“Meei 8–14. Mataio 19–20; Mareko 10; Ruka 18: ‘Tera ae I Kabwaka Iai?,’” Nakomai, Iriirai—Ibukin te Moanrinan: Nu Tetemanti 2023 (2022)
“Meei 8–14. Mataio 19–20; Mareko 10; Ruka 18,” Nakomai, Iriirai—Ibukin te Moanrinan: 2023
Meei 8–14
Mataio 19–20; Mareko 10; Ruka 18
“Tera ae I Kabwaka Iai?”
Wareka Mataio 19–20; Mareko 10; ao Ruka 18, ao iangoia ataei ake ko reireiniia. Korei iango ake ko karekei. Am katauraoi e na buokiia ataei ni mataata raoi n taian mwakoro aikai.
Kaunga te Tibwatibwa
Kaoiia ataei bwa a na tibwaa te reirei are a karekea man te wiiki ae nako. Kaotii tabeua tamnei bwa e na buokiia n uringa te reirei.
Reirei te Reirei: Ataei aika a Uarereke Riki
Tamara are i Karawa e tangirai bwa N na mare n te tembora ao ni karekea au utu ae akea tokina.
E na tera te kabwaia nakoia ataei ngkana a reiakina taekan te mare ae akea tokina? E nako n ibuobuoki n reiakin koaua iaon te mare n “Te Utu: Te Katanoata nakon te Aonnaba” (ChurchofJesusChrist.org).
Waaki ni Kakukurei aika a Kona ni Karaoaki
-
Wareka Mareko 10:6–8 nakoia ataei, ao kaota tamneia taanga aika mareaki. Tuangiia ataei bwa a na kotea tamnein te mmwaane ma te aine ngkana a ongo te taeka ae mmwaane ao aine. Kabwarabwara bwa Tamara are i Karawa e tangira te mmwaane ma te aine bwa a na mare (taraa Karikani Bwaai 1:27–28).
-
Kaota tamnein te utu ma te tembora. Tuangiia ataei bwa a na tuangko bwa tera are a nooria n taian tamnei. Kabwarabwaraa bwa Tamara are i karawa e tangiriira bwa ti na kabaeaki n ara utu n te tembora bwa ti aonga ni kona ni maeka ma ngaiia n akea tokina. Iangoia ataei ake a tuai ni kabaeaki aia karo bwa a na aki oobwanako.
-
Anene te kuna ae rongorongon te utu, n aron “A Happy Family” (Aia Boki n Anene Ataei, 198). Ko kona ni karaoa aei tabeua te tai. Kaoiia ataei bwa a na tibwai aia takakaro aika kaunga ma aia utu. Bukin tera a kaitau ibukin aia utu?
-
Anenea te kuna ae taekina te tembora, n aron “I Love to See the Temple” ke “Families Can Be Together Forever” (Aia Boki n Anene Ataei, 95, 188). Tuangiia ataei bwa a na taui tamnein tembora ao utu, ao kaoiia bwa a na tabekirake aia tamnei ngkana a anenea te “tembora” ke “utu.” Buokiia ataei n iangoi bukina ngkai e kakaawaki te mare n te tembora.
Iesu e tangiriia ataei, ngaia are “bon aia bwai uean te Atua” (Mareko 10:14).
Iesu e tangiriia ataei aika uarereke bwa a na nakoina bwa E na kakabwaiaia.
Te rongorongo aei e kona ni buokiia ataei n ataia bwa mwaitira ana tangira Iesu ibukiia.
Waaki ni Kakukurei aika a Kona ni Karaoaki
-
Ni bon am taeka, kabwaranakoa te rongorongo ae koreaki n Mareko 10:13–16. Ko kona naba ni kaota te tamnei ae “Suffer the Little Children to Come unto Me” (ChurchofJesusChrist.org). Buokiia ataei bwa a na iangoi taai ake a namakina iai ana tangira Iesu ibukiia. Kaota am koaua nakoia ataei bwa e tangiriia Iesu ao e tangiria ni kakabwaiaia.
-
Kaota te tamnei ae Kristo ma Ataei (Boki n Tamnei n te Euangkerio, nambwa. 47). Buokiia ataei n iangoa bwa tera aroia ngke arona bwa a mena n te tai are e tekateka iai Iesu ma ataei n aron ae kaotaki n te tamnei. Kaoiia ataei bwa a na tibwaa aia namakin ibukin Iesu.
-
Tuangiia ataei bwa a na korei tmanei ngke a kakabwaiaaki iroun Iesu (taraa Mareko 10:16 ao te iteraniba ibukin te mwakuri ni kauring).
Ngkana I ongeaba nakon tuua, N na karekea te maiu ae akea tokina.
Iesu e reirei nakon te ataeinimmwaane ae kaubwai arona ni karekea te maiu ae akea tokina—te maiu are e reke irouna ma Tamara are i Karawa—e riai n ongeaba nakon tuua.
Waaki ni Kakukurei aika a Kona ni Karaoaki
-
Karakina rongorongon te ataeinimmwaane ae kaubwai are koreaki ni Mareko 10:17–22 . (Taraa naba “Mwakoro 42: Te Ataeinimmwaane ae kaubwai,” n Karaki man te Nu Tetemanti, 105–6, ke te tamnei are irekereke ma te reirei ChurchofJesusChrist.org.) Tuangiia bwa a na kakauonga n ana taeka Iesu nakon te ataeinimmwaane aei ao tera ae e karaoia.
-
Karaki teuana ke e raka riki rongorongoia ataei ake a ukora te kaetieti ao te kairiri mairouia aia karo ma a aki ongeaba ke n iria. Tera bwaai aika e tuangiira Tamara arei Karawa bwa ti na karaoi? Tera ara namakin ngkana ti ongeaba nakon Ana tua?
-
Tibwaua rongorongom ngke ko karekea te wirikiriki ae onoti bwa ko kona karaoa ae tamaroa riki.
Reirei te Reirei: Ataei aika a Ikawai Riki
Tamara are i Karawa e tangirai bwa N na mare n te tembora ao ni karekea au utu ae akea tokina.
Bwaai ake e reirei Iesu iaon te mare e kona ni buokiia ataei n tangiria ni mare n te tembora ao n katea aia utu ae akea tokina.
Waaki ni Kakukurei aika a Kona ni Karaoaki
-
Tuanga temanna te ataei bwa e na wareka Mareko 10:6–8 ni kabaibati. Kabwarabwara bwa te nim bon “reitaki” ke “taua ni kamatoaa” te bwai teuana. Bukin tera e kakaawaki bwa buummwaane ao buuaine a ikarekebai, a tangiriia imarenaia, ao a kaai n ibuobuoki imarenaia?
-
Tuangiia ataei bwa a na iangoi kaeka nakon titiraki n aron “Bukin tera a kakawaki utu n te Ekaretia?” ke “Bukin tera e kakaawaki te mare n te tembora?” Buokiia kakaei taian kaeka inanon Mareko 10:6–8; 1 I-Korinto 11:11; Reirei ao Berita aika Tabu 42:22; 131:1–4; Mote 3:18, 21–24; ao “Te Utu: Te Katanoata nakon te Aonnaaba.”
-
Bootaki anenea te kuna ae taekina te utu, n aron “Families Can Be Together Forever” (Aia Boki n Anene Ataei, 188). Kaota am koaua n te mare ma te utu ae akea tokina ma ataei. Kaoiia bwa a na tibwaa naba aia koaua.
E kona ni buokai Iesu n tuangai bwaai aika I kainnanoi n rikirake.
Te kairake ae kaubwai e ukora Iesu bwa e na karekea te kaetieti bon ibukina. Ko na kanga ni buokiia ataei bwa a na karaoa naba ae aron aei inanon maiuia?
Waaki ni Kakukurei aika a Kona ni Karaoaki
-
Tuangiia ataei bwa a na kakaea te kibu ni Mareko 10:17–22 are e kabwarabwara te tamnei n te kanoa n reirei n te wiiki aei n Nakomai, Iriirai—Ibukiia Aomata n Tatabemaniia ao Utu. Kabwarabwara bwa te kaetieti are e tua Iesu nakon te kairake e bon onoti, ao ti kona ni karekei kaetieti aika a onoto mairoun te Uea rinanon te Tamnei.
-
Bootaki wareka Mareko 10:17–22. Kaoiia ataei bwa a korei iaon te burakibooti tuua ake e tua te Tia Kamaiu nakon te kairake bwa e na toua mwina (taraa kibu 19). Tera riki ae tua Iesu nakon te kairake bwa e na karaoia? (taraa kibu 21). Kaungaia ataei bwa a na iangoi bwaai aika a kainnanoi ni karaoa ke ni katoka karaoana n iriira Iesu. Tera kawai aika ti kona ni karekei nanon Iesu ibukira?
Kaungaa te Kamatebwai n te Mweenga
Kaoiia ataei bwa a na kaotia nakon aia utu ae a tangiriia, rinanon te kororeta ke karaoan te mwakuri n ibuobuoki.
Kanakoraoan Ara Anga reirei
Kanakoa am iango ao tarataraia am ataei. A kanga ataein am kiraati ni kaeka nakon waaki ni kakukurei ni kamatebwai? Ngkana a aki bati n ira te waaki, tao ko kona ni karaoa riki te mwakuri ni kauring ae okoro ke rianna i tinaniku ma te karaurau. Irarikin aei, ngkana ko nooria bwa e nakoraoi aia reirei ataei ao e bati reireiaia man mwakoron te reirei, tai raoraomakina kabanean kanoan te reirei.