“Meei 1–7. Ruka 12–17; Ioane 11: ‘Kukurei ma Ngai; Bwa I a Tia ni Kunea au Tiibu Are Bua Ngkoa,’” Nakomai, Iriirai—Ibukin te Moanrinan: Nu Tetemanti 2023 (2022)
“Meei 1–7. Ruka 12–17; Ioane 11,” Nakomai, Iriirai—Ibukin te Moanrinan: 2023
Te Nati ae Bakatae, iroun Liz Lemon Swindle
Meei 1–7
Ruka 12–17; Ioane 11
“Kukurei ma Ngai; Bwa I a Tia ni Kunea au Tiibu Are Bua”
Wareka ma te tataromwaaka Ruka 12–17 ao Ioane 11, n ukoria bwa ko na kanga ni buokiia ataei ni mataata ni koaua aika ni mwakoro aikai ao n namakina ana tangira Tamara are i Karawa.
Kaunga te Tibwatibwa
Kauringiia ataei taeka ni kaikonaki ma karaki ake a koreaki n Ruka 12–17 ao Ioane 11, ao koaiia bwa a na tibwaa aia atatai n taian karaki aikai.
Reirei te Reirei: Ataei aika a Uarereke Riki
Tamara are i Karawa e tangiriia Natina ni kabane bwa a na okiria.
Iangoia ataei n am kiraati, ao naake a aki bati n roroko n te kiraati. Ko na kanga ni buokiia n namakina ana tangira Tamara are i Karawa? Ko na kanga ni kaungaia ataei bwa a na buokiia naake a aki bati n roroko?
Waaki ni Kakukurei aika a Kona ni Karaoaki
-
Anga te koin nakon te ataei, ao temanna te ataei anganna tamnein te tiibu, ao temanna anganna tamnein te nati ae bakatae (taraa ChurchofJesusChrist.org ke n iteranibaan te mwakuri ni kauring). Taekin taeka ni kaikonaki aika koreaki n Ruka 15 ao kaoiia ataei bwa a na katea te koin ke te tamnei ngkana ko taekinna. Ko kona naba ni kaoiia ataei bwa a na karakin taeka ni kaikonaki ibon imarenaia n oin aia taeka.
-
Tuangiia ataei bwa a na tibwaa te tai are iai aia bwai ae bua. E kanga n reke? Kabwarabwara bwa a kona ni bua aomata n te maiu n tamnei ngkana aki iriira Tamara are i Karawa. Kaota am koaua bwa te Atua e tangiriia aomata ake a bua bwa a na nakoina, ao ti kona ni buokiia.
-
Kaoiia ataei bwa a na iangoia ataei ake aki bati n roko n te Kiraati. Buokiia karanii ke ni korei aia reta ni kakao nakoia ataei aikai nakon te waaki ni kakukurei ke te kiraati. Ti na kanga ni buokiia ataei aikai n namakina ana tangira Tamara are i Karawa ibukiia?
I kona ni kaota au tangira ibukin Tamara are i Karawa man au kakaitau ibukin au kakabwaia.
Ko kanga ni kabongana te taeka ni kaikonaki are tengaun rebera ni kaungaia ataei bwa a na bwaina te kakaitau?
Waaki ni Kakukurei aika a Kona ni Karaoaki
-
Karakinii tengaun rebera ake a kamaiuaki iroun Iesu. Kao te tamnei are kuneaki n te kamataata n te wiiki aei inanon Nakomai, Irirai—Ibukiia Aomata n tatabeman ao Utu, ao kaoiia ataei bwa a na wareka tebwina ni kabonganaa tabonibaia. Tuangiia bwa a na katukui ruaiwa tabonbaia ni kaotia bwa tii temanna te rebera are e kaitaua Iesu. Buokiia ataei n iangoa te aomata are a kona ni kaitaua ibukin ana akoi ao ana ibuobuoki nakoia.
-
Kaoiia ataei bwa a na karaoa te bwai are a kakaitau iai, ao tuangiia ataei bwa a na keetinna bwa tera. Tuangiia ataei bwa a na tibwai kawai ake a kona iai ni kaotia nakon Tamara are i Karawa bwa ti kakaitau ibukin ara kakabwaia.
Ti kakoauaa bwa Iesu bon Natin te Atua.
Mareta, are mwanen Rataro, e tuanga Iesu: “I kakoauaa bwa boni ngkoe te Kristo, Natin te Atua” (Ioane 11:27). Karakinan Maria, Mareta, ao Rataro e kona ni kakorakoraa aia koaua ataei iroun Iesu Kristo.
Waaki ni Kakukurei aika a Kona ni Karaoaki
-
Kakimototoa karakinan Iesu ngke e kauta Rataro man te mate (taraa naba “Mwakoro 43: Iesu e kauta Rataro man te mate,” n Karaki man te Nu Tetemanti, 107–9, ke te tamnei are irekereke ChurchofJesusChrist.org). Kaota nakoia ataei te aroka ae mate ao ae maiu, ao tuangiia bwa e ngaa ae mate ao ae maiu. Kaota am koaua bwa mani mwaakan Iesu Kristo, aomata ake a mate a na mangauti ao ni maiu n aki toki.
-
Buokiia ataei ni kamatenanoi botantaeka are taekin Iesu nakon Mareta: “Ngai bon te mangauti, ao te maiu” (Ioane 11:25). Kabwarabwara bwa mani Mangautin te Tia Kamaiu, ti na manga kaitiboaki ma ara koraki ake a tia ni mate.
Reirei te Reirei: Ataei aika a Ikawai Riki
I kona ni buoka Iesu ni kakaea Ana tiibu are bua.
Ti kinaa te aomata are kanga ai aron te tiibu ae bua, te koin ae bua, ke te nati ae bakatae n ana taeka ni kaikonaki te Tia Kamaiu. Iangoia bwa ko na kanga ni kaungai nanoia ataei ni buokiia aomata aikai ma te tangira.
Waaki ni Kakukurei aika a Kona ni Karaoaki
-
Buokiia ataei ni wareka te taeka ni kaikonaki ae te tiibu ae bua ke te taeka ni kaikonaki n te koin ae bua, are koreaki n Ruka 15:1–10, ao tibwaia bwa tera ae a reiakinna.
-
Korei aara aikai iaon te burakibooti: tama, nati te mwaane, ao nati te mmwaane ae uarereke riki. Kaota te tamnei ae “Te Nati ae Bakatae” (ChurchofJesusChrist.org) ao katokia n taabo ake ko taku ni korei aia iango aomata ake a koreaki. Tera ana namakin Tamara are i Karawa ma Iesu irouia aomata aika taan bure?
-
Tuanga te ataei bwa e na otinako man te umwanreirei ao ataei ake tabeman a karabaa te mwane ke te tiibu. Karina te ataei ao tuangnga bwa e na kakaea te mwane ke te tiibu. Tera tabeua kawai are aomata a na namakin ae a “bua” n aron te mwane ma te tiibu? Kaoiia ataei bwa a na karioi iango ni buokiia aomata aikai. Anene ma ataei te kuna ae irekereke, n aron “Dear to the Heart of the Shepherd” (Anene n Taromauri, nambwa. 221), ao kaota ama koaua n te kimwareirei are e reke ngkana ko okira te Atua.
-
Kabwarabwara bwa Iesu e kabonganaa te tiibu ae bua, te mwane ae bua, ao te nati ae bakatae n tei ibukiia aomata aika a “bua” ibukina bwa aikoa karekei kakabwaia man te euangkerio. Kaoiia ataei bwa a na iangoi aomata ake a kina ake aikoa karekei kakabwaia aikai inanon maiuia. Tera ae ko kona ni karaoia ni buokiia aomata aikai n namakin ana tangira Tamara are i Karawa?
Te Tia Kawakin Tiibu ae Aamarau, iroun Yongsung Kim
I kona ni kaota au tangira ibukin Tamara are i Karawa man au kakaitau ibukin au kakabwaia.
Karakinaia rebera ake tengaun bon te kawai ae tamaroa ni kaungai nanoia ataei ni kaitau nakon Tamara are i Karawa ibukin aia kakabwaia.
Waaki ni Kakukurei aika a Kona ni Karaoaki
-
Wareka rongorongoia rebera ake tengaun. E kanga te rebera are e kaitau ni kakabwaiaaki ibukin ana kaitau? Bukin tera e kakawaki kaitauan te Atua ibukin ara kakabwaia?
-
Kaoiia ataei bwa a na korei bwaai ake a kaitau iai ao a waakinna man moan manin araia.
-
Tuangiia ataei bwa a na korea te reta ni kaitau nakon Tamara are i Karawa ibukin kakabwaia ake E anganiia. A kona ni katekei aia koroboki i etan aia kainiwene bwa te kauring nakoia ni kaotan te kaitau ngkana a tataro.
Ti kakoauaa bwa Iesu bon Natin te Atua.
Ko na kanga ni kabongana karakinan Maria, Mareta, ma Rataro ni buokiia n ataia, n aron are ataia Mareta, bwa “Iesu bon te Kristo, Natin te Atua”? (Ioane 11:27).
Waaki ni Kakukurei aika a Kona ni Karaoaki
-
Korea iaon te burakibootai aia taeka aomata n Ioane 11. Tuangiia ataei bwa a na katebenakoa aomata te taetae, ao kaoiia bwa a na wareka Ioane 11 n tuoa aia reke. Tera aia namakin ngke arona bwa ngaiia Iesu, Mareta, Maria, ke Rataro? E na kanga kakoauaan Iesu ni buokiira n ara tai n nanokawaki mani maroaa?
-
Wareka ana koaua Mareta, are koreaki n Ioane 11:20–27. Tuangiia ataei bwa a na kakaei taeka ma botantaeka ake a kaota iai ana onimaki Mareta iroun Iesu Kristo. Tera ae ti kona ni karaoia ni karekea te onimaki irouna?
-
Buokiia ataei ni kamatenanoa Ioane 11:25. Kabwarabwara bwa aomata ni bane a na mangauti, ma tii aomata aika raraoi aika a na karekea te maiu ae akea tokina ao ni maeka ma Tamara are i Karawa ma Iesu Kristo.
Kaungaa te Kamatebwai n te Mweenga
Anganiia ataei beeba tabeua ake a kona ni koroboki iai ke ni korotamnei iai ni bwaai ake a kaitau iai inanon te wiiki.
Kanakoraoan Ara Anga reirei
Kaokiokan bwaai bon ngaia kiingin te reirei. A na rangi ni buokaki ataei man ongoraeakinan te reirei n te euangkerio ke karaoan te waaki ni kakukurei ngkana e karakaaki karaoana nakon ae tii te taina. Kataia manga karaoi waaki ni kakukurei n aanga aika a bati.