງທີ່ມີພະລັງ ທີ່ຈະຊ່ວຍຄອບຄົວຂອງທ່ານໃຫ້ຮູ້ສຶກເຖິງອິດທິພົນຂອງພຣະວິນຍານບໍລິສຸດ ແລະ ຮຽນຮູ້ພຣະກິດຕິຄຸນ. ການອ່ານຫລາຍ ຫລື ການອ່ານດົນ ແມ່ນບໍ່ສຳຄັນເທົ່າກັບການໃຊ້ຄວາມພະຍາຍາມຢ່າງບໍ່ປ່ຽນແປງ. ເມື່ອທ່ານເຮັດໃຫ້ການສຶກສາພຣະຄຳພີເປັນພາກສ່ວນໜຶ່ງທີ່ສຳຄັນໃນຊີວິດຄອບຄົວຂອງທ່ານ, ແລ້ວທ່ານຈະຊ່ວຍສະມາຊິກໃນຄອບຄົວຂອງທ່ານ ໃຫ້ເຂົ້າໃກ້ຊິດພຣະບິດາ ແລະ ພຣະເຢຊູຄຣິດຫລາຍຂຶ້ນ ແລະ ສ້າງປະຈັກພະຍານຂອງເຂົາເຈົ້າ ຢູ່ເທິງພື້ນຖານຂອງພຣະຄຳຂອງພຣະເຈົ້າ. ໃຫ້ຄິດທີ່ຈະປຶກສາຫາລືນຳກັນກ່ຽວກັບຄຳຖາມດັ່ງຕໍ່ໄປນີ້:
-
ສະມາຊິກໃນຄອບຄົວຂອງທ່ານຈະຊຸກຍູ້ກັນແລະກັນໃຫ້ສຶກສາພຣະຄຳພີເປັນສ່ວນຕົວໄດ້ແນວໃດ?
-
ສະມາຊິກໃນຄອບຄົວຂອງທ່ານສາມາດເຮັດຫຍັງແດ່ເພື່ອຊຸກຍູ້ກັນແລະກັນໃຫ້ແບ່ງປັນສິ່ງທີ່ເຂົາເຈົ້າກຳລັງຮຽນຮູ້?
-
ທ່ານຈະສາມາດເນັ້ນໜັກຫລັກທຳທີ່ທ່ານໄດ້ຮຽນຮູ້ຢູ່ໃນພຣະຄຳພີໃໝ່ ໃນຊ່ວງເວລາການສິດສອນແຕ່ລະວັນແນວໃດ?
ຈົ່ງຈື່ຈຳໄວ້ວ່າ ບ້ານເຮືອນເປັນສະຖານທີ່ ທີ່ດີເລີດສຳລັບການຮຽນຮູ້ພຣະກິດຕິຄຸນ. ທ່ານສາມາດຮຽນຮູ້ ແລະ ສິດສອນພຣະກິດຕິຄຸນຢູ່ທີ່ບ້ານ ໃນວິທີທາງທີ່ຫ້ອງຮຽນຂອງສາດສະໜາຈັກບໍ່ສາມາດເຮັດໄດ້. ໃຫ້ຮູ້ຈັກສ້າງສັນ ຂະນະທີ່ທ່ານຄິດຫາວິທີທາງ ທີ່ຈະຊ່ວຍເຫລືອຄອບຄົວຂອງທ່ານ ໃຫ້ຮຽນຮູ້ຈາກພຣະຄຳພີ. ໃຫ້ພິຈາລະນາແນວຄິດບາງຢ່າງດັ່ງຕໍ່ໄປນີ້ ເພື່ອສົ່ງເສີມການສຶກສາພຣະຄຳພີເປັນຄອບຄົວຂອງທ່ານ.
ໃຊ້ເພງ
ໃຫ້ຮ້ອງເພງທີ່ສະໜັບສະໜູນຫລັກທຳທີ່ສິດສອນຢູ່ໃນພຣະຄຳພີ. ເພງສວດ ແລະ ເພງຂອງເດັກນ້ອຍທີ່ແນະນຳ ໄດ້ຖືກລະບຸໄວ້ຢູ່ໃນໂຄງຮ່າງໃນແຕ່ລະອາທິດ. ທ່ານອາດຖາມຄຳຖາມກັບສະມາຊິກໃນຄອບຄົວກ່ຽວກັບຖ້ອຍຄຳ ຫລື ວະລີຂອງເນື້ອເພງ. ນອກເໜືອໄປຈາກການຮ້ອງເພງແລ້ວ, ຄອບຄົວຂອງທ່ານຍັງສາມາດສະແດງທ່າທີທີ່ເຂົ້າກັບເພງ ຫລື ຟັງເພງເບົາໆ ຂະນະທີ່ເຮັດກິດຈະກຳຢ່າງອື່ນໆ. ສຳລັບແນວຄິດເພີ່ມເຕີມ, ໃຫ້ເບິ່ງ “ການລວມເພງສັກສິດເຂົ້າກັບການຮຽນຮູ້ພຣະກິດຕິຄຸນຂອງທ່ານ” ຢູ່ໃນແຫລ່ງນີ້.
ແບ່ງປັນຂໍ້ພຣະຄຳພີທີ່ມີຄວາມໝາຍ
ໃຫ້ເວລາສະມາຊິກໃນຄອບຄົວ ທີ່ຈະແບ່ງປັນຂໍ້ພຣະຄຳພີ ທີ່ເຂົາເຈົ້າພົບເຫັນວ່າມີຄວາມໝາຍລະຫວ່າງການສຶກສາສ່ວນຕົວຂອງເຂົາເຈົ້າ.
ໃຊ້ຄຳຂອງທ່ານເອງ
ເຊື້ອເຊີນສະມາຊິກໃນຄອບຄົວໃຫ້ກ່າວສະຫລຸບດ້ວຍຄຳຂອງຕົວເອງ ເຖິງສິ່ງທີ່ເຂົາເຈົ້າໄດ້ຮຽນຮູ້ຈາກພຣະຄຳພີທີ່ພວກທ່ານສຶກສາ.
ນຳໃຊ້ຂໍ້ພຣະຄຳພີກັບຊີວິດຂອງທ່ານ
ຫລັງຈາກໄດ້ອ່ານຂໍ້ພຣະຄຳພີແລ້ວ, ຂໍໃຫ້ສະມາຊິກໃນຄອບຄົວແບ່ງປັນວິທີທີ່ຂໍ້ພຣະຄຳພີກ່ຽວຂ້ອງກັບຊີວິດຂອງເຂົາເຈົ້າແນວໃດ.
ຖາມຄຳຖາມ
ເຊື້ອເຊີນສະມາຊິກໃນຄອບຄົວໃຫ້ຖາມກ່ຽວກັບພຣະກິດຕິຄຸນ, ແລະ ແລ້ວໃຫ້ໃຊ້ເວລາຊອກຫາຂໍ້ພຣະຄຳພີທີ່ສາມາດຊ່ວຍຕອບຄຳຖາມດັ່ງກ່າວ.
ສະແດງຂໍ້ພຣະຄຳພີ
ໃຫ້ເລືອກເອົາຂໍ້ໜຶ່ງທີ່ທ່ານເຫັນວ່າ ມັນມີຄວາມໝາຍ, ແລະ ໃຫ້ສະແດງມັນໄວ້ໃນບ່ອນທີ່ສະມາຊິກໃນຄອບຄົວສາມາດຫລຽວເຫັນມັນໄດ້ເລື້ອຍໆ. ເຊື້ອເຊີນສະມາຊິກໃນຄອບຄົວຄົນອື່ນໆ ໃຫ້ເລືອກຂໍ້ພຣະຄຳພີ ເພື່ອສະແດງ.
ຂຽນລາຍການຂໍ້ພຣະຄຳພີ
ນຳກັນເປັນຄອບຄົວ, ໃຫ້ເລືອກເອົາພຣະຄຳພີຫລາຍຂໍ້ ເພື່ອວ່າພວກທ່ານຈະໄດ້ສົນທະນາ ລະຫວ່າງອາທິດທີ່ຈະມາເຖິງ.
ທ່ອງຈຳຂໍ້ພຣະຄຳພີ
ໃຫ້ເລືອກເອົາຂໍ້ພຣະຄຳພີໃດໜຶ່ງ ທີ່ມີຄວາມໝາຍຕໍ່ຄອບຄົວຂອງທ່ານ, ແລະ ໃຫ້ເຊື້ອເຊີນສະມາຊິກໃນຄອບຄົວທ່ອງຈຳມັນ ໂດຍການກ່າວລຶ້ມຄືນທຸກວັນ ຫລື ຫລິ້ນເກມທ່ອງຈຳ.
ແບ່ງປັນບົດຮຽນທີ່ໃຊ້ສິ່ງຂອງ
ໃຫ້ຊອກຫາສິ່ງຂອງທີ່ກ່ຽວພັນກັບຫລັກທຳພຣະກິດຕິຄຸນໃນຂໍ້ພຣະຄຳພີທີ່ພວກທ່ານກຳລັງອ່ານເປັນຄອບຄົວ. ເຊື້ອເຊີນສະມາຊິກໃນຄອບຄົວໃຫ້ເວົ້າລົມກັນກ່ຽວກັບວິທີທີ່ສິ່ງຂອງກ່ຽວພັນກັບການສິດສອນຢູ່ໃນພຣະຄຳພີແນວໃດ.
ເລືອກຫົວຂໍ້
ໃຫ້ສະມາຊິກໃນຄອບຄົວປ່ຽນກັນເລືອກເອົາຫົວຂໍ້ທີ່ຄອບຄົວຈະສຶກສານຳກັນ. ໃຫ້ໃຊ້ Topical Guide, Bible Dictionary, ຫລື ຄູ່ມືພຣະຄຳພີ (scriptures.ChurchofJesusChrist.org) ເພື່ອຊອກຫາຂໍ້ພຣະຄຳພີ ທີ່ກ່ຽວກັບຫົວຂໍ້.
ແຕ້ມຮູບ
ໃຫ້ອ່ານສອງສາມຂໍ້ເປັນຄອບຄົວ, ແລະ ແລ້ວປ່ອຍໃຫ້ສະມາຊິກໃນຄອບຄົວແຕ້ມບາງສິ່ງທີ່ກ່ຽວພັນກັບສິ່ງທີ່ພວກທ່ານໄດ້ອ່ານ. ໃຫ້ໃຊ້ເວລາສົນທະນາກ່ຽວກັບຮູບແຕ້ມຂອງກັນແລະກັນ.
ສະແດງຕາມເລື່ອງ
ຫລັງຈາກອ່ານເລື່ອງໃດເລື່ອງໜຶ່ງແລ້ວ, ໃຫ້ເຊື້ອເຊີນສະມາຊິກໃນຄອບຄົວສະແດງຕາມເລື່ອງນັ້ນ. ຫລັງຈາກນັ້ນ, ໃຫ້ເວົ້າລົມກັນກ່ຽວກັບວິທີທີ່ເລື່ອງເລົ່າກ່ຽວພັນກັບສິ່ງທີ່ພວກທ່ານໄດ້ປະເຊີນເປັນສ່ວນບຸກຄົນ ແລະ ເປັນຄອບຄົວແນວໃດ.
ປະທານຣະໂຊ ເອັມ ແນວສັນ ໄດ້ກ່າວວ່າ: “ຂ້າພະເຈົ້າສັນຍາວ່າ ເມື່ອເຮົາທຳງານຢ່າງພາກພຽນ ເພື່ອສ້ອມແປງບ້ານເຮືອນຂອງເຮົາ ໃຫ້ເປັນສູນກາງການຮຽນຮູ້ພຣະກິດຕິຄຸນ, ແລ້ວເມື່ອເວລາຜ່ານໄປ ວັນຊະບາໂຕ ຂອງທ່ານ ຈະເປັນມື້ທີ່ມີຄວາມສຸກຫລາຍແທ້ໆ. ລູກໆຂອງທ່ານ ຈະຕື່ນເຕັ້ນ ທີ່ຈະຮຽນຮູ້ ແລະ ດຳລົງຊີວິດຕາມຄຳສອນຂອງພຣະຜູ້ຊ່ວຍໃຫ້ລອດ, ແລະ ອິດທິພົນຂອງຜູ້ປໍລະປັກ ໃນຊີວິດ ຂອງທ່ານ ແລະ ໃນບ້ານເຮືອນ ຂອງທ່ານ ຈະລົດນ້ອຍຖອຍລົງ. ການປ່ຽນແປງໃນຄອບຄົວຂອງທ່ານ ຈະເປັນສິ່ງທີ່ໜ້າຕື່ນເຕັ້ນ ແລະ ຄ້ຳຈູນ” (“Becoming Exemplary Latter-day Saints,” Liahona, Nov. 2018, 113).