“27 marzo–2 abril. Mateo 14; Markos 6; Jwan 5-6: “Mexxiwak,” ” Kim, Taaqehin—Choq’ reheb’ li komon ut li junkab’al: Li Ak’ Chaq’rab’ 2023 (2022)
“27 marzo–2 abril. Mateo 14; Markos 6; Jwan 5-6,” Kim, Taaqehin—Choq’ reheb’ li komon ut li junkab’al: 2023
27 marzo–2 abril.
Mateo 14; Markos 6; Jwan 5–6
“Mexxiwak”
Naq nakawil Mateo 14; Markos 6; ut Jwan 5–6, sik’eb’ li na’leb’ li neke’xtoch’ aach’ool. Naru nakak’e li patz’om jo’ “Chan ru naq neke’k’anjelak li esilal sa’eb’ li ch’ol a’in choq’ we laa’in?” “K’a’ru li na’leb’ nintaw choq’ re lin yu’am?” malaj “K’a’ru nawaj xwotzb’al rik’in lin junkab’al ut rik’ineb’ xkomon chik li kristiaan?”
Tz’iib’a li nakak’oxla
K’a’ru ki’eek’asink re laj Pedro chi elk chaq sa’ lix jukub’ sa’ xyi li Palaw re Galilea naq wan kawil iq’? K’a’ut naq kixk’oxla naq wi li Jesus naru chi b’eek chiru li ha’, a’an ajwi’ taaruuq chixb’aanunkil? Ink’a’ naru naqanaw chi tz’aqal, a’ut maare laj Pedro kixtaw ru naq li ralal li Dios ink’a’ ka’ajwi’ kichal re xb’aanunkil li sachb’a-ch’oolejil b’aanuhom, maare re ajwi’ xk’eeb’al xwankileb’ li kristiaan jo’ laj Pedro chixb’aanunkil ajwi’ li sachb’a-ch’oolejil b’aanuhom. Relik chi yaal, a’an ajwi’ lix b’oqom li Jesus: “Kim, taaqehin” (Lukas 18:22). Laj Pedro ak kixk’ul li b’oqok a’in jun sut, ut ok re chixk’ulb’al wi’chik, us ta wan xxiw ut yoo chixb’aanunkil li k’a’ru chanchan ink’a’ naru xb’aanunkil. Maare li Qaawa’ ink’a’ tixpatz’ naq too’elq chaq sa’ jun jukub’ sa’ xyi li kaq-sut-iq’ malaj naq taqak’e xb’ab’ayil li qawa naq wankeb’ k’iila mil li te’raj wa’ak, a’ut wan naq tixpatz’ naq taqapaab’ lix yehom us ta ink’a’ naqataw ru chi tz’aqal. Naq wan k’a’ru naxtz’aama chiqu, wan naq taasachq qach’ool rik’in, wan naq tooxuwaq. A’b’anan naru na’uxman li sachb’a-ch’oolej wi laa’o, jo’ laj Pedro, naqakanab’ li qaxiw, lix kab’il rix li qach’ool, ut xka’ch’inal li qana’leb’, ut naqataaqe a’an rik’in paab’aal.
Li na’leb’ re xtzolb’aleb’ li loq’laj hu aajunes
Li Jesukristo naroxloq’i lix Yuwaʼ.
Tento naq loq’aq li k’a’ru neke’reek’a chirib’ileb’ rib’ li qaChoxahil Yuwa’ ut chixjunqaleb’ li ralal xk’ajol. Sa’eb’ li raqal a’in, li Jesukristo naxk’ut chiqu jun eetalil li naxye chan ru naq tento toowanq rik’in li qaChoxahil Yuwa’. Il Jwan 5:17–47 ut k’e reetal jarub’ sut na’oksiman li aatin Yuwa’. Chan ru naq li K’ajolb’ej naroxloq’i li Yuwa’b’ej, ut chan ru nakatru laa’at chixb’aanunkil ajwi’? K’a’ru xatzol chirix li reek’ahom xch’ool li Yuwa’b’ej choq’ re li Ralal? K’a’ru eek’asinb’ilat chixb’aanunkil re xkawob’resinkil laa wanjik rik’in laa Choxahil Yuwa’?
Chi’ilmanq ajwi’ Jwan 17; Jeffrey R. Holland, “La grandiosidad de Dios,” Liahona, noviembre 2003, 70–73.
Jo’ jun sachb’a-ch’oolej, li Jesus kixk’e chi wa’ak oob’ mil rik’in oob’ kaxlan wa ut wiib’ kar.
Mateo 14:15–21; Markos 6:33–44; Jwan 6:5–14
Li Kolonel naru chixnimob’resinkil ru lin ch’ina mayej re taab’aanumanq lix k’anjel.
Ma wan naq nakaweek’a naq ink’a’ tatruuq chixb’aanunkil chixjunil li ajb’il ru sa’ aasutam—sa’ laa wochoch, rik’ineb’ laa was aawiitz’in, malaj sa’ laa tenamit? Eb’ lix tzolom li Jesus maare ke’reek’a naq maak’a’eb’ xwankil naq a’an kixye reheb’ naq te’xk’e chi wa’ak numenaq oob’ mil chi tenamit li te’tz’okaaq rik’in ka’ajwi’ oob’ chi kaxlan wa ut wiib’ chi kar. Naq nakawil resil li sachb’a-ch’oolej li kik’ulman chirix a’an, k’oxla chan ru naq li Dios naru chiroksinkil laa tuulanil mayej re rosob’tesinkileb’ li wankeb’ sa’ aasutam. Chan ru nakatrosob’tesi naq nakatk’anjelak sa’ li Iglees? K’oxla li raatin li Hermana Michelle D. Craig: “Laa’ex ut laa’in naru naqak’e li wan qik’in re li Kristo, ut a’an taaruuq tixk’ihob’resi lix yalb’al qaq’e. Li wan eere re xwotzb’al tz’aqal ru—us ta xq’unil ut xlub’il lee junxaqalil—wi nekekanab’ eerib’ chiru li rusilal li Dios” (“Li choxahil ch’i’ch’i’,” Jolomil ch’utub’aj-ib’ re octubre 2018).
Mateo 14:22–33; Markos 6:45–52; Jwan 6:15–21
Li Jesukristo nikinxb’oq re tinkanab’ lin xiw ut xkab’il rix inch’ool, ut naq tink’anjela lin paab’aal chirix a’an.
K’oxla sa’ laa k’a’uxl li k’a’ru yeeb’il resil sa’ Mateo 14:22–33; Markos 6:45–52; ut Jwan 6:15–21. K’oxla k’a’ru xe’reek’a laj Pedro ut xkomoneb’ chik li tzolom. K’a’ru nakatzol chirix li wank choq’ tzolom rik’in li raatin ut lix b’aanuhom li Kolonel sa’eb’ li raqal a’in? K’a’ru nakatzol rik’in li raatin ut lix b’aanuhom laj Pedro? (Chi’ilmanq ajwi’ 1 Nefi 3:7.) K’a’ru yoo chixtz’aamankil li Qaawa’ chawu li jo’ ta li elk chaq sa’ li jukub’? K’a’ru nakataw sa’eb’ li raqal a’in li naxk’e xkawil aach’ool chixk’anjelankil aapaab’aal chirix li Jesukristo?
Jo’ jun xtzolom li Jesukristo, tento taawanq inch’ool chixpaab’ankil ut chixk’ulb’al li yaal, us ta ch’a’aj xb’aanunkil.
Naq li Jesus kixye naq a’an li “yu’am wa” (Jwan 6:48), naab’aleb’ ke’xye “q’axal kaw li aatin a’in” (Jwan 6:60). Chan ru naq li raatin laj Pedro li wan sa’ Jwan 6:68–69 tatxtenq’a chixtawb’al ru lix tzol’leb’ li Kolonel naq maare ch’a’aj xk’ulub’ankil malaj xyu’aminkil? K’a’ru nawulak chawu chirix lix ch’olob’ahom laj Pedro? K’a’ruheb’ li “aatin re li yu’am chi junelik” (Jwan 6:68) li neke’tenq’ank aawe laa’at re naq k’eek’ooq aach’ool chixtaaqenkil li Kolonel?
Chi’ilmanq ajwi’ M. Russell Ballard, “Ani aj ik’in tooxik?,” Jolomil ch’utub’aj-ib’ re octubre 2016.
Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al
-
Mateo 14:15–21.K’oxla chan ru taatenq’a laa junkab’al chixk’oxlankil jarub’ chi kaxlan wa ut kar taa’ajmanq re xk’eeb’aleb’ chi wa’ak oob’ mil chi kristiaan. K’a’ru naxk’ut chiqu li sachb’a-ch’oolej sa’ Mateo 14:15–21 chirix li Kolonel? Naru nakawotz junaq aak’ulum b’ar wi’ xaweek’a naq maak’a’ naab’al li k’a’aq re ru taayeechi’i a’ut li Kolonel kixtamresi.
-
Mateo 14:22–33.Maare teeraj xb’aanunkil sa’ junkab’al jo’ naxye li seraq’ sa’eb’ li raqal a’in. K’a’ut naq ke’xuwak li tzolom? K’a’ut naq laj Pedro kiru chixq’axb’al ru lix xiw ut chi elk chaq sa’ li jukub’? Chan ru naq kixk’ut lix paab’aal us ta ki’ok chi sub’e’k? Chan ru naq laa’o chanchano laj Pedro?
-
Jwan 5:1–16.Patz’ reheb’ li komon naq te’xk’e reetal jarub’ sut na’oksiman li aatin “k’iraak” malaj “k’irtesiik” sa’eb’ li raqal a’in. Chan ru naq li Jesus naru chixk’irtesinkileb’ li kristiaan? Jo’q’e ut chan ru naq xooxk’irtesi laa’o?
-
Jwan 6:28–58.K’e re li junjunq komon b’ayaq li wa re te’xtzeka, ut aatinanqex chirix li chaab’ilal naqak’ul rik’in li wa ut xkomon chik li chaab’il tzakemq. Chirix a’an, tz’ilomaq rix sa’ komonil eb’ li raqal a’in, ut sik’omaq k’a’ut naq li Jesukristo kixye naq a’an li “yu’am wa” (Jwan 6:35). K’a’ru raj naraj naxye “xwa’b’al” li yu’am wa? (chi’ilmanq D. Todd Christofferson, “Li yo’yookil wa li kikub’e chaq sa’ choxa,” Jolomil ch’utub’aj-ib’ re octubre 2017).
Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.
Jun b’ich naru xb’ichankil: “K’a’jo’ xrahom ut xchaab’ilal,” Eb’ li B’ich, 120.
Xkawresinkil aawib’ chi tzolok
Sik’ aamusiq’ejil na’leb’. Naq nakattzolok aajunes ut sa’ junkab’al, ink’a’ ka’ajwi’ taatzoleb’ li raqal sa’eb’ li tusleb’ aatin a’in. Naru naq li Qaawa’ naraj xk’eeb’al aawe li na’leb’ li ink’a’ neke’tawman sa’ a’in. Sik’ li na’leb’ a’an rik’in tijok.
Chiru li iq’, xb’aan xLiz Lemon Swindle