Meei 8–14

Mataio 19–20; Mareko 10; Ruka 18

“Tera ae I Aki Koro Raoi Iai?”

Wareka ao iangoa raoi Mataio 19–20; Mareko 10; ao Ruka 18, kakauongo nakon wirikiriki ake ko karekei. Korei taekan wirikiriki akanne, ao baireia bwa ko na kanga ni karaoi nanoia.

Korei Am Namakin

Ngkana e reke am tai bwa ko na titirakina te Tia Kamaiu, a na tera am titiraki? Ngke e kaaitibo te rorobuaka ae kaubwai ma te Tia Kamiu te moantai,, e titiraki, “Tera te bwai ae raoiroi ae N na karaoi ba e aonga n reke irou te maiu are e aki toki iai?” (Mataio 19:16). Ana kaeka te Tia Kamaiu e kaoti uoua kaitauan mwakuri aika a raoroi ake e a tia ni karaoi te rorobuaka ao tangiran te kaungaaki ni karaoia riki. Ngkana ti iangoa te kona ni karekea te maiu ae akea tokina, ti na miimi n ae ti te arona ngkana e na mwaiti riki ae ti na karaoi. Ngkana ti titiraki n oin ara kawai, “Tera ae I aki Koro raoi iai?” (Mataio 19:20), e kona te Uea n anganiira kaeka aika a kaineti nakoira n aron ana kaeka nakon te rorobuka are e kaubwai arei. Bwa tera ae tuangira te Uea bwa tina karaoia, mwakurian nanon ana kaeka e kainnanoa ae ti riai n onimakinna nakon oin raoiroira (taraa Ruka 18:9–14) ao bwa ti na “taua bukin uean te Atua n ai aron te tei ae uarereke” (Ruka 18:17; taraa naba 3 Nibwaai 9:22).

Iango ibukin te Kamatebwai i bon Iroum ni Koroboki aika Tabu

Mataio 19:3–9; Mareko 10:2–12

Te mare imarenan te mwaane ao te aine e katabuaki iroun te Atua.

Te reitaki imarenan te Tia Kamaiu ao te Baritaio bon teuana maibuakon waaki aika a riki aika a tauaki mwia ike te Tia Kamaiu e kabotoa ana reirei n taekan te mare. Imwiin warekan Mataio 19:3–9 ao Mareko 10:2–12, Korei karinani tabeua kibuntaeka ake ko namakini bwa a taekin ni kakimototoi ana taratara te Uea iaon te mare. Ngkanne kamatebwai tabeua bwaai n reirei ake a kuneaki inanon “Marriage” (Gospel Topics, topics.ChurchofJesusChrist.org), ao karini riki kibuntaeka nakon baike ko korei ni karinani. E kanga am atatai n ana babaire ni kamaiu te Uea n roota aron am iango ao am namakin ibukin te mare?

Mataio 19:3–9; Mareko 10:2–12

E bon reirei Iesu bwa te raure e aki butimwaeaki ke aomata aika a raure a na aki mare?

N te maroro iaon taekan te raure, e reireiniira Beretitenti Dallin H. Oaks bwa Tamara are i Karawa e kantaningaia bwa te reitaki n te mare bon akea tokina. E ngae n anne, e ataia naba te Atua bwa te raure e riai n taai tabetai. E kabwarabwara Beretitenti Oaks bwa te Uea “e kariaia aomata aika a raure bwa a na manga mare n akean barekan te aki itiaki ae e kaotaki n te tua ae e rietata. Ti ngkana te tia raure e a tia ni karaoa te mwakuri ae e aki raoiroi, teuanne ke neienne e na manga kona n roko n te tembora iaan te aeka ni kororaoi anne naba n te kainibaire ae e kaineti nakoia naba membwa” (“Divorce,” Liahona, May 2007, 70).

Mataio 19:16–22; Mareko 10:17–22; Ruka 18:18–23

Ngkana I butia te Uea, e na reireinai te bwai ae I kainnanoia ni karaoia bwa e na reke irou te maiu ae akea tokina.

Rongorongon te rorobuaka ae kaubwai e karika ae ko na toki ao n iango nakoia naba aika a kakaonimaki, n riki bwa ana reirei n aki toki. Ngkai ko wareka Mareko 10:17–22, tera kakoaua aika ko kunei n ana kakaonimaki ma ana kokoaua te rorobuaka aei? Tera ana namakin te Uea iroun te rorobuaka aei?

E kona te rongorongo aei n anganaiko te wirikiriki bwa ko na titiraki, “Tera ae I aki Koro raoi iai?” (Mataio 19:20). E kanga te Uea ni buokiira ni baike ti aki kororaoi iai? (taraa Ita 12:27). Tera ae ti kona ni karaoia ni katauraoira bwa ti na butimwaea kaetara Irouna ao ni ibuobuoki ngkai ti ukeuke ibukin te tamaroa?

Taraa naba Larry R. Lawrence, “What Lack I Yet?,” Riaona, Nob. 2015, 33–35; S. Mark Palmer, “Then Jesus Beholding Him Loved Him,” Riaona, Meei 2017, 114–16.

Mataio 20:1–16

A kona aomata ni kabane ni karekea te kakabwaia n te maiu ae akea tokina ngkana a butimwaea te euangkerio.

Ko kona ni kairekerekea ma aia taneiai taan mwakuri n te nne ni kureebe? Tera te reirei ae ko kunea n te rongorongo aei? Ana rongorongo Unimwaane Jeffrey R. Holland “The Laborers in the Vineyard” (Riaona, Meei 2012, 31–33) e kona ni buoka n tarai kawai aika a boou ni maiuakina te taetae ni kaikonaki aei. Baikara riki wirikiriki ae e anganiko te Tamnei?

Te Tia Rikoi Angabwai ae Rairananona ao te Baretaio ae Bakan Raoiroi inanon te Tembora, iroun Frank Adams

Ruka 18:9–14

I riai n onimakna ana nanoanga te Atua, tiaki oin raoiroiu.

Ko na kanga ni booti ni kaurerekei kakaokoro imarenaia taan takakaro aika uoman n te taetae ni kaikonaki aei? Iangoa raoi te bwai ae ko namakinna bwa ko riai ni karaoia n riki n ai aron te tia rikoa te angabwai ao n aki riki bwa te Baritaio.

Taraa naba I-Biribi 4:11–13; Aramwa 31:12–23; 32:12–16.

Iango ibukin Kamatebwai ni Koroboki aika Tabu n te Utu ao te Bootaki n te Tairiki

Mareko 10:13–16; Ruka 18:15–17.Ni buokia kaain te utu ni iangoa te rongorongo ni kiibu aikai, ko kona n anenea ni ikotaki te anene ae e irekereke n aron”I Think When I Read That Sweet Story” (Aia Boki n Anene Ataei, 56). A na tera aekakina ngke ko mena ibuakoia ataei ake a tia ni kakabwaiaaki iroun Iesu? Tera ae nanonaki n “taua bukin te Atua n ai aron te tei ae uarereke”? (Mareko 10:15).

Mareko 10:23–27.Tera te kaokoro imarenan karekean te kaubwai ao onimakinan te kaubwai? (taraa Mareko 10:23–24). Ngkai ko wareka te kibu 27, ko na tangiria ni kan maroroakina ana Rairairi Iotebwa Timiti: “Ma mwaane ake a onimakina te kaubwai, e bon kanganga; ma e bon aki kona ni kanganga ma mwaane ake a onimakina te Atua ao ni katikui bwaai ni kabane ibukiu, bwa n aron bwaai aikai ni kabane a kona ni karaoaki (Ana Rairairi Iotebwa Timiti, Mareko 10:26 [n Mareko 10:27, bwaai aika a na taraaki mai inano a]). N aron te utu, ti na kanga ni kaotia ae ti onimakina te Atua nakon riki taian kaubwai?

Mataio 20:1–16.Ni kamatatai taian reirei n Mataio 20:1–16, ko kona ni karaoa te kaboo ae bebete, n aron te kabobirimwaaka ae uarereke. Imwiin tiaia ni kaboo n te takakaro,anganiia kanuangaia ae ti te arona, ni moanna mairoun te aomata are e bina ao n toki iroun te aomata are e moanna. Tera ae ti reiakinaki n aei bwa antai ae na karekea te kakabwaia n te maiu ae akea tokina n ana babaire Tamara are i Karawa?

Mataio 20:25–28; Mareko 10:42–45.Tera nanon te kibuntaeka ae “ma ane kani kakanato i buakomi ao ke e riki ba ami toro”? (Mataio 20:27). E kanga Iesu Kristo ni kamatata te reirei aei? Ti na kanga n ira Ana katoto inanon ara utu, ara uoote ke ara mwaanga, ao ma kaain rarikira?

Ruka 18:1–14.Tera ae ti reiakinna ibukin te tataro man taetae ni kaikonaki aika uoua aikai inanon kiibu aikai?

Ibukin iango aika a mwaiti riki ibukiia ataei, taraa te kamataata n te wiiki aei n Nakomai, Iriirai—Ibukin te Moanrinan.

Te anene ae rineaki: “Dearest Children, God Is Near You,” Anene n Taromauri,, nambwa. 96.

Kanakoraoan Am Kamatebwai

Kakaea te tai ae nakoraoi ibukim. E rangi ni bebete n taainako aron reiakinakna ngkana ko kona ni kamatebwai booki aika tabu n akean katabetabeam. Kakaea te tai ae nakoraoi ibukim, ao karaoa am kabanea n tamaroa ibukin am kamatebwai ni koaua ni katoa bong.

Kristo ao te Rorobuaka ae te Tia Tautaeka, iroun Heinrich Hofmann