“ວັນທີ 6–12 ເດືອນກຸມພາ. ໂຢຮັນ 2–4: ‘ເຈົ້າທັງຫລາຍຈຳເປັນຕ້ອງເກີດມາໃໝ່,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີໃໝ່ 2023 (2022)

“ວັນທີ 6–12 ເດືອນກຸມພາ. ໂຢຮັນ 2–4,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2023

ຮູບພາບ

ພຣະເຢຊູກຳລັງກ່າວກັບນີໂກເດມ

ວັນທີ 6–12 ເດືອນກຸມພາ

ໂຢຮັນ 2–4

“ເຈົ້າທັງຫລາຍຈຳເປັນຕ້ອງເກີດມາໃໝ່”

ຂະນະທີ່ທ່ານອ່ານ ໂຢຮັນ 2–4, ພຣະວິນຍານຈະສິດສອນທ່ານເຖິງສິ່ງທີ່ກ່ຽວກັບການປ່ຽນໃຈເຫລື້ອມໃສຂອງທ່ານເອງ. ໃຫ້ຂຽນການກະຕຸ້ນຂອງພຣະອົງໄວ້. ທ່ານອາດພົບເຫັນຄວາມຮູ້ທາງວິນຍານເພີ່ມເຕີມ ຈາກແນວຄິດສຶກສາຢູ່ໃນໂຄງຮ່າງນີ້.

ບັນທຶກຄວາມປະທັບໃຈຂອງທ່ານ

ຢູ່ທີ່ງານສົມຣົດໃນບ້ານການາ, ພຣະຄຣິດໄດ້ປ່ຽນນ້ຳເປັນເຫລົ້າອະງຸ່ນ—ເປັນເຫດການທີ່ໂຢຮັນເອີ້ນວ່າ “ການອັດສະຈັນເທື່ອທຳອິດ” (ໂຢຮັນ 2:11). ສິ່ງນັ້ນເປັນຄວາມຈິງຫລາຍກວ່າໃນຄວາມຮູ້ສຶກໜຶ່ງ. ຂະນະທີ່ສິ່ງນີ້ເປັນການອັດສະຈັນເທື່ອທຳອິດ ທີ່ພຣະເຢຊູໄດ້ກະທຳຢ່າງເປີດເຜີຍ, ແຕ່ມັນກໍສາມາດເປັນສັນຍາລັກເຖິງການເລີ່ມຕົ້ນທີ່ມະຫັດສະຈັນອີກຢ່າງ—ເປັນຂັ້ນຕອນຂອງການປ່ຽນແປງໃຈເຮົາ ຂະນະທີ່ເຮົາກາຍເປັນເໝືອນດັ່ງພຣະຜູ້ຊ່ວຍໃຫ້ລອດຫລາຍຂຶ້ນ. ການອັດສະຈັນຂອງຕະຫລອດຊີວິດນີ້ ເລີ່ມຕົ້ນດ້ວຍການຕັດສິນໃຈທີ່ຈະຕິດຕາມພຣະເຢຊູຄຣິດ, ທີ່ຈະປ່ຽນແປງ ແລະ ດຳລົງຊີວິດທີ່ດີກວ່າເກົ່າຜ່ານທາງພຣະອົງ. ການອັດສະຈັນນີ້ສາມາດເປັນການປ່ຽນແປງຊີວິດແທ້ໆ ຊຶ່ງການ “ເກີດມາໃໝ່” ເປັນວິທີໜຶ່ງທີ່ດີທີ່ສຸດ ໃນການບັນຍາຍກ່ຽວກັບມັນ (ໂຢຮັນ 3:7). ແຕ່ການເກີດມາໃໝ່ເປັນພຽງການເລີ່ມຕົ້ນໃນເສັ້ນທາງແຫ່ງການເປັນສານຸສິດເທົ່ານັ້ນ. ພຣະຄຳຂອງພຣະຄຣິດຕໍ່ຍິງຊາວຊາມາເຣຍຢູ່ທີ່ນ້ຳສ້າງເຕືອນເຮົາວ່າ ຖ້າຫາກເຮົາເດີນຕໍ່ໄປໃນເສັ້ນທາງນີ້, ໃນທີ່ສຸດພຣະກິດຕິຄຸນຈະກາຍເປັນ “ນ້ຳພຸ” ໃນຕົວເຮົາ, “ຈະພຸ່ງຂຶ້ນເຖິງຊີວິດນິລັນດອນ” (ໂຢຮັນ 4:14).

ຮູບພາບ

ຮູບເຄື່ອງໝາຍການສຶກສາສ່ວນຕົວ

ແນວຄິດສຳລັບການສຶກສາພຣະຄຳພີເປັນສ່ວນຕົວ

ໂຢຮັນ 2:1–11

ການອັດສະຈັນຂອງພຣະເຢຊູຄຣິດ “ເປີດເຜີຍສະຫງ່າລາສີຂອງພຣະອົງໃຫ້ປະກົດ.”

ຂະນະທີ່ທ່ານອ່ານກ່ຽວກັບພຣະຜູ້ຊ່ວຍໃຫ້ລອດປ່ຽນນ້ຳໃຫ້ເປັນເຫລົ້າອະງຸ່ນໃນ ໂຢຮັນ 2:1–11, ທ່ານອາດໄດ້ຮັບຄວາມຮູ້ເພີ່ມເຕີມ ໂດຍການພິຈາລະນາມຸມມອງຂອງຜູ້ຄົນທີ່ຫລາກຫລາຍຢູ່ທີ່ນັ້ນ, ລວມທັງນາງມາຣີ, ພວກສາວົກ, ແລະ ຄົນອື່ນໆ. ຖ້າຫາກທ່ານໄດ້ເປັນພະຍານເຖິງເຫດການທີ່ບັນຍາຍໃນນີ້, ທ່ານຈະມີຄວາມປະທັບໃຈແນວໃດກ່ຽວກັບພຣະເຢຊູ? ການມະຫັດສະຈັນນີ້ສິດສອນທ່ານຫຍັງແດ່ກ່ຽວກັບພຣະອົງ?

ໂຢຮັນ 3:1–21

ເຮົາຈະຕ້ອງເກີດມາໃໝ່ອີກຄັ້ງ ເພື່ອຈະໄດ້ເຂົ້າໄປໃນອານາຈັກຂອງພຣະເຈົ້າ.

ຕອນນີໂກເດມໄດ້ມາຫາພຣະເຢຊູເປັນສ່ວນຕົວ, ເພິ່ນເປັນພຽງຜູ້ສັງເກດທີ່ລະມັດລະວັງ. ເຖິງຢ່າງໃດກໍຕາມ, ຕໍ່ມາ, ເພິ່ນໄດ້ປ້ອງກັນພຣະເຢຊູໃນສາທາລະນະ (ເບິ່ງ ໂຢຮັນ 7:45–52) ແລະ ໄດ້ຮ່ວມມືກັບຜູ້ທີ່ເຊື່ອໃນການຝັງພຣະສົບຂອງພຣະຜູ້ຊ່ວຍໃຫ້ລອດ (ເບິ່ງ ໂຢຮັນ 19:38–40). ມີຄຳສອນໃດແດ່ທີ່ທ່ານພົບເຫັນຢູ່ໃນ ໂຢຮັນ 3:1–21 ທີ່ອາດດົນໃຈນີໂກເດມໃຫ້ຕິດຕາມພຣະເຢຊູ ແລະ ເກີດມາໃໝ່ອີກຄັ້ງ?

ສາດສະດາໂຈເຊັບ ສະມິດ ໄດ້ສິດສອນວ່າ, “ການເກີດມາໃໝ່, ມີມາໂດຍພຣະວິນຍານຂອງພຣະເຈົ້າ ຜ່ານທາງພິທີການຕ່າງໆ” (Teachings of Presidents of the Church: Joseph Smith [2007], 95). ການບັບຕິສະມາ ແລະ ການຢືນຢັນຂອງທ່ານມີບົດບາດ—ໃນການ “ບັງເກີດຈາກນ້ຳ ແລະ ຈາກພຣະວິນຍານ” (ໂຢຮັນ 3:5)—ໃນການເກີດມາໃໝ່ອີກຄັ້ງຂອງທ່ານແນວໃດ? ທ່ານຈະເຮັດແນວໃດເພື່ອສືບຕໍ່ໃນຂັ້ນຕອນການປ່ຽນແປງນີ້? (ເບິ່ງ ແອວມາ 5:11–14).

ເບິ່ງ ໂມໄຊຢາ 5:7; 27:25–26; David A. Bednar, “Ye Must Be Born Again,” Liahona, May 2007, 19–22 ນຳອີກ.

ໂຢຮັນ 3:16–17

ພຣະບິດາເທິງສະຫວັນສະແດງຄວາມຮັກຂອງພຣະອົງຕໍ່ເຮົາຜ່ານທາງພຣະເຢຊູຄຣິດ.

ແອວເດີ ແຈັບຟະຣີ ອາ ຮໍແລນ ໄດ້ສິດສອນວ່າ, “ຄວາມຈິງ ຂໍ້ໃຫຍ່ ແລະ ຂໍ້ຕົ້ນຂອງຊົ່ວນິລັນດອນກໍຄືວ່າ ພຣະເຈົ້າຮັກ ເຮົາ ດ້ວຍສຸດພຣະໄທ, ພະລັງ, ຄວາມນຶກຄິດ, ແລະ ລິດອຳນາດ ຂອງພຣະອົງ” (“Tomorrow the Lord Will Do Wonders among You,” Liahona, May 2016, 127). ທ່ານຮູ້ສຶກແນວໃດເຖິງຄວາມຮັກຂອງພຣະເຈົ້າ ຜ່ານທາງຂອງປະທານທີ່ເປັນພຣະບຸດຂອງພຣະອົງ?

ສິນລະລຶກໃຫ້ເວລາທີ່ຈະສະທ້ອນຄິດເຖິງຄວາມຮັກຂອງພຣະເຈົ້າ ແລະ ຂອງປະທານທີ່ເປັນພຣະບຸດຂອງພຣະອົງ. ເພງສວດສິນລະລຶກເພງໃດ ທີ່ຊ່ວຍທ່ານໃຫ້ຮູ້ສຶກເຖິງຄວາມຮັກນີ້? ທ່ານສາມາດເຮັດສິ່ງໃດເພື່ອເຮັດໃຫ້ສິນລະລຶກມີຄວາມໝາຍຫລາຍກວ່າເກົ່າ?

ຂະນະທີ່ທ່ານອ່ານຕໍ່ໄປກ່ຽວກັບຄຳສອນ ແລະ ການປະຕິບັດສາດສະໜາກິດຂອງພຣະຜູ້ຊ່ວຍໃຫ້ລອດ, ໃຫ້ຖາມຕົວເອງວ່າສິ່ງທີ່ທ່ານອ່ານ ຊ່ວຍທ່ານໃຫ້ເຂົ້າໃຈ ແລະ ຮູ້ສຶກເຖິງຄວາມຮັກຂອງພຣະເຈົ້າແນວໃດ.

ໂຢຮັນ 4:24

ພຣະເຈົ້າເປັນວິນຍານບໍ?

ບາງຄົນອາດສັບສົນໂດຍສິ່ງທີ່ພຣະເຢຊູໄດ້ກ່າວວ່າ ພຣະເຈົ້າເປັນວິນຍານ. ການແປຂອງໂຈເຊັບ ສະມິດ ກ່ຽວກັບຂໍ້ນີ້ ໃຫ້ຄຳຊີ້ແຈງທີ່ສຳຄັນວ່າ: “ເພາະແກ່ຄົນເຊັ່ນນັ້ນ ພຣະເຈົ້າໄດ້ສັນຍາວ່າຈະມອບພຣະວິນຍານຂອງພຣະອົງໃຫ້” (ໃນ ໂຢຮັນ 4:24, ໝາຍເຫດຢູ່ທາງລຸ່ມໜ້າປຶ້ມ ກ ). ການເປີດເຜີຍສະໄໝໃໝ່ກໍສິດສອນຄືກັນວ່າ ພຣະເຈົ້າມີພຣະກາຍທີ່ເປັນເນື້ອໜັງ ແລະ ກະດູກ (ເບິ່ງ ຄຳສອນ ແລະ ພັນທະສັນຍາ 130:22–23; ເບິ່ງ ປະຖົມມະການ 5:1–3; ເຮັບເຣີ 1:1–3) ນຳອີກ.

ໂຢຮັນ 4:5–26

ພຣະຄຣິດສະເໜີມອບນ້ຳທີ່ປະກອບດ້ວຍຊີວິດຂອງພຣະອົງໃຫ້ແກ່ເຮົາ.

ພຣະເຢຊູອາດໝາຍຄວາມວ່າແນວໃດ ເມື່ອພຣະອົງບອກຍິງຊາວຊາມາເຣຍວ່າ ຜູ້ໃດກໍຕາມທີ່ດື່ມນ້ຳທີ່ພຣະອົງສະເໜີມອບໃຫ້ນັ້ນ ຈະບໍ່ຢາກອີກຈັກເທື່ອ? ພຣະກິດຕິຄຸນເປັນເໝືອນດັ່ງນ້ຳທີ່ປະກອບດ້ວຍຊີວິດແນວໃດ?

ພຣະກິດຕິຄຸນຂອງພຣະຄຣິດຄືນ້ຳທີ່ປະກອບດ້ວຍຊີວິດ ທີ່ບຳລຸງລ້ຽງຈິດວິນຍານຂອງເຮົາ.

ຂ່າວສານຢ່າງໜຶ່ງຂອງພຣະຜູ້ຊ່ວຍໃຫ້ລອດຕໍ່ຍິງຊາວຊາມາເຣຍແມ່ນວ່າ ວິທີທີ່ເຮົານະມັດສະການ ແມ່ນສຳຄັນກວ່າສະຖານທີ່ ທີ່ເຮົານະມັດສະການ (ເບິ່ງ ໂຢຮັນ 4:21–24). ທ່ານກຳລັງເຮັດສິ່ງໃດ ເພື່ອ “ນະມັດສະການພຣະບິດາດ້ວຍວິນຍານ ແລະ ຄວາມຈິງ”? (ໂຢຮັນ 4:23).

ເບິ່ງ ຄູ່ມືພຣະຄຳພີ, “ນະມັດສະການ,” scriptures.ChurchofJesusChrist.org; Dean M. Davies, “The Blessings of Worship,” Liahona, Nov. 2016, 93–95 ນຳອີກ.

ຮູບພາບ

ຮູບເຄື່ອງໝາຍການສຶກສາເປັນຄອບຄົວ

ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ

ໂຢຮັນ 2–4.ຂະນະທີ່ຄອບຄົວຂອງທ່ານອ່ານບົດເຫລົ່ານີ້ ໃນອາທິດນີ້, ໃຫ້ເອົາໃຈໃສ່ເປັນພິເສດເຖິງວິທີທີ່ພຣະຜູ້ຊ່ວຍໃຫ້ລອດໄດ້ໃຊ້ສິ່ງຂອງປະຈຳວັນ—ການກຳເນີດ, ລົມ, ນ້ຳ, ແລະ ອາຫານ—ເພື່ອສິດສອນຄວາມຈິງທາງວິນຍານແນວໃດ. ມີສິ່ງຂອງຢ່າງໃດແດ່ຢູ່ໃນເຮືອນຂອງທ່ານ ທີ່ທ່ານສາມາດໃຊ້ເພື່ອສິດສອນຄວາມຈິງທາງວິນຍານ?

ຂະນະທີ່ທ່ານສຶກສາບົດເຫລົ່ານີ້, ໃຫ້ຄິດທີ່ຈະເບິ່ງວິດີໂອນຳກັນ ອັນທີ່ສະແດງເລື່ອງລາວເຊັ່ນ: “ພຣະເຢຊູປ່ຽນນ້ຳເປັນເຫລົ້າອະງຸ່ນ,” “ພຣະເຢຊູຊຳລະພຣະວິຫານ,” “ພຣະເຢຊູສິດສອນເລື່ອງການເກີດມາໃໝ່,” ແລະ “ພຣະເຢຊູສິດສອນຍິງຊາວຊາມາເຣຍ” (ChurchofJesusChrist.org).

ໂຢຮັນ 2:13–17.ມີອິດທິພົນບໍ່ສະອາດຢ່າງໃດແດ່ ທີ່ຄອບຄົວຂອງທ່ານຕ້ອງກີດກັນບໍ່ໃຫ້ເຂົ້າມາໃນບ້ານເຮືອນຂອງທ່ານ ເພື່ອວ່າມັນຈະໄດ້ເປັນສະຖານທີ່ສັກສິດ—ຄືກັນກັບພຣະວິຫານ? ທ່ານຈະເຮັດສິ່ງໃດເພື່ອຈະໄດ້ຮັກສາສິ່ງເຫລົ່ານັ້ນໃຫ້ຢູ່ຂ້າງນອກ?

ໂຢຮັນ 3:1–6.ໃຫ້ເວົ້າລົມກັບຄອບຄົວຂອງທ່ານກ່ຽວກັບການອັດສະຈັນຂອງການຕັ້ງທ້ອງ ແລະ ການກຳເນີດ—ຂັ້ນຕອນຂອງການສ້າງມະນຸດທີ່ມີຊີວິດ ແລະ ສະຫລາດຫລັກແຫລມ. ພຣະເຢຊູໄດ້ສິດສອນວ່າ ເຮົາຈະຕ້ອງເກີດມາໃໝ່ ກ່ອນຈະສາມາດເຂົ້າໄປໃນອານາຈັກຂອງພຣະເຈົ້າ. ເປັນຫຍັງການເກີດມາໃໝ່ຈຶ່ງເປັນການປຽບທຽບທີ່ດີ ສຳລັບການປ່ຽນແປງທີ່ຮຽກຮ້ອງໃຫ້ເຮົາເຮັດ ກ່ອນເຮົາຈະສາມາດເຂົ້າໄປໃນອານາຈັກຂອງພຣະເຈົ້າ? ເຮົາຈະສາມາດມີປະສົບການກັບຂັ້ນຕອນຂອງການເກີດມາໃໝ່ທາງວິນຍານໄດ້ແນວໃດ?

ໂຢຮັນ 3:16–17.ເຊື້ອເຊີນສະມາຊິກໃນຄອບຄົວໃຫ້ກ່າວຊ້ຳຂໍ້ເຫລົ່ານີ້ໃນຖ້ອຍຄຳຂອງເຂົາເຈົ້າເອງ ຄືກັບວ່າເຂົາເຈົ້າກຳລັງອະທິບາຍມັນໃຫ້ກັບໝູ່ຄົນໜຶ່ງຟັງ. ພຣະເຢຊູຄຣິດຊ່ວຍເຮົາໃຫ້ຮູ້ສຶກເຖິງຄວາມຮັກຂອງພຣະເຈົ້າໄດ້ແນວໃດ?

ໂຢຮັນ 4:5–15.ພຣະຜູ້ຊ່ວຍໃຫ້ລອດໄດ້ສິດສອນສິ່ງໃດໃຫ້ກັບເຮົາ ຕອນພຣະອົງປຽບທຽບພຣະກິດຕິຄຸນຂອງພຣະອົງໃສ່ກັບນ້ຳທີ່ປະກອບດ້ວຍຊີວິດ? ບາງທີຄອບຄົວຂອງທ່ານສາມາດຫລຽວເບິ່ງນ້ຳທີ່ກຳລັງໄຫລ ແລະ ບັນຍາຍຄຸນນະພາບຂອງນ້ຳ. ເປັນຫຍັງເຮົາຈຶ່ງຕ້ອງດື່ມນ້ຳທຸກວັນ? ໃນທາງໃດແດ່ທີ່ພຣະກິດຕິຄຸນຂອງພຣະເຢຊູຄຣິດເປັນຄືກັນກັບ “ນ້ຳພຸທີ່ຈະພຸ່ງຂຶ້ນເຖິງຊີວິດນິລັນດອນ”? (ໂຢຮັນ 4:14).

ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ this week’s outline ໃນ Come, Follow Me—For Primary.

ເພງແນະນຳ: “ພຣະວິນຍານພຣະເຈົ້າ,” ເພງສວດ ແລະ ເພງຂອງເດັກນ້ອຍ, 30.

ການປັບປຸງການສຶກສາສ່ວນຕົວ

ຊອກຫາສັນຍາລັກ. ພຣະຄຳພີມັກໃຊ້ສິ່ງຂອງ, ເຫດການ, ຫລື ການກະທຳທີ່ເປັນຕົວແທນໃຫ້ແກ່ຄວາມຈິງທາງວິນຍານ. ສັນຍາລັກເຫລົ່ານີ້ສາມາດຊ່ວຍທ່ານໃຫ້ເຂົ້າໃຈຫລາຍກວ່າເກົ່າກ່ຽວກັບຄຳສອນທີ່ກຳລັງຖືກສິດສອນ. ຍົກຕົວຢ່າງ, ພຣະຜູ້ຊ່ວຍໃຫ້ລອດໄດ້ປຽບທຽບການປ່ຽນໃຈເຫລື້ອມໃສໃສ່ກັບການເກີດມາໃໝ່.